Maltratasqa warmikunata yanapanapaq
“KAY pachapiqa askha warmikunan maltratasqa kashanku, yaqapaschá qanpas paykunamanta jujnin kashanki. Diosqa manan munanchu warmikuna maltratasqa kanankutaqa, ¿imatan paykunarayku ruwanqa?”.
Chay simikunawanmi qallarin internetpi jw.org paginapi “Warmikunan maltratasqa kashanku, ¿imaninmi Biblia chaymanta?” nisqa willakuy, tukuyninpitaq kashan chay qelqata descargaspa papelpi impriminapaq, chaytaqa iskaymanmi doblakunman. Estados Unidos nacionmanta hermananchis Stacy nin: “Chay qelqataqa papelpin imprimirqani, jinaspa juj hermanapiwan aparqayku maltratasqa warmikunata yanapaq wasiman”, nispa.
Chay wasipi llank’aq juj warmis juj copiakunatawan mañakusqa chay wasipi tiyaq warmikunaman qonanpaq. Jinas 40 copiakunata saqesqaku, JW.ORG nisqa tarjetakunatataq kinsa chunkata saqesqaku. Juj kutinpitaq chay wasita pusariq warmi mañakusqa chay wasipi tiyaq warmikunaman imaynatas Bibliamanta yachachinchis chayta rikuchinankupaq.
Stacy hermananchisqa iskay hermanakunawan kuskas rillasqakutaq maltratasqa warmikunata yanapaq juj wasimanñataq, chaypipas pisqa qelqatas chaskikusqaku, masta apanankupaq iman nisqaku. Chay wasipi llank’aq juj warmin nisqa: “Kay qelqaqa yanapanqan kaypi tiyaq warmikunata. Kaytapunin necesitasharqayku”, nispa. Chay qhepaman jujmanta chay wasita riqtinkus chaypi tiyaq wakin warmikunaman rikuchisqaku imaynatas Bibliamanta yachachinchis chayta. Chay warmikunamanta iskaysi chay semana juñunakuyman riyta munasqaku.
Stacy hermananchismi nillantaq: “Kusisqan kashayku kay munay qelqata sumaqta chaskikusqankumanta. Kay qelqaqa imprimispa iskayman doblasqaqa munaymi rikukun, kusan kashan maltratasqa warmikunaman Diospa gobiernonmanta willanapaq. Noqaykuqa allintan yachayku: Jehová Diosqa bendecinqapunin chay warmikunaman chayanaykupaq kallpachakusqaykutaqa. Maytan munashani imaynatas bendecinqa chayta rikuyta”, nispa.