“Tukuy imapi sonqochaj” Diosmanta yachakuna

1. ¿Imaraykú wajkunata sonqocharinanchej tiyan?

KAY tiempopi ‘imaymana pruebaspi’ rikukusqanchejrayku tukuypis necesitanchej sonqocharinawanchejta (1 Ped. 1:6). Llakiypi kashajtinchej pillapis kallpachariwajtinchejqa mayta agradecekunchej. Chayrayku kikillantataj ruwananchejqa may allin (Mat. 7:12). Jehovaqa “tukuy imapi sonqochaj” Dios, “imaymana llakiykunapi” kashajtinchejtaj sonqochawanchej. Ajinata payqa yachachiwanchej noqanchejpis ‘purajmanta sonqochanakunapaj’ (2 Cor. 1:3, 4; 1 Tes. 4:18). Chaytataj hermanosninchejta munakusqanchejrayku kusiywan ruwanchej, nitaj obligasqa jinachu. Kay yachaqanapeqa kay kinsa imasta yachakusun: 1) Bibliapi sonqochaymanta parlaspa, ¿imamantá parlashan? 2) ¿Imaynatá wajkunata sonqocharisunman? 3) Sonqocharinawanchejta necesitaspa, ¿imatá ruwasunman?

BIBLIAPI, ¿IMA NIYTÁ MUNAN “SONQOCHAY”?

2. Bibliapi “sonqochay” palabrapaj griego parlaypi ima palabratachus oqharikusqan, ¿imastaj niyta munan?

² Bibliapi “sonqochay” palabrapaj griego parlaypi ima palabratachus oqharikusqanqa, imamantachus parlakushasqanman jina ashkha imas niyta munanman. Niyta munanman “kallpachariy”, “yuyaychariy” ima (Rom. 12:8; Biblia de estudio nisqapi chay versiculoj sutʼinchayninta leeriy “el que anima”). Griego parlaymanta palabritamanta palabrita traducisqataj niyta munan “yanaparinapaj pejpa ladonmanpis sayaykuy”. Chayqa piensarichiwanchej pillapis llakiypi kashasqanrayku yanapata necesitajtin, ujnin amigon tukuy imaynamanta yanapananpaj ladonman correykusqanpi. Chay amigon imaynallamantapis yanaparisqanrayku sonqochasqa, kallpachasqa ima kanqa.

3. ¿Imatá Bernabemanta yachakusunman? (Dibujotawan qhawariy).

³ Bibliapeqa uj cristianomanta parlan, payqa wajkunata sumajta sonqochayta yachaj, yanaparejtaj. Chay cristianoqa José sutikorqa, apostolestaj Bernabé nispa suticharqanku. Chaytaj niyta munan “sonqochaj wawa” (Hech. 4:36). Chay suteqa paypaj jinapuni karqa, Bibliapeqa paymanta manaña José nispa oqharinchu. Payqa ashkha kutispi hermanosninta yanapaspa sutin nisqanman jinapuni ruwarqa. Por ejemplo, uj pacha Saulota yanaparqa. Sauloqa cristianoman tukusqanmanta pisi tiemponman, Jerusalenman rerqa Jesuspa discipulosninta rejsej. Jinapis discipulosqa payta manchachikorqanku, aswan ñaupajta cristianosta sinchʼita qhatiykachasqanrayku. ¿Imatá Bernabé ruwarqa? Payqa mana manchachikorqachu Saulowan kʼacha kayta, apostolesmantaj rejsicherqa (Hech. 9:26-28).

¿IMAYNATÁ WAJKUNATA SONQOCHASUNMAN?

4. ¿Imaynatá wajkunata sumajta sonqocharisunman? (Romanos 1:11, 12).

⁴ Atikojtenqa visitarina. Jehovaqa kamachisninnejta wajkunata sonqochan. Uj pacha profeta Eliasqa sinchʼi llakisqa kasharqa, Jehovataj payta kallpacharinanpaj uj angelta kacharqa (1 Rey. 19:4-7). Apóstol Pablopis repararqa, hermanostaqa visitarispapuni sumajta kallpachariyta atisqanchejta (Romanos 1:11, 12 leey). Pillatapis sonqocharinapaj visitarispaqa paywan karinapaj tiempochakunchej, manataj chay ratitochu ripunchej (1 Cor. 16:7). Mana visitarej riyta atisparí, ¿imatá ruwasunman? Kallpachariyta atillasunmantaj mensajeta apachispa, wajyarispa, uj tarjetata chayri uj cartata ruwapuspa. Qanrí, ¿saqenkichu Jehová qannejta wajkunata sonqocharinanta?

