Llakiykunasninchejta Jehová jina qhawana

1, 2. ¿Imatá ruwananchej tiyan llakiykunasninchejta aguantanapaj? (Fototawan qhawariy).

¿QHASIMANTACHU sufrichishasunku? ¿Familiayki churanakushasunkichu chayri creeyniykiraykuchu qhatiykachasqa kashanki? ¿Onqoyniykiraykuchu chayri machuyapusqaykiraykuchu sufrishanki? ¿Pinillaykipis wañupusqanraykuchu chayri waj llakiyraykuchu sufrishanki? Jehovaqa kamachisninta mayta munakun. Jinapis kausayninchejqa ichapis “llakiywan, phutiywan juntʼa kashan” (Sal. 90:10).

² Llakiykunasninchejtaqa Jehová jina qhawananchej tiyan. Chayqa yanapawasun aguantanapaj. ¿Imajtintaj chayta ninchej? Kaypi piensarina. Autota manejashajtinchejqa ñanpi tukuy imas rikhuriwanchej. Imachus rikhuriwasqanchejman jina wakin kutisqa waj ladonta pasanchej, aswan calmitawan manejanchej chayri uj rato sayanchej. Jinapis imatachus ruwanata yachanapajqa, imachus ñanpi kashasqanta sumajta rikunanchej tiyan. Sichus autoj vidriosnin chʼichi chayqa, mana sumajta rikuyta atisunchu. Kausayninchejpi llakiykunaqa chay ñanpi rikhurej imas jina kanman. Chayta aguantanapajqa sumajta qhawananchej tiyan, nisunman llakiykunasninchejta Jehová jina qhawananchej tiyan. Kay yachaqanapi kinsa imasta yachakusunchej: 1) ¿Imaynatá llakiykunasninchejta qhawananchej tiyan? 2) Llakiykunasninchejta mana Jehová jinachu qhawajtinchej, ¿imaspí rikukusunman? 3) Llakiykunapi rikukuspa, ¿imatá ruwasunman Jehová jina yuyanapaj?

LLAKIYKUNASNINCHEJTA MAYCHUS KAJTA QHAWANA

3. ¿Imaraykutaj llakiykunapi rikukusunpuni?

³ Kay mundopeqa llakiykuna kanqapuni. Pantaj runas kasqanchejrayku, Satanastaj kay mundota kamachisqanrayku, mana llakiykunamanta librakuyta atisunchu. Chantapis kay mundoj tukukuynin astawan qayllaykamusqanman jina kausayqa astawan sajrayanqa. Ichapis llakiykuna kanqa desastres naturales kasqanrayku, runas wakin imasta ruwasqankurayku, chayri sajra imasta ruwasqankurayku (Mat. 24:8; 2 Tim. 3:13). Sichus chay llakiykunata Jehová kay tiempopi allinchanman chayqa, Satanastapis kamachiyta yanapashanman jina kanman. Reparanchej jina kay mundopi kausakushaspaqa ima ‘desgraciapipis’ chayri ima llakiypipis rikukusunpuni (Ecl. 9:12).

4. ¿Imaraykutaj sufrillanchejtaj?

⁴ Jesusta kasukusqanchejrayku sufrillanchejtaj. Jesusqa ashkha kutispi discipulosninman nerqa payta kasukusqankurayku qhatiykachasqas kanankuta (Mat. 24:9; Juan 16:2). Chayta yachayqa yanapawanchej qhatiykachasqa kaspa sinchʼita sayanallapajpuni (1 Tes. 3:3, 4). Pruebaspi kaspa sinchʼita sayanchej chayqa, wiñay kausayman apaj ñanllapipuni kashanchej. Ama chaymanta iskayrayanachu. Chantapis rikuchishanchej Jehovallata yupaychayta ajllakusqanchejta, paylla aswan sumaj kamachej kasqanrayku. Rikuchillanchejtaj Satanasqa manchay llullapuni kasqanta. Diabloqa Diospa sutinta chʼichichananpaj, llullakuspa nerqa runasqa mana Jehovata munakusqankuraykuchu sirvisqankuta, manaqa pay imatapis qosqanraykulla. Chayrayku Satanasqa Diospa kamachisninta maytapuni sufrichin, llakiypi kaspa Diosta mana kasukuyta atinankuta rikuchiyta munaspa (Job 1:9-11). Jinapis llakiypi kashaspa Jehovata mana wasanchaspaqa, payta cheqamantapuni munakusqanchejta rikuchishanchej. Jehovataj chaymanta maytapuni kusikun (Pro. 27:11).

