‘Cheqa kajta parlaj Diosqa’ nisqanta juntʼanpuni

1. Salmo 31:2-5 nisqanman jina, ¿imajtintaj Jehovapi atienekuyta atinchej?

SATANASPA mundonpi kausakunchej. Chaypitaj llullakuywan, chʼaukiyaywan, wasanchaywan, engañaywan ima juntʼa kashan. Chayrayku wakin kutisqa mana pi runapipis confiayta atikullanchu. Por ejemplo, wakin empresarios chayri negociosniyoj kajkunaqa tukuy imata ruwanku waj negociosniyoj kajkunata perjudicanankupaj. Chantapis wakin runasqa vendenankurayku imatapis llullakuspa ofrecenku. Wakintaj ni amigosninkupipis confiayta atinkuchu, imajtinchus mana nisqankuta juntʼankuchu. Jehovatajrí mana ajinachu, payqa “cheqa kajta parlaj Dios”. Chayrayku paypi atienekuyta atinchej (Salmo 31:2-5 leey). Cheqa kajqa paypi kashan. Chaytataj sutʼita reparanchej tukuy ima nisqanpi, ruwasqanpi ima. Jehová nisqanta juntʼananmantaqa nipuni iskayrayasunmanchu.

2. ¿Imatá kay yachaqanapi yachakusun?

² Kay yachaqanapi qhawarisun imajtinchus Jehovapi atienekuyta atisqanchejmanta wakin imasta. Chantapis yachakullasuntaj imastachus Jehová ruwananta Satanasta, sajra mundontawan chinkachinanpaj. Yachakullasuntaj kay tiempopi munayninta juntʼananpaj imatachus ruwashasqanta. Chay imasqa yanapawasun mana manchachikojkuna kanapaj, cheqa kajmantataj mana manchachikuspa parlanapaj.

¿IMAJTINTAJ CHEQA KAJTA PARLAJ DIOSPI ATIENEKUNCHEJ?

3. ¿Imajtintaj Jehovapi tukuy sonqo atienekuyta atinchej?

³ Jehovapi atienekuyta atinchej pay tukuy imata ruwasqanrayku. Pay ruwarqa cielota, kay jallpʼata, chaypi tukuy kausajkunatawan (Gén. 1:1; Sal. 36:9; Apo. 4:11). Chantapis jallpʼataqa kausay ni jaykʼaj tukukunanpaj jina tukuy imayojta ruwarqa. Paypa makinpi tukuy ima kashan, kallanqapunitaj. Jehovaqa may yachayniyoj, atiyninpis mana tukukuyniyoj. Chayrayku mana iskayrayaspa kausayninchejta makinpi saqeyta atinchej, nitaj iskayrayanchejchu qhepaman allin kausayta qonawanchejmantapuni.

4. ¿Imaynapí yachanchej Jehová munakuwasqanchejta?

⁴ Jehovapi atienekuyta atinchej pay munakuwasqanchejrayku. Jehovaqa munarqa runas pay jina kusisqas kausakunankuta. Chayrayku kausayta regalota jina qowarqanchej, payman ‘rijchʼakojtataj ruwawarqanchej’, nisunman pay jina munakuyniyoj, kʼachastaj kanapaj (Gén. 1:26). Chantapis payqa ajllayta atinapaj jina ruwawarqanchej, kay kʼachitu jallpʼatataj kausakunapaj qowarqanchej (Sal. 115:16). Adanman, Evamanpis uj kʼachitu llankʼayta qorqa. Paykunaqa tukuynin jallpʼata uj kʼachitu paraisoman tukuchinanku karqa (Gén. 1:28; 2:15). Kusisqa kausakunankupajtaj kay jallpʼapi tukuy imata qorqa. Chaypi sutʼita reparanchej ‘Jehová Diospa munakuynenqa wiñaypaj wiñaynintinpaj’ kasqanta (Sal. 103:17).