5. ¿Imata ruwaytaj kay tiempopi mana atikullanchu?

⁵ Kay tiempopi kausayqa astawan llakiylla kashan. Chayrayku hermanosninchejta sonqochanapaj visitarej reyqa mana atikullanchu. Efesomanta Onesíforo sutiyoj cristianoqa, Pablota Romapi carcelpi kashajtin tarinankama maskʼaj rerqa. Payqa chayta ruwaspa kausayninta wañuy pataman churarqa, carcelpi wisqʼasqa kaytapis mana manchachikorqachu (2 Tim. 1:16-18). Rusiamanta hermanosninchejpis kikillantataj ruwashanku. Uj testigo creeyninrayku juzgasqa kashajtin, ashkha hermanosqa paywan khuska kanku payta kallpacharinankupaj, paykunapis wisqʼasqa kayta atisqankuta yachaspapis. Qanrí, ¿imaynatá hermanosninchejta mana manchachikuspa sonqocharinaykipaj wakichikuwaj? Ñaupa tiempopi, kunan tiempopi Diospa kamachisninmanta estudiariwaj, imaynatachus paykuna purajmanta sonqochanakusqankumanta, qhatiykachasqa kaspapis imaynatachus kusisqallapuni kasqankumanta ima.

6. ¿Imaynatá Jehová jina wajkunata sonqochasunman? (Fototawan qhawariy).

⁶ Sumajta uyarispa. Profeta Eliasqa kausaynin wañuy patapi kashasqanta yuyaspa, Jehovaman sonqonpi kaj chhikata willakorqa. Jehovataj imapichus rikukushasqanta yachaspañapis sumajta uyarerqa. Kikillantapuni kutin kutita willakojtinpis Jehovaqa uyarillarqapuni (1 Rey. 19:9, 10, 14). Profeta Habacucmantañataj parlarina. Uj kuti Jehovaman llakiyninta willakushaspa mana respetowan parlaspa jinarqa. Jinapis Jehovaqa mana phiñakorqachu (Hab. 1:2, 3). Kay tiempopipis Jehovaqa imatachus necesitasqanchejta yachaspañapis sumajta uyariwanchej. ¿Imaynatá pay jina ruwasunman? Hermanosninchejta sumajta uyarispa, respetowantaj. Imatapis willarishawajtinchejqa ‘allinta uyariyta yachana’ (Sant. 1:19). Sonqonchejta nanachinawanchejpaj jina imata niwajtinchejpis, chayri kikillantapuni kutin kutita willakuwajtinchejpis ama pantachinachu, nitaj phiñakunachu (Ecl. 7:9).

7. Pillatapis allinta sonqocharinapaj, ¿imatá ruwasunman?

⁷ Imatapunichus necesitasqankuta yachanapaj kallpachakuspa. Jehovaqa yachan imachus runaj sonqonpi kasqanta, noqanchejtaj mana. Chayrayku allinta uyarispalla yachasun necesitasqanman jina sonqochayta. Ichá piensasunman noqanchej ajinapi rikukuspa imatachus necesitasqanchejpi. Chayraykutaj chayman jina sonqochariyta munasunman. Jinapis ama qonqanachu mana tukuy runaschu kikin kasqanchejta, mana tukuychu kikin sonqochayta necesitanchej. Chayrayku willarikushawajtinchej sumajta uyarina, kʼachamanta, allin yuyaywantaj tapuykunasta ruwana imaynachus kashasqanta, imatatajchus necesitasqanta yachanapaj (Pro. 20:5).

8. ¿Imaynatá Martata, Mariatawan Jesús sonqocharqa, chanta imatá paymanta yachakunchej? (Fotostawan qhawariy).

⁸ Piensarina Martata, Mariatawan imaynatachus Jesús sonqochasqanpi hermanonku Lázaro wañupojtin. Iskayninku kikin llakiypi rikukojtinkupis, Jesusqa sapa ujta waj jinamanta yanaparqa. Jesusqa Marta paywan parlarisqantawan kausarimuymanta parlarerqa, chaytaj Martata yanaparqa kausarimuypi astawan creenanpaj. María Jesusta waqaspa taripaj rejtintaj, payqa nisina ni imatapis kausarimuymanta parlarqachu, astawanpis paywan khuska waqarikorqa, maypichus Lazarota pʼampasqankutataj taporqa (Juan 11:20-35). ¿Imatá yachakunchej? Mana tukuytachu kikinta sonqochayta atisqanchejta. Chayrayku allinta qhawarina imatachus sapa uj necesitasqanta yachanapaj.

