54 APÓSTOL JUAN
Tuta ukhupin k’anchay jina karqan
APÓSTOL Juanqa kuraqña kapushaspan nirqan: “Tukukuy horapiñan kashanchis”, nispa. ¿Imaraykun chayta ninman karqan? Payqa allintan yacharqan Jesuswan apóstol Pablowan imachus nisqankuta. Paykunan willarqanku imaynas wakin runakuna iñiq t’aqakunapi pantasqata q’ewisqata Diosmanta yachachinanku karqan chayta. Tiempowanqa chaymi pasarqan, ichaqa chaykuna pasayta qallariqtinmi apóstol Juanwan juj apostolkunawan iñiqkunata yanaparqanku ama chay llulla yachachikuykunawan engañachikunankupaq (Mat. 7:15; Hech. 20:29, 30; 2 Tes. 2:6, 7). Tiempowanmi ichaqa apostolkuna wañupurqanku, apóstol Juanllañan kausakusharqan. Payqa rikurqanmi imaynatas wakin runakuna iñiq t’aqapi llulla yachachikuykunata mast’arisharqanku chayta. Chaykunata rikuspa, ¿imaynan Juan kashanman karqan? Payqa manan chaywanqa pisiparqanchu, aswanpas mana manchakuspan cheqaq yachachikuykunata defienderqan.
Apóstol Juanqa kuraqña kashaspapas aguantarqanmi qatikachayta, wisq’asqa kayta, iñiq t’aqapi yanqa yachachikuykuna paqarisqanta ima. ¿Iman yanapanman karqan?
Apóstol Juanqa 90 watanpiñan kasharqan, chaywanpas payqa willashallarqanmi Jehová Diosmanta Jesusmantapas. Chayraykun Romapi kamachikuqqa Patmos islaman Juanta presota apachipurqan, chay islaqa ch’aki pampa rumi-rumin karqan. ¿Iman Juanta yanapanman karqan chhaynapi tarikuspa ama pisipananpaq? Paytaqa Jesuspa nisqanta yuyariychá yanaparqan. Juj kutinmi Jesusqa discipulokunata nirqan: “Noqaqa sapa p’unchaymi qankunawan kashasaq kay tiempoq tukukapunankama”, nispa (Mat. 28:20).
Chay promesa ruwasqanmanta 60 wata qhepamanmi Jesusqa juj rijuriyta Juanman rikuchirqan. Chay rijuriypin rikurqan “Señorpa p’unchayninpi” askha runakunata Diosta munayninman jina yupaychasaqta. Chaymantapas chay rijuriypin rikullarqantaq Jehová Diosta serviqninkunata yanapashaqta.
Jesusqa mosqoypi jinan imaymanata Juanman willarqan. Juanqa manapaschá chaykunataqa llapantachu entienderqan. Ichaqa sut’itan repararqan imaynas Jehová Diospas Jesuspas mana jinallatachu qhawananku karqan llulla yachachikuykuna mast’arikunanta chayta. Aswanpas “Señorpa p’unchayninpiqa” astawanmi yapakunan karqan Dios serviqkunaqa, sumaq bendicionkunata iman chaskinanku karqan. Satanaspas janaq pachapi Jesuswan atipachikusqan qhepamanmi kay pachaman wijch’uykusqa kanan karqan, chaymantataq wiñaypaq wañuchisqa kanan karqan. Payqa “tukuy imachus rikusqanta” llapanta qelqarqan. Chaykunata rikusqanqa, ¡maytachá Juantaqa kallpacharqan!
Patmos islapiña Juan preso kasharqan chaypas manan pisiparqanchu, aswanpas astawanmi payqa Jehová Dios serviyta munasharqan. Tiempowanmi Juantaqa Romapi kamachikuq Domiciano wañupuqtin chay islamanta kacharipurqanku. Chay kamachikuqqa nishutan Jesuspa qatikuqninkunataqa cheqnikurqan. Chay qhepamanqa yaqachus jina Juanqa Éfeso llaqtaman ripunman karqan. Chay kutipaqqa pachaq watanpiñan Juanqa kasharqan, chaywanpas payqa juj mosoq llank’aytan chaskirqan. ¿Ima llank’aymi chay kanman karqan?
Jehová Diosmi Juanta kamachirqan juj librota qelqananpaq, chay libron karqan Juan. Chaypin payqa qelqarqan Jesuspa vidanmanta. Payqa allintachá yacharqan chay qelqasqan libroqa llapa iñiq t’aqakunaman chayananta. Chay qelqasqanqa iñiqkunatan yanapanan karqan Jesuspi astawan iñinankupaq, mana manchakuspa paypi iñisqankuta defiendenankupaq ima. Chay ruwasqanmanta wakin runakuna phiñakunkumanña karqan chaypas, Juanqa mana manchakuspan chay librota qelqarqan.