5. 1) ¿Imaynatá Jehová nisqanta juntʼarqa Adanwan Evawan juchallikojtinkupis? 2) ¿Imastataj Jehová nisqasninmanta juntʼanña? (“Jehovaqa nisqanta juntʼanpuni” nisqa recuadrota qhawariy).

⁵ Jehovapi atienekuyta atinchej imajtinchus payqa nisqanta juntʼanpuni. Diosqa ‘jallpʼata mana qhasipajchu ruwarqa’, payqa munarqa chaypi ‘runas tiyakunankuta’ (Isa. 45:18, 19). Jinapis Adanwan Evawanqa, paypa contranpi oqharikusqankurayku wañunanku karqa. Ajina kajtin, ¿niñachu Diospa munaynin juntʼakunman karqa? Mana. Jehová nisqanta juntʼanantaqa ni ima jarkʼayta atinmanchu (Isa. 46:10, 11). Payqa munarqa kay jallpʼaman cheqan runas juntʼanankuta, chaytaj mana cambiarqachu. Chayrayku saqerqa Adanwan Evawan wawasniyoj kanankuta. Jesustataj kachamorqa Adanpa wawasninta salvananpaj. Ajinamanta wiñaypaj kausakuyta atinankupaj (Juan 3:16).

CHEQA KAJTA PARLAJ DIOSQA NISQANTA JUNTʼANPUNI

6. ¿Imatá Jehová nerqa Adanwan Evawan contranpi oqharikusqankutawan?

⁶ ¿Pitaj Adantawan Evatawan tanqarqa Diospa contranpi oqharikunankupaj? ‘Ñaupa katari, pichus sutichasqa Diablo, Satanastaj’ (Apo. 12:9; Gén. 3:4, 5; Juan 8:44).a Jehovaqa imachus Satanaswan pasananta willashaspa, aswan qhepaman chinkachisqa kananta nerqa (Gén. 3:15). Chantapis nillarqataj niraj chinkachisqa kashajtin ashkhas Satanasman ujchaykukunankuta, pay jinataj ruwanankuta. Jinapis Jehovata kasukojkunaqa kanallankutaj karqa.

7. ¿Pikunataj Satanasman ujchaykukunku, chanta imataj paykunawan kanqa?

⁷ ¿Pikunataj Satanasman ujchaykukunku? Diospa contranpi oqharikoj ángeles, mana kasukoj runas ima. Paykunaqa Satanás jinallataj Diosman churanakunku, chayraykutaj Satanaspa mirayninmanta kanku. Jinapis Jehovaqa ninña maykʼajchus Satanasta, payman ujchaykukojkunatawan chinkachinanta (Dan. 2:44; Rom. 16:20).

8. ¿Imatataj Jesús ruwarqa 1914 watapi? (Fotostawan qhawariy).

⁸ ¿Imajtintaj mana iskayrayanchejchu Jehová Satanasta, payman ujchaykukojkunatawan chinkachinanmanta? 1914 watapi Jehovaqa Jesusta Rey kananpaj churarqa. Jesustaj cielopi maqanakorqa Satanaswan demoniosninwan ima. Jesús atipasqanraykutaj Satanaswan demoniosninwanqa kay jallpʼaman wijchʼuchikamorqanku (Apo. 12:7-9). Chay maqanaku cielopi ruwakojtinpis, kay jallpʼapeqa sutʼi reparakorqa chay maqanakupi imachus pasasqan. Imaraykuchus 1914 watamantapacha, Satanasqa tukuy atisqanta ruwarqa astawan ashkha runas pay jina ruwanankupaj. Chayraykutaj kay mundopi kausayqa astawan sajrayarqa. Chayraykuchá Biblia nin: “Ay jallpʼamanta, mar qochamantawan, Diabloqa qankunaman uraykamun manchay phiñasqa, paypaj pisi tiempollaña kasqanta yachaspa”, nispa (Apo. 12:12). Jinapis Jesusqa tumpamantawan 1914 watapi jina ujtawan ‘atipallanqataj’. Payqa Satanasta, payman ujchaykukojkunatawan chinkasqata chinkachenqa (Apo. 6:2). Jesusqa sutʼita rikuchenqa Satanasqa sajrapuni kasqanta, Jehovamanta parlasqantaj llullapuni kasqanta (Sal. 45:4-6). Jinamanta tukuy yachanqanku Jehovaqa cheqa kajta parlaj Diospuni kasqanta (Eze. 38:23).

