¿Imajtintaj necesitanchej kacharichisqa kayta?

1, 2. ¿Imajtintaj necesitanchej kacharichisqa kayta? (Romanos 7:22-24; dibujotawan qhawariy).

WASI urmaykusqanrayku chay ukhupi pʼampaykuchikoj runapi piensarina. Sapallanmantaqa mana llojsimuyta atinchu, mana wañunanpajqa pipis orqhonanta mayta necesitashan. Chayrayku qhaparikuspa pipis salvanallantaña suyakushan.

² Noqanchejpis ajinallapitaj rikukushanchej. ¿Imajtin? Adanqa Diosta mana kasukusqanrayku juchasapa runaman tukorqa, noqanchejpis wawasnin kasqanchejrayku juchasapasllataj kanchej. Juchata herenciata jina japʼisqanchejrayku juchawan pʼampasqa jinallataj kashanchej, necesitanchejtaj pipis chaymanta kacharichinawanchejta. Apóstol Pabloqa Romanosman Cartanpi nerqa jucharayku presos jina kashasqanchejta (Romanos 7:22-24 leey). Chay cartanpi rogakorqa “¿pitaj wañuyman pusaj cuerpoymanta kacharichiwanqari?” nispa. Payqa Adanmanta juchata japʼisqanrayku juchawan pʼampasqa jina kasharqa, chaytaj wañuyman apasharqa (Rom. 6:23). Noqanchejpis ajinallapitaj kashanchej, necesitanchejtaj pillapis chaymanta kacharichinawanchejta.

3. ¿Ima kinsa imaspitaj kacharichisqa kasqanchej yanapawanchej?

³ Apóstol Pabloqa jucharayku imaynachus kashasqanmanta parlaytawan, sumaj suyakuymantañataj parlarqa. “¿Pitaj wañuyman pusaj cuerpoymanta kacharichiwanqari?” niytawan, “Diosman graciasta qoni. Imaraykuchus paymin kacharichiwan Señorninchej Jesucristonejta” nispa nerqa (Rom. 7:25). Chayta nispaqa Jesuspa wañuyninnejta kacharichisqa kasqanchejmanta parlasharqa.a Kacharichisqa kasqanchejqa kay kinsa imaspi yanapawanchej: 1) Juchasninchejmanta perdonasqa kayta atinchej. 2) Mana pantayniyoj runasman tukuyta atinchej. 3) Dioswan allinyakuyta atinchej. Chay kinsa imasta ukhuncharishaspa “suyakuyta qoj” Diosninchejta astawan munakusunchej, astawantaj Jesusta agradecekusunchej paynejta “preciowan kacharichisqa” kasqanchejmanta (Rom. 15:13; Col. 1:14).

JUCHASNINCHEJMANTA PERDONASQA KAYTA ATINCHEJ

4, 5. ¿Imaraykutaj tukuy necesitanchej kacharichisqa kayta? (Eclesiastés 7:20).

⁴ Juchasninchejmanta perdonasqa kanapajqa tukuy necesitanchej kacharichisqa kayta. Tukuypis pantaj runas kanchej, chayrayku parlasqanchejwan ruwasqanchejwan pantanchejpuni (Eclesiastés 7:20 leey). Wakin juchasqa allin jatun juchaspuni kanku. Moisespa Leynin nisqanman jina, pikunachus qhenchachakojkuna, runata wañuchejkunapis wañuchisqa kananku karqa (Lev. 20:10; Núm. 35:30, 31). Wakin juchastaj mana chaykama jatuchej juchaspunichu kanku, jinapis juchasllapuni kanku. Davidqa nerqa: “Allinta qhawarikusaj, ama parlaspa juchallikunaypaj”, nispa (Sal. 39:1). Chaypi reparanchej parlaspapis juchallikusqanchejta (Sant. 3:2).

⁵ ¿Maykʼajllapis nerqanchejchu “amallapis chayta ruwaymanchu karqa”, “amallapis chayta niymanchu karqa” nispa? Tukuypis chayta nerqanchejpuni. Bibliaqa nin: “Sichus ninchej ‘mana juchayojchu kanchej’ nispa chayqa, noqallanchejtaj chʼaukiyakushanchej, cheqa kajtaj mana noqanchejpichu kashan” (1 Juan 1:8).

6, 7. ¿Imaraykutaj Jehová juchasninchejta perdonayta atiwanchej? (Dibujotawan qhawariy).

⁶ Jehovaqa cheqan kajtapuni ruwasqanrayku mana ajinallamanta juchasninchejta perdonawasunmanchu karqa. Juchasninchejta perdonananpajqa uj pago necesitakorqa. Jinapis payllataj chayta pagarqa. ¿Imaynata? Wawanta kachamorqa wañuyninwan salvanawanchejpaj (Efe. 1:7). Ajinata juchasninchejta perdonasqanrayku, ¿kikillanchu paypaj kanman juchallikunanchej, mana juchallikunanchejpaj kallpachakunanchejpis? Mana, payqa juchata chejnikun (Isa. 59:2).

