“Koht en Mehlel” Kin Ketin Kapwaiada Kupwure Ahnsou Koaros

1. Nin duwen me Melkahka 31:​2-5 mahsanih, dahme kahrehda kitail kak likih Siohwa?

KITAIL mi nan sampah ehu me aramas tohto kin likamw. E kak apwal en ese ihs me kitail kak likih. Pesines tohto kin likamw oh mwersuwed. Aramas kin kalapw likamwkihda kamwahupen dahme re men netikihla pwe aramas en pwainda. Oh ekei aramas sohte kak koapworopworki kompoakparail kan en kapwaiada arail inou. Ahpw e kansenamwahu en ese me kitail kak likih Siohwa ahnsou koaros pwehki ih me “Koht en mehlel”! (Wadek Melkahka 31:​2-5.) Siohwa sohte kin ketin likamw. Soahng koaros me e kin ketin mahsanih kin mehlel. Kitail kak likih me Siohwa pahn ketin kapwaiada soahng koaros me e kin ketin mahsanih.

2. Dahme kitail pahn koasoiapene nan iren onop wet?

² Nan iren onop wet, kitail pahn koasoiapene mahs ekei kahrepe kan me kitail kak likih Siohwa ni unsek. A mwuri kitail pahn koasoiapene ia duwen Koht en mehlel eh pahn ketin kasohrehla en Sehdan sampah suwed wet oh dahme Koht kin ketin wiewia pil ni ahnsou wet pwehn kapwaiada kupwure. Iren onop wet pahn sewese kitail en kalaudehla atail men padahkihong meteikan padahk mehlel duwen Siohwa.

KAHREPEN ATAIL KAK LIKIH KOHT EN MEHLEL

3. Dahme kahrehda kitail kak likih Siohwa ni unsek?

³ Kitail kak likih Siohwa pwehki Ih me Sounkapikpen mehkoaros. Ih me ketin kapikada lahng oh sampah oh ih me poahsoanpen mour koaros. (Sen. 1:1; Mel. 36:9; Kaud. 4:11) E ketin wiahda sampah pwe soahng koaros me kitail anahne pwehn momour en wie doadoahk—soahng kan me duwehte ahng me kitail kin esingengki oh pihl me kitail kin nim. E kin ketin ahnsou koaros sapwellimanki manaman pohn mehkoaros. Pwehki Siohwa ketin wiaikitailda, mwahngih soahng koaros, oh sapwellimanki manaman me sohte irepe, kitail kak uhdahn likih ih en ketin kaweid atail mour oh pil kamehlele me e pahn ketikihong kitail mour kaselel ehu ahnsou kohkohdo.

4. Ia duwen atail ese me Siohwa ketin poakohng kitail?

⁴ Kitail kak likih Siohwa pwehki e ketin poakohng kitail. Siohwa ketin kapikada aramas pwehki e ketin kupwurki irail en mour oh pil perenki mour duwehte me e kin ketin wia. Siohwa ketin kasalehda kupwure nan mahsen pwukat: “Kita wiahda aramas rasehng kita.” (Sen. 1:26) E ketikihong kitail saledek en wiahda pein atail pilipil. E ketin kapikada wasa kaselel ehu kitail en kousoan ie. (Mel. 115:16) Oh e ketin kapaiahda tepin atail pahpa nohno ira en ahneki pwukoa kaperen ehu en wiahiong atail wasahn kousoan en wiahla paradais ehu. (Sen. 1:28; 2:15) E ketikihong ira soahng koaros me ira anahne pwe ira en kak peren oh nsenamwahuki mour nin sampah. Soahng pwukat koaros uhdahn kadehdehda me “sapwellimen Siohwa limpoak loalopwoat me poatopoat.”—Mel. 103:17.

5. (a) Dahme Siohwa ketin wia ni ahnsou me Adam oh Ihp uhwongada ih? (b) Ia ekei inou kan me Koht ketin kapwaiadahr? (Menlau kilang koakono “Dahme Koht Kin Ketin Inoukihda Kin Pweida.”)

