Wehwehn oh Kesempwalpen Papidais

1. Dahme kin kasalehda me papidais wia padahk en Paipel ehu me uhdahn kesempwal?

KITAIL kin uhdahn peren ni ahnsou me irail me kapw kan kin papidaisla! Tepin Kristian ko ahneki soangen perenohte ni ahnsou me mihting en Kristian en mwomwohdiso tepida wiawi. Ni ahnsowo, wahnpoaron Piter wia padahk ehu me kawehwehda me papidais uhdahn kesempwal. (Wiewia 2:​38, 40, 41) Wahnpoaron Pohl ntingihedi me “tepin padahk kan duwen Krais” pil kin iangahki “padahk duwen papidais.” (Ipru 6:​1, 2) Mendahki oaralapo papidais mwomwen wia padahk mengei ehu, ahpw kitail uhdahn anahne wehwehkihla. Dahme kahrehda?

2. Dahme kahrehda e kesempwal kitail en wehwehki padahk en Paipel duwen papidais?

² Duwehte poahsoan en ihmw kehlail ehu me kin sewese ihmw ehu en dehr mengei en mweredi, atail wehwehkihla mwahu duwen papidais kak sewese kitail en ahneki pwoson laud. Mehnda ma kitail saikinte papidaisla de kitail pil papidaiskiher sounpar tohto, kitail anahne ese dahme kahrehda papidais kin uhdahn kesempwal. Eri nan iren onop wet, kitail pahn sapengala peidek pwukat: Ia wehwehn papidais? Dahme kin wiawi ni ahnsoun papidais? Oh dahme kahrehda kitail kin papidaisla ni mwaren Sahm, Sapwellime Ohl, oh ngehn sarawi?

WEHWEHN PAPIDAIS

3. Dahme papidais kin kasalehiong meteikan?

³ Omw papidaisla kin kasalehiong wehipokon me ke kamehlelehier padahk mehlel duwen Siohwa Koht oh Krais Sises, koluhkihlahr dipomw kan, wiahda wekidekla kan nan omw mour pwe ken papah Siohwa, pohnese me Sises iei sapwellimen Koht elen komourala, oh kapakapkihong Koht me ke uhdahn men iang Sapwellime pwihn kapwaiada kupwure. Ni omw wiahda inou wet oh papidaisla, ke tepidahr keid nan ahl me kohkolahng mour soutuk.

4. Ia wehwehn omw duhdi nan pihlo oh pwaradahsang? (Pil kilang kilel.)

⁴ Ni ahnsou me ke papidais, paliweromwen pwon kin duhdihong nan pihlo oh mwuri ke pwaradahsang,a oh e mwomwen me ke seridi oh mwuri iasada. (Pil kilang Kolose 2:12.) Papidais kin karasahda wekidekla laud kan me ke wiahda nan omw mour. Ia duwen? Ni omw duhdi nan pihlo, ke kasaledahr me ke keselahr omw mour en mahso. Ni omw kohdahsang nan pihlo, ke tepidahr omw mour kapw, oh sang ahnsowo kohla, wia kupwuren Koht iei me keieu kesempwal nan omw mour.

5. Ia duwen doadoahk me ke kin wia pwehn kaunopadahng papidais eh pahrekiong doadoahk me Noha wia pwehn kauwada warihmwo? (1 Piter 3:​18-21)

⁵ Wadek 1 Piter 3:​18-21. Kitail kak kapahrekihpene doadoahk me ke kin wia pwehn kaunopada ong papidais ong doadoahk me Noha kin wia pwehn kauwada warihmwo. Ma ke ahpwtehn tepida sukuhlki duwen Siohwa, doadoahk me ke pahn wia ele mwomwen apwal duwehte doadoahk laud en kauwada en Noha warihmwo. Ia duwe, doadoahk laud wet uhdahn anahn? E uhdahn anahn ong Noha. Koht me ketin koasoanehdi mwomwen kokoudahn warihmwo, oh Noha anahne idawehn mwahu pwehn kapitala mour sang Nohliko. Sang ni pwoson oh sapwellimen Koht sawas, Noha peikiong oh kauwada warihmwo. Duwehte Noha, ke pil kak kapwaiada ‘mehkoaros . . . me Koht ketin kehkehlingki.’—Sen. 6:22.