⁷ Moisespa Leyninpeqa nerqa israelitas juchasninkumanta perdonasqa kanankupaj, animalesta ofrendata jina jaywananku kasqanta (Lev. 4:27-31; 17:11). Chaypi yachakorqa runasqa juchasninkumanta perdonasqa kanankupaj mana animalesllatachu jaywananku kasqanta, manachayqa aswan jatun ofrendata necesitasqankuta. Chay ofrendataj karqa Jesuspa wañuynin, chaynejtataj may sumaj bendiciones runaspaj kanan karqa. Jehovaqa Jesuspa wañuyninwan pagakusqanraykulla juchasninchejta perdonayta atinman karqa. Pabloqa ujnin cartanpi Corintomanta cristianosman nerqa Jesuspa wañuynin may valorniyoj kasqanta. Ñaupajta jatun juchasta ruwasqankuta niytawan, kayta nerqa: “Kunantaj qankunaqa llimphuchasqaña kankichej, Diospaj tʼaqasqaña. Chantapis Señor Jesucristoj sutinpi, Diosninchejpa espiritunnejta ima, cheqan runaspajña qhawasqa kankichej”, nispa (1 Cor. 6:9-11).

8. ¿Imapitaj niraj Jesuspa Wañuyninta Yuyarinapaj tantakuyman rishaspa tʼukurisunman?

⁸ Kay wata niraj Jesuspa Wañuyninta Yuyarinapaj tantakuyman rishaspa, piensarisunman imaynatachus Jehovaj perdonnin yanapawasqanchejta. Sichus ñaupa juchasninchejmanta pesachikunchejña chayqa, Jesús kausayninta qosqanrayku manaña saqenanchejchu tiyan kutin kutinta sonqonchej juchachanallawanchejtapuni. Pero ichapis Jehovaj perdonninta nipuni japʼikuyta atinchejchu, chayraykutaj nisunman: “Jehová perdonawan chaypis, noqaqa manapuni perdonakuyta atinichu”, nispa. Jinapis amapuni qonqakunachu pichus perdonajqa Jehová kasqanta, juzgananpajtaj Wawanta churasqanta. Mana noqanchejtachu chayta ruwananchejpaj churawanchej. Chayrayku mana noqanchejchu ninanchej kashan pitachus Jehová khuyakunanta. Biblia nin: ‘Sitajchus kʼanchaypi purishanchej chayqa, Wawan Jesuspa yawarnin tukuy juchamanta llimphuchawanchej’, nispa (1 Juan 1:6, 7). Imaynatachus Biblia waj imasta yachachisqanpi creenchej, ajinallatataj chay yachachiypipis creenanchej tiyan. Jesuspa wañuyninwan pagakusqanrayku Jehovaqa khuyakuwanchej, Palabrantaj yachachiwanchej ‘perdonananpaj wakichisqa’ kasqanta (Sal. 86:5).

MANA PANTAYNIYOJ RUNASMAN TUKUYTA ATINCHEJ

9. ¿Bibliapi ima niytataj munan jucha palabra? (Salmo 51:5).

⁹ Bibliapeqa jucha palabrata oqharin mana sajra imasta ruwasqanchejmanta parlanallanpajchu, manachayqa mamanchejpa wijsanpi rikhurisqanchejmantapacha juchasapa kasqanchejmanta parlananpajpis (Salmo 51:5 leey). Juchasapa kasqanchejtaj mana sajra kajta ruwanallapajchu aysawanchej, manaqa cuerponchejpis manaña allinta funcionayta atinchu imaynatachus Jehová ruwawarqanchej ajinataqa. Chayrayku onqonchej, machuyanchej, wañunchej ima. Chaynejta uña wawitaspis niraj ima sajrata ruwashaspa onqonku, wañunku ima. Chaynejllatataj sajra runaspis bueno runaspis sufrinku, wañunku ima. Adanmanta rikhurisqanchejrayku tukuy ajinapi rikukunchej.

10. ¿Imaynataj Adanwan Evawan kasharqanku juchallikuspa pantaj runasman tukojtinku?

¹⁰ ¿Imaynataj Adanwan Evawan kashankuman karqa juchallikusqankurayku pantaj runasman tukusqankutawan? Diospa leynin “sonqonkupi qhelqasqa” kasqanrayku, mana kasukusqankutawankama chay rato sonqonkoqa juchachayta qallarerqa (Rom. 2:15). Reparakorqanku ukhunkupi imachá cambiasqanta. Pʼenqakuyta qallarisqankurayku cuerponkuta tapakorqanku, Diosmantataj suwas jina pakakorqanku (Gén. 3:7, 8). Chay kutimantapacha sonqonku juchacharqa, llakikorqanku, manchikorqanku, sonqonku nanarqa, pʼenqakorqanku ima. Ajinallapunitaj karqanku wañupunanku pʼunchaykama (Gén. 3:16-19).