⁵ Kitail kak likih Siohwa pwehki e kin ketin ahnsou koaros kapwaiada dahme e kin ketin mahsanih. Siohwa sohte ketin kapikada sampah “ni soh kahrepe, ahpw ketin wiahda pwe aramas en kousoan ie.” (Ais. 45:​18, 19) Ni ahnsou me Adam oh Ihp uhwongada Siohwa, met kahrehda ira anahne mehla. Eri e mwomwen me kupwuren Kohto sohte kak pweida. Ahpw sohte mehkot kak kauhdi Siohwa. E kin ketin ahnsou koaros wia dahme e ketin koasoanehdi en wia. (Ais. 46:​10, 11) Kupwure en ketin audehkihla sampah aramas pwung kan sohte wekila. Ihme kahrehda e ketin mweidohng Adam oh Ihp en naineki seri. Oh E ketikihda sapwellime Iehroso nin duwen pweinen pweipwei sapahl ehu pwehn doarehla kadaudok en Adam kan oh ketikihong irail koapworopwor kaselel ehu en mour kohkohlahte.—Sohn 3:16.

KOHT EN MEHLEL KIN KETIN KAPWAIADA KUPWURE

6. Dahme Siohwa ketin kohpada mwurin uhwongo me wiawi nan Ihden?

⁶ “Serpent en mahso, me adaneki Tepil oh Sehdan”a me kasonge Adam oh Ihp en uhwongada Koht. (Kaud. 12:9; Sen. 3:​4, 5; Sohn 8:44) Kahrehda Siohwa ketin mahsanih me Sehdan pahn kasohrala ni ahnsou kohkohdo. (Sen. 3:15) Lao lel ahnsowo, aramas tohto pahn idawehnla Sehdan oh wia soahng suwed kan. Ahpw, ekei aramas pahn loalopwoatohngete Siohwa.

7. Ihs me kin idawehnla Tepil, oh dahme pahn wiawihong irail?

⁷ Irail kan me kin idawehnla Sehdan me Tepilo iei tohnleng kan oh aramas akan me uhwongada Koht. Pwehki irail uhwongada de pelianda kupwuren Kohto, irail wiahkilahr pein irail kadaudok en Sehdan. Ahpw Siohwa ketin koasoanedier ahnsowo me E pahn ketin kasohrehla Sehdan oh irail koaros me utungada ih.—Dan. 2:44; Rom 16:20.

8. Dahme Sises ketin wia nan pahr 1914? (Pil kilang kilel kan.)

⁸ Dahme kahrehda kitail kak kamehlele me inou me Siohwa ketin wiahda pwehn ketin kasohrehla Sehdan oh irail koaros me kin idawehn ih, pahn pweida? Nan pahr 1914, Sises ketin tepida mahweniong Sehdan me Tepil oh nah ngehn suwed kan, oh ketin kesepwekeiraildiong nin sampah. (Kaud. 12:​7-9) Mendahki mahwen wet wiawi nanleng, aramas akan nin sampah kak kehn imwilahn mahwen wet. Pwe Paipel mahsanih: “Meid suwediong sampah oh sehd, pwehki Tepilo leledohr rehmwa, oh e inenen lingeringer kowahlap, pwehki eh ese me eh ahnsou mwotomwotalahr.” (Kaud. 12:12) Sangete pahr 1914, Sehdan kin wia uwen eh kak koaros en kahrehiong aramas tohto en idawehnla ih. Kahrehda irair en sampah wet kin wie susuwedla. Ei mehlel, “meid suwediong sampah”! Ahpw kereniong, Sises pahn ketin “kalowehdi eh imwintihti kan,” oh Sehdan oh irail koaros me kin utung ih pahn kasohrala. (Kaud. 6:2) Sises pahn ketin kasalehiong koaros me Sehdan suwed oh me e kin kihseli likamw kan duwen Siohwa. (Mel. 45:​4-6) Eri koaros pahn ese me Siohwa iei Koht en mehlel!—Esek. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