Primera Guerra Mundial: U.S. National Archives photo; bomba: USAF photo; onqoy: blvdone/stock.adobe.com; chʼajwas: inhauscreative/E+ via Getty Images

JEHOVAQA CHEQA KAJTA MUNAKOJKUNATA TANTASHAN

9. ¿Pikunatataj Jehová kay tiempopi tantashan?

⁹ Chaykamataj Jehovaqa ‘cielopi kaj imasta, kay jallpʼapi kaj imasta Cristopi tantaykushan’ (Efe. 1:10). “Cielopi kaj imas” nispaqa parlashan ajllasqa cristianosmanta. Paykunataqa Jehová ajllarqa Cristowan khuska cielopi kamachinankupaj. ‘Kay jallpʼapi kaj imas’ nispataj parlashan, kay jallpʼapi uj paraisopi wiñaypaj kausakonqanku chaykunamanta. Tukuy chay kamachisnenqa may ocupasqa kashanku wajkunaman cheqa kajta yachachispa, Satanás llulla kasqanta rikuchispa ima.

10. ¿Imatataj Jehová ruwashan runasta religionespa llulla yachachiyninkumanta kacharichinanpaj? (Apocalipsis 14:6, 7).

¹⁰ ¿Imaynatá Jehová cheqa kajta munakoj runasta tantashan? Predicacionnejta. Kay tiempopeqa ni jaykʼaj jina mundontinpi predicakushan (Apocalipsis 14:6, 7 leey). Jehová runaswan sumaj willaykunata willachejtinpis, angelespis yanapakushallankutaj Diospa llajtanpi kʼacha sonqoyoj runasta tantaspa. Satanasqa ashkha watastaña Jatun Babilonianejta, nisunman llulla religionesnejta Jehovamanta llulla imasta yachachishan. Predicaspataj sutʼita rikuchinchej chay yachachisqasnenqa llullapuni kasqanta (Apo. 18:2, 4). Tumpamantawan tukuynin llulla religiones chinkasqata chinkachisqa kanqanku, cheqa kajta parlaj Diosta munakojkunataj Jehovallata jatunchanqanku (Apo. 17:16).

11. ¿Imaynatá reparasunman pikunachus cheqamantapuni Jehovata yupaychashasqankuta?

¹¹ Jehovaqa tukuy laya runasta llajtanman pusamushan: imaymana culturayojkunata, qhapajkunata, wajchasta ima (Apo. 7:9, 10). Paykunaqa ‘sumaj willaykunata’ uyarispa reparanku cheqa kajta tarisqankuta, tukuy sonqotaj Jehovaj llajtanman ujchaykukunku (Mar. 13:10). Kay tiempopi astawan sutʼiraj reparakun pikunachus Jehovata munasqanman jina yupaychashasqanku, pikunatajchus mana. Profeta Malaquías nerqa: “Qankunaqa watejmanta sutʼita reparankichej pichus cheqan runa kasqanta, pitajchus sajra runa kasqanta, pichus Diosta sirvisqanta, pitajchus mana sirvisqantapis”, nispa (Mal. 3:18). Jehovaj kamachisnenqa kausayninkuwan, predicasqankuwan ima sutʼita rikuchinku cheqa kajta parlaj Diosta yupaychasqankuta.

12. ¿Imaynatá predicaspa Diospa munaynin juntʼakunanpaj yanapakunchej?

¹² ‘Diospa Gobiernonmanta sumaj willaykunata’ willaspaqa, Jesuspa kamachisqanta kasukushanchej, uj profeciaj nisqantataj juntʼashanchej (Mat. 24:14; 28:18-20). Predicakusqanrayku mundontinmanta ashkha qharis, warmis ima Jesuspa yachachisqasninman tukunku, cheqa kajta parlaj Diostataj wiñaypaj yupaychayta atinku. Chayta ruwaspa yanapakushanchej Diospa munaynin juntʼakunanpaj. Chaytaj may sumajpuni.

