Ahneki Sapwellimen Siohwa Madamadau ong Kahpwal kan

1-2. Dahme kitail anahne wia pwehn dadaurete pahn atail kahpwal kan? (Pil kilang kilel.)

IA DUWE, ke kin lelohng wiewia sapahrek, omw peneinei kin uhwong uhk, de ke kin lelohng kalokolok pwehki omw pwoson? Ke kin lokolongki soumwahu ehu de pil kehn me omw medek kin lalaudla ni omw mahmahla? De mie mehkot kansensuwed wiawihong uhk, duwehte mehlahn emen me ke poakohng? Duwehte sapwellimen Siohwa aramas kesempwal tohto, ele omw mour pil “diren kahpwal oh pahtou.”—Mel. 90:10.

² Pwehn dadaurete pahn atail kahpwal kan, kitail anahne ahneki madamadau pwung ong mepwukat. Dahme met kin pidada? Kitail kak karasahda met ni ahl wet: Kahpwal kan me ke lelohng nan mour kin duwehte keper kan me ke kakete lelohng ni omw diraipih sidohsa ehu. Pwehn soikala keper kan, ele ke pahn wetla palimeing de palimaun, wawaila de uhdi ahnsou kis. Ahpw pwehn ese dahme ke anahne wia, ke anahne tehk mwahu kepero. Ke sohte kak kilang kepero ma kilahsin mwohn weromw sidohsao edied de samin. Duwehte met, pwehn dadaurete pahn atail kahpwal kan, kitail anahne kilangwohng atail kahpwal kan nin duwen me Siohwa kin ketin wia. Nan iren onop wet, kitail pahn koasoiapene (1) ia duwen atail kak ahneki madamadau pwung ong atail kahpwal kan, (2) dahme kak wiawi ma kitail sohte ahneki sapwellimen Siohwa madamadau ong atail kahpwal kan, oh (3) ekei kahk me kitail kak wia pwehn kolokolete madamadau pwung ni kahpwal kan eh pwarada.

MADAMADAU PWUNG ONG KAHPWAL KAN

3. Dahme kahrehda kitail kin lelohng kahpwal kan nan koasoandi suwed wet?

³ Kitail pahn kin lelohng kahpwal kan nan koasoandi suwed wet. Kitail kin lokolongki kahpwal kan pwehki kitail soh unsek oh Sehdan kin kakaun sampah wet. Patehng met, ni imwilahn koasoandi wet eh kin kerekerendo, atail mour pahn ehute apwalla, e pahn tohtohla kahpwal kan me duwehte rerrer en sahpw, lapake oh isihslahn nansapw oh aramas tohto pahn pil lokolongki soahng suwed kan me aramas kin wia. (Mad. 24:8; 2 Tim. 3:13) Ma Siohwa pahn ketin kamwahwihala kahpwal pwukat ni ahnsou wet, e pahn mwomwen me E kin ketin sewese Sehdan en kaunda sampah. Erein Sehdan kin kakaun sampah wet, kitail pahn lokolongki kahpwal kan.—Ekl. 9:12.

4. Ia pil ehu kahrepe me kitail kin lelohng kalokolok?

⁴ Kristian kan pil kin lelohng kalokolok pwehki arail kin peikiong Sises. Sises kin kalapw mahsanihong sapwellime tohnpadahk kan me re pahn lelohng kalokolok pwehki ar pwoson. (Mad. 24:9; Sohn 16:2) Kahrehda ni atail kin lelohng kalokolok, kitail sohte kin pwuriamweikihla. Kitail ese me kitail kin idawehn Sises, oh kitail pil koasoanehdi teng en kolokolete atail lelepek. (1 Des. 3:​3, 4) Oh ni atail kin dadaurete pahn kahpwal kan pwehki kitail ahneki pwoson kehlail, kitail kak kamehlele me kitail kin weweidte nan ahl me kolahng mour soutuk. Patehng met, kitail kin kadehdehda me kitail kin uhki Siohwa, a kaidehn Sehdan. Ehu likamw me Sehdan wiahda iei me aramas akan kin papah Koht ihte pwe ren kak ale mehkot sang reh. Eri Sehdan kin uhdahn kaloke sapwellimen Siohwa aramas akan pwehn song en kadehdehda me re sohla pahn lelepek ni ahnsou me apwal en wia met. (Sohp 1:​9-11) Ahpw ni atail kin dadaurete pwehki kitail poakohng Siohwa, kitail kin kaperenda kupwure.—Lep. Pad. 27:11.