5. ¿Imatá yachakunchej Eclesiastés 7:13, 14 versiculosmanta? (Fotostawan qhawariy).

⁵ Jehová saqen llakiykuna kananta. Payqa ni jaykʼaj sajra imasta ruwanchu, nitaj sajra imaswan pruebaman churawanchejchu (Sant. 1:13). Jinapis rey Salomón nerqa ‘llakiy pʼunchaykunaqa’ ‘Diospa ruwasqasninmanta’ ujnin kasqanta (Eclesiastés 7:13, 14 leey). Chaywanqa mana nisharqachu Jehová llakiykunata rikhurichisqanta, manaqa nisharqa llakiykuna kananta saqesqanta. ¿Imatá yachakusunman Salomonpa nisqanmanta? Yachakunchej Satanaspa mundonpi kausakushajtinchejqa, wakin días allin rinawanchejta, wakin diastaj llakiykunapi rikukunanchejta. Uj día allin riwajtinchejqa Jehová Diosmanta uj regalota jina qhawana, agradecekunataj. Salomonqa yachachillawanchejtaj ‘imachus qhatirinawanchejta’ mana yachayta atisqanchejta, nisunman uj día allinchus manachus rinawanchejta mana yachayta atisqanchejta. Chaypi reparanchej kʼacha runaspis sajra runaspis mana yuyashajtillanku ima llakiypipis rikukunankutapuni.

6. ¿Imaraykutaj Jehová saqen llakiykunapi rikukunanchejta? (Hebreos 12:7, 11).

⁶ Llakiykunasninchejmanta Jehová jina yuyaspaqa, reparasunchej Jehovaqa paypi atienekunata yachachishawasqanchejta, manataj noqallanchejpichu. Jehovaqa yachan imaspichus rikukushasqanchejta, sufrejtinchejtaj sonqon nanan. Jehová “manchay laqha wayqʼosta” purejta saqewajtinchejpis nisunman sinchʼi llakiykunapi rikukojta saqewajtinchejpis, yanapawanchej imatachus ruwanata yachanapaj, chantapis mayta munakuwasqanchejta rikuchiwanchej, aguantanapajtaj kallpata qowanchej (Sal. 23:4). Llakiykunapi rikukuspaqa reparanchej imaspichus astawan mejorananchej kasqanta, Jehovataj yanapawanchej chay imaspi mejoranapaj (Hebreos 12:7, 11 leey). Jobqa astawan kʼumuykukoj sonqo kayta yachakunan karqa. Mana Jehovachu Jobpa llakiykunasninta rikhurichejtinpis, saqerqa llakiykunapi rikukunanta, chaywantaj sumaj imasta yachacherqa (Job 42:1-6). Kayta amapuni qonqanachu: Jehová ima llakiypipis rikukunanchejta saqen chayqa, yanapallawasuntaj paymanta manapuni karunchakunapaj. Chaymantataj bendeciwasun (Rom. 8:35-39).

7. ¿Imaraykutaj qhatiykachawajtinchejpis kusisqas kasunman?

⁷ Qhatiykachawajtinchejpis kusisqas kasunman. Creeyniykirayku qhatiykachasqa kashanki chayqa, ama yuyaychu Jehová niña allinpajchu qhawasusqanta. Astawanpis yuyarikuy Jehovata kasukusqaykirayku qhatiykachasqa kashasqaykita, Jehovataj chayrayku qanwan kusisqa kashasqanta, bendecisunanta ima (Mat. 5:10-12). Qhatiykachasqa kaspa chayta mana qonqasunchu chayqa, apóstoles jina kusisqas kasun (Hech. 5:40-42). Chantapis qhatiykachasqa kashaspa Diosta mana wasanchajtinchejqa, wajkuna cheqa kajmanta yachakuyta munanqanku, ‘Diostataj jatunchanqanku’ (1 Ped. 2:12). Josej kausayninpi piensarina. Jehovaqa payta mana llakiykunasnin pasajtillanchu bendicerqa, manaqa llakiykunapi kashajtinpis bendecillarqataj. Noqanchejwanpis ajinallatataj ruwanman (Gén. 39:3, 23).