KOHT EN MEHLEL KIN KETIKIPENE KOAROS ME POAKOHNG ME MEHLEL

9. Ihs me Siohwa kin ketikipene rahnpwukat?

⁹ Eri Siohwa kin ketikipene “mehkoaros rehn Krais, soahng kan nanleng oh soahng kan nin sampah.” (Ep. 1:10) “Soahng kan nanleng” kin dokedoke me keidi kan me Siohwa ketin piladahr ren iang Krais kaunda nanleng. “Soahng kan nin sampah” kin dokedoke irail kan me pahn mour kohkohlahte nan Paradais nin sampah. Irail pwukat koaros me kin kaudokiong Siohwa kin soupisengki sewese meteikan ren sukuhlki me mehlel duwen Siohwa oh kasalehiong irail me Sehdan iei sounlikamw mwersuwed men.

10. Ia duwen Siohwa eh kin ketin sewese aramas akan ren saledek sang padahk likamw en pelien lamalam likamw kan? (Kaudiahl 14:​6, 7)

¹⁰ Sang ni doadoahk en kalohk me kin wiawi nan sampah pwon, Siohwa kin ketikipene irail kan me poakohng me mehlel. Oh met iei doadoahk en kalohk me keieu laud nan poadopoad en aramas. (Wadek Kaudiahl 14:​6, 7.) Mendahki Siohwa kin ketin doadoahngki aramas akan ren padahkihong meteikan duwen rongamwahwo, tohnleng kan pil kin iang kihpene aramas mohngiong mehlel kan ren iang mwomwohdisohn Kristian. Ni ahnsou me sapwellimen Koht aramas akan kin kalohki me mehlel duwen Ih, re pil kin sewese aramas akan ren wehwehki me Tepilo kin doadoahngki Papilon Lapalap, pelien lamalam likamw kan en sampah, pwehn kihseli padahk likamw kan duwen Siohwa. (Kaud. 18:​2, 4) Kereniong pelien lamalam likamw koaros pahn kasohrala douluhl, oh irail koaros me poakohng Koht en mehlel pahn patohwanohng Ih lingan me e ketin warohng sapwellimanki.—Kaud. 17:16.

11. Ia duwen atail kak ese ihs me sapwellimen Siohwa tohnkaudok mehlel kan?

¹¹ Irail me kin poakohng me mehlel kin kohsang soangsoangen aramas akan, tiahk kan oh wehi kan sang wasa koaros nan sampah. (Kaud. 7:​9, 10) Ni ahnsou me irail rong ‘rongamwahwo,’ re kak kilang ni sansal me dahme re sukusukuhlki iei padahk mehlel oh re men wiahla kisehn sapwellimen Siohwa aramas akan. (Mark 13:10) Rahnpwukat e kin ahpwte sansalla ihs me kin papah Siohwa ni ahl me pwung oh ihs me sohte kin. Soukohp Malakai kohpada: “Kumwail pahn pwurehng kilang wekpeseng en nanpwungen aramas pwung men oh aramas suwed men, wekpeseng en nanpwungen me kin papah Koht oh me sohte kin papah ih.” (Mal. 3:18) Sapwellimen Siohwa ladu kan kin kasalehda sang ni arail wiewia oh arail doadoahk en kalohk me re kin kaudokiong Koht en mehlel.

12. Ia duwen doadoahk en kalohk eh sewese kapwaiada kupwuren Siohwa?

¹² Sang ni atail kin kalohki “rongamwahu en Wehio,” kitail kin peikiong sapwellimen Sises kehkehlik oh pil ni ahnsowohte kapwaiada kokohp. (Mad. 24:14; 28:​18-20) Oh doadoahk wet kin kahrehiong aramas sang wasa koaros nin sampah ren wiahla sapwellimen Krais tohnpadahk oh re kin kasikasik ahnsowo me re pahn kaudokiong Koht en mehlel kohkohlahte. E kin wia pwais kaselel ehu me Siohwa kin ketin doadoahngki kitail pwehn sewese kapwaiada kupwure!