5. Dahme kitail kak sukuhlkihsang Eklesiasdes 7:​13, 14? (Pil kilang kilel kan.)

⁵ Siohwa kin ketin mweidohng kahpwal kan en wiawi. Siohwa sohte douluhl kin ketin lemei de kasonge kitail. (Seims 1:13) Ahpw Nanmwarki Solomon ntingihedi me “Koht mehlelo ketin wiahda” rahnen “apwal.” (Wadek Eklesiasdes 7:​13, 14.) E sohte koasoakoasoia me Siohwa kin ketin kahrehiong soahng suwed kan en wiawi, ahpw mepwukat kin wiawi pwehki E kin ketin mweidada. Solomon kihda kaweid mwahu me kak sewese kitail en ahneki madamadau pwung ong atail kahpwal kan. Keieu, kitail anahne pohnese me kitail soh unsek nan en Sehdan sampah wet, oh e pahn mie rahn akan me mwahu oh rahn akan me suwed. Ni atail kin ahneki rahn me mwahu, kitail kak kasalehda atail kalahnganki sapwellimen Koht kupwuramwahu oh kilangwohng rahno nin duwen kisakis ehu sang reh. Keriau, Solomon katamankihong kitail me kitail ‘sohte kak ese dahme pahn wiawihong kitail.’ Kitail sehse ma rahno pahn mwahu de soh. Kahpwal kan me kitail sohte kasik kin lelohng irail me mwahu kan oh pil me suwed kan.

6. Dahme kahrehda Siohwa kin kakete mweidohng kitail en lelohng kahpwal kan? (Ipru 12:​7, 11)

⁶ Ma kitail kin ahneki madamadau pwung ong atail kahpwal kan, kitail pahn kilang me Siohwa kin ketin padahkihong kitail en koapworopworki ih, a kaidehn pein kitail. Siohwa kin ketin tehk kahpwal kan me kin wiawihong kitail oh e kin ketin nsenohki ni atail lelohng kalokolok kan. Pil ni eh kin ketin mweidohng kitail en lelohng nan “wahu me rotorot mosul,” e kin ketin pousehlahte kaweid kitail, kamehlelehiong kitail duwen sapwellime limpoak, oh ketikihong kitail kehl me kitail anahne pwehn dadaurete. (Mel. 23:4) Kahpwal kan pil kak sewese kitail en kilangada atail luwet kan oh kamwahwihala pein kitail sang ni sapwellimen Koht sawas. (Wadek Ipru 12:​7, 11.) Karasepe, Sohp anahne kamwahwihala eh aktikitik. Kaidehn Siohwa me ketin kahrehda en Sohp kahpwalo, ahpw e ketin mweidada oh ketin doadoahngki pwehn sewese Sohp en sukuhlkihdi mehn kasukuhl kesempwal kan. (Sohp 42:​1-6) Kitail kak uhdahn kamehlele me ma Siohwa ketin mweidohng kitail en lelohng lokolok, e pahn ketin sewese kitail en lelepekohngete ih oh e uhdahn pahn ketin katingih kitail.—Rom 8:​35-39.

