53 PABLO
Mana manchakuq valienten karqan
SAULO cristianoman tukupusqan qhepamanmi Jesusqa payman willarqan allin willakuykunarayku imaymana sasachakuykunapi tarikunanta. Chhaynapunitaqmi karqanpas, payqa imaymana sasachakuypin tarikurqan. Sauloqa Pablo sutiwanmi reqsisqa kapurqan. Payqa iskay chunka wata qhepamanmi Corinto iñiq t’aqaman iskay kaq cartata qelqarqan. Pabloqa manaraq chay cartata qelqashaspaqa imaymana sasachakuykunapin tarikurqan, paytaqa askha kutipin jasut’irqanku, “askha kutipin wañuy patapipas tarikurqan”. Chaymantapas kinsa kutipin viajasqan barco t’ijrakurqan, chaymi juj kutinqa juj tutata juj p’unchaytawan lamar-qocha ukhupi tarikurqan. Manan chayllachu, unay watakuna qhepamanpas Pabloq viajasqan barcoqa jujmantan t’ijrakullarqantaq. Chaypi imachus pasasqanmantan kaypi yachasunchis.
Pabloqa Cesarea llaqtapin iskay wata carcelpi wisq’asqa kasharqan. Chay llaqtapi kamachikuqqa manan Pablo kachariyta munarqanchu, payqa Pablo qolqe qonantan munasharqan. Tiempowanqa jujmi chay kamachikuqpa rantinpi jaykurqan, chaypin Pabloqa chay mosoq kamachikuqta nirqan: “¡Kikin Roma rey aswanpas juzgawachun!”, nispa. Jinan Pablotaqa barcopi Roma llaqtaman aparqanku, payqa 3.000 kilometrotan lamar-qochanta viajanan karqan. Ichaqa manan sapallanchu Romamanqa viajarqan, paywanmi kasharqanku “munakusqan médico” Lucas, Aristarco ima (Col. 4:14).
Ñaupaqtan chayarqanku Mira llaqtaman. Chay llaqtaman chayaspan Julio sutiyoq capitanqa presokunata barcomanta uraychispa juj barcoman seqachirqan, chay barcoqa Egipto llaqtamantan Italia llaqtaman mijuykunata apasharqan. Lamar-qochanta viajashaqtinkun sinchita wayramurqan, jinan barcoqa mana avanzayta atirqanchu. Lucaspa willakusqan jina, ñak’aytan barcoqa risharqan. Paykunaqa ñak’aytan Allin Puerto nisqanman chayarqanku, chaypin sayarqanku wayraq pasanankama. Pabloqa mana allin tiempo kasqanta reparaspan munasharqan chaypi juj tiempo qhepakuyta.
Chaymi Pabloqa mana manchakuspa Juliota nirqan chay Allin Puerto nisqapi qhepakunankupaq. Nirqanmi: “Reparasqayman jinaqa sinchi sasan kay viajeqa kanqa, manan cargallatachu ni barcollatachu chinkachisun, yaqapaschá noqanchispas wañuyta tarisun”, nispa. Julion ichaqa mana kasurqanchu, aswanpas payqa barco apaqkunaq nisqanman jinan ruwarqan. Chay qhepamanqa ¡maytachá Julioqa pesapakurqan Pablota mana kasusqanmantaqa! Lucaspa willasqan jina, manaraq unayta rishaqtinkun sinchita wayra wayramurqan, barcoqa manan maymanpas puririyta atirqanchu, chaymi jinallaña wayrawan apachikurqanku. Chaymantapas manchakuyta wayramusqanwanmi unuqa nishuta barcota wajtamusharqan, chaymi paykunaqa barcopi wakin cargakunata lamar-qochaman wijch’uykurqanku. Paykunaqa iskay semanan chhayna kasharqanku, manataqmi imatapas mijurqankuchu. Chaychá Lucasqa nirqan: “[Llapaykun] yuyaykurqayku manaña salvakunaykupaq”, nispa.
Pablo presoña barcopi viajasharqan chaypas, payqa kallpacharqanmi barcopi viajaqkunata
Rikusqanchis jina, paykunaqa chaypi wañukapunankupaqmi piensaykusharqanku. Ichaqa chayllamanmi Pablo paykunata nirqan: “Kallpachakuychis, manan mayqenniykichispas wañunkichischu, aswanpas barcollan chinkapunqa”, nispa. Chaywanpas barcopi llank’aqkunaqa juch’uy botepin ayqekuyta munasharqanku, jinan Pabloqa capitanta soldadokunatawan nirqan: “Manachus kay runakuna barcollapi kanqaku chayqa, manan salvasqachu kankichis”, nispa. Jinan soldadokunaqa chay juch’uy botekunaq waskhankunata kacharparipurqanku.