Jesuspa wañupusqanmanta qanchis chunka wataña pasarqan chaypas, payqa santo espirituq yanapasqanmi Jesuspa imachus ruwasqanta imachus rimasqanta yuyashallarqan. Chaychá payqa Jesuspa vidanmantaqa munayta willarqan, wakin willasqankunaqa manan Mateo, Marcos, Lucas librokunapiqa rijurinchu. Payllan Juan libropi willarqan Jesús Lazarota kausarichisqanmanta, imaynas religionpi umalliqkunapas Lazarota kausarimpusqan qhepaman wañuchiyta munarqanku chayta (Juan 11:1-46; 12:10). Chaymantapas payllan willan imatas Jesús discipulonkunaman nirqan traicionasqanku tutapi chayta, chay kutipi paykunarayku mañakusqanta ima. ¡Chaykuna qelqasqanqa maytan noqanchistapas yanapawanchis ¿riki?!
Chay tiempollapitaqmi Juanqa kinsa cartakunata qelqarqan iñiqkunata kallpachananpaq. Chay cartakunapin payqa sut’ita willarqan yanqa yachachiq apostatakunamanta cuidakunankupaq, ama paykunawan juñukunankupaq, ama napaykunankupaq ima. Chaymantapas chay cartakunapin willarqan imaynas Jehová Diosqa munakuq Dios chayta, imaynas payqa sumaq suyakuyta qowanchis chaytawan. Juanpas Jehová Dios jinan munakuywan iñiqkunata kallpachaq yuyaychaq ima. Payqa juj tayta jinan munayta Diosmanta yachachisqan runakunamanta rimaq, may kusisqataqmi kasharqan cheqaq ñanpi purisqankumanta. ¡Maytachá iñiqkunaqa kallpachakurqanku chay cartakunata leespaqa!
Juanpa wañupusqan qhepamanqa astawanraqmi Diospa llaqtanpiqa yanqa yachachiqkuna rijurirqan. Kay tiempopi chaykuna kanña chaypas, Jehová Diosqa manan jayk’aqpas ch’uya yupaychay qhellichasqa kanantaqa munanqachu (Isa. 54:17; Hech. 3:21). Juanta jinaña Diosta servisqanchisrayku qatikachawasunchis, carcelmanña wisq’awasunchis chaypas, manan pisipananchischu. Aswanpas Juan jinan kananchis, imapiña tarikuspapas mana manchakuq valiente runa.
Kay textokunata leey
¿Imaniwaqmi?
¿Imakunata ruwaspan Juan rikuchirqan mana manchakuq kasqanta?
Astawan t’aqwiriy
1. ¿Imaynapin yachanchis Juan usqhaylla phiñakuq kasqanta? (bt recuadro de la pág. 33 párrs. 3, 4).
2. ¿Imaraykun Juantawan Pedrotawan nirqanku “mana educasqa común runakuna” nispa? (Hech. 4:13; w08 15/5 30 párr. 6).
3. ¿Imaraykun Jesús Juanmanta nirqan “munaqtiyqa payqa kausanmanmi kutimunaykamapas” nispa? (Nota de estudio de Juan 21:22, nwtsty).
4. ¿Imaynapin yachanchis Juanpuni sutinta apaq librota qelqasqanta? (it “Juan, Las buenas nuevas según” párrs. 2-8). A
Fondation Martin Bodmer, Cologny (Genève)
Foto A: 200 watamanta jina qelqa k’uyu. Chaypin nishan: “Lucaspa willasqan allin willakuykuna”, nispa.
Imakunapin yanapawasunman
Juan libropiqa pachaj más kutitan willan imaraykus Jesús wañurqan chayta, ima bendicionkunatas payrayku chaskisunchis chaytapas. ¿Imaynatan noqanchispas Juan jina Jesuspa wañusqanmanta ancha agradecido kasqanchista rikuchisunman?
Juanqa yaqa pachaj watanpi kashaspa jinan Jehová Diospa yuyaychasqan kaspa pisqa librokunata qelqarqan. ¿Imatan Jehová Diosmanta yachasunman imaynatachus kuraq iñiqmasikunata qhawarisqanmanta? B
Foto B
¿Imakunata ruwaspan rikuchiwaq Juan jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
Jehová Diosqa Juantan ajllarqan Jesuswan kuska kamachimunankupaq. ¿Imaniwaqmi chaymanta?
Astawan yachanapaq
¿Atinkumanchu kuraq iñiqmasikuna Juan jina mana manchakuq kayta?
Juanqa askha kutipin munakuymanta qelqarqan. ¿Imatan Juanpa imachus qelqasqanmanta yachasunman?
“Imaynatan noqanchispas Jesuspa munakusqan apóstol jina kasunman” (w21.01 8-13)