¿Imaynatataj Jesuspa wañuyninmanta agradecekuwaj?

1, 2. Jesuspa wañuyninpi tʼukurisqanchej, ¿imata ruwananchejpajtaj aysawanchej, chanta imarayku? (2 Corintios 5:14, 15; dibujotawan qhawariy).

KAYPI tʼukurina: Wasi urmaykusqanrayku chay ukhupi pʼampaykusqa kashasunman. Ajina kashajtinchejtaj uj runa orqhowasunman. ¿Maytacharí payta agradecekusunman salvawasqanchejmanta? Mana noqallanchejtachu salvawajtinchejpis, maytapuni payta agradecekusunman salvawasqanchejmanta, nisunmantaj ni jaykʼaj chay ruwasqanta qonqakunanchejta.

² Ñaupaj yachaqanapi yachakorqanchej jina, pillapis juchamanta kacharichinawanchejta necesitarqanchej. ¿Pitaj kacharichiwarqanchej? Jehová Diosninchej, Wawanta noqanchejrayku qospa. Jesuspa wañuynintaj kay kinsa imaspi yanapawanchej: 1) juchasninchejmanta perdonasqa kayta atinchej, 2) mana pantaj runasman tukuyta atisunchej, 3) Dioswan allinyakuyta atinchej. Chayraykutaj paraisopi wiñaypaj kausakuyta atisunchej. Jesusqa niraj kay jallpʼaman jamushaspa munakuwarqanchejña, kausayninta noqanchejrayku qospataj chay jatun munakuyninta rikuchiwarqanchej (Pro. 8:30, 31). Chay munakuymanta parlaspa apóstol Pablo nerqa: “Cristoj munakuynenqa tanqawayku”, nispa (2 Corintios 5:14, 15 leey). ¿Imatá chaywan nisharqa? Jesuspa wañuyninpi tʼukurisqanchejqa sonqonchejta aysanawanchej kasqanta payman agradecekunanchejpaj, chay ruwasqantataj ni jaykʼaj qonqakunanchejpaj.

3. ¿Imajtintaj mana tukuychu kikin imasta ruwasunman Jesuspa wañuyninmanta agradecekunapaj?

³ ¿Imaynatá sapa ujninchej Jesuspa wañuyninmanta agradecekusunman? Ichapis mana tukuychu kikinta kutichisunman. Kaywan kikincharina: kinsa runas kikin lugarman chayayta munankuman. Jinapis sapa ujninku waj llajtapi kashankuman. Chayrayku chay lugarman chayanankupajqa mana kikin ñantachu japʼenqanku. Noqanchejpis Jesuspa wañuyninmanta agradecekuyta munanchej. Jinapis agradecekunanchejpajqa mana tukuychu kikin imasta ruwasun. ¿Imajtin? Chayqa kashan imaynachus kunitan Jehovawan kashasqanchejmanta. Chayrayku kay yachaqanaqa kinsa grupo runaspaj kashan: 1) Bibliamanta yachakojkunapaj, 2) bautizasqa cristianospaj, 3) Jehovamanta karunchasqa kajkunapaj.

BIBLIAMANTA YACHAKOJKUNA

4. ¿Imaynatataj Jehová Bibliamanta yachakojkunaj sonqonkuta allinta qhawaykurin?

⁴ ¿Bibliata estudiashankichu? Chayqa rikuchin Jehová amigon kanaykipaj yanapashasusqanta (Juan 6:44; Hech. 13:48). Bibliaqa nin: “Sonqostataj Jehová Dios allinta qhawaykurin”, nispa. Chayqa niyta munan paymanta yachakunaykipaj kallpachakushasqaykita sumajta reparasqanta, kamachiykunasninman jina kausakunaykipaj cambiosta ruwasqaykimantataj mayta kusikusqanta (Pro. 17:3; 27:11). Wawanta qosqanraykulla sumaj amigon kayta atinki (Rom. 5:10, 11). Amapuni ni jaykʼaj chayta qonqakuychu.