6. Ia wehwehn en Piter nda me papidais kin “komourkumwailla”?

⁶ Nan iretikitik 21, wahnpoaron Piter ntingihedi me papidais “kin komourkumwailla.” Ahpw met sohte wehwehki me atail duhdi nan pihl kin komourkitailla de pil kin widensang dipatail. Pwe ntahn Sises kelehpw me kak kamwakeleikitailsang dipatail kan. (1 Sohn 1:7) Ahpw papidaisla pil kin uhdahn kesempwal pwehki Siohwa me ketin kehkehlingki kitail en wia met. Oh ni atail kin papidaisla, kitail kin pekipeki “nsenmwakelekel rehn Koht.” Siohwa pahn ketin kupwurki ketikihong kitail dahme kitail peki. Pwehki Siohwa kin ketin kupwurki wia met, papidais kin ‘komourkitailla’ de kahluwalahng kitail mour soutuk.

DAHME KIN WIAWI NI AHNSOUN PAPIDAIS

7. Dahme anahne wiawi ni ahnsoun papidais?

⁷ Paipel padahkihong kitail me ni emen eh kin papidaisla, paliwere pwon anahne duhdi pahn pihl. Likin mwo, Paipel sohte kasalehda oaritik tohto duwen mwomwen papidais. Ahpw Paipel kin sewese kitail en ese dahme konehng. Karasepe, kaweid en Paipel kan kin sewese irail me pahn papidais ren ese soangen likou dah me konehng oh pil sewese irail me kilang papidaiso en ese soangen wiewia dah me konehng. (1 Kor. 14:40; 1 Tim. 2:9) Rahnpwukat, elder men me kin wia papidais, ahpw kitail en dehr kin wiahkihla me e kesempwalsang meteikan. (1 Kor. 1:​14, 15) Papidais kin uhdahn kesempwal sohte lipilipil ma aramas tohto kilang de me malaulaute.—Wiewia 8:36.

8. Peidek dah kan me kin kowohng irail kan me pahn papidais, oh dahme kahrehda? (Wiewia 2:​38-42) (Pil kilang kilel.)

⁸ Paipel kasalehda me “pwe en komourla, [kitail] anahne lohkihong wehipokon rohngo,” me wehwehki en kasalehda atail pwoson. (Rom 10:​9, 10) Eri ia uwen eh konehng kitail en wia met ni atail papidaisla, wiewia ehu me kin kesempwal ong komourala! Ihme kahrehda peidek riau pwukat kin kohwong irail me pahn papidais. Keieu iei, “Ke koluhkihlahr dipomw kan, inoukihong Siohwa omw mour, oh kamehlele sapwellime ahl en komourla ni eh ketikihda Sises Krais?” Peidek wet kin pidada dahme aramas emen wiadahr pwehn kak papidaisla. Met duwehte dahme Piter koasoia ni rahnen Pendekos ni ahnsou me e padahkihong aramas ako ren koluhla oh papidaisla. Keriaun peideko iei, “Ke wehwehki me omw papidaisla kin kasalehda me kowe emen Sounkadehdehn Siohwa ni omw kin werekiong sapwellimen Siohwa pwihn?” Peidek wet katamankihong kitail me kitail en mour ni ahl ehu me pahrekiong atail inou sang ni atail peikiong kaweid kan me sapwellimen Siohwa pwihn kin kihda oh iang iengatail Kristian kan papah Koht, duwehte me tepin tohnpadahk ko kin wia. (Wadek Wiewia 2:​38-42.) Irail kan me sapengki ei ong peidek riau pwukat kakehr papidaisla.

9. Dahme koaros anahne wia pwehn kaperenda Koht?

⁹ Pil mwohn omw tepida sukuhlki padahk mehlel, ele ke kin ahneki mour ehu me mwahu oh sohte mwahn wiahda dihp laud. De mwein ke tikida rehn papah nohno Kristian kan me seweseiuk ken poakohngala Siohwa. Ia duwe, ke anahnehte en koluhla oh papidaisla pwe Koht en ketin kupwurkin uhk? Ei. Sohte lipilipil ia mwomwen atail tikida, kitail koaros anahne pohnese me kitail sohsohki dihp me kin kadohwaneweikitailsang rehn Koht. (Mel. 51:5) Ahpw ni atail esehla Siohwa, kitail kin pilada en mwohneki mahs kupwure. Ni atail kin wia met, kitail kin uhdahn koluhkihla soangen dihp koaros me kitail wiahda, oh sohla wia soahng kan me kin kansensuwedihada Koht, oh tepida mour ni ahl ehu me kin kaperenda Samatail nanleng. Eri met kitail kakehr papidaisla.—Wiewia 3:19.

