Kadeikpen Loalatail—Doadoahngki Mehn Kasukuhl kan en Paipel Pwehn Kaiahnehda

1-2. (a) Kisakis dahieu me Siohwa ketikihong Adam oh Ihp? (b) Ia duwen ara kak kasalehda ara kalahnganki kisakis wet?

MAHN akan kin mwekid ni ahl ehu me re kepikipikda ren mwekid. Misihn tohto kak prokramdier ren doadoahk ni soangen ahl ehu. Ahpw aramas kin weksang mepwukat. Kitail kepikipikda ahneki kisakis tohrohr ehu me Kristian kan kin kesempwalki. Kisakis wet iei saledek en pein wiahda pilipil kan nan mour. Paipel padahkihong kitail me tepin ohlo, Adam, kepikipikda rasehng Koht. (Sen. 1:​26, 27) Siohwa ketin kapikada Adam oh Ihp ira en ahneki koahiek en pein wiahda ara pilipil kan.

² Siohwa sohte ketikihong Adam oh Ihp kosonned tohto. Ihte me e ketin padahkihong ira en wia iei ira en apwalih sampah, kadirehkihla sampah neira seri kan, oh wauneki sapwellime pwuhng en koasoanehdi dahme ira kak oh sohte kak wia. (Sen. 1:28; 2:​16, 17) Eri ia duwen Adam oh Ihp ara kak kasalehda ara kalahnganki Koht eh ketikihong ira saledek en wiahda ara pilipil? Pwehki soahng pwukat koaros me Siohwa ketikihong ira, e konehng Adam oh Ihp en men peikiong kehkehlik mengei pwukat pwehn kasalehda me ira uhdahn poakohng Siohwa oh men kaperenda ih.—Lep. Pad. 23:15.

3. Ia duwen Adam oh Ihp ara doadoahngki ara saledek en pilipil?

³ Paipel mahsanih me Adam oh Ihp sohte doadoahngki ara saledek en pilipil ni loalokong. Ahpw ira pilada en sapeikiong Siohwa. Ira wiahda pilipil wet pwehki ira poakohng pein ira, a kaidehn Siohwa. (Sen. 3:​1-7) Leledo rahnwet kitail kin wie lokolongkihte ara pilipil sapwungo.—Rom 5:12.

4. (a) Nin duwen Kalesia 6:5 mahsanih, dahme kitail koaros anahne wia? (b) Ia pil ehu kisakis me kitail pahn koasoiapene nan iren onop wet?

⁴ Atail mour rahnpwukat kin uhdahn apwal. Ehuehu rahn kitail kin anahne wiahda soangsoangen pilipil kan. (Wadek Kalesia 6:5.) Ekei pilipil pwukat kin mengei, ahpw ekei kin apwal. Eri ia duwen atail pahn kak wiahda pilipil kan me pahn kaperenda Siohwa? Keieu, kitail anahne pohnese me kitail anahne sapwellimen Siohwa sawas. (Lep. Pad. 16:3; Ser. 10:23) Pil ohl unseko Sises mwahngih me e ketin anahne sapwellimen Koht sawas. (Ipru 5:7) Nin duwen aramas soh unsek kei, kitail uhdahn anahne kaweid laudsang Sises. Eri kitail pahn koasoiapene pil ehu kisakis sang rehn Koht me pahn sewese kitail en wiahda pilipil pwung kan—me iei kadeikpen loalatail.

DAHKOT KADEIKPEN LOALATAIL?

5. (a) Dahkot kadeikpen loalatail? (b) Ia duwen kadeikpen loalatail eh kin sewese kitail? (Rom 2:​14, 15)

⁵ Koht ketin kapikkitailda en ahneki kadeikpen loalatail me kin sewese kitail en ese dahme pwung oh dahme sapwung. Pil aramas emen me sohte ese duwen sapwellimen Koht kosonned akan kin mie kadeikpen loale. (2 Kor. 4:2) Kadeikpen loalatail kin duwehte sounkopwung men loalatail me kin padahkihong kitail ma atail madamadau de wiewia kin mwahu de soh. (Wadek Rom 2:​14, 15.) Kadeikpen loalatail kin kalekeikitailsang en wia dahme kitail ese me sapwung. (1 Sam. 26:​8-11) De e kin kangoange kitail en wia dahme kitail ese me pwung. Atail ahneki saledek en wiahda pilipil sohte wehwehki me Siohwa pahn ketin kupwurki pilipil koaros me kitail kin wiahda. Kadeikpen loalatail anahne sewese kitail en ese ma pilipil me kitail wiahda kin mwahu de soh.