7. Dahme kahrehda ke kak peren pil ni omw lelohng kalokolok pwehki omw pwoson?

⁷ Kitail kak peren erein atail lelohng kalokolok. Ma ke kin lelohng kalokolok pwehki omw pwoson, dehr medewe me Siohwa solahr ketin kupwurkin uhk. Pwe soangen kalokolok wet kin kadehdehda me e kin ketin kupwurkin uhk. (Mad. 5:​10-12) Ni atail kilangwohng kalokolok ni ahl wet, kitail kak peren duwehte wahnpoaron ko. (Wiewia 5:​40-42) Patehng met, kitail pil pahn kakete sewese emen me kaidehn Sounkadehde men en sukuhlki duwen padahk mehlel oh “kalinganahda Koht.” (1 Pit. 2:12) Duwehte Sosep, ke pil kak pweida erein kahpwal ehu eh wiewiawi oh pil mwurin kahpwalo eh nekier.—Sen. 39:​3, 23.

8. Dahme pil kak sewese kitail en koasoanehdi teng en kolokol atail lelepek mehnda ma kitail pil kin lokolok?

⁸ Atail kahpwal kan pahn imwisekla. Dahme wiawihong Sohp katamankihong kitail me atail kahpwal kan pahn imwisekla. Ni mehlel, Siohwa “ketin kapaiahda luhwen mouren Sohp laudsang nin tapio.” (Sohp 42:12) Duwehte met, Siohwa pahn pil ketin kapaikitailda nan sampah kapwo. Atail mour me ele diren kahpwal ni ahnsou wet kin ongete ahnsou kis, ma kitail pahn kapahrekiong mour poatopoat me kitail pahn ahneki ni ahnsou kohkohdo. Kitail men kilang ia duwen Siohwa eh pahn ketin kapwaiada sapwellime inou en kapaikitailda nan sampah kapwo, kahrehda kitail en doulahte papah ih ni lelepek!—Mad. 24:13.

ELEN MADAMADAU KEPER EHU

9. Soangen madamadau dah me kitail en soikala, oh dahme kahrehda?

⁹ Ni atail kin lelohng kahpwal ehu, kitail kakete kalaudehla kahpwalo ma kitail kamehlele soahng kan me sohte mehlel. Karasepe, kitail kakete kamehlele me Siohwa me ketin kahrehda atail kahpwalo. Ong ahnsou kis, Sohp pehm me Siohwa me ketin kahrehda eh kahpwal ko, oh madamadau sapwung wet kahrehiong en “songosong en kadehdehda me ih me pwung a kaidehn Koht.” (Sohp 32:2) Duwehte met, Naomi pil kapwukoahki Siohwa eh kahpwal ko nin tapio. (Rud 1:​13, 20, 21) Ma Sohp oh Naomi kolokolete soangen madamadau sapwung pwukat, ira pahn kakete kauwehla ara nanpwungmwahu rehn Siohwa. (Lep. Pad. 19:3) Ahpw Siohwa ketin sewese ira en ahneki madamadau pwung ong ara kahpwal ko oh e ketin kapaiahda ira pwehki ira loalopwoat.

10. Ni atail lelohng kahpwal kan, dahme kitail kakete tepida medewe?

¹⁰ Mehnda ma kitail kamehlele me kaidehn Siohwa me ketin kahrehda atail kahpwal kan, ele kitail kakete tepida medewe ma e ketin nsenohkihte kitail. Soangen madamadau sapwung wet kak kaluweteikitailla. (Lep. Pad. 24:10) Nanmwarki Depit oh soukohpo Apakuk lelohng kahpwal kan oh ekei pak ira kin medewe ma Siohwa kin ketin karonge ara kapakap kan. (Mel. 10:1; Apak. 1:2) Ahpw ira sohte uhdihsang kapakap. Siohwa ketin kamehlelehiong ohl lelepek pwukat me e kin ketin sewese ira, oh e pahn pil ketin pousehlahte seweseiuk.—Mel. 10:17.