9. ¿Imaynatá Biblia yanapawanchej wajkunata sonqochanapaj? (Romanos 15:4, 5).

⁹ Bibliawan. Pipajpis Bibliamanta uj versiculota leeripuspaqa, yanapashanchej ‘Diosmanta Qhelqasqaswan’ sonqochakunanpaj, Jehovaj nisqasninpi astawan creenanpaj ima (Romanos 15:4, 5 leey). Chaypi creesqantaj yanapanqa astawan kallpachasqa, sonqochasqa ima kananpaj (Isa. 40:31). ¿Imaynatá yachasunman ima versiculostachus leeripunata? Wakin hermanosqa kallpacharinapaj jina textosta uj listapi anotakunku. Chay textosmanta wakenqa kashan Diospa Palabranwan yanapachikuna nisqa libropi, “Sonqochay” nisqa temapi. Chantapis Jehovamanta yanapata mañakuna Palabranta aswan sumajta apaykachayta yachanapaj. Jehovaqa espíritu santonwan yanapayta atiwanchej kallpacharinapaj jina textosta yuyarikunapaj (Juan 14:26).

10. ¿Imajtintaj sonqochashaspa kʼachamantapuni parlarina tiyan?

¹⁰ Kʼachamanta parlaspa. Wakin kutisqa pillatapis sonqocharishaspa, yanapananchej kanqa imapichus rikukushasqanmanta imatachus yuyasqanta cambiananpaj. Chay kutispeqa niraj imatapis nishaspa, allinta piensarinanchej tiyan sonqocharinapaj jina parlanapaj, manataj sonqonta nanachinapaj (Pro. 12:18). Imaynatachus chayta ruwanata profeta Eliaswan Jehová imaynatachus parlasqanpi yachakusunman. Eliasqa yuyarqa profeta jina mana allintachu ruwasqanta, tukuynin Israelpitaj payllaña Diosta sirvishasqanta. Jehovataj kʼachallamanta, munakuywantaj yuyasqanta cambiacherqa, pantasqa kashasqanta mana nispalla (1 Rey. 19:15-18). Noqanchejpis hermanosninchejta sumajta kallpacharisunman, kʼachallamanta parlaspa, sumaj palabrasta ajllaspa ima. Chantapis tantakuykunapi comentashaspa chayri discursosta qoshaspaqa, kʼachamantapuni chayta ruwana, yanapanapaj jinataj. Ajinamanta hermanosninchejta sumajta kallpacharisunchej.

11. ¿Imatá llakiypi kajkuna ashkha kutispi necesitanku? (1 Juan 3:18).

¹¹ Imaynallamantapis yanaparispa. Ashkha kutispi llakiypi rikukojkunaqa necesitanku imaynallamantapis yanaparinata, manataj parlasqanchejwan sonqocharinallatachu (1 Juan 3:18 leey). Bernabemanta sumajta yachakunchej. Payqa jallpʼanta vendespa chay qolqeta apostolesman qorqa, chaywan reciellanraj bautizakoj wajcha hermanosta yanapanankupaj (Hech. 4:36, 37). Kay tiempopipis ashkha hermanos chayman rijchʼakojllatataj ruwanku. Poloniamanta hermananchej Gabrielaj wasenqa yaku juntʼaykusqanrayku niña tiyakunapaj jinachu karqa. Chayrayku payqa may llakisqa kasharqa. Pay nin: “Noqaqa tatasniywan tiyakusharqani, tukuyniykutaj may llakisqas, mancharisqastaj kasharqayku. Nisharqanitaj ‘¿imaynatataj wasiykuta allinchasqaykuri?’ nispa. Jinallapitaj chay qayllapi kaj congregacionesmanta ashkha hermanos jamorqanku, uj diallapitaj ashkha imasta allincharqanku. Chaypitaj aswan sutʼita repararqani imaynatachus Jehová llajtannejta llakiypi kajkunata sonqochasqanta”.