6. Kahpwal dahieu me mie me pid kadeikpen loalatail?

⁶ Ahpw mie kahpwal me pid kadeikpen loalatail. Pwehki atail sohte unsek, kadeikpen loalatail pil sohte unsek. Kadeikpen loalatail kak ohla pwehki mwomwen atail tikida, sahpw me kitail kin mi ie, oh atail ineng suwed kan. Paipel mahsanih me kadeikpen loalatail kak “luwet,” “samin,” “solahr kin kehn wasa rasehng kilin aramas me mwasingkihla mete karakar,” de pil “suwed.” (1 Kor. 8:12; Taitus 1:15; 1 Tim. 4:2; Ipru 10:22) Ma kadeikpen loalatail kin duwehte met, e sohte pahn sewese kitail en wiahda pilipil pwung kan. E duwehte mehn sosohng ehu me anahne kamwahula. Kahrehda kitail anahne doadoahk laud pwehn kaiahnehda mwahu kadeikpen loalatail. (1 Pit. 3:16) Ia duwen atail kak wia met?

IA DUWEN ATAIL KAK KAIAHNEHDA KADEIKPEN LOALATAIL?

7-8. (a) Dahme pahn sewese kitail pwe kitail en kaiahnehda kadeikpen loalatail? (b) Ia duwen mehn kasukuhl kan en Paipel eh kin sewese kaweid kitail? Menlau kihda ehu karasaras. (Pil kilang kilel.)

⁷ Ia duwen atail kak kaiahnehda kadeikpen loalatail? Kitail anahne kaukaule wadek Paipel oh sukuhlki dahme Siohwa ketin mahsanih me pwung oh sapwung. Atail kin onopki duwen sapwellimen Koht kosonned kan pahn sewese kitail en wehwehki sapwellime madamadau kan. Ahpw nin duwen atail koasoiapene nan iren onop en mwoweo, ekei kosonned kan ele kin wiawihda ong ahnsou de irair tohrohr ehu. Ihme kahrehda kitail anahne sukuhlki duwen kahrepen sapwellimen Siohwa kosonned kan pwe kitail en wehwehkihla sapwellime madamadau oh pepehm kan ong soangsoangen irair kan.—Ais. 55:9.

⁸ Atail mour kak karasahiong atail songosong en seiloak nan sapwtehn ehu me sohte ahl de sain akan. Ketipino oh usu kan kak sewese kitail en ese ia wasa kitail pahn keid ie pwe kitail en lellahng wasa me kitail kohkolahng ie. Ahpw e pahn mwahu ma mie neitail map ehu pwe e pahn kak mengei ong kitail en tehkada soahng kan, me duwehte nahna kan de pillap akan. Met pahn sewese kitail en kamehlele me kitail kohkolahng ni ahl me pwung. De e pahn padahkihong kitail ma kitail kohkolahng ni ahl me sapwung. Atail mehn akadei nan mour iei en kaperenda Siohwa. Paipel kin duwehte map ehu me kin sewese kitail en wia met. Ma kitail doadoahngki dahme kitail kin sukuhlki sang nan Paipel duwen sapwellimen Siohwa madamadau kan nan atail mour, kitail kak kamehlele me kitail kin kekeid nan ahl me pwung oh kitail pahn kapwaiada atail mehn akadei en ahnsou koaros kaperenda Siohwa.

9. Dahme pil kak sewese kitail en kaiahnehda kadeikpen loalatail? (Rom 9:1)

⁹ Pwehn kaiahnehda mwahu kadeikpen loalatail, kitail anahne sawas sang sapwellimen Koht ngehn sarawi. (Wadek Rom 9:1.) Ngehn sarawi pahn sewese kitail en wehwehkihla sapwellimen Koht madamadau duwen irair ehu. E pil kak kamwakid oh kakehlaka kitail en wia dahme Siohwa ketin kupwurki. (Pil. 2:13) Ahpw ia duwen atail kak ale sawas sang sapwellimen Siohwa ngehn sarawi?

