Opadaia—Kakairada Lemmwin Koht

Opadaia me kin apwalih tohn tehnpas en Nanmwarki suwedo Eihap, kaun me mweidada kaudok en Paal en rekla nan sahpwo. Ahpw, Opadaia kin kakairada eh lemmwiki Siohwa “sangete ni eh pwulopwulo.” (1 Nan. 18:​1-13) Eri ni ahnsou me Lih Nanmwarki Sesepel ruwese me sapwellimen Siohwa soukohp koaros ren kamakamala, Opadaia ese me e anahne eimah pwehn kak sewese irail. En ekihla soukohp emente kin keper; ahpw, Opadaia ekihla soukohp 100 oh kin kihkihong kanarail mwenge erein lehk lapalapo! Medewehla ia uwen eh apwal en wia met oh pil tetehk pwehn dehr dierekda rehn soukohp likamw epwiki kei me kin papah nanmwarkio oh lih nanmwarkio.—1 Nan. 18:19.

Dahme kitail kak sukuhlkihsang ohl menet me kin lemmwiki Koht? Mendahki Opadaia kin masak Eihap, eh lemmwiki Koht kin laudsang. Met kin kahrehiong en ahneki eimah laud pwehn kak mendahkihla eh mour oh pere ienge tohnkaudok teikan. Kitail pil anahne kakairada lemmwin Koht, ahpw mehlel ma kaudok mehlel keinapwidi wasa me kitail kin kousoan ie. Soangen lemmwin Koht wet pahn kakehlaka kitail pwe kitail en kak sewese riatail Kristian kan me kin lelohng kahpwal kan.