KILENGWOHNG AHNSOU KOHKOHDO NI KOAPWOROPWOR

13. Ihs me Sehdan kin keieu kaloke, oh dahme kahrehda?

¹³ Sehdan me Tepil inenen lingeringer pwehki e ese me “eh ahnsou mwotomwotalahr” mwohn eh sampah pahn kasohrala. (Kaud. 12:​12, 13) E kin keieu kaloke irail me kin wia wiliepen Wehin Koht nin sampah, irail “me kin kapwaiada kehkehlik en Koht kan oh pwaisanki doadoahk en kadehdehda duwen Sises.” (Kaud. 12:17; 14:12) E pil kin uhwong koaros me kin utung irail oh doadoahk me irail kin wiewia.

14. Dahme pahn wiawi ni ahnsou me Sehdan pahn song en kasohrehla sapwellimen Siohwa aramas akan? (Pil kilang kilel ni wet.)

¹⁴ Mwurin kasohrlahn Papilon Lapalap, irail akan me kin utung Sehdan pahn song en kasohrehla sapwellimen Siohwa aramas akan koaros. Uhwong wet pahn kahrehda Armakedon en wiawi. (Kaud. 16:​13, 14, 16) Sises oh karis en nanleng pahn kapitala sapwellimen Siohwa tohnkaudok kan oh pahn kasohrehla douluhl mehkoaros me luwehdi nan en Sehdan sampah. (Kaud. 19:​19-21) Solahr pahn mie sounlikamw akan, aramas suwed kan oh koaros me kin wia koasoandi mwersuwed kan. (Kaud. 21:8) Koaros pahn ese me Siohwa kin ketin ahnsou koaros wia dahme pwung oh sapwellime mahsen kin ahnsou koaros mehlel.

15. Dahme kahrehda kitail kak kamehlele me dahme Siohwa ketin inoukihda pahn uhdahn pweida? (Aiseia 65:​16, 17) (Pil kilang kilel.)

¹⁵ Rahnpwukat laudsang mahs, aramas akan nan sampah pwon kin pousehlahte peipene oh pitih emenemen. Ahpw sang ni sapwellimen Siohwa sawas, sapwellime ladu kan kin kolokol arail miniminpene. Doadoahk en kihpene aramas akan tepidahr wiawi. Sohte mehkot kak kauhdi Siohwa sang eh pahn ketin kapaia sapwellime aramas akan oh doadoahk me re kin wiewia. (Wadek Aiseia 65:​16, 17.) Kitail kak kamehlele me dahme e ketin inoukidahr pahn pweida. En wahnpoaron Pohl eh koasoi kan me kileldi nan Rom 8:​38, 39 kamehlelehiong kitail: “Kaidehn mehla de mour de tohnleng kan de koperment kan de mehkan en ahnsou wet de mehkan me pahn kohdo de manaman kan de me ile de me loal de pil kepikipik teikan pahn kak katohreikitailsang sapwellimen Koht limpoak me kin sansalda rehn Krais Sises atail Kaun.”

16. Dahme kahrehda ke kak likih Siohwa ni mohngiong unsek?

¹⁶ Kitail ahneki kahrepe tohto en likih Siohwa, Koht en mehlel. Ih me Sounkapikpatail. E uhdahn ketin poakohng kitail. Pokon kalaimwuno kin wie tohtohla, ni aramas en wehi koaros ar patopene pwe ren kaudokiong Siohwa. (Ais. 60:22; Sek. 8:23) Kitail ese me ahnsou koaros Siohwa kin ketin kapwaiada kupwure oh kereniong e pahn ketin kasohrehla Sehdan pwe sampah en saledeksang en Sehdan likamw akan. Kitail kin kapakap duwehte Depit me patohwan: “Kaping en kohwong Siohwa Koht, . . . Ih kelehpw me kin ketin wia soahng kapwuriamwei kan. Kaping en kohwong mware me lingan kohkohlahte, oh sapwellime lingan en kadirehla sampah pwon.”—Mel. 72:​18, 19.