10. Ia duwen atail kak ale sawas sang ngehn sarawi? (Luk 11:​10, 13)

¹⁰ Kapakapki ngehn sarawi. (Wadek Luk 11:​10, 13.) Kitail kak likih me Siohwa kin ketin kupwurki ketikihong kitail sapwellime ngehn sarawi. (Sohn 3:34) E kin ketikihda ni sapan sapwellime ngehn sarawi ong irail kan me kin peikiong ih. (Lep. Pad. 1:23; Seims 1:5) Ahpw dahme pahn pil sewese kitail en kaiahnehda kadeikpen loalatail?

11. (a) Dahme pahn keieu kesempwal nan atail mour? (b) Dahme kahrehda kitail anahne tehk mwahu me kadeikpen loalatail kaiahnda oh kin doadoahk ni pwung?

¹¹ Nantihong kaperenda Siohwa ahnsou koaros. (Lep. Pad. 8:​34, 35) Met anahne wia mehkot me keieu kesempwal nan atail mour. Ma kitail kin tamataman me kitail men kaperenda Siohwa nan soahng koaros me kitail kin wia, met kak sewese kaiahnehda kadeikpen loalatail. Kitail kak kaiahnehda mwahu kadeikpen loalatail ma kitail kin ahneki sapwellimen Siohwa madamadau oh nsenohki sapwellime pepehm kan. Ni atail kin medewehla uwen apwal en mour rahnpwukat, kitail kin pohnese ia uwen kesempwal en kaiahnehda mwahu kadeikpen loalatail. Kitail kin kalapw anahne wiahda pilipil kan duwen soahng kan me Paipel sohte kin kasalehda duwe ni sansal. Met kak pidada mehn kamweit kan, atail doadoahk, sukuhl, de ihs me kitail kin patehng. Eri ia duwen atail kak tehk mwahu me pilipil kan me kitail kin wiahda me pid mepwukat kin kaperenda Siohwa?—2 Kor. 1:12.

12. Dahme pahn sewese kitail en ese ma kadeikpen loalatail kin sewese kitail en wia dahme pwung? (Episos 5:10)

¹² Doudouloale duwen dahme ke kin wadek nan Mahsen en Koht. (Mel. 49:3) Ni omw kin wadek Paipel, rapahki mehn kasukuhl kan me pahn seweseiuk en wehwehkihla sapwellimen Siohwa madamadau. (Wadek Episos 5:10.) Met pahn sewese kitail en ese ma kadeikpen loalatail kin kaweid kitail en wiahda pilipil mwahu kan ni atail kin song en apwalihala kahpwal kan. (Lep. Pad. 2:​4-9, 11-13) Mehn kasukuhl pwukat kak sewese kitail en kaiahnehda kadeikpen loalatail oh wia dahme Siohwa ketin kupwurki kitail en wia.—Ipru 5:14.

13. Dahme kitail en dehr wia? Menlau kihda ehu karasaras.

¹³ Dehr wiahda pilipil ehu oh mwuri rapahki sapwellimen Siohwa madamadau duwen irairo. Kitail sohte men alasang mehn Israel ko me mihmihte nan sapwen Suda mwurin ohlahn Serusalem nan pahr 607 Mwohn Krais. Re ndaiong Seremaia: “Siohwa omw Koht en ketin padahkihong kiht ahl me se anahne weid loale oh dahme se anahne wia.” (Ser. 42:​3-6) Ahpw re koasoanedier dahme re pahn wia. Eri ni ahnsou me re sohte mwahuki sapwellimen Siohwa kaweid, re wiahte dahme re men wia. Met kahrehda kahpwal laud. (Ser. 42:​19-22; 43:​1, 2, 4) Eri mwohn atail pahn wiahda pilipil ehu, kitail anahne wehwehkihla sapwellimen Siohwa madamadau oh wia dahme e ketin kupwurki.