Manaraq p’unchayamushaqtinmi Pabloqa llapankuta kallpacharqan ama imamanta llakikuspa mijunankupaq. Nirqanmi: “Manan juj chujchallaykichispas chinkanqachu”, nispa. Pabloqa manaraq mijushaqtinkun Diosmanta mañakurqan, sajsata mijuruspankutaq barcomanta trigota qochaman wijch’uykurqanku. Pabloq chaykuna ruwasqanta rikuspan chaypi kaq runakunaqa kallpachasqa karqanku. Chaychá Lucaspas nirqan: “Llapankun kallpachakurqayku”, nispa. P’unchayamuqtintaq barcoqa aqo moqoman winakurqan, unuq wajtasqanwantaq ñut’ukapuyta qallarirqan. Chhaynaña karqan chaypas, Pabloq nisqanman jinan “llapanku allillan jallp’aman chayarqanku”.
¿Maymanmi paykuna chayarqanku? Malta nisqa islamanmi. Chaypin Pabloqa compañaqninkunawan kuska Diosmanta willayta qallarirqan. Chaymantapas Diospa yanapayninwanmi chay islapi juj milagrota ruwarqan. Chaypi tiyaq runakunaqa sumaq sonqon karqanku, allintan Pabloq willasqantapas uyarikurqanku.
Tiempowanmi Pabloqa Roma llaqtaman chayarqan, chaypin payqa juj wasipi iskay wata preso karqan. Guardiakunaq qhawasqanña kasharqan chaypas, payqa Diosmantaqa willashallarqanmi, chaymantapas Diospa yanapayninwanmi askha cartakunata qelqarqan. Chay qhepaman libreña kapurqan chaypas, willashallarqanmi Diosmantaqa, ichaqa pisi tiempollamantan jujmanta Roma carcelpi wisq’arqanku. Yaqachus jina Pablotaqa chay kutipi wañuchipunkuman karqan. Yachamusqanchis jina, Pabloqa mana manchakuq Dios sonqo runan karqan, payqa manan wañuytapas manchakurqanchu. Payqa allintan yacharqan Jehová Dios kausarichimpunanta, wañuytapas wiñaypaq chinkachipunanta (1 Cor. 15:26). Chaymantapas allintan yacharqan Jehová Dios tiempollanpi premio qonanta. Arí yacharqanmi Jehová Dios mana jayk’aq wañuq cuerpota qonanta, yacharqanmi Jesuswan kuska janaq pachamanta kamachikamunantapas.
Kay textokunata leey
¿Imaniwaqmi?
¿Imakunata ruwaspan Pablo rikuchirqan mana manchakuq kasqanta?
Astawan t’aqwiriy
1. Pabloq juj sutinqa Saulon karqan, ¿imaraykun pay munarqan Pablo sutiwan reqsinankuta? (w08 1/3 12 párrs. 4, 5).
2. Pabloqa isqon watan Tarso llaqtapi karqan chaymantataq Antioquía llaqtaman ripurqan, ¿imakunapin yaqapas Pablo chay watakunapi tarikunman karqan? (w00 15/7 26, 27, recuadro).
3. ¿Imaraykun Pablo Juliota ninman karqan “wiraqochakuna, reparasqayman jinaqa sinchi sasan kay viajeqa kanqa” nispa? (Hech. 27:9, 10; wp17.5 9 párrs. 3, 4). A
Imagen A: Mijuykunata apaq barco. Yaqachus jina Pabloqa chayman rijch’akuq barcopi viajanman karqan Mira llaqtamanta lloqsispaqa.
4. ¿Imaraykun Malta islamanta runakuna Pablomanta ninkuman karqan “kay runaqa runa wañuchiqchá” nispa? (Hech. 28:4; w15 1/10 9 párrs. 5, 6).
Imakunapin yanapawasunman
Pablon barcopi riqkunata nirqan Jehová Diosmi yanapasunkichis “manan juj chujchallaykichispas chinkanqachu” nispa (Hech. 27:22, 34). ¿Imaynatan Jehová Dios noqanchistapas yanapawasunman? ¿Imaynatan Diosmanta willaytapas qhawarinanchis?
Pabloq mañakusqan qhepamanmi barcopi kaqkunaqa llapanku kallpachasqa kasharqanku (Hech. 27:35, 36). ¿Imakunapi tarikuspan Diosmanta mañakusqanchis jujkunata yanapanman? B
Imagen B
¿Imakunata ruwaspan rikuchiwaq Pablo jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
Jehová Diosqa Pablotan ajllarqan Jesuswan kuska kamachimunankupaq. ¿Imaniwaqmi chaymanta?
Astawan yachanapaq
Apostolkunaq tiemponpiqa barcopin may llaqtamanpas viajaqku. Apostolkunapas chay barcokunapin viajaqku Diosmanta willanankupaq.
¿Imaynatan umalliqkunata apóstol Pabloq ejemplon yanaparqan?
Pacienciawan Diospa promesankunata chaskiqkunata qatikusun: Apóstol Pablo jina kasun (3:22)