11. Dahme kakete wiawihong kitail ma kitail ahneki madamadau sapwung ong kahpwal kan?

¹¹ Ma kitail ahneki madamadau sapwung ong atail kahpwal kan, kitail kakete pwuriamweikihla kahpwalo oh kakete medewe ‘Dahme kahrehda Siohwa ketin mweidohng met en wiawihong ie?’ (1 Pit. 4:12) Sapwellimen Sises tohnpadahk ko sohte kak kamehlele me e pahn ketin lelohng kalokolok laud. (Luk 18:​33, 34) Mendahki Sises ketin kawehwehda ni sansal dahme pahn wiawihong ih, wahnpoaron Piter medewe me Koht sohte pahn ketin mweidohng Sises en lokolok ni ahl wet. Sises mwahngih me soangen madamadau wet kak kerempwahla eh pahn kapwaiada kupwuren Siohwa, kahrehda e kapwungala Piter. (Mark 8:​31-33) Pil mwurin Sises pwoula, sapwellime tohnpadahk ko saikinte wehwehki kahrepen eh kamakamala. Ahpw Sises ketin poakohngete irail oh pousehlahte sewese irail. Ni eh mahseniong irail mwurin eh ketin iasada, e ketin sewese irail ren ahneki madamadau pwung ong lokolok me e ketin lelohng sang ni eh ketin “kawehwehiong [irail] ni sansal Nting Sarawi kan.” (Luk 24:​25-27, 32, 44-48) Ni arail pahn medemedewe duwen dahme Sises ketin padapadahkihong irail, met pahn sewese irail en onopadahng uhwong me re pahn lelohng nin duwen sapwellime tohnpadahk. Ni atail kin medemedewe duwen padahk mehlel kan en Paipel, met pil kak sewese kitail en onopadahng kahpwal kan.

12. Ma kitail ahneki madamadau sapwung ong atail irair, ia pahn atail pepehm?

¹² Ma kitail ahneki madamadau sapwung ong atail irair, met kak kahrehiong kitail en pehm me kahpwalo laudsang dahme uhdahn wiawi. Sises ketin kasalehda ehu ahl me met kak wiawi nan sapwellime karasaras en tohndoadoahk kan nan mwetin kreip ehu. Ekei tohndoadoahk ko nsensuwedla pwehki re medewe me sapwung pweinarailo, ahpw soumaso ndaiong emen irail: “Nahn, sohte sapwung ehu I wiahiong uhk.” (Mad. 20:​10-13) Soumaso sohte kin wiakauwe tohndoadoahk ko. Kahrepen ar nsensuwedla pwehki re kasikasik mehkot me re sohte konehng kasik. Rahnpwukat ekei Sounkadehde kan kin ahneki soangen pepehm kohte—karasepe, ni arail sohte alehdi de anahne uhdihsang pwukoa ehu. Soahng dah kan me kak sewese kitail en ahneki madamadau pwung ong irair apwal ehu?

DAHME KITAIL KAK WIA NI KAHPWAL EHU EH PWARADA

13. Dahme kakete wiawi ni kahpwal ehu eh pwarada?

¹³ Ele ke eseier duwen padahk mehlel kan en Paipel me pid kahpwal kan. Mwein ke pil ehukihongehr meteikan padahk pwukat pwehn sewese irail dadaur pahn arail kahpwal kan. Ahpw ni omw lelohng kahpwal ehu, mwein ke kakete apwalki kolokol madamadau pwung. Karasepe, ke pahn kakete pehm me Siohwa kin ketin kalokalokeiuk de me e sohte kin ketin karonge omw kapakap kan. Dahme ke kak wia pwehn kolokolete madamadau pwung?

14. Dahme ke kak kapakapki ni omw lelohng lokolok? (Pilipai 4:13)

¹⁴ Peki sapwellimen Siohwa sawas. Padahkihong Siohwa duwen omw lokolok oh omw pepehm kan. Ke kak kapakapkihong ih mehkot me ke men en ketin sewesekin uhk. Ke kak peki en ketikihong uhk sapwellime ngehn sarawi pwehn kakehlakaiuk oh kihong uhk erpit me ke anahne pwehn kak dadaurete. Ahpw, tamataman me Siohwa kak ketin sapengala omw kapakap ni ahl ehu me ke sohte kasik. (Ep. 3:20) E pil kakete ketin doadoahngki tohnleng kan de riomw Kristian kan pwehn seweseiuk. (Mel. 34:7) Eri tehk mwahu ia duwen Siohwa eh kin ketin seweseiuk oh kalahngankihong ih met. Ke kak kamehlele me Siohwa ketin kupwurki ketikihong uhk sapwellime ngehn sarawi ni sapan pwe ken kak dadaurete pahn kahpwal sohte lipilipil.—Wadek Pilipai 4:13.

15. Dahme pahn seweseiuk en dadaurete pahn kahpwal kan? (Pil kilang kilel.)

¹⁵ Pousehlahte wia soahng kan me kin kakehlaka omw nanpwungmwahu rehn Siohwa. Wia dahme ke kak mehnda ma ke pil sohte kak pwakih omw koasoandi en mwoweo. Erein ahnsoun “kapwunod oh kahpwal” kan me ke anahne kalaudehla omw nantihong ahneki sapwellimen Koht madamadau kan. (Mel. 119:143) Pousehlahte wadek Paipel rahn koaros, onopki oh doudouloale. Wia uwen omw kak en iang kalohk, oh towehda mihting kan oh iang pasapeng. Patehng riomw Kristian akan. Dehr nohn kelekelehpw mehnda ma ke pil men wia met.—Lep. Pad. 18:1.

16. Soahng dah kan me ke kakete peikasalki ni omw lelohng kahpwal kan, oh ia duwen omw kak kapwungala madamadau pwukat? (2 Korint 10:​4, 5)

¹⁶ Kapwungala omw madamadau duwen soahng kan me ke kin peikasalki. Ni kahpwal ehu eh wiawi, ele ke pahn anahne powehdi madamadau kan me “teng oh kehlail,” iangahki omw kin peikasalki duwen pein kowe de Siohwa. (Wadek 2 Korint 10:​4, 5.) Ke kak kapwungala soangen peikasal pwukat ni omw “esehla Koht” sang ni omw doadoahngki Paipel oh sawaspen Paipel kan me sapwellime pwihn kin wiahda. Karasepe, ke kin peikasalki me Siohwa solahr ketin kupwurkin uhk? Onopki duwen soahng kan me wiawihong wahnpoaron Pohl. Erein eh kalohk e kin lelohng kahpwal laud kan, ahpw mepwukat kin ihte kalaudehla eh kamehlele me Sises oh Siohwa ketin kupwurkin ih. (2 Kor. 11:​23-27) Ke kin medewe ma Siohwa uhdahn ketin mahkikihong uhk sapwung kan me ke wiahda mahso? Ma iei, ntingihedi iren Paipel kan me kasalehda me Siohwa kin ketin mahkohngehr dipatail kan. (Ais. 43:25) Mwuri wadek oh doudouloale iren Paipel pwukat. (Mel. 119:97) Ia duwe, mie kahpwal ehu me ke lelohng me kahrehiong uhk ken peikasalki duwen sapwellimen Koht inou me e pahn ketin pere sapwellime ladu lelepek kan? Ropada ire kan duwen kahrepen Koht eh kin ketin mweidohng lokolok en mie oh ia duwen eh kin ketin pere atail nanpwungmwahu reh, sohte lipilipil dahme wiawihong kitail. (Mel. 91:​9-12) Pil wadek duwen riatail Kristian akan me kin dadaurete pahn kahpwal kan.a

17. Dahme kitail anahne wia ni atail lelohng kahpwal ehu?

¹⁷ Ia duwe, ni ahnsou wet ke ahneki “rahn me mwahu” me saledeksang kahpwal kan? Ma iei, eri kalahngankihong Siohwa oh doadoahngki ahnsou wet pwehn doudouloale duwen sapwellime kupwuramwahu. (Ekl. 7:14) Ahpw ni omw lelohng kahpwal ehu, kolokolete madamadau pwung ong omw irairo oh doulahte likih Siohwa ni mohngiong unsek. Ni omw wia met, Siohwa pahn ‘ketikihda elen pitsang pwe ken kak dadaurete.’ (1 Kor. 10:13) Ahpw dahme ke anahne wia ni riomw Kristian akan ar lelohng kahpwal ehu? Kitail pahn koasoiapene met nan iren onop en mwuhr.