Uhk kan nan Paipel

Irail kan me kin wadek Paipel kakete taman me ekei sapwellimen Sises tohnpadahk kan wia soused kei. (Mark 1:​16-20) Irail kin doadoahngki uhk kan ni arail kin laid nan Sehden Kalili.

Re kin doadoahngki sahl de dereht me wiawihkihda plaks oh kin pirepene pwehn wiahda uhk ehu. Ma sousedo men koledi mwahmw tikitik, e pahn doadoahngki uhk me pwoahr ko tikitik. A ma e men koledi mwahmw laud, e pahn doadoahngki uhk me pwoahr ko laud. Uhk tikitik kan kin kalapw mie leht de takai kan me pahn kahrehiong en kihrla. A uhk laud kan kin mie soahng pwukat pah me kin kakihrala, oh pil tuhke de usepehi kan powe me kin kahrehiong en peipei.

Uhk kan kin pweilaud. Mepwukat kak ohkihla takai kan ni kapin sehdo de teipeseng ni eh nohn toutoukihla mwahmw. (Luk 5:6) Paipel mahsanih me Seims oh Sohn “onohne arail uhk ko,” mwein sang ni ara doadoahngki dikek lapala ehu oh dereht linen. (Mad. 4:21) Soused kan ele pahn wia met mwurin ehuehu ahnsou me re doadoahngki arail uhk ko. Luk pil kawehwehda me soused ko kin “widewiden ar uhk ko” pwehn widensang soahng samin kan. (Luk 5:2) Mwurin mwo, soused ko kin palangada arail uhk ko pwehn madada oh dehr matala.—Esek. 47:10.

Sises ketin luke ohl kan me koahiek en doadoahngki uhk kan ren wiahla “sounlaidih aramas.”