PEIDEK KAN SANG SOUNWADAWAD KAN

Inou lap riau dah me wahnpoaron Pohl kin koasoakoasoia nan Kalesia 4:24?

Mwurin wahnpoaron Pohl eh koasoia duwen nanpwungen Eipraam oh Sara oh nanpwungen Eipraam oh Akar, e koasoia: “Mepwukat duwehte sipai en karasaras pwoat; pwe lih riemen pwukat kin wehwehki inou lap riau.” (Kal. 4:​22-24.) Mahso, kitail kin kamehlele me inou lap riau pwukat iei inou lap en Kosonnedo oh inou lap kapwo. Ahpw mwurin atail pwurehng tehkpene ire pwukat, kitail kamehlele me wekidekla ieu anahne wiawi. Pwe e mwomwen me Pohl kin koasoakoasoia duwen inou lap me wiawihda rehn Eipraam, ahpw kaidehn inou lap kapwo. Kitail pahn tehkpene ekei oaritik kan.a

Pohl kadokepene lih liduwo Akar ong Nahna Sainai. (Kal. 4:25) Akar dokedoke inou lap en Kosonnedo me wiawi ni Nahna Sainai nan pahr 1513 Mwohn Krais. (Eks. 19:​5, 6) Sohte aramas soh unsek men kak kapwaiada Kosonnedo ni unsek, kahrehda e katamankihong mehn Suhs kan me irail wia lidun dihp. Inou lap wet kak sewese wehin Israel ren ese ihs Mesaiao, pwe aramas menet kelehpw me pahn kak kapwaiada Kosonnedo ni unsek. Ni ahnsou me Mesaiao meirongkihla sapwellime mour unsek, e ketin kahrehiong aramas soh unsek kan ren kak saledeksang dihp oh mehla. (Kal. 3:​19, 24, 25) Mwurin Sises eh ketin kapwaiada kupwuren Koht, Kosonnedo solahr anahn.—Rom 10:4.

Pohl kasalehda me Akar weksang Sara, “lih saledeko” me naitikihedi seri “nin duwen inou ehu.” (Kal. 4:23) Inou wet iei inou lap me Siohwa ketin wiahda rehn Eipraam. (Kal. 3:29; 4:​28, 30) Inou lap wet sansalda nan Senesis 22:18 me mahsanih: “Pwehki kadaudokomw [kadaudok en Eipraam] wehi koaros en sampah pahn ale kapai ehu ong pein irail pwehki ke rong kapitiei.”

Inou lap me wiawihda rehn Eipraam pil kihda ekei ire duwen inou me Siohwa ketin wiahda nan mwetuwel en Ihden. (Sen. 3:15) Inou lapo kasalehda me ‘kadaudok’ me kokohpdahro pahn wia kadaudok en Eipraam. Pohl kawehwehda me ‘kadaudok’ menet kin keieu dokedoke Sises Krais. Ahpw irail kan me wia “sapwellimen Krais,” me iei 144,000 keidi ko me pahn iang Sises kaunda nan sapwellime Wehio, pil iang wia kisehn kadaudok tohrohr wet. (Kal. 3:​16, 29; Kaud. 14:​1-3) Pweidahn sapwellimen Koht inou ong Eipraam pahn wahdo kapai tohto ong irail kan me kamehlele oh kin peikiong Sises.

Dahme kahrehda Pohl doadoahngki “sipai en karasaras” wet? E kasalehda me ma mehn Suhs akan ni eh mwehio kin ngihtehtehki ren kapwaiada Kosonnedo, eri irail pahn wiahte lidu kei me duwehte Akar. Ahpw ma irail kamehlele “kadaudok” en Eipraam me keieu kesempwalo, me iei Sises Krais, irail pahn saledekla duwehte Sara. Irail pahn uhdahn saledeksang dihp oh mehla. (Sohn 8:​32-34) Ahpw ma irail sohte kamehlele Sises, met wehwehki me irail sohte wehwehki uhdahn kahrepen inou lap en Kosonnedo, me iei en kahluwairaillahng Krais.

Mehn Kalesia tohto me Pohl ntinglahng kaidehn mehn Suhs kei oh re sohte mwahn mi pahn Kosonnedo. Ekei irail me kin uhki lamalam en mehn Suhs kin ngihtehtehki me Kristian kan me kaidehn mehn Suhs anahne peikiong Kosonnedo, iangahki kosonned en sirkumsais. Pohl kawehwehda me dahme re wia sohte loalokong. Re sohte anahne wia “lidu” en Kosonnedo. Pwehki arail kin kamehlele Sises, irail ‘saledeklahr.’—Kal. 5:​1, 10-14.