8. ¿Imataj yanapallawanchejtaj llakiykunata aguantanapaj?

⁸ Llakiykunasninchejqa tukukonqa. Jobpa kausayninmantaqa chayta yachakunchej. Bibliapeqa nin: “Jehová Diosqa chay qhepa wataspi Jobta astawan bendicerqa, chay ñaupa watasmanta nisqaqa”, nispa (Job 42:12). Ajinallatataj noqanchejtapis Jehovaqa paraisopi tʼukunata bendeciwasun. Paraisopeqa wiñaypaj kusisqas kausakusun. Chayrayku kay tiempopi llakiykunasninchejqa chaywan kikinchaspa mana imapischu. Chayta yachayqa tukukuykama aguantanapaj yanapawanchej (Mat. 24:13).

MANA JEHOVÁ JINA LLAKIYKUNASNINCHEJTA QHAWAJTINCHEJ

9. ¿Imataj kanman llakiykunasninchejta mana Jehová jinachu qhawajtinchej?

⁹ Llakiypi kashaspa mana Jehová jinachu llakiykunasninchejta qhawasunman chayqa, astawan llakiyllapi rikukusunman. Ichapis yuyayta qallarisunman Jehová chay llakiypi rikhurichishawasqanchejta. Jobpis ajinata yuyarqa uj tiempota. Ajina pantasqata yuyasqanraykutaj, “Jobqa Dios cheqan kasqanta ninantaqa pay cheqan runa kasqanta nerqa” (Job 32:2). Ajinallatataj Noemipis qallariypi llakiykunasninmanta Jehovata juchacharqa (Rut 1:13, 20, 21). Jobpis Noemipis ajinallatapuni yuyankuman karqa chayqa, Jehovamanta karunchakunkuman karqa (Pro. 19:3). Jinapis Jehová paykunata yanaparqa llakiykunasninkuta pay jina qhawanankupaj. Chantapis paykunata bendicerqa payllatapuni kasukusqankurayku.

10. ¿Imatá ichapis yuyasunman llakiykunapi rikukuspa?

¹⁰ Mana Jehovachu llakiykunasninchejta rikhurichisqanta yachaspapis, ichapis yuyayta qallarisunman Jehová noqanchejmanta qonqapusqanta. Ajinata yuyaspataj desanimakapusunman, niñataj Jehovata sirviyta atisunmanchu (Pro. 24:10). Rey Davidwan profeta Habacucwanqa ashkha llakiykunapi rikukorqanku. Wakin kutistaj paykunapis yuyarqanku Jehová yanapata mañakusqankuta manasina uyarisqanta (Sal. 10:1; Hab. 1:2). Jinapis paykunaqa mañakullarqankupuni. Jehovataj mañakusqankuta uyarerqapuni, yanaparqataj. Noqanchejwanpis kikillantataj ruwanqa (Sal. 10:17).

11. ¿Imataj pasawasunman pruebasta mana Jehová jinachu qhawajtinchej?

¹¹ Pruebasta mana Jehová jinachu qhawasun chayqa, pruebaspi rikukuspa tʼukusunman, nisunmantaj: “¿Imaraykutaj Jehová saqen kay jina pruebapi rikukunaytari?”, nispa (1 Ped. 4:12). Jesuspa discipulosninpi piensarina. Paykunaqa mana entiendeyta atillarqankuchu imaraykuchus Jesús sinchʼi qhatiykachasqa kanan kasqanta (Luc. 18:33, 34). Jesús paykunaman ima llakiykunapichus rikukunanta sutʼita nejtinpis, apóstol Pedroqa yuyarqa Jesús chay llakiykunapi rikukunanta Dios mana saqenanta. Jesusqa yacharqa Diospa munayninta ruwananpaj sufrinan, wañunan ima kasqanta. Yachallarqataj Pedro imaynatachus yuyasqanqa paypaj uj jarkʼay jina kasqanta, chayrayku payta kʼamerqa (Mar. 8:31-33). Jesús wañupojtinñapis, discipulosnenqa manapuni entiendeyta aterqankuchu imaraykuchus chay jinata sufrispa wañusqanta. Jinapis Jesusqa paykunata munakullarqapuni, yanapallarqapunitaj. Payqa kausarimuytawan paykunaman ‘Diosmanta Qhelqasqata allinta sutʼinchaspa’ entiendecherqa imaraykuchus chay jinata sufrispa wañusqanta (Luc. 24:25-27, 32, 44-48). Discipulosnenqa Jesuspa yachachisqanpi sumajta tʼukurinanku karqa. Ajinamanta tumpamantawan qhatiykachasqa kajtinku wakichisqas kanankupaj. Noqanchejpis imatachus Biblia qhatiykachaymanta nisqanpi tʼukurina. Ajinamanta jamoj pruebaspaj wakichisqas kasun.