10. Dahme ke anahne wia ma ke papidaislahr nan ehu pelien lamalam tohrohr?

¹⁰ Ma ke papidaislahr nan ehu pelien lamalam tohrohr, ke pil anahnehte papidaisla nin duwen Sounkadehdehn Siohwa men. Dahme kahrehda? Pwehki ahnsowo, ke saikinte uhdahn wehwehki padahk mehlel duwen Siohwa Koht oh Sises. Oh mehnda ma ke pil inoukihda omw mour ong Koht ni kapakap, omw inou sohte poahsoankihda wehwe pwung duwen kupwure. Ni ahnsou me wahnpoaron Pohl tuhwong mehn Episos kei me papidaislahr ahpw sohte wehwehki padahk en Kristian kan, e koasoanehdi irail en pwurehng papidaisla.b (Wiewia 19:​1-5) Duwehte rahnwet, papidais kin manaman ihte ma e poahsoankihda loalokong pwung duwen kupwuren Koht.

“NI MWAREN SAHM OH SAPWELLIME OHL OH NGEHN SARAWI”

11. Ia wehwehn en papidaisla “ni mwaren Sahm oh Sapwellime Ohl oh ngehn sarawi”? (Madiu 28:​18-20)

¹¹ Sises ketin kehkehlingki me tohnpadahk kapw kan en papidaisla “ni mwaren Sahm oh Sapwellime Ohl oh ngehn sarawi.” (Wadek Madiu 28:​18-20.) Ia wehwehn met? Nan Paipel, lepin lokaiao “mwaren” kin kalapw dokedoke dahme aramas kin esehki emen. E pil kak dokedoke dehu oh manaman me aramaso ahneki. Eri ni ahnsou me kitail wia mehkot “ni mwaren” aramas emen de mehkot, kitail kin pohnese manaman en mwaro. (Pil kilang Madiu 10:41.) Eri met kitail pahn kilang ia duwen atail pahn pohnese dehu oh manaman en Sahmo oh Sapwellime Ohlo iangahki dahme ngehn sarawi kin wia.

12. Ia wehwehn atail papidaisla ni mwaren Sahmo? (Kaudiahl 4:11) (Pil kilang kilel .)

¹² Ni mwaren Sahmo. Kitail kin pohnese me Siohwa iei Samatail nanleng oh me kin ketikihong kitail mour. Ih Koht me keieu manaman oh Sounkapikpen mehkoaros. (Wadek Kaudiahl 4:11.) Kitail kin pohnese ih nin duwen Sounkaronge kapakap, oh kitail kin doadoahngki mwareo ni wahu oh ni saledek ni atail kin kapakapohng ih oh koasoiaiong meteikan duwen ih. (Mel. 65:2) Ahpw en papidaisla ni mwaren Sahmo kin pidada mehkot laudsang met. Irail me rongorong Piter ni rahnen Pendekos eseier duwen Siohwa, ahpw met re wehwehki me Siohwa me kin ketikihda mour soutuk ihte pwehki Sises Krais.—Rom 5:8.

13. Ia wehwehn atail papidaisla ni mwaren Sapwellime Ohlo? (Pil kilang kilel .)

¹³ Ni mwaren Sapwellime Ohlo. Kitail kin pohnese Sises nin duwen Sapwellimen Koht Iehroso. Sises iei ‘ahlohte’ me kahrehiong kitail en kak ahneki nanpwungmwahu rehn Siohwa. (Sohn 14:6) Sises pil wia Sounkomourpatail, de ih me pwoukinkitailla pwe kitail en kak alehda mour. Ihme kahrehda kitail kin kahlemengih ih rahn koaros, kaidehnte ni rahn me kitail papidaisla. (1 Sohn 2:6) Oh kitail kin kalohk ni ngoang, duwehte me e kin ketin wia, oh sohte mweidohng mehkot en kerempwa kitail. (Luk 4:43) Kitail pil onopadahr en dadaurete pahn lokolok pwe kitail en papah Koht ni loalopwoat. (2 Tim. 3:12) Kitail kin wauneki Sises nin duwen “tapwin mwomwohdiso