12. Llakiykunata aguantaspa, ¿imaynatá hermanosninchejta yanapashanchej?

¹² Llakiykunata aguantaspa. Pabloqa Tesalonicamanta cristianosman nerqa, llakiykunata aguantasqanku, Diospi atienekusqankupis payta sonqochasqanta, kallpachasqanta ima. Repararqataj paykunarayku imastachus ruwasqanqa mana qhasipajchu kasqanta (1 Tes. 3:5-8). Chantapis Pabloqa yacharqa, llakiykunapi rikukuspapis Jehovatapuni kasukusqanqa hermanosta, jinallataj payta mana rejsejkunatapis kallpachayta atisqanta (Col. 2:1, 2). Ajinallatataj hermanosninchejpis, Jehová llakiykunata aguantanapaj yanapashawasqanchejta rikuspa kallpachasqa kanku.

13. ¿Ima kʼacha kaytataj necesitanchej, chanta imaraykutaj?

¹³ Pacienciakuspa. Sonqocharinchej chay hermano chayri chay hermanaqa, ichapis mana sonqochasqanchejtawankamachu allin sientekonqa. Jinapis Bibliaqa kayta yuyaychawanchej: “Qankunapura sonqochanakullaychejpuni”, nispa. Chaywan nishawanchej chayta ruwanallapuni kasqanta (1 Tes. 5:11). Chayrayku pacienciayoj kana tiyan, manataj saykʼupunachu tiyan (1 Tes. 5:14). Jinapis noqanchej sonqocharinata necesitajtinchejrí, ¿imatá ruwasunman?

SONQOCHARINAWANCHEJTA NECESITASPA, ¿IMATÁ RUWASUNMAN?

14, 15. Sinchʼi llakisqa chayri allin phutisqa kashanchej chay, ¿imatá ruwasunman?

¹⁴ Jehovaman orakuna. Sinchʼi llakisqas chayri allin phutisqas kashanchej chayqa, Jehovamanta sonqochanawanchejta mañakuna (Sal. 94:19). Imaynachus sientekusqanchejta sutʼita willarina (Sal. 62:8). Payqa niraj mañakushajtinchej yachanña imatachus necesitasqanchejta. Jinapis sonqonchejpi kaj chhikata willakuspaqa, paypi creesqanchejta rikuchishanchej. Jehovaqa imachus allinninchejpaj kasqanman jinapuni kutichiwanchej (Mar. 11:24). Filipenses 4:6, 7 niwanchej: ‘Tukuy imapaj Diospa yanapayninta mañakuychej. Diostaj sonqo tiyaykuyta qosonqachej, mayqentachus runas mana entiendeyta atinkuchu chayta. Ajinamanta payqa sonqoykichejta, yuyayniykichejtawan waqaychanqa’, nispa.

¹⁵ Yanapata mañakuna. Uj amigonchejman chayri confianchej chay ancianoman willarina imaynachus kashasqanchejta. Hermanosqa mayta sonqochawasunman. Jinapis mana willarejtinchejqa, mana yachanqankuchu imaynachus kashasqanchejta chayri imatachus necesitasqanchejta (Pro. 14:10). Chayrayku imaynachus kashasqanchejta willarinapaj, uyaririnawanchejta nina. Chantapis nillasunmantaj ima textochus chayri ima yachaqanachus paykunata sonqochasqanta rikurichinawanchejta.

16. ¿Imataj kanman wajkuna kallpachariyta munawajtinchej, chanta imatá yuyarikunapuni tiyan?

¹⁶ Pacienciakuna, perdonanataj. Hermanosninchejqa kallpachariyta munaspa ichapis pantankuman. Ichapis imatachus nisqankuwan, chayri imatachus ruwasqankuwan allin sientekunapaj yanapanawanchejmantaqa sonqollanchejta astawan nanachiwasunman. Ajina pasawasunman chayqa paykunawan pacienciakuna (1 Cor. 13:4, 7). Imatachus Santiago 3:2 nisqanta yuyarikuna. Chaypi nin: “Pillapis parlasqanpi ni jaykʼaj pantanchu chayqa, chaymá mana juchayoj runaqa”, nispa. Chayrayku astawanqa hermanos kallpachariyta munawasqanchejpi piensarina. Kayta yuyarikunapuni: “Runaqa cheqa kajtapuni ruwayta munan, cuerpontajrí mana chaypaj jinachu” (Mat. 26:41).

17. ¿Imapajtaj tukuyninchej kallpachakunanchej tiyan?

¹⁷ Tukuypis necesitanchej kallpacharinawanchejta, sonqocharinawanchejta ima. Chaytataj astawanraj necesitasun kay qhepa pʼunchaykunapi kausay astawan sajrayapusqanrayku, Diospa enemigosnintaj astawan churanakuwasqanchejrayku. Chayrayku tukuyninchej tukuy atisqanchejta kallpachakuna purajmanta sonqochanakunapaj.