Ama t’aqasunchu santo espirituq jujllachasqanta
APÓSTOL Pablon Éfeso llaqtapi iñiqkunata nirqan: “Munakuywan aguantanakuspa kausaychis. Chaymantapas jujkuna-jujkunawan sumaqta kausaychis, tukuy atisqaykichistataq ruwaychis jujllachasqalla kashanaykichispaq, chay jujllachasqa kaytaqa santo espirituraykun chaskirqankichis”, nispa (Efes. 4:2, 3).
Chaypi apóstol Pabloq nisqanman jinaqa jujllachasqa kasqanchisqa “santo espirituraykun”. ¿Imaninantaq chayri? Diospa kallpanwanmi atiyninwanmi hermanonchiskunawan jujllachasqa kashanchis. Chaymantapas apóstol Pabloqa nillarqantaqmi “tukuy atisqaykichistataq ruwaychis jujllachasqalla kashanaykichispaq”, nispa. Ichaqa, ¿wakillanchu chaypaq kallpachakunanku? Manan, llapanchismi chaypaqqa kallpachakunanchis.
Piensay juj runapi, chay runaqa mosoq carrotas regalasunki. ¿Pin cuidanan chay carrota allillan kananpaq? ¿Regalaqniykichu icha qanchu? Qanmi ¿riki? Sichus chay carrota mana allintachu apakachanki, chhaynapitaq malograkapunman manataq jap’inmanpaschu chayqa, manan regalaqniykitaqa chaymantaqa juchachawaqchu ¿riki?
Diospa llaqtanpi juj sonqolla kausasqanchispas Diosninchispa qowasqanchis jatun regalon. Chay regalotaqa sapankanchismi allinta cuidananchis. Chaymi juj hermanowan juj hermanawanpas mana allinpi kashanchis chayqa tapurikunanchis: “¿Kallpachakushanichu kay problemata allichapunaypaq, chhaynapi hermanokunawan juj nisqalla kanaypaq?”, nispa.
“TUKUY ATISQAYKICHISTA RUWAYCHIS JUJLLACHASQALLA KANAYKICHISPAQ”
Pabloq nisqanman jinaqa, tukuy atisqanchistan kallpachakunanchis hermanonchiskunawan juj nisqalla kananchispaq. Mayninqa yaqapaschá mayqen iñiqmasinchispas ofienderuwasun sienterachiwasunpas. Chhayna kaqtinqa, ¿rimananchispachachu chay iñiqmasiwan? Manan. Aswanpas ñaupaqtan tapurikunanchis: “Paywan usqhaylla rimaspa, ¿allichasaqchu chay problemata icha aswan problemamanchu jaykusaqku?”, nispa. Mayninqa aswan allinmi kanman chaykunata qonqapuy (Prov. 19:11; Mar. 11:25).
“Paywan usqhaylla rimaspa, ¿allichasaqchu chay problemata icha aswan problemamanchu jaykusaqku?”
Pabloqa nillarqantaqmi: “Munakuywan aguantanakuychis”, nispa (Efes. 4:2). Juj libropi nisqanman jinaqa, chayqa “jujkunataqa imaynaña kanku chaypas sumaqtan chaskinanchis” ninantan nin (Comentario para exégesis y traducción. Carta a los Efesios, Mariano Ávila Arteaga). Iñiqmasinchiskunaqa noqanchis jina pantaq juchallikuq iman kanku. Arí, sapankanchismi “mosoq runa kaywan p’achakunanchis” (Efes. 4:23, 24). Ichaqa manan mayqenpas mana pantaq ch’uya kaytaqa atisunmanchu (Rom. 3:23). Chaypi allinta piensarisun chayqa yachasunmi jujkunawan pacienciakuyta ratullan perdonasunpas, chhaynapitaq jujllachasqalla kasunchis.
Pipas k’iriwaqtinchis sumaqta chayta allichapusun sonqonchispipas chayta chinkachipusun chayqa, sumaqtan jujkunawan kausasunchis. Efesios 4:3 textopi rijuriq “jujkuna-jujkunawan sumaqta kausaychis” nisqa simiqa, Griego rimaypiqa “jank’ukunawan” ninantan nin. Chhaynatan nin Colosenses 2:19 textopipas. Chay jank’ukunaqa chuchun, chaymi tullukunata allinta juñun, qaqatan jap’in. Chhaynatan thaj kaypas munakuypas hermanonchiskunatawan munayta juñuwanchis. Imapiña wakin pantarunkuman chaypas paykunata munakusqanchisraykun jujlla kanchis.
Chhaynaqa mayqen hermanopas hermanapas ofiendewasunman, imatapas niwasunman chayqa sumaq sonqollawan qhawarisun, amataq phiñasqachu (Col. 3:12). Llapanchispas pantaqmi juchallikuqmi kanchis. Noqanchispas yaqapaschá k’araqta pitapas niranchis otaq mana allinta rimaranchis. Chaykunapi allinta piensasun chayqa manan espirituq jujllachasqantaqa t’aqasunchu.