14. Dahme kahrehda kitail anahne doadoahngki sapwellimen Siohwa madamadau ni atail kin wiahda pilipil kan?

¹⁴ Wiahda pilipil kan me poahsoankihda sapwellimen Siohwa madamadau. (Mad. 7:​24-29; Seims 1:​23-25) Ni atail kin wiahda pilipil kan me poahsoankihda sapwellimen Siohwa madamadau, kitail kin mweidohng ngehn sarawi en kaweid kitail. Ma kitail wia met, Siohwa pahn ketin pousehlahte ketikihong kitail sapwellime ngehn sarawi. (Wiewia 5:32) Ahpw ma kitail sohte mweidohng sapwellimen Siohwa ngehn sarawi en kaweid kitail, kitail kakete “kansensuwedihada” de uhwong ngehn sarawi. (Ep. 4:30; Ais. 63:10; Wiewia 7:51) Siohwa pil kak ketikihsang sapwellime ngehn sarawi rehtail. (Mel. 51:11; 1 Des. 5:19) Oh met pahn uhdahn suwed ong kitail pwehki kitail anahne kehl oh manaman me kin kohsang ngehn sarawi.—Ep. 3:16.

IA DUWEN ATAIL KAK DIAR MEHN KASUKUHL KAN SANG NAN PAIPEL ME KAK SEWESE KITAIL

15-16. (a) Ia duwen atail kak diar mehn kasukuhl kan sang nan Paipel me kak sewese kitail? (b) Mehnia mehn kasukuhl kak sewese tohnsukuhl en Paipel men en uhdihsang simoak?

¹⁵ Doadoahngki mwahu mehn sawas kan ong onop. Mwohn atail kak doadoahngki mehn kasukuhl kan en Paipel, kitail anahne diarada mepwukat nan Paipel. Karasepe, ia duwen ma noumw tohnsukuhl en Paipelo kin apwalki uhdihsang simoak? Ele e pahn medewe: ‘Paipel sohte kin koasoia duwen simoak. Eri ia duwen atail ese me e sapwung?’ Ia duwen omw kak sewese ih en diarada mehn kasukuhl kan sang nan Paipel me pahn sewese ih en wehwehki me e sapwung en simoak? Ehu mehn sawas mwahu iei Watchtower ONLINE LIBRARY. Ma tohnsukuhlo rapahki lepin lokaiao “Simoak,” e pahn diar artikel tohto me kak sawas. Ehu artikel iei “Ia Sapwellimen Koht Madamadau ong Simoak?” (Kilang Kahn Iroir en June 1, 2014.) Ni eh wadek artikelo, soangen iren Paipel oh mehn kasukuhl dah kan me e pahn kak diar?

¹⁶ Iet mehn kasukuhl limau me kileldi nan artikelo. (1) Kitail en dehr wiahla lidun mehkot me kak kemeikitailla. (Rom 6:16) (2) Kitail en soikala mehkoaros me pahn keper ong paliwaratail. (2 Kor. 7:1) (3) Siohwa ketin kupwurki kitail en papah ih ni mour unsek. (Mad. 22:37) (4) Kitail en dehr wia mehkot me pahn kahrehiong mouren meteikan nan keper. (Mad. 22:39; 1 Kor. 10:24) (5) Siohwa kak ketikihong kitail kehl en wia dahme pwung. (Pil. 4:13) Eri mendahki Paipel sohte kin koasoia duwen simoak, mehn kasukuhl kan me dierek nan Paipel kak sewese noumw tohnsukuhlo en wehwehkihla sapwellimen Siohwa madamadau duwen met.

17. Ia duwen brother men oh sister men me pahn pwopwoud ara kak diar mehn kasukuhl kan nan Paipel me pahn sewese ira en wiahda pilipil mwahu kan ong ara kapwopwoud?