JEHOVAQA NISQANTA JUNTʼANQAPUNI

13. ¿Pikunatataj Satanás astawan urmachiyta munan, chanta imaraykutaj?

¹³ Satanasqa yachan mundon tukuchisqa kananpaj “pisi tiempollaña kasqanta”. Chayraykutaj may phiñasqa kashan (Apo. 12:12, 13). ¿Pikunatataj astawan Satanás urmachiyta munan? Ajllasqa cristianosta. Paykunaqa “Diospa kamachisqasninta kasukunku, Jesusmantataj willanankupaj kamachisqa kanku” (Apo. 12:17; 14:12). Satanasqa urmachiyta munallantaj ajllasqa cristianosta yanapajkunata.

14. ¿Imataj kanqa Satanás Diospa llajtanta chinkachiyta munajtin? (Dibujotawan qhawariy).

¹⁴ Jatun Babilonia chinkachisqa kasqantawan, Satanasman ujchaykukojkunaqa Diospa llajtanta chinkachiyta munanqanku. Chaypitaj Armagedón guerra qallarenqa (Apo. 16:13, 14, 16). Jesuswan soldadosninwanqa Jehovaj kamachisninta salvanqanku, Satanaspa mundonmanta puchojkunatataj chinkasqata chinkachenqanku (Apo. 19:19-21). Ajinamanta tukuy sajra runas, llullakojkuna ima chinkachisqas kanqanku (Apo. 21:8). Tukuytaj yachanqanku Diosqa cheqan kajtapuni ruwasqanta, cheqa kajtapunitaj parlasqanta.

15. ¿Imaraykutaj Jehová imatachus aswan qhepaman ruwananta nisqanta juntʼananmanta mana iskayrayanchejchu? (Isaías 65:16, 17; dibujotawan qhawariy).

¹⁵ Kay mundoqa manchay tʼaqanasqa kashan, Jehovaj kamachisnintaj pay yanapasqanrayku sumaj ujchasqas kashanku. Jehovaqa cheqa kajta munakojkunata tantashan, nitaj ni ima jarkʼayta atinchu llajtanta, paypaj imatachus ruwasqankutapis bendecinanta (Isaías 65:16, 17 leey). Jehovaqa imatachus aswan qhepaman ruwananta nisqanta juntʼanqapuni. ¿Imaraykutaj chaymanta mana iskayrayanchejchu? Apóstol Pablo Romanos 8:38, 39 versiculospi niwarqanchej: “Ni wañuypis, ni kausaypis, ni angelespis, ni gobiernospis, ni kaypi kaj imaspis, ni jamoj imaspis, ni atiykunapis, ni patapi kaj imaspis, ni urapi kaj imaspis, nitaj waj ruwasqa kaj imaspis tʼaqayta atiwasunmanchu Diospa munakuyninmantaqa. Chay munakuytaqa Dios rikuchin Señorninchej Cristo Jesusnejta”, nispa.

16. ¿Imaraykutaj Jehová Diospi tukuy sonqoykiwan atienekunki?

¹⁶ Ashkha imasrayku cheqa kajta parlaj Diospi atienekuyta atinchej. Payqa Ruwawajninchej, mayta munakuwanchej, tukuy nacionesmanta may chhika runastataj tantashan payta munasqanman jina yupaychanankupaj (Isa. 60:22; Zac. 8:23). Chantapis Jehovaqa nisqasninta juntʼanpuni. Yachanchejtaj tumpamantawan Satanasta, llullakusqasnintawan chinkachinanta. Chayrayku David jina ninchej: “Jehová Diosqa jatunchasqa kachun […]. Paylla tʼukuna imasta ruwan. Sumaj sutenqa wiñaypaj jatunchasqa kachun. Jatun kaynintaj jallpʼantinman juntʼaykuchun”, nispa (Sal. 72:18, 19).