12. Imaspichus rikukusqanchejta mana Jehová jinachu qhawasun chay, ¿imatataj yuyasunman?

¹² Imaspichus rikukushasqanchejta mana Jehová jinachu qhawaspaqa, yuyasunman noqanchejwan japʼinakushasqankuta chayri mana cheqan kajman jinachu noqanchejwan ruwashasqankuta, manachayri imaspichus rikukusqanchej mana sinchʼichu kajtinpis, manchay sinchʼipuni kasqanta yuyasunman. Wakin hermanosqa Diospa llajtanpi wakin ruwanasta mana japʼisqankurayku, chayri wakin ruwanasta saqenankuta nisqankurayku, ichapis yuyayta qallarinkuman paykunawan mana cheqan kajman jinachu ruwakushasqanta. Uva huertayoj kikinchaywan imatachus Jesús yachachisqanpi piensarina. Uva huertapi llankʼajkunamanta wakenqa phiñasqas kasharqanku. Imaraykuchus yuyarqanku wajkunamanta nisqa aswan pisita pagota japʼisqankuta. Uva huertayojqa ujninman kuticherqa: “Qantaqa mana ima sajratapis ruwashaykichu”, nispa (Mat. 20:10-13). Chay trabajadoresqa mana aswan pisitachu pagonkuta japʼisharqanku, manaqa aswan ashkhata pagananku kasqanta yuyasqankurayku quejakusharqanku. Noqanchejqa mana chay trabajadores jina kayta munanchejchu. ¿Imataj yanapawasunman imapichus rikukushasqanchejta Jehová jina qhawanapaj?

¿IMATÁ RUWASUNMAN LLAKIYKUNAPI RIKUKOJTINCHEJ?

13. ¿Imataj kanman uj llakiypi rikukojtinchej?

¹³ Noqanchejqa sumajta yachanchej imatachus Biblia llakiykunamanta nisqanta. Llakiypi kajkunapajtaj kallpacharinapaj jina, sonqocharinapaj jina Bibliamanta wakin textosta leeripuyta yachanchej. Jinapis noqanchej uj llakiypi rikukojtinchejqa, ichá mana atillasunmanchu Jehová jina chay llakiyta qhawayta. Ichá yuyasunman Dios castigashawasqanchejta chayri mañakuykunasninchejta mana uyariwasqanchejta. Ajinata yuyashanchej chay, ¿imatá ruwasunman?

14. Llakiypi kashajtinchej, ¿imastataj Jehovamanta mañakusunman? (Filipenses 4:13).

¹⁴ Jehovamanta yanapata mañakuna. Tatanchej Jehovaman willarikuna imapichus rikukushasqanchejta, imaynachus kashasqanchejtapis. Paymanqa sutʼita nisunman imatachus noqanchejrayku ruwananta munasqanchejta. Chantapis mañakullasunmantaj espíritu santonnejta kallpata, yachayta ima qonawanchejta. Jinapis kayta ama qonqanachu: Ichapis payqa mana yuyasqanchejman jinapunichu mañakusqanchejman kutichiwasun (Efe. 3:20). Chantapis ichá angelesnejta chayri hermanosnejta yanapawasun (Sal. 34:7). Chayrayku sumajta reparana imaynatachus Jehová yanapashawasqanchejta, chay yanapantataj japʼikuna. Chantapis payqa llakiyninchejta aguantanapaj jina espíritu santonta qowasunpuni. Chaymantataj ama iskayrayanachu (Filipenses 4:13 leey).

