Warmikunan maltratasqa kashanku | ¿Imaninmi Biblia chaymanta?
Kay pachapiqa askha warmikunan maltratasqa kashanku, yaqapaschá qanpas paykunamanta jujnin kashanki. Diosqa manan munanchu warmikuna maltratasqa kanankutaqa, ¿imatan paykunarayku ruwanqa?
“Erqellaraq kashaqtiymi turayqa millayta k’amiwaq maqawaq ima. Casarakusqay qhepamantaq suegrayñataq k’amiwaq, paywan suegroywanmi esclavanpaq jap’iwaqku. Askha kutipin wañuchikuyta munarqani” (Madhu,a India nacionmanta).
Organización Mundial de la Salud nin: “Warmikunataqa tukuy ladopin maltratanku”, nispa. Kay pachapiqa sapa kinsa warmimantan juj warmita maqarqanku otaq abusarqanku.
Sichus qanta chay pasarqasunki chayqa, imay ratupas piensashallankin qanmanta jujkuna abusakunankupaq otaq maltratanasuykikupaq. Tukuy ladopi warmikunata maltratasqankuta rikuspan niwaq: “Yaqa llapankun warmitaqa mana valeqpaq qhawarinku”, nispa. Ichaqa, ¿imaynatan Dios warmikunata qhawarin?
Diosqa manan munanchu warmikuna maltratasqa kanankutaqa, chaytan Bibliapi nishan.
¿Imaynatan Dios warmikunata qhawarin?
Bibliapin nishan: “Qharita warmitawanmi Diosqa kamarqan”, nispa (Génesis 1:27).
¿Imatan chaywan nishan?: Diosqa qharitawan warmitawanmi ruwarqan, chhaynaqa warmipas qharipas respetanapaq jinan kanku. Chaymantapas Diosqa qosakunatan kamachirqan esposankuta cuerponkuta jina munakunankupaq, manan esposantaqa maqananchu nitaq k’aminanchu (Efesios 5:33; Colosenses 3:19). Rikusqanchis jina, Diosqa manan munanchu warmikuna maltratasqa kanankutaqa.
“Erqechallaraq kashaqtiymi wakin familiaykuna violawarqanku, 17 wataypi kashaqtiytaq llank’anaypi jefey niwarqan: Manachus noqawan puñunki chayqa despedipusaykin, nispa. Kuraqña kaqtiytaq qosaypas tayta-mamaypas vecinoykunapas nishuta cheqnikuwarqanku. Ichaqa chay tiempopin Jehováb Diosta reqsirqani, jinaspa yacharqani Diosqa respetowan warmikunata qhawarisqanta. Chayraqmi repararqani Dios munakuwasqanta valorawasqantapas” (María, Argentina nacionmanta).
¿Iman yanapasunkiman llakikuyniykita pisiyachinaykipaq?
Bibliapin nishan: “Kallantaqmi wayqemantapas aswan k’askakuq amigo”, nispa (Proverbios 18:24).
¿Imatan chaywan nishan?: Juj cheqaq amigoqa yanapasunkin, imayna sientekusqaykitan payman willakuwaq.
“Iskay chunka wata jinan mana pimanpas willakurqanichu abusasqa kasqaymanta. Chay jawan tukuy tiempo llakisqalla kaq kani. Qhepamanmi ichaqa imachus pasawasqanta confiasqay amigoyman willakurqani, chayraqmi sonqoy thaj nirqan” (Elif, Turquía nacionmanta).
Bibliapin nishan: “Tukuy llakipakuyniykichista Diosman saqeychis, payqa qankunamantan llakikun”, nispa (1 Pedro 5:7).
¿Imatan chaywan nishan?: Diosqa uyarinpunin mañakusqaykitaqa (Salmos 55:22; 65:2). Diospaqqa ancha valorniyoqmi kanki, paymi yanapasunki allinta qhawarikunaykipaq.
“Jehová Diosmanta yachaymi yanapawarqan sinchi llakikuyniyta pisiyachinaypaq. Kunanqa Diosmanta mañakushaspan payman imayna sientekusqayta llapanta willakuni, payqa allintan entiendewan” (Ana, Belice nacionmanta).
Jamuq tiempopiqa manañan maltratasqachu kanqaku
Bibliapin nishan: “Mana taytayoqkunapaqmi, sarunchasqakunapaqmi justiciata ruwapunki, kay pacha runakunaqa manañan paykunata manchachinqakuchu”, nispa (Salmos 10:18).
¿Imatan chaywan nishan?: Diosqa tukuy millay ruwaykunatan chinkachipunqa, chay tiempopiqa manañan pipas warmikunataqa maltratanqachu.
“Diosqa pisi tiempollamantan chinkachipunqa warmikuna maltratayta, chayta yachaymi llakikuyniypaq jampi jina karqan, jinan sonqoy ukhupi thaj sientekurqani” (Roberta, México nacionmanta).
¿Confiasunmanchu sumaq kausay kananmanta Bibliaq nisqanpi? ¿Imaynatan Jehová Diospa testigonkuna Bibliawan jujkunata yanapanku? Chaykunamanta yachanaykipaq jaykuy: ¿Munawaqchu wasiykiman jamunaykuta? Nisqaman.
a Sutikunaqa cambiasqan kashan.
b Diospa sutinqa Jehová nisqan (Salmos 83:18). Astawan yachanaykipaq leey “¿Pitaq Jehová Diosri?” nisqa yachachikuyta.