11. ¿Imaspitaj rikukunchej pantaj runas kasqanchejrayku?

¹¹ Pantaj runas kasqanchejrayku tukuypis ñaupa tatasninchej jinallataj rikukunchej. Chayrayku sufrinchej, llakikunchej ima. Kausayninchej allinyananpaj mayta kallpachakojtinchejpis wakin imitasllata allinchayta atinchej. Bibliaqa nin mana noqallanchejchu, manaqa tukuy runas “qhasi manakajman churasqa” kasqanchejta (Rom. 8:20). Gobiernosqa tukuy imata ruwanku contaminacionta, suwasta, wajchayayta, guerrasta ima chinkachinankupaj. ¿Atinkuchu chinkachiyta? Wakin imitasta allinchajtinkupis, mana chinkachiyta atinkuchu. Jinapis Jesús wañuyninwan kacharichiwasqanchejrayku sumaj suyakuyniyoj kanchej.

12. Jesús kausayninta qosqanrayku, ¿ima sumaj suyakuyniyojtaj kanchej?

¹² Jesús wañusqanrayku suyakushanchej “Diospa tukuy ima ruwasqan” juchaj atiyninmanta, wañuymantawan “kacharichisqa” kananta (Rom. 8:21). ¿Ima niytá munan chay? Paraisopi manaña pantaj runaschu kajtinchej manaña onqonanchejta, niña llakikunanchejta, niña phutikunanchejta, niña manchikunanchejta, niña sonqonchej nananawanchejta, nitaj pʼenqakunanchejta. Chaypeqa kamachiwasunchej Jesucristo, “Allin Kausayta Apamoj Kuraj Kamachej”, kausaynintataj kacharichinawanchejpaj qorqa. Payqa yanapawasunchej jallpʼanchejta sumajta cuidananchejpaj, allintataj kausakunanchejpaj (Isa. 9:6, 7).

13. ¿Imapitaj tʼukurillasunmantaj niraj Jesuspa Wañuyninta Yuyarinapaj tantakuyman rishaspa?

¹³ ¿Imaynataj kausayninchej kanqa manaña pantaj runaschu kajtinchej? Sapa día kusisqallaña rijchʼarisun. Manaña llakikusunchu familiaresninchej, noqanchejpis yarqhayta pasananchejmanta, onqonanchejmanta chayri wañunanchejmanta. Chantapis ñaupaqenchejpi kashan chay suyakuymanta sinchʼita chʼipakojtinchej, kunanña sonqo tiyasqas kasunman. Chay suyakoyqa kausayninchejpi “barco sayachina gancho jina, mana iskayrayaspa sinchʼita sayanapaj yanapawanchej” (Heb. 6:18, 19). Imaynatachus uj barco sayachina gancho barcota sinchʼita sayachin, ajinallatataj suyakuyninchejpi tʼukurisqanchejqa creeyninchejta astawan sinchʼiyachin, yanapawanchejtaj ima pruebatapis aguantanapaj. Sutʼita yachanchej Jehovaqa ‘sonqo kʼajaywan payta maskʼajkunata tʼinkasqanta’ (Heb. 11:6). Jesús wañuyninwan kacharichiwasqanchejraykulla kunan sonqochasqa kanchej, aswan qhepamantaj sumaj imas kananta suyakushanchej.

DIOSWAN ALLINYAKUYTA ATINCHEJ

14. Adanwan Evawan juchallikusqankurayku, ¿imataj runaswan karqa?

¹⁴ Adanwan Evawan juchallikusqankumantapacha, runasqa Diosmanta karunchasqa kashanchej (Col. 1:21). Bibliaqa nin Diospa enemigosninman tukusqanchejta (Rom. 8:7, 8). ¿Imajtin? Jehová mana pantayniyoj kasqanrayku. Cheqan kamachiykunasninrayku mana juchataqa qhawakullanmanchu. Bibliaqa Jehovamanta nin: “Ñawisniykeqa manchay llimphus kanku mana allin kajta qhawanallaykipajqa. Sajra kajtaqa mana qhawakullawajchu”, nispa (Hab. 1:13). Reparanchej jina juchaqa maytapuni Diosmanta karunchawanchej. Manachus Dioswan allinyakunanchejpaj uj puente kanman chayqa, ni mayqenninchej Diospa amigosnin kayta atisunmanchu. Dioswan allinyakunanchejpaj puentetaj Jesús wañuyninwan kacharichiwasqanchej.

15. ¿Imaynatataj Jesuspa wañuynin yanapawanchej watejmanta Dioswan allinyakunapaj?