¹⁷ Ia duwen brother men oh sister men me pahn pwopwoud ara kak diar mehn kasukuhl kan nan Paipel me pahn sewese ira en wiahda pilipil mwahu kan ong ara kapwopwoud? Ira kak doadoahngki Watchtower ONLINE LIBRARY. Ma ira rapahki lepin lokaiao “Kapwopwoud,” ira pahn diar artikel tohto me kin kasalehda mehn kasukuhl kan sang nan Paipel. Tehk mehn kasukuhl weneu me pwopwoud ehu kak medemedewe. (1) Koasoandi kan koaros anahne kawauwih Siohwa. (1 Kor. 10:​31, 32) (2) Atail likou anahne soandi mwahu oh konehng. (1 Tim. 2:9; 1 Pit. 3:​3, 4) (3) Kitail en dehr song en suweiki dahme kitail ahneki, nin duwen me aramas kan nan en Sehdan sampah wet ar kin wia. (Sohn 17:14; Seims 1:27; 1 Sohn 2:​15, 16) (4) Soahng koaros anahne soandi mwahu. (1 Kor. 14:40) (5) Kamadipwo en dehr wia kamadipw mwoarongorong ehu me aramas kin sakaula. (Kal. 5:21) (6) Emen anahne tehk mwahu me soahng koaros en wiawi ni ahl ehu me kaperenda Siohwa.—Sohn 2:​8, 9.

18-19. (a) Pil mehn sawas dah me kak sewese kitail? (b) Mehn kasukuhl dah kan me ke kak diar ni omw doadoahngki mehn sawas wet pwehn wiahda pilipil kan me pid duwen kasarawi kan? (Menlau kilang koakono “Ke Kak Diarada Ia Sapwellimen Siohwa Madamadau ong Irair Ehu?”)

¹⁸ Pil ehu mehn sawas me kin sewese me tohto iei pwuhko Iren Paipel kan ong Mour en Kristian. Pwuhk wet kin kairekehdi iren Paipel kan pahnangin soangsoangen oaralap kan. Ni omw pilada oaralap ehu, ke pahn kilang kairekdien peidek kan iangahki iren Paipel kan me kak seweseiuk en wehwehkihla mehn kasukuhl kan en Paipel. Karasepe, mwein Kristian men medemedewe ma e pahn iang towehda kasarawi ehu de soh. Ma e kilang oaralapo “Kasarawi kan,” e pahn diar sawaspen oaralapo “Kasarawi kan me Kristian kan sohte kin iang wia.”

¹⁹ Medewehla ekei soahng kan me sansalda pahnangin pali wet: “Dahme kahrehda e sapwung en iang wia kasarawi kan me kin pidada kaudok likamw? (1 Kor. 10:21; 2 Kor. 6:​14-18; Ep. 5:​10, 11).” Mie ekei soangen kasarawi pwukat me kileldi. Pahn sawaspen oaralapo “Kasarawi en wehi,” mie mehn kasukuhl kan en Paipel me kak sewese Kristian men en pilada ma e pahn iang kasarawih dahme koperment wiadahr de mahwen kan, de kawauwih emen ni ahl ehu me mwomwen pwongih. Ia uwen atail kalahnganki me sapwellimen Siohwa pwihn kin kihong kitail mehn sawas pwukat me kak sewese kitail en kaiahnehda kadeikpen loalatail!

KADEHDEHDA ME KADEIKPEN LOALOMW KAIAHNDA MWAHU

20. Ia duwen atail kak ese me kadeikpen loalatail kaiahndahr en doadoahk ni ahl me pwung?

²⁰ Kitail kin kesempwalki saledek en wiahda pilipil. Ahpw kitail pil pohnese me kitail anahne kaiahnehda kadeikpen loalatail pwe kitail en kak doadoahngki atail kisakis en wiahda pilipil ni ahl ehu me pahn kaperenda Siohwa. Kadeikpen loalatail me kaiahnda mwahu pahn sewese kitail en wiahda pilipil kan me kin kawauwih oh kaperenda Siohwa. Pwehn wia met, kitail anahne sawas sang sapwellimen Siohwa ngehn sarawi. Eri kitail anahne pousehlahte peki sawas sang ngehn sarawi oh mweidohng en kaweid kitail. Mehn kasukuhl kan sang nan Paipel pil kak sewese kitail en kaweid kadeikpen loalatail. Eri kitail en doadoahngki kisakis pwukat ni ahl me pwung oh mwuri kilang manaman en sapwellimen Koht Mahsen nan atail mour.—2 Tim. 3:​16, 17; Ipru 4:12.