Peidek kan Sang Sounwadawad kan

Iahd me wehi kan pahn pakairki “popohl oh sohte keper”?

Nin duwen me kitail tehkpeneier nan “Peidek kan Sang Sounwadawad kan” nan Kahn Iroira ehu me ahpwtehn wiawihda, Siohwa pahn kereniong ketikihong nan mohngiong en ‘kode eiseko’ (koperment kan koaros) “kupwure,” me iei ren kihong arail manaman rehn ‘mahn lawalo weitahtao’—United Nations. Mahn lawalo menet pil adaneki “sansal en mahn lawalou.” (Kaud. 13:​14, 15; 17:​3, 16, 17) Eri ‘kode eiseko’ oh mahn lawalou me ahpwtehn alehdi manaman pahn kasohrehla pelien lamalam likamw koaros nin sampah. Ia duwe, wehi kan pahn pakairki “popohl oh sohte keper”b mwohn de mwurin kasohralahn pelien lamalam likamw koaros?—1 Des. 5:3.

Kitail sohte uhdahn ese iahd me wehi kan pahn pakairki “popohl oh sohte keper.” Ma kitail ese oaritik kan koaros, kitail sohte pahn anahne pepehd oh mwasamwasahn. Ahpw Sises kin ketin pwurupwurehng kaweidki sapwellime tohnpadahk ko ren “pousehlahte mwasamwasahn.” (Mad. 24:42; 25:13; 26:41) Met kitail pahn tehkpene dahme Siohwa ketin kamwakid wahnpoaron Pohl en kohpada.

Pohl ntingihedi: “Ni ahnsou me irail pahn nda, ‘Popohl oh sohte keper!’ re ahpw pahn kamwomwmwomwla. Kahpwal wet pahn mwadangete lelohng irail.” (1 Des. 5:​2, 3) Neitail sawaspen Paipel kan kin kalapw kawehwehdi dahme Pohl koasoia ni ahl wet: Pakair en “popohl oh sohte keper” pahn wiawi mwohnte kahn kamakam kowahlapo eh pahn tepida, me pahn tepikihda kasohralahn Papilon Lapalap—pelien lamalam likamw koaros nin sampah. Kitail pil kin nda me ni ahnsou me pakair wet wiawi, kitail pahn ese me kahn kamakam kowahlapo pahn tepidahr.

Ahpw mwurin roporop eh pil wiawi, e mwomwen me e pil kakete mie ehu wehwe tohrohr. Mwein pakair en “popohl oh sohte keper” pahn wiawi mwurin kasohralahn pelien lamalam likamw koaros. Dahme kahrehda kitail kak ndahki met? Medewehla peidek pwukat.

Ia duwen pelien lamalam likamw kan ar kin pidada mahwen kan nin sampah? Paipel mahsanih: “Ntahn irail koaros me kamakamalahr nin sampah dierekdahr nan kahnimw wet [“lihen netiki paliwere ndand,” Papilon Lapalap].” (Kaud. 17:​1, 5; 18:24) Sangete mahs, poadopoad kasalehda me lihen netiki paliwere ndando kin utungada mahwen kan oh pil kin kalapw kahrehda tiahk lemei oh kamakamalahn aramas rar kei. Eri pelien lamalam likamw kin kahrehda mahwen oh tiahk lemei, a kaidehn popohl oh sohte keper. Kahrehda mwein wehi kan pahn kakete pakairki “popohl oh sohte keper” mwurinte kasohralahn Papilon Lapalap, ahpw kitail sohte uhdahn ese ma ih met me pahn wiawi.

Dahme pahn wiawi mwurin pakair en “popohl oh sohte keper”? Pohl koasoia: “Re ahpw pahn kamwomwmwomwla. Kahpwal wet pahn mwadangete lelohng irail.” (1 Des. 5:3) Ma wehi kan en sampah wet pakairki “popohl oh sohte keper” mwurin pelien lamalam likamw kan ar kasohrala, eri kamwomwmwomwlahn wehi pwukat koaros pahn mwadangete wiawi ni soh kasikpe.

Ia duwen sapwellimen Siohwa aramas akan ar pahn mwekidki pweidahn kokohp wet? Pohl koasoia: “Riat ko, kumwail sohte mi nan rotorot, kahrehda rahno sohte pahn mwadangete lelohng kumwail rasehng marain en rahn eh kin lelohng lipirap akan ni soh kasikpe.” (1 Des. 5:4) Medewehla met: Ma pakair en “popohl oh sohte keper” wiawi mwurin pelien lamalam likamw kan ar kasohrala, eri sapwellimen Siohwa aramas akan pahn ese me kasohralahn wehi kan pahn kereniong wiawi. Ahpw ong wehi kan, kasohrala wet pahn lelohng irail rasehng lipirap men me kin kohdo ni soh kasikpe.

Eri dahme kitail pahn kasik? Ni ahnsou keren ‘kode eiseko’ oh mahn lawalou me alehdi manaman laud pahn kasohrehla pelien lamalam likamw kan. Ih met me pahn tapiada kahn kamakam kowahlapo. Kitail pil ese me e pahn mie ahnsou ehu me wehi kan pahn pakairki “popohl oh sohte keper.” Iahd me met pahn wiawi? Kitail tehkpeneier soahng riau me kak wiawi. Ehu iei: Pakair wet pahn wiawi mwohn kasohralahn pelien lamalam likamw koaros. Pil ehu iei: Pakair wet pahn wiawi mwurin wehi kan ar kasohrehla pelien lamalam likamw koaros. Kitail pahn anahne awih oh kilang dahme pahn wiawi. Kitail kin kalapw wehwehkihda kokohp en Paipel kan erein ar wie pweipweida de pil mwurin ar pweidahier.—Pil kilang Sohn 12:16.

Ahpw dahme keieu kesempwal iei kitail en lelepekohngete Koht, a kaidehn iahd me wehi kan pahn pakairki “popohl oh sohte keper.” Kahrehda kitail anahne “pepehd oh kolokol atail koahiek en madamadau” pwe kitail en kak onopada mwahu ong sohte lipilipil dahme pahn wiawi.—1 Des. 5:6.