15. Llakiypi kashaspa, ¿imastataj ruwanallapuni tiyan? (Fototawan qhawariy).

¹⁵ Jehovaman qayllaykuchiwanchej chay imasta ruwanallapuni. ‘Llakiypi, phutiypi’ kaspaqa mana ñaupajta jina ruwayta atillasunmanchu. Jinapis chay kutispi astawanraj kallpachakunanchej tiyan llakiykunasninchejta Jehová jina qhawanapaj. Chayrayku imaschus Jehovapi, nisqasninpi ima tʼukurichiwanchej chay imasta leenapaj chayri uyarinapaj tukuy atisqanchejta kallpachakuna (Sal. 119:143). Chantapis Bibliata leenallapuni, estudianallapuni, leesqanchejpitaj tʼukurina. Tukuy atisqanchejta predicana, reunionesman rina, chaypitaj comentana. Sapallanchej kayta munajtinchejpis, ama hermanosmanta karunchakunachu. Astawanpis paykunawan khuska karikunapaj tiempochakuna (Pro. 18:1).

16. Llakiykunapi rikukuspa, ¿imasmantataj iskayrayasunman, chanta imatataj ruwasunman manaña iskayrayanapaj? (2 Corintios 10:4, 5).

¹⁶ Imamantapis iskayrayaspaqa Bibliawan yanapachikuna manaña iskayrayanapaj. Llakiypi rikukojtinchejqa noqanchejmanta chayri Jehovamanta iskayrayayta qallarisunman. Chaytaj ‘sumaj perqas’ jina kanman. Chaytataj thuñinanchej tiyan, nisunman yuyayninchejmanta orqhonanchej tiyan (2 Corintios 10:4, 5 leey). ¿Imaynatá chayta ruwasunman? Bibliata, publicacionesta ima sumajta estudiaspa reparana imatachus Dios yuyasqanta. Diospa ñaupaqenpi allinpaj qhawasqa kasqanchejmanta iskayrayashanchej chayqa, apóstol Pabloj kausayninmanta estudiana. Payqa sonqo kʼajaywan sumaj willaykunata willaspapis, ashkha llakiykunapi rikukorqa. Jinapis predicayta atillarqapuni. Chaypitaj sutʼita repararqa Jehovawan Jesuswanqa payta allinpaj qhawasqankuta (2 Cor. 11:23-27). Jehová ñaupa juchasninchejta perdonawasqanchejmanta iskayrayashanchej chaytajrí, Jehová juchasninchejta perdonasqanmanta parlaj versiculosta uj listapi anotakuna (Isa. 43:25). Chantá chay versiculosta leerina, chaypitaj tʼukurina (Sal. 119:97). Uj llakiypi rikukuspa Jehová kamachisninta jarkʼasqanta nisqanmanta iskayrayanchej chaytaj, publicacionesninchejpi maskʼana imaraykuchus Jehová llakiykuna kananta saqesqanmanta, imapi rikukojtinchejpis imaynatachus Jehová paypa qayllallanpipuni kanapaj yanapawasqanchejmanta ima (Sal. 91:9-12). Chantapis sinchʼi llakiykunapi rikukuspapis Jehovata kusisqallapuni sirvej hermanospa experienciasninkuta leerina.a

17. ¿Imatá ruwana tiyan uj llakiy chayamuwajtinchej?

¹⁷ Ichapis kunanqa mana sinchʼi llakiykunapichu rikukushanchej. Jina kajtenqa Jehovaman chaymanta agradecekuna, tʼukurinataj ima allin imastachus qowasqanchejpi (Ecl. 7:14). Jinapis uj llakiy chayamuwajtinchejqa kallpachakuna Jehová jina chay llakiyninchejta qhawanapaj, paypitaj tukuy sonqo atienekunallapuni. Jehovaqa kasukoj kamachisninman nin ‘aguantanankupaj yanapananta’ (1 Cor. 10:13). Chanta, ¿imaynatá sinchʼi llakiypi tarikoj hermanosninchejta yanapasunman? Chayta qhepan yachaqanapi yachakusun.