Diosta necesitasqanchejta reparakunallapuni

1. ¿Imastataj runas kausanapaj necesitanchej? (Mateo 5:3).

JEHOVAQA yachan runasqa kausanapaj kay imasta necesitasqanchejta: mikhunata, ropata, wasita ima. Mana chay imas kapuwajtinchejqa mana kausayta atillasunmanchu, wañusunman ima. Jinapis Jehovaqa yachallantaj mana chay imasllatachu necesitasqanchejta. Runastaqa ruwawarqanchej payta necesitasqanchejta reparakunanchejpaj jina (Mateo 5:3 leey). Cheqamantapuni kusisqas kayta munanchej chayqa, reparakunanchej tiyan Diosta necesitasqanchejta, paypitaj atienekunallanchejpuni tiyan.

2. ‘Diosta necesitasqankuta reparakojkuna’, ¿imapitaj wajchitasman rijchʼakunku?

² ¿Ima niytá munasharqa Jesús “Diosta necesitasqankuta reparakojkunaqa” nispa? Griego parlaypeqa niyta munan espiritupi wajchas. Chayta aswan sumajta entiendenapaj thanta traposwan vistisqa may wajcha runapi piensarina. Payqa esquinapi khuyayta chukushan, pʼunchay ruphaypi, tutantaj chiripi. Mana mikhunan kapusqanraykutaj allin tullitu. Ajina kasqanraykutaj runasqa mana payman chimpaykuyta munankuchu. Chay wajchitaqa yachan kausaynin allinyananpaj yanapata necesitasqanta. Espiritupi wajchaspis, nisunman Diosta necesitasqankuta reparakojkunapis ajinallapitaj rikukunku. Yachanku kausayninku allinyananpaj Diosta mayta necesitasqankuta. Chayrayku mayta yanapachikuyta munanku ima yanapastachus Jehová payta munakojkunaman qon chay imaswan.

3. ¿Imatataj kay yachaqanapi qhawarisun?

³ Kay yachaqanapi ñaupajta parlarisun fenicia warmimanta. Payqa Jesusmanta rogakorqa yanaparinanta. Qhawarisun Diosta necesitasqankuta reparakojkuna imaynatachus chay warmi jina ruwanankuta. Chaymantataj parlarisun apóstol Pedromanta, apóstol Pablomanta, rey Davidmantawan. Paykunaqa Jehovata necesitasqankuta reparakorqanku.

KʼUMUYKUKOJ SONQO KARQA, MANA SAYKʼUSPA MAÑAKORQA, CREEYNIYOJTAJ KARQA

4. ¿Imatataj fenicia warmi Jesusmanta rogakorqa?

⁴ Uj pacha fenicia warmi Jesusman qayllaykorqa, “warmi wawayta anchataña supay ñakʼarichishan” nispa (Mat. 15:21-28). Chay warmeqa Jesuspa ñaupaqenman qonqoriykukuspa, yanaparinanta mayta rogakorqa. Qhawarina ima kinsa imastachus paymanta yachakuyta atisqanchejta.

5. ¿Imaraykutaj Jesús fenicia warmita yanaparqa? (Dibujotawan qhawariy).

⁵ Fenicia warmeqa kʼumuykukoj sonqopuni karqa. ¿Imajtintaj chayta ninchej? Jesús payta uj alqetuwan kikinchajtin mana phiñakorqachu. Chaypachas mana judío familiasqa ichapis alqetuyojpuni kaj kanku. ¿Imatá noqanchej ruwasunman karqa Jesús ajinata kikinchawajtinchej? ¿Phiñarpakusunmanchu karqa, chay ratotajchu niña yanapata mañakuspa ripusunman karqa? Fenicia warmeqa mana chaytachu ruwarqa. Payqa kʼumuykukoj sonqo karqa, mana saykʼuspataj Jesusmanta kutin kutinta rogakorqa yanaparinanta. ¿Imajtin? Paypi creesqanrayku. Jesusqa repararqa chay warmej creeynenqa may jatun kasqanta, chayraykutaj tʼukunapaj jina yanaparerqa. “Diosqa Israel nacionmanta chinkasqa ovejasllaman kachamuwan” nejtinpis, Jesusqa warmi wawanmanta supayta qharqoporqa.

6. ¿Imatá yachakunchej fenicia warmimanta?

⁶ Jehová yanapasta qowasqanchejwan yanapachikunapajqa, fenicia warmi jina kʼumuykukoj sonqo kananchej tiyan, mana saykʼuspa rogakunanchej tiyan, jatun creeyniyojtaj kananchej tiyan. Kʼumuykukoj sonqo kajtillanchej Diosmanta mana saykʼuspa yanapata mañakusun. Chantapis Jesucristopi creesqanchej jatun kanan tiyan, pikunanejtachus pusawanchej chaykunapitaj atienekunanchej tiyan (Mat. 24:45-47). Jehovawan, Jesuswanqa mayta kusikunku chay jina runasta yanapaspa (Santiago 1:5-7 versiculoswan kikinchay). Kunan qhawarina imaynatachus Jehová mikhunata, ropata, jarkʼaynintapis qowasqanchejta, imaynatachus chaykunawan yanapachikunanchejtapis. Chaypajtaj parlarisunchej Pedromanta, Pablomanta, Davidmantawan.

PEDRO JINA DIOSPA PALABRANWAN ALIMENTAKUNA

7. ¿Ima ruwaytataj Pedro japʼerqa, chanta imatawán ruwanan karqa? (Hebreos 5:14–6:1).

⁷ Apóstol Pedropi piensarina. Judiosmantaqa pay ñaupajta repararqa Jesús Mesías kasqanta, yacharqataj Jehovaqa Jesusmanta valekushasqanta llajtanman ‘wiñay kausaymanta’ yachachinanpaj (Juan 6:66-68). Niraj cieloman ripushaspataj Jesusqa Pedrota nerqa: “Ovejitasniyta mikhuchipuway”, nispa (Juan 21:17). Apóstol Pedroqa chay ruwayta sumajta juntʼarqa. Chantapis Jehovaqa Bibliamanta iskay cartasta Pedrowan qhelqacherqa. Jinapis Pedroqa mana wajkunallatachu mikhuchinan karqa, paypis Diospa Palabranwan alimentakunallantaj karqa. Chayrayku apóstol Pabloj qhelqasqan cartasta estudiarqa. Chaywanpis nerqa “qhelqasqanmanta wakin imasqa, mana entiendeyta atikullanchu” nispa (2 Ped. 3:15, 16). Jinapis chay qhelqasqanta estudiallarqapuni. Creeyniyoj kasqanraykutaj yacharqa entiendenanpaj, chayman jinataj ruwananpaj Jehová yanapananta (Hebreos 5:14–6:1 leey).

8. ¿Imatá Pedro ruwarqa Jehová mosoj kamachiykunata qojtin?

⁸ Pedroqa Jehovaj kamachiykunasninta kasukuspa rikucherqa paypi creesqanta. Jope llajtapi kashajtin, apóstol Pedroqa mosqoypi jina Diospa angelninta rikorqa. Chay angeltaj nerqa Moisespa Leyninman jina chʼichipaj qhawasqa animalesta ñakʼaspa mikhunanta. Judiosqa chayta nipuni ruwajchu kanku. Chayrayku Pedroqa nerqa: “Ni imarayku Señor. Ni jaykʼaj mikhorqanichu leyman jina mana mikhuna imastaqa, nitaj chʼichipaj qhawasqa imastapis”, nispa. Angeltaj nerqa: “Imastachus Dios llimphuchasqantaqa amaña chʼichi niychu”, nispa (Hech. 10:9-15). Jinallapitaj Cornelioj kachamusqan kinsa runas chayarqanku, nerqankutaj Cornelio wasinman wajyachisqanta paywan parlananpaj. Cornelioqa mana judiochu karqa, judiostaj waj nacionmanta runasta chʼichipaj qhawaj kanku. Chayrayku manachus Dios mosqoypi jina Pedroman chayta rikuchinman karqa chayqa, ni jaykʼaj Cornelioj wasinman rinmanchu karqa (Hech. 10:28, 29). Jehovaqa Pedroman entiendecherqa chay kutimantapacha tukuy laya runas sumaj willaykunata uyarinankuta munasqanta (Pro. 4:18). Pedrotaj Jehovata kasukunanpaj chay ratopacha yuyasqanta cambiarqa. Chayrayku Cornelioman, wasinpi tukuy tantasqa kajkunamanwan predicarqa, rikorqataj imaynatachus paykuna Jesuspi creesqankuta, espíritu santota japʼisqankuta, bautizakusqankuta ima (Hech. 10:44-48).

9. ¿Imaynasmantataj yanapawanchej khamuna mikhunawan gustachikusqanchej?

⁹ Pedro jinallataj Diospa Palabranmanta qallariy yachachiykunawan alimentakunanchej tiyan, chaykunaqa leche jina kanku. Wakin yachachiykunataj khamuna mikhuna jina kanku. Chaykunata estudiaywanpis gustachikunallanchejtaj tiyan. Chay yachachiykunataqa ichapis mana facilta entiendeyta atillasunmanchu. Chayrayku chay khamuna mikhunata sumajta entiendenapajqa tiempochakunanchej, kallpachakunanchej tiyan. Jinapis mana qhasichu kanqa. Kay iskay imaspi mayta yanapawasun: Uj, Jehovamanta sumaj imasta yachakusqanchejqa yanapawasun payta astawan munakunapaj, respetanapaj ima. Iskay, Tatanchej Jehová may kʼacha kasqanta wajkunaman astawan willayta munasun (Rom. 11:33; Apo. 4:11). ¿Imatawán Pedromanta yachakullanchejtaj? Diospa llajtan imaynatachus uj yachachiyta entiendesqanchejta cambiajtin, chay mosoj yachachiyta usqhayllata japʼikunanchej tiyan. Ajinallamanta sumaj alimentasqa kasun, Jehovatapis sirviyta atillasunpuni.

PABLO JINA MOSOJ KAUSAYWAN PʼACHALLIKUNA

10. ¿Imataj cristianospata mosoj ropanchej jina kanman? (Colosenses 3:8-10).

¹⁰ Jehovata kusichinapajqa mosoj ropawan jina pʼachallikunanchej tiyan. ¿Imataj chay ropa? Apóstol Pablo nerqa: “Ñaupa kausayniykichejta, ñaupa ruwasqasniykichejtapis saqeychej. Diospa qosqan mosoj kausaywantaj pʼachallikuychej”, nispa (Colosenses 3:8-10 leey). Mosoj kausaywan pʼachallikunapajqa mana saykʼuspa kallpachakunallanchejpuni tiyan. Pablopis jovenmantapacha kallpachakorqa Diosta kusichinanpaj (Gál. 1:14; Fili. 3:4, 5). Jinapis mana yacharqachu imaynatachus Diosta munayninman jina yupaychayta, chayrayku Diospa ñaupaqenpi wajcha jina karqa. Pabloqa mana Cristoj yachachiykunasninta rejserqachu, jatunchakoj runataj karqa. Chantapis “machu machu” runa karqa, Diospa ñaupaqenpitaj mana allinpaj qhawasqachu karqa (1 Tim. 1:13).

11. ¿Imapi cambiananpajtaj Pablo mayta kallpachakunan karqa?

¹¹ Pabloqa niraj cristiano kashaspa imamantapis chay ratito phiñarqokoj. Bibliaqa nin Jesuspa discipulosninpaj maytapuni phiñakusqanta, chayraykutaj paykunata “ñakʼarichiyta, wañuchiyta ima” munarqa (Hech. 9:1). Cristianoman tukuytawanñataj maytachá kallpachakorqa manaña ajina kananpaj (Efe. 4:22, 31). Jinapis uj kuti Bernabewan mana entiendenakuyta atispa ‘sinchʼita phiñanakorqanku’ (Hech. 15:37-39). Chay kutipi phiñakuyninwan atipachikojtinpis, Pabloqa tukuy atisqanta kallpachakullarqapuni Diospa ñaupaqenpi allinpaj qhawasqa kananpaj (1 Cor. 9:27).

12. ¿Imaynatataj Pablo cambiarqa?

¹² ¿Imaynatá Pablo cambiarqa? ¿Imataj yanaparqa mosoj kausaywan pʼachallikunanpaj? Payqa mana kallpallanpichu atienekorqa (Fili. 4:13). Pedro jinallataj “Dios kallpata qosqanpi” atienekorqa (1 Ped. 4:11). Jinapis wakin kutisqa pantasqanrayku desanimakorqa, chay kutispitaj piensarej ima sumaj imastachus Jehová payrayku ruwasqanpi. Ajinamantataj kallpata japʼej cambianallanpajpuni (Rom. 7:21-25).

13. ¿Imaynamantá Pablo jina ruwasunman?

¹³ Unayña chayri kunallanraj Jehovata sirvishanchej chaypis, tukuyninchej Pablo jina ruwayta atisunman. Chaypajtaj kallpachakunallanchejpuni tiyan ñaupa kausayninchejta saqenapaj, mosoj kausaywantaj pʼachallikunapaj, Jehová munasqanman jina. Jinapis wakin kutisqa ichá pantasunpuni. Ichapis phiñarpakusunman, chayri mana siminchejta mandarikuyta atillasunmanchu. Jinapis ama yuyanachu ni jaykʼaj Jehová Diosta kusichiyta atinanchejta, astawanpis tukuy atisqanchejta kallpachakunallapuni yuyayninchejta, ruwasqanchejtapis cambianapaj (Rom. 12:1, 2; Efe. 4:24). Kaytataj amapuni qonqakunachu: Ropataqa gustawasqanchejman jina, yaykuwasqanchejman jina churakunchej, mosoj kausaywan pʼachallikuytaj Diospa munasqanman jina kanan tiyan, manataj munasqanchejman jinachu. Chayrayku chaywan pʼachallikunapajqa noqanchej cambiananchej tiyan.

DAVID JINA JEHOVAJ JARKʼAYNINTA MASKʼANALLAPUNI

14, 15. ¿Imaynatataj Jehová kay tiempopi llajtanta jarkʼashan? (Salmo 27:5; tapapi fototawan qhawariy).

¹⁴ Cheqamantapuni kusisqa kanapajqa, necesitallanchejtaj Jehová jarkʼanawanchejta. ¿Imaynasmantá Jehová jarkʼawanchej? Chanta, ¿imatá ruwasunman pay jarkʼanawanchejpaj?

¹⁵ Rey Davidqa yacharqa Jehová jarkʼayta atisqanta, paypitaj pakakuyta atisqanta (Salmo 27:5 leey). ¿Imaynatataj Jehová kay tiempopi llajtanta jarkʼashan? Mana saqenchu pipis creeyninkuta chinkachinanta. Chantapis nin contranchejpi ima armata ruwasqankupis qhasilla kasqanta (Sal. 34:7; Isa. 54:17). Satanaspis, demoniospis, qhatiykachawanchej chaykunapis atiyniyoj kanku. Jinapis mana imatapis ruwayta atiwanchejchu mana allinchay atinataqa. Wañuchiwasunman chaypis Jehovaqa kausarichimullawasun (1 Cor. 15:55-57; Apo. 21:3, 4). Llakiypi kajtinchejpis Jehovaqa yanapallawanchejtaj, ajinamanta payta sirvinallanchejpajpuni (Pro. 12:25; Mat. 6:27-29). Chantapis mayta munakuwasqanchejrayku uj jatun familiata qowanchej yanapanawanchejpaj, ancianostataj qowanchej cuidanawanchejpaj (Isa. 32:1, 2). Reunionespitaj yachakunchej imastawanchus ruwananchej kasqanta Jehovaj jarkʼayninwan yanapachikunapaj (Heb. 10:24, 25).

16. ¿Imaynasmantá Jehová Davidta jarkʼarqa?

¹⁶ David kasukojtin, ¿imaynatá Jehová payta jarkʼarqa? Allinta ajllananpaj yanaparqa, ajinamanta Davidqa kusisqa kausakorqa (Proverbios 5:1, 2 versiculoswan kikinchay). Jinapis David mana kasukojtin Jehovaqa mana jarkʼarqachu imaspichus rikukunanmanta (2 Sam. 12:9, 10). Waj kutispitaj Davidqa wajkunaj juchankurayku sufrerqa. Chay kutispi Davidqa Jehovamanta mañakorqa. Jehovataj jarkʼarqa payta sonqochaspa, mayta munakusqanta, cuidanantataj nispa (Sal. 23:1-6).

17. ¿Imaynatá David jina ruwasunman?

¹⁷ David jina ruwasunman imata ajllananchej kajtinpis Jehovaj yanapantapuni mañakuspa. Chantapis yuyarikunanchej tiyan Jehovata mana kasukojtinchejqa llakiykunapi rikukuyta atisqanchejta, chaymantataj Jehovaqa mana jarkʼawasunchu (Gál. 6:7, 8). Wajkunaj juchankurayku ñakʼarejtinchejtaj Jehovamanta mañakusunman, paytaj sonqonchejta, yuyayninchejtawan waqaychanqa (Fili. 4:6, 7).

DIOSTA NECESITASQANCHEJTA REPARAKUNALLAPUNI

18. ¿Imatataj Diosta mana rejsej runas ruwanku, noqanchejrí imatataj ruwananchej tiyan? (Fotostawan qhawariy).

¹⁸ 2026 watapaj textoqa nin: “Kusisqa kanku Diosta necesitasqankuta reparakojkunaqa”, nispa. Kay tiempopitaj astawanraj chayta ruwananchej tiyan. Diosta mana rejsej runasqa mana kusisqachu kanku mana chayta reparakusqankurayku. Wakintaj Diosta necesitasqankuta reparakuspapis munasqankuman jinalla payta yupaychanku, wakintaj runaj yuyaynillanpi atienekunku. Noqanchejtaj nipuni paykuna jina kayta munasunmanchu. Chayrayku Diosta necesitasqanchejta reparakunallapuni. Chaypajtaj Diospa Palabranwan alimentakuna, mosoj kausaywan pʼachallikuna, Jehovaj jarkʼaynintapis maskʼanallapuni.