Sukuhlsang “Koht en Kansenamwahu Koaros”

1. Dahme kahrehda kitail anahne kansenamwahwih meteikan?

KITAIL koaros kin “nsensuwedkihla soangsoangen kahpwal kan,” kahrehda ekei pak kitail anahne emen en kansenamwahwih oh kangoange kitail. (1 Pit. 1:6) Duwehte atail kin kalahnganki en meteikan ar kin kansenamwahwih kitail, kitail pil men mwadang en kansenamwahwih irail kan me kin lelohng kahpwal kan. (Mad. 7:12) Siohwa “Koht en kansenamwahu koaros,” kin ketin kasalehiong kitail ia duwen atail pahn ‘kansenamwahwih meteikan me mi nan soangsoangen apwal akan.’ Kitail kak alasang sapwellime mehn kahlemeng sang ni atail kin ‘kansenamwahwih emenemen.’ (2 Kor. 1:​3, 4; 1 Des. 4:18) Kitail kin wia met kaidehn ihte pwehki kitail anahne wia met, ahpw pwehki kitail kin poakohng riatail brother oh sister kan. Nan iren onop wet, kitail pahn koasoiapene (1) dahme Paipel mahsanihki duwen en kansenamwahwih emenemen, (2) ia duwen atail kak kansenamwahwih meteikan, oh (3) dahme kitail kak wia ni atail anahne emen en kansenamwahwih kitail.

DAHME PAIPEL MAHSANIHKI DUWEN EN KANSENAMWAHWIH EMENEMEN

2. Nan Paipel, ia wehwehn lepin lokaiao me kawehwehdiong “kansenamwahwih”?

² Nan Paipel, lepin lokaiahn Krihso me kin kawehwehdiong “kansenamwahu” kak wehwehki soahng tohto. E kak wehwehki “en kangoange,” “en kaweid,” de “peki en wia mehkot.” (Rom 12:8) Lepin lokaiahn Krihso me kadoadoahk kin wehwehki en likwerihedo emen en uh limwah oh sewesehda. Eri kitail kak medewehla aramas emen me mwadang tangalahng kompoakepaho me wie lokolok pwehn kak sewesehki dahme e anahne. Sohte lipilipil soangen sawas dah me e pahn kihong kompoakepaho, e kin ahnsou koaros tehk mwahu me kompoakepaho nsenamwahula.

3. Ia duwen Parnapas eh kin kansenamwahwih meteikan? (Pil kilang kilel.)

³ Medewehla duwen mehn kahlemeng en emen nan Paipel. Kristian emen me ede Sosep kin uhdahn koahiek en kangoange oh kansenamwahwih meteikan me kahrehda wahnpoaron ko kin ekerki ih Parnapas, me wehwehki “Nein Kansenamwahu Pwutak.” (Wiewia 4:​36, ntp.) Uwen ahd wet eh kin kawehwehda ih mwahu, Paipel sohla pwurehng ekerki ih uhdahn edeo. Pak tohto, Parnapas kin sewese ienge tohnkaudok kan ni ahnsou me re anahne sawas. Karasepe, ni ahnsou me Sohl ahpwtehn wiahla Kristian men, e kohla Serusalem pwe e men tuhwong tohnpadahk kan wasao. Ahpw irail masak pwehki eh kin kaloke Kristian kan mahso. Parnapas likih Sohl oh kahrehla en tuhwong wahnpoaron ko.—Wiewia 9:​26-28.

IA DUWEN ATAIL KAK KANSENAMWAHWIH METEIKAN

4. Ia ehu ahl me keieu mwahu en kansenamwahwih meteikan? (Rom 1:​11, 12)

⁴ Mwemweitla rehrail ma kak. Siohwa kin ketin doadoahngki sapwellime ladu kan pwehn kansenamwahwih meteikan. Karasepe, ni ahnsou me soukohp Elaisa nsensuwedla, Siohwa ketin doadoahngki tohnleng men pwehn kangoange ih. (1 Nan. 19:​4-7) Wahnpoaron Pohl pil kin men mwemweitla rehn rie Kristian kan pwehn kangoange irail. (Wadek Rom 1:​11, 12.) Ni ahnsou me ke kin mwemweitla rehn emen, ekis mihmi werei pwe ken kak kansenamwahwih. (1 Kor. 16:7) Ma ke sohte kak mwemweitla rehn emen, ke kak call, ntingihada kisinlikou de card ehu, de kadarala text message ehu pwehn kansenamwahwih ih. Ia duwe, ke pahn mweidohng Siohwa en ketin doadoahngkin uhk pwehn kansenamwahwih meteikan?