¹⁵ Biblia nin: “Jesusqa juchasninchejrayku jaywasqa karqa Dioswan allinyakunanchejpaj”, nispa (1 Juan 2:2). ¿Imaynatá Jesuspa wañuynin runasta yanapawanchej watejmanta Jehovaj amigosnin kananchejpaj? Jehová cheqan kajtapuni ruwasqanrayku paywan allinyakunanchejpaj uj pago necesitakorqa. Jesuspa wañuynin chay preciota pagasqanraykulla, Jehovaqa saqewanchej paywan allinyakunanchejta (Rom. 3:23-26). Jehovaqa ñaupa tiempopi payta tukuy sonqo sirverqanku chaykunatapis, Cristoj wañuyninnejta cheqan runaspajña qhawarqa (Gén. 15:1, 6). ¿Imajtin? Wawan Jesús wañuyninwan chay preciota paganantapuni yachasqanrayku (Isa. 46:10). Reparanchej jina Jesuspa wañuynin punkuta jina kicharin runas Dioswan allinyakunanchejpaj.

16. ¿Imapitaj tʼukurillasunmantaj niraj Jesuspa Wañuyninta Yuyarinapaj tantakuyman rishaspa? (Dibujotawan qhawariy).

¹⁶ Dioswan allinyachisqa kasqanchej, ¿imaynatataj yanapawanchej? Jesús yachachisqanman jina, noqanchejpis Jehovata ‘Tatáy’ niyta atinchej (Mat. 6:9). Chantapis Diosninchej amigonchej kasqanta niyta atinchej. Pantaj runas kasqanchejrayku sapallanchejmantaqa mana chay iskay imasta niyta atisunmanchu. Jesuspa wañuyninraykulla chayta niyta atinchej. Chayrayku chayta ruwananchej tiyan kʼumuykukoj sonqowan, sonqomantapacha respetaspataj. “Diosqa munallarqataj tukuy imata pay kikinwan Cristonejta allinyachiyta”. “Chay allinyachiypaj Cristoqa ñakʼarina kʼaspipi wañuspa yawarninta jichʼarqa” (Col. 1:19, 20). Chayrayku pantaj runas kaspapis Dioswan sumaj amigos kayta atinchej.

JEHOVAJ KHUYAKUYNINTA RIKUCHIWANCHEJ

17. ¿Imaynatá Jesuspa wañuynin Jehová may khuyakuyniyoj kasqanta rikuchin? (Efesios 2:4, 5).

¹⁷ Jesuspa wañuynenqa sutʼita reparachiwanchej “Diosqa khuyakuyninpi may qhapaj” kasqanta. Diosqa “kausayta qowarqanchej, juchasninchejpi wañusqa jina kashajtinchejpis” (Efesios 2:4, 5 leey). “Wiñay kausayta japʼinankupaj allin sonqoyoj” kajkunaqa, reparakunku juchata herenciata jina japʼisqankurayku juchawan pʼampasqa jina kashasqankuta, chaymantataj kacharichisqa kayta necesitasqankuta (Hech. 13:48). Chayrayku qhaparikuspa yanapata mañakunku, Jehovataj Gobiernonmanta sumaj willaykunanejta yanapan payta, Wawantapis rejsinankupaj (Juan 17:3). Ichapis Satanasqa yuyarqa Adanwan Evawan Diosta mana kasukusqankurayku Jehová manaña munayninta juntʼananta. Jinata yuyarqa chayqa, mayta pantarqa.

18. Jesuspa wañuyninpi tʼukurispa, ¿imatataj mana qonqananchejchu tiyan?

¹⁸ Jesuspa wañuynin sapa ujninchejta yanapawasqanchejpi tʼukurejtinchejpis, mana chaychu aswan importante, chayta mana qonqananchejchu tiyan. Jehovaqa mana salvanallawanchejpajchu Wawanta kachamorqa, manachayqa Satanás imastachus Edén huertapi nisqan llulla kasqanta rikuchinanpaj (Gén. 3:1-5, 15). Jesús wañusqanrayku Jehovaqa sutinta llimphuchan, Satanás paymanta millay imasta parlasqantaj mana ajinachu kasqanta rikuchin. Chantapis Jesuspa wañuyninwan juchamanta, wañuymanta ima kacharichiwanchej. Chaywantaj rikuchin munakuyniyoj Dios kasqanta. Jatun khuyakuyninraykutaj pantaj runas kajtinchejpis, Satanás llulla kasqanta rikuchinanpaj yanapakunanchejta saqewanchej (Pro. 27:11). Maytapuni agradecekunchej Jesús noqanchejrayku wañusqanmanta. Chanta, ¿imaynatá rikuchisunman may agradecesqa kasqanchejta? Chayta qhepan yachaqanapi yachakusunchej.