5. ¿Imaynatá Bibliamanta yachakojkuna Filipenses 3:16 nisqanman jina ruwankuman?

⁵ ¿Imaynatá rikuchiwaj Jesuspa wañuyninmanta agradecekusqaykita? Ujqa kanman apóstol Pabloj yuyaychasqanman jina ruwaspa. Payqa filipensesman nerqa: “Maykamachus ñauparerqanchej, chayman jinallapuni maychus kajta purinachej”, nispa (Fili. 3:16). Chaywan nisharqa imaynatachus Diosta yupaychaypi ñauparishanki, ajinata ñauparinallaykitapuni. Amapuni saqeychu kausayman pusaj ñanmanta imapis orqhosunanta (Mat. 7:14; Luc. 9:62).

6. ¿Imatá Bibliamanta yachakojkuna ruwankuman mana cambiayta atispa? (Deuteronomio 30:11-14; fototawan qhawariy).

⁶ Bibliamanta ujnin yachachiyta, ¿nichu japʼikuyta atishallanki? Astawan chaymanta ukhunchariy, Jehovamantapis mañakuy aswan sumajta entiendenaykipaj yanapasunanta (Sal. 86:11). Ni chaywanpis japʼikuyta atillankichu chayqa, ichapis aswan qhepaman watejmanta qhawaykurillawaj. Jinapis chaykamaqa Bibliata estudiallaypuni. Jehovaj chejnisqanta mana saqeyta atishallankichu chayrí, ¿imatá ruwawaj? Yuyarikuy Jehovaqa pantaj runas kasqanchejta yachasqanta, nitaj mana ruwayta atinanchejtaqa mañawasunmanchu. Chayrayku atinkipuni kamachiykunasninta kasukuyta (Deuteronomio 30:11-14 leey). Jehovaqa yanapasunanta nin (Isa. 41:10, 13; 1 Cor. 10:13). Chayrayku ama saykʼupuychu. Chay yuyaylla kanaykimantaqa, Jehová ima allin imastachus qanrayku ruwasqanpi piensariy. Chaykunamanta ujnenqa Wawanta noqanchejrayku kachamusqan kashan. Jehovata astawan munakusqaykiman jina reparanki ‘kamachisqasninta kasukuy atina jinalla’ kasqanta (1 Juan 5:3).a

7. Testigo tatasniyoj jóvenes, ¿imapitaj tʼukurinkuman?

⁷ Ichapis tatasniyki testigos kanku, Bibliamantataj yachachishasunku. Jina kajtenqa qanpis Bibliamanta yachakojllataj kanki. Tataspata aswan sumaj estudiosninkoqa wawasnillankutaj kanku. Jinapis joven, yuyarikuypuni Biblia “Diosman qayllaykuychej, paytaj qankunaman qayllaykamusonqachej” nispa nisqanta (Sant. 4:8; 1 Cró. 28:9). Qanrajchus ñaupajta Jehovaman qayllaykunki chayqa, paypis qayllaykamullasonqataj. Jehovaqa mana familiayki testigos kasqankuraykuchu payman pusashasunki, manaqa amigon kanaykita munasqanrayku. Chanta, ¿imatá Jehová ruwarqa amigon kanaykipaj? Wawanta qorqa. Chay regalota qosusqanmantaqa amapuni qonqakuychu (Rom. 5:1, 2). Niraj Jesuspa Wañuyninta Yuyarinapaj tantakuyman rishaspa, ¿nichu tʼukuriwaj imatachus Jehovawan Jesuswan qanrayku ruwasqankupi? Chayqa yanapasonqa Jehovapaj astawan ruwayta munanaykipaj, chayta ruwanaykipajtaj astawan kallpachakunaykipaj. Chaywan rikuchinki Jehovata maytapuni agradecekusqaykita qanrayku Wawanta qosqanmanta.b

BAUTIZASQA CRISTIANOS

8. ¿Imaynatataj bautizasqa cristianos rikuchinkuña Jesuspa wañuyninpi creesqankuta?

⁸ Bautizasqaña kanki chayqa, ashkha imaynasmantaña rikuchinki Jesuspa wañuyninpi creesqaykita. Kausayniykita cambiarqanki Jehovaman qayllaykunaykipaj, kamachiykunasnintapis kasukunaykipaj. Jesús runasman predicamunata, discipulosninmantaj tukuchimunata kamachisqantapis kasukushankiña. Jehovaman kausayniykita qopuspa bautizakunkiña. Wajkunapis ichá Diosta sirvisqaykirayku churanakusorqanku (2 Tim. 3:12). Aguantasqayki, creeyniyoj kasqaykipis rikuchin Jehovata munakusqaykita, Wawanta qosqanmantataj mayta agradecekusqaykita (Heb. 12:2, 3).

9. ¿Imajtintaj bautizasqa cristianos allinta qhawarikunanchej tiyan?

⁹ Bautizasqaña kanchej chaypis, allinta qhawarikunanchej tiyan. Ichapis tiempo pasasqanman jina Jesús kausayninta qosqanmanta agradecekuyta qonqapusunman. Efesomanta cristianoswan imachus pasasqanpi piensarina. Aguantasqankumanta Jesús felicitajtinpis, congregacionman nerqa: “Chaywanpis kayta contraykipi nini: Qanqa manaña ñaupajta jinachu Diosta munakunki”, nispa (Apo. 2:3, 4). Cristianosqa pisimanta pisi iskay sonqollaña Diosta yupaychasunman, chayta Jesuspa nisqanpi reparanchej. Ichapis orakushasunman, reunionesman, predicacionmanpis rishasunman. Jinapis chay imasta ruwashasunman ruwananchej kasqanraykulla, niñataj munakusqanchejraykuchu. ¿Imataj yanapawasunman niña ñaupajta jinachu Jehovata munakushasqanchejta reparakunchej chay?

10. ¿Imaynatá 1 Timoteo 4:13, 15 nisqanman jina ruwasunman?

¹⁰ Apóstol Pabloqa Timoteota nerqa imayna sonqowanchus Diosta yupaychashasqanpi ‘tʼukurinanta’, Diosta allinta yupaychananpajtaj kallpachakunallantapuni (1 Timoteo 4:13, 15 leey). ¿Imaynatá noqanchejpis chay yuyaychasqanman jina ruwasunman? Tʼukurisunman imayna sonqowanchus Diosta sirvishasqanchejpi. Ajinamanta reparasun imastawanchus ruwananchej kasqanta Diosta tukuy sonqollapuni sirvinapaj (Rom. 12:11; Biblia de estudio nisqapi chay versiculoj sutʼinchayninta leeriy, “Que el espíritu los llene de fervor”). Kallpachakusunman tantakuykunapaj aswan sumajta wakichikunapaj, chaypitaj aswan sumajta uyarinapaj. Bibliata sapallanchejpi estudiasqanchejwan aswan sumajta yanapachikunapajtaj, chʼin lugarcitosta maskʼasunman estudianapaj, tʼukurinapajpis. Chay imasta ruwallasunpuni chayqa, Jehová Wawanta qosqanmanta, waj imasta qowasqanchejmantapis astawan agradecekusunchej. Ajinamanta agradecekusqanchejqa astawan laurarenqa, imaynatachus ninaman llantʼata yapajtinchej astawan laurarin ajinata. Chantapis Jesuspa Wañuyninta Yuyarinapaj tantakuy ñaupaj semanasnin, tʼukurisunman Jehovaj testigosnin kasqanchejrayku ima sumaj imastachus japʼisqanchejpi. Ajinamanta Jesuspa wañuyninmanta astawan agradecekusunchej, chaynejllata Jehovaj amigosnin kayta atisqanchejrayku.

11, 12. Niña Jehovata tukuy sonqochu sirvishanchej chay, ¿ninayanchu Jehová niña espíritu santonwan yanapashawasqanchejta? (Fototawan qhawariy).

¹¹ Manaña ñaupajta jina Jehovata tukuy sonqochu sirvishasqaykita reparakunki chayqa, ama desanimakuychu. Nillataj yuyaychu Jehová niña espíritu santonwan yanapashasusqanta. Yuyarikuy imatachus apóstol Pablo uj kuti predicasqanmanta nisqanta. Pay nerqa: “Mana ruwayta munajtiypis, chaytaqa ruwanaypuni tiyan. Imaraykuchus chaypaj kamachisqa kani”, nispa (1 Cor. 9:17). Chaywan, ¿ima niytá munasharqa?

¹² Pabloqa wakin kutis desanimasqa kasqanrayku mana tukuy sonqochu predicarqa. Jinapis predicallarqapuni. Noqanchejpis kikillantataj ruwana. Mana sonqonchej aysawajtinchejpis kallpachakunallapuni cheqan kajta ruwanapaj. Jehovamanta mañakuna ‘ruwayta munananchejpaj, ruwayta atinanchejpajtaj’ yanapanawanchejta (Fili. 2:13). Imaschus Jehovaj qayllallanpipuni kanapaj yanapawanchej chay imasta ruwanallapuni. Chayqa yanapawasunchej Jehovata watejmanta munakunapaj, tukuy sonqotaj payta sirvinallapajpuni.

13. ¿Imatataj ruwasunman “creeypi sinchʼitachus manachus” sayashasqanchejta yachanapaj?

¹³ Biblia 2 Corintios 13:5 versiculopi kayta yuyaychawanchej: “Allinta qhawarikullaychejpuni, creeypi sinchʼitachus manachus sayashasqaykichejta yachanaykichejpaj. Allinta qhawarikullaychejpuni imayna runachus kasqaykichejta”, nispa. Chay yuyaychayman jina ruwanapaj wakin kutis kay tapuykunata ruwakusunman: “¿Diospa Gobiernonta kausayniypi ñaupajmanchu churashani? ¿Imaswanchus kusirikunayta ajllasqay rikuchinchu sajra kajta chejnikusqayta? ¿Yanapakushanichu hermanos ukhupi allin kausay kananpaj, ujchasqataj kanapaj?” (Sal. 97:10; Mat. 6:33; Efe. 4:2, 3). Jesuspa Wañuyninta Yuyarinapaj tantakuyta ruwanchej chay diasqa, may sumajpuni kanman chay imaspi piensarinanchej. Jehovawan Jesuswan imatachus noqanchejrayku ruwasqankupi piensarejtinchejqa, astawan sonqonchej aysawasun paykunaman agradecekunapaj, niñataj noqanchejpajchu kausanapaj, manaqa Cristopaj.c

JEHOVAMANTA KARUNCHAKOJKUNA

14. ¿Imaraykutaj wakin cristianos congregacionmanta karunchakapunku?

¹⁴ Wakin cristianosqa killasllataraj chayri watastaña Jehovata tukuy sonqo sirviytawan congregacionmanta karunchakapunku. ¿Imajtin? Wakenqa “kay kausaypa llakiykunasninwan” atipachikusqankurayku niña Jehovata sirviyta atinkuchu (Luc. 21:34). Wakintaj sienterpakaporqanku uj hermano imata nisqanrayku chayri imata ruwasqanrayku (Sant. 3:2). Wakin hermanostaj ichapis jatun juchapi urmarqanku, nitaj yanapachikuyta munallankuchu. Sichus qanpis chay imasrayku chayri waj imasrayku Jehovamanta karunchakorqanki chay, ¿imatá ruwawaj? Jesús kausayninta qosqan, ¿imata ruwanaykipajtaj tanqasonqa?

15. ¿Imaynatá Jehová qhawan paymanta karunchakoj cristianosta? (Ezequiel 34:11, 12, 16).

¹⁵ Paymanta karunchakojkunata imaynatachus Jehová qhawasqanpi tʼukuriy. Jehovaqa mana paykunamanta qonqakunchu. Astawanpis paypajqa chinkasqa ovejitasnin jina kashanku, chayraykutaj maskʼashan. Paykunata tarispataj kutinpunankupaj yanapan, Palabranwantaj alimentan (Ezequiel 34:11, 12, 16 leey). ¿Kikillantatajchu qanrayku ruwashanman? Arí. Kay yachaqanata leesqaykeqa rikuchin Jehovata munakullasqaykitapuni. Payqa qanpi allin kajta rikorqa. Chayraykutaj llajtanman pusamusorqa. Kunanpis qanpi allin kajta rikushallanpuni. Chayraykutaj munan familianman kutinpunaykita.

16. Jehovamanta karunchakojkuna, ¿imatataj ruwankuman Jehovaman kutinpunankupaj? (Fototawan qhawariy).

¹⁶ Jehovaman kutinpuy folletopi kay jina kʼachitu palabrasta nin: “Jehovaqa payman kutinpunaykipaj yanapasonqa. Pay yanapasonqa llakiykunasniykita atipanaykipaj, ama phiñasqallapuni kanaykipaj, nitaj sonqoyki juchachasunanpaj. Ajinamanta hermanoswan khuska watejmanta Jehovata yupaychayta munanki”, nispa. Ancianospis mayta yanapayta munallasunkutaj. Paykunaqa kanku “wayramanta pakakunapaj jina, sinchʼi paramanta pakakunapaj jina” (Isa. 32:2). Allin kanman Jehovaman kutinpunaykipaj imastachus ruwanaykipi piensarinayki (Isa. 1:18; 1 Ped. 2:25). Ichapis uj tantakuyman riwaj, chaypitaj uj ancianowan parlariwaj. Niwajtaj Jehovaman kutinpuyta munasqaykita. Payqa ichapis arreglosta ruwanqa pillapis uj tiempota Bibliata estudiachisunanpaj. Jesús kausayninta qosqanmanta agradecekunaykipaj tukuy imata ruwajtiyki, Jehovaqa bendecisonqapuni.

¿IMATÁ RUWAYTA MUNAWAJ?

17, 18. ¿Imatá ruwasunman Jesuspa Wañuyninta Yuyarinapaj tantakuy ñaupaj diasnin?

¹⁷ Jesusqa nerqa: Diosqa “uj kʼata Wawanta qorqa, ajinamanta pillapis paypi creejqa mana wañunanpaj, manachayqa wiñay kausayniyoj kananpaj”, nispa (Juan 3:16). Jehovaqa Wawanta wañunanpaj kachamusqanrayku juchamanta, wañuymantawan kacharichiyta atiwanchej. Amapuni chaymanta agradecekuyta qonqakunachu (Rom. 3:23, 24; 2 Cor. 6:1). Jesuspa Wañuyninta Yuyarinapaj tantakuy ñaupaj diasnin, tʼukurisunman Jehovawan Jesuswan maytapuni munakuwasqanchejpi. Chayqa tanqawasun chay jinata munakuwasqanchejmanta astawan agradecekunapaj.

¹⁸ Jesús kausayninta qosqanmanta agradecekusqaykirayku, ¿imatataj ruwanki? Mana tukuychu kikinta ruwasunman. Jinapis Jehovaqa kallpachakusqaykita, jallpʼantinpi tukuy kamachisninpa kallpachakusqankutapis bendicenqapuni, pikunachus ‘manaña paykunapajchu kausanku. Astawanqa pichus paykunarayku wañorqa, kausarinporqataj chaypaj’ (2 Cor. 5:15).