5. Soangen kahpwal dah kan me kitail kak kasik en lelohng?

⁵ Ni imwin rahn akan eh pahn apwalla, kitail kak kasik me e pahn apwalla kitail en tuhwong oh kansenamwahwih riatail brother oh sister kan. Erein Pohl eh selidi nan Rom, Onesiporus me kohsang Episos, kin raparapahki ih mendahki e kakete selkihdi de pil kamakamkihla eh wia met. (2 Tim. 1:​16-18) Duwehte met, Sounkadehde kan nan Russia kin kansenamwahwih riarail brother oh sister kan ni arail kin lelohng kalokolok pwehki ar pwoson. Ni Sounkadehde kan ar kin wisiklahng mwoalen kopwung, riatail brother oh sister kan kin iang kohla ni mwoalen kopwung pwehn utung irail mehnda ma irail pil kakete selkihdi ar wia met. Ke sou onopadahng alasang arail mehn kahlemeng en eimah sang ni omw onopki duwen sapwellimen Koht aramas akan mahso oh rahnpwukat ar kin sewese emenemen oh pil kolokol arail peren mendahki kalokolok?

6. Ia duwen atail kak alasang Siohwa ni atail kin kansenamwahwih meteikan? (Pil kilang kilel.)

⁶ Rong irail. Ni ahnsou me soukohp Elaisa pehm me eh mour mihmi nan keper, e kapakap ong Siohwa oh kasalehda eh pepehm kan. Atail Koht limpoako uhdahn ketin karonge Elaisa ni eh kasalehda duwen soahng kan me e kin pwunodki, mendahki E ketin mwahngiher dahme kin kapwunode ih. Siohwa pil ketin kanengamah oh karonge ni Elaisa eh kin kapwukapwurehiong dahme e kin koasoia. (1 Nan. 19:​9, 10, 14) Siohwa pil ketin mweidohng soukohp Apakuk en kasalehda eh iren kapwunod kan oh soahng kan me e kin peikasalki ni ahl ehu me kakete mwomwen me e sohte wauneki sapwellimen Koht pwuhng en kaunda. (Apak. 1:​2, 3) Rahnpwukat, Siohwa kin ketin karonge atail kapakap kan mendahki e ketin mwahngiher dahme kitail anahne. Kitail kak alasang Siohwa ni atail kin rong kanaiehng oh wauneki riatail brother oh sister kan ni arail kin koasoi. Kitail en “mwadang rong” ni arail kin koasoi oh dehr sopuk de nsensuwedkihla dahme re nda mehnda ma re mwomwen pwurur en koasoi de kin kapwukapwurehiong dahme re koasoia.—Seims 1:19; Ekl. 7:9.

7. Ia duwen atail kak diarada dahme kitail kak wia pwehn sewese emen?

⁷ Song en diarada dahme ke kak wia pwehn sawas. Kitail sohte kak ese audepen mohngiong nin duwen me Siohwa kin ketin wia. Eri ihte me kitail kak wia pwehn esehda ia duwen atail pahn kansenamwahwih emen iei en rong kanahieng ni emen eh koasoi. Dehr medewe me ke eseier dahme aramaso pahn anahne pwehki ke lelohngehr nan soangen irairohte. Kitail koaros wekpeseng. Eri kihong ahnsou en rong kanahieng oh idek peidek kan ni kadek pwehn sewese aramaso en kasalehda eh pepehm kan.—Lep. Pad. 20:5.

8. Ia duwen Sises eh ketin kansenamwahwih Marda oh Mery mwurin Lasarus eh mehla? (Pil kilang kilel kan.)

⁸ Medewehla duwen Sises eh ketin kansenamwahwihala Marda oh Mery mwurin riara pwutako Lasarus eh mehla. Lih ako koaros uhdahn nsensuwedkihla mehlahn riara pwutako; ahpw, mwomwen en Sises ketin kansenamwahwih ira wekpeseng. Mwurin Marda eh koasoiong ih, Sises mahsanih duwen kaiasadao oh ketin sewese en kakehlakahda eh pwoson inowo. Ahpw ni ahnsou me Mery kohdo reh oh wie sengiseng, Paipel sohte kasalehda me Sises mahsanih duwen kaiasada. E tentenihr rehn Mery oh keinemwe reh ia wasa re nekidedi ie paliweren Lasaruso. (Sohn 11:​20-35) Dahme kitail sukuhlkihsang met? Ni ahnsou me kitail kin kansenamwahwih irail kan me wie lokolok, kitail en song diarada dahme re anahne a kaidehn en kansenamwahwih aramas koaros ni soangen wiepetehieu.

9. Ia duwen atail kak doadoahngki Paipel pwehn kansenamwahwih meteikan? (Rom 15:​4, 5)

⁹ Doadoahngki Paipel. Ni omw kin wadek iren Paipel kan me kin kansenamwahwihala irail kan me wie lokolok, ke kak sewese irail en kakehlaka arail koapworopwor. (Wadek Rom 15:​4, 5.) Oh koapworopwor wet pahn kak kansenamwahwih oh kangoange irail. (Ais. 40:31) Ia duwen omw kak diarada iren Paipel kan me kak kangoange emen? Ekei kin ntingihedi iren Paipel kan me re kak doadoahngki ni ahnsou me anahn, duwehte ire kan me mi pahn oaralapo “Kansenamwahu” nan Iren Paipel kan ong Mour en Kristian. Peki rehn Siohwa en ketin seweseiuk doadoahngki sapwellime Mahsen ni ahl me keieu mwahu pwehn kak kihda kangoang. Sapwellime ngehn sarawi kak seweseiuk en tamanda iren Paipel kan me konehng ni ahnsou me ke anahne doadoahngki.—Sohn 14:26.

10. Dahme kahrehda kitail anahne koasoi ni kadek ni atail kin song en kangoange emen?

¹⁰ Koasoi ni kadek. Lepin lokaiahn Krihso me kadoadoahk ong “kansenamwahwih” pil kak wehwehki “en kaweid,” de “peki en wia mehkot.” Ekei pak, ele ke pahn anahne kaweid de peki aramas me ke kansenamwahwiho en wekidala eh madamadau. Ma ke anahne wia met, medewe mwahu mwohn omw koasoi pwe omw lokaia kan en kak sewese a kaidehn kamedekihala. (Lep. Pad. 12:18) Kitail kak kahlemengih mwomwen Siohwa eh ketin sewese Elaisa. Elaisa medewe me ih kelehpw me luhluhwe me kin papah Siohwa oh me e sohte pweida nan eh pwukoa nin duwen sapwellimen Koht soukohp men. Ni kadek, Siohwa ketin sewese Elaisa en kapwungala eh madamadau ni Eh sohte ketin kasalehiong eh sapwung kan. (1 Nan. 19:​15-18) Ke pil kak wia soahngohte ni omw kin kasalehda kadek oh medewe mwahu mwohn omw koasoi. Ni omw kin wia padahk kan de pasapeng ni mihting en Kristian kan, koasoi ni kadek ahnsou koaros ni omw kin song en kangoange oh kakehlaka riomw brother oh sister kan.

11. Dahme irail kan me kin lokolok kin kalapw anahne? (1 Sohn 3:18)

¹¹ Sawaskihda dahme kompoakepahmw kan pahn anahne. Ni ahnsou me kompoakepatail kan kin wie lokolok, ele kitail pahn anahne wia mehkot pwehn sewese irail, a kaidehn ndahte soahng kan me kin kangoange irail. (Wadek 1 Sohn 3:18.) Parnapas wia mehn kahlemeng mwahu ni eh netikihla sapwe kis oh toukihda mwohnio ong rie Kristian semwehmwe ko me ahpwtehn papidaisla. (Wiewia 4:​36, 37) Rahnpwukat, riatail Kristian tohto kin alasang eh mehn kahlemeng mwahu sang ni arail kin sawaskihda dahme meteikan kin anahne. Gabriela, sang Poland, uhdahn nsensuwedla oh pwunodada ni ahnsou me lapake ehu kauwehla imweo. E koasoia: “Ngehi oh ei pahpa nohno me kin mi rehi uhdahn masepwehkada oh pwunodada. I sehse ia duwen at pahn kamwahwihala imwato. Ahpw brother oh sister kan sang mwomwohdiso kan me karanih kiht kohdo oh uhdahn doadoahk laud pwehn kamwahwihala imwato nan rahn ehute. Dahme wiawi kakehlakahda ei pwoson me Siohwa kin ketin kaweid sapwellime aramas akan ren kansenamwahwih irail kan me lokolok.”

12. Ia duwen omw kak sewese riomw Kristian kan ni omw kin dadaurete ni lelepek pahn omw kahpwal kan?

¹² Dadaurete pahn omw kahpwal kan. Pohl ndaiong mehn Deselonika ko me e kin uhdahn perenkihda oh kehlailkihda eh rong duwen arail kin dadaurete ni lelepek. E uhdahn doadoahk laud pwehn sewese irail, kahrehda e alehdi kangoang laud ni eh ese me re kin papahte Siohwa. (1 Des. 3:​5-8) Pohl pil men kansenamwahwih rie Kristian ko—pil irail kan me saikinte tuhwong ih—sang ni eh kin dadaurete ni lelepek pahn eh kahpwal kan. (Kol. 2:​1, 2) Duwehte met, ni ahnsou me riarail Kristian kan kin kilang ia duwen Siohwa eh kin ketin sewese kitail en dadaurete pahn atail kahpwal kan, met uhdahn kin kangoange irail.

13. Dahme kitail en pousehlahte wia ni atail kin kangoange meteikan?

¹³ Kanengamah. Brother oh sister kan me mworusala ele sohte pahn mwadangete nsenamwahula mwurin atail song en kansenamwahwih irail. Ahpw Paipel mahsanih me kitail en “kangkangoange . . . emenemen.” Lepin lokaiao “kangkangoange” kin wehwehki me kitail anahne pwurupwurehng kangoange meteikan. (1 Des. 5:11) Kanengamah ni omw kin pousehlahte kansenamwahwih irail kan me anahne omw sawas. (1 Des. 5:14) Ahpw ekei pak, kitail kin anahne meteikan en kansenamwahwih kitail. Eri dahme kitail kak wia?

NI OMW ANAHNE METEIKAN EN KANSENAMWAHWIHIUK

14-15. Dahme kitail anahne wia ma kitail kin pwunod de nsensuwed?

¹⁴ Kapakap ong Siohwa. Peki en ketin kansenamwahwihiuk ni omw kin pwunod de nsensuwed. (Mel. 94:19) Kasalehda omw pepehm kan koaros ni sansal nan omw kapakap ong ih. (Mel. 62:8) Ei mehlel, Siohwa ketin mwahngiher omw pepehm kan mwohn omw kapakap ong. Ahpw ni omw kin pein ehukihong ih omw pepehm oh madamadau kan, met kin kasalehda omw pwoson. Oh Siohwa kin ketin ahnsou koaros wia mehkot pwehn sapengala kapakap en aramas men me pwoson Ih. (Mark 11:24) Pilipai 4:​6, 7 kihda kaweid wet: “Kumwail en kapakapohng Koht—peki reh kaweid ni mehkoaros ni ngidingid . . . Ma kumwail wia met, sapwellimen Koht popohl me inenen siksang dahme kitail kak wehwehki pahn pere amwail mohngiong oh amwail kehl en madamadau.”

¹⁵ Peki sawas sang rehn meteikan. Ehukihong omw pepehm kan rehn kompoakepahmw men de elder men me ke likih. Riomw brother oh sister kan kak kansenamwahwihiuk, ahpw mwein re pahn sehse ia omw pepehm de dahme ke anahne lao ke padahkihong irail. (Lep. Pad. 14:10) Ke kak peki ren rong kanaiehng ni omw kawehwehda duwen omw pepehm kan de peki ren ehukihong uhk ehu iren Paipel de artikel me kin kansenamwahwih irail.

16. Dahme kakete wiawi ni meteikan ar song en kangoangeiuk, ahpw dahme ken tamataman?

¹⁶ Kanengamah oh mahkohng meteikan. Riomw brother oh sister kan ele pahn kakete sapwungala ni arail song en kangoangeiuk. Karasepe, re kakete nda de wia mehkot me pahn kalaudehla omw nsensuwed, a kaidehn kansenamwahwihiukala. Ma met wiawi, kanengamahiong irail. (1 Kor. 13:​4, 7) Oh tamataman dahme kileldi nan Seims 3:2: “Ma emen sohte kin sapwungala ni lokaia, ih aramas unsek men.” Tamataman me riomw brother oh sister kan men seweseiuk. Dehr manokehla me “mohngiong me ngoang, ahpw paliwar me luwet.”—Mad. 26:41.

17. Dahme kitail en koasoanehdi teng en wia?

¹⁷ Kitail koaros kin anahne meteikan en kansenamwahwih kitail pwehki kitail kin momour ni imwin rahn akan. Oh kitail kasik me atail mour pahn ehute apwalla oh sapwellimen Koht imwintihti kan pahn pil kalaudehla arail uhwong kitail. Eri kitail pahn anahne kansenamwahwih emenemen laudsang mahs. Kitail en koasoanehdi teng en wia uwen atail kak koaros en kansenamwahwih emenemen.