Onqoykuna, ¿Diospa castigonchu?

LUCIAQA LLOQʼE CHAKINMANTA COJITA. Payqa juchʼuyllaraj kashaspa poliomielitis onqoyta chimpaykuchikusqanrayku cojitaman tukusqa. Lucía 16 watayoj kashajtin, patronan payman nisqa: “Nichá mamaykita kasukorqankichu, machu machu imillachá karqanki. Chayraykuchá Dios castigasunki”, nispa. Chay nisqanqa Luciaj sonqonta mayta nanacherqa, kunankamataj yuyarikullanpuni.

DAMARISMAN UMANPI CANCERNIYOJ KASQANTA WILLAJTINKU, tatanqa payman nisqa: “Ima juchatachá ruwarqanki. Chantachá Dios castigashasunki”, nispa. Tatan chayta nisqanrayku, Damarisqa sonqo pʼakisqa qhepakorqa.

Runasqa unaymantapachaña yuyanku Diosninchej runasta onqoykunawan castigasqanta. Jesuspa tiemponmanta parlaj libro nin: “Uj runa onqoykojtin, runasqa yuyaj kanku chay runata Dios castigashasqanta. Chay castigotataj juchanmanta chayri mayqen familianpa juchanmanta japʼisqanta”, nispa. Jesús wañupusqanmanta ashkha watasninman, runasqa kikillantataj yuyaj kanku. Chay tiempomanta parlaj libro nin: “Wakin runasqa yuyaj kanku wañuchej onqoykunaqa runas juchallisqankurayku kasqanta”, nispa. ¿Jinachu kanman? 1301-1400 watas chaynejpi wañuchej onqoywan ashkha runas wañusqanku, ¿Diospa castigonchu karqa? Chayri, ¿doctores ninku jinachu jukʼuchasnejta runasman chimpaykorqa? ¿Ciertopunichu Dios runasta onqoykunawan castigan?a

TʼUKURINA: Diosninchej runasta onqoykunawan chayri waj llakiykunawan castigan chayqa, Jesusqa nichá onqosqasta sanoyachinmanchu karqa. Imajtinchus chayta ruwaspaqa Diosman churanakushanman karqa (Mateo 4:23, 24). Jesustajrí ni jaykʼaj Diospa contranpi churakorqachu. Payllataj nerqa: ‘Tataypa munasqantapuni ruwani’, nispa. Chantá nillarqataj: “Imaynatachus Tatay kamachiwarqa ruwanayta ajinata ruwashani”, nispa (Juan 8:29; 14:31).

Bibliaqa Jehová Diosmanta nin: “Mana jaykʼajpis mana cheqan kajtaqa ruwanchu”, nispa (Deuteronomio 32:4). Kaypi piensarina. ¿Diosninchej ashkha pasajerosniyoj avionta urmaykuchinmanchu uj sajra runata wañuchinanpaj? Mana. Diospa kamachin Abrahán nerqa: ‘Diosqa mana yuyallanpischu cheqan runatawan juchayoj runatawan ujllapi wañuchiytaqa’, nispa (Génesis 18:25). Biblia nillantaj: “Diosqa manapuni sajra kajtaqa ruwanchu”. “Diosqa ni imarayku mana cheqan kajtaqa ruwanmanchu”, nispa (Job 34:10-12).

¿IMATÁ BIBLIA YACHACHIWANCHEJ?

¿Dios juchanchejmanta castigawasqanchejraykuchu onqonchej? Mana. Jesús chayta yachachiwanchej. Uj kutipi Jesusqa, discipulosninwan purishaspa uj runata rikorqa. Chay runaqa nacekusqanmantapacha ciego karqa. Discipulosnintaj Jesusta taporqanku: “Yachachejníy, ¿pitaj juchallikorqa kay runa ciego nacekunanpaj? ¿Paychu? ¿Tatasninchu?”, nispa. Jesustaj kuticherqa: “Mana paychu, nitaj tatasninchu juchallikorqanku”, nispa (Juan 9:1-3).

Jesuspa discipulosnenqa chayta uyarispa maytachá tʼukorqanku. Imajtinchus chay tiempomanta runasqa, yuyaj kanku Dios runasta onqoykunawan castigasqanta. Jesusqa chay cieguitota sanoyachispa, pantasqata yuyasqankuta rikucherqa (Juan 9:6, 7). Diosninchejqa mana runasta onqoykunawan castiganchu. Sinchʼi onqoyniyoj kajkunaqa, chayta yachaspa maytachá sonqochakunku.

Biblia niwanchej

• “Diostaqa mana pipis sajra imaswan pruebaman churayta atinchu, nitaj payqa pitapis pruebaman churanchu” (SANTIAGO 1:13). May chhika unaytaña onqoykunawan, nanaywan, wañuywan ima ñakʼarishanchej. Diosninchejtaj chay tukuy llakiykunata pisimantawan chinkachenqa.

• Jesusqa ‘tukuy onqosqasta sanoyacherqa’ (MATEO 8:16). Payqa Diospa Gobiernonpi kamachishajtin chayllatataj ruwanqa.

• Diosqa “ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj waqaypis, nitaj nanaypis. Chay ñaupaj kaj imasqa chinkapunña” (APOCALIPSIS 21:3-5).

¿PITAJ JUCHAYOJ?

Mana Dioschu castigashawanchej chay, ¿imajtintaj kay mundopi chay chhika llakiykuna kan? Runasqa unayña chayta yachayta munanku. Chanta, ¿pitaj juchayoj llakiykuna kananpaj? Qhepan yachaqanapi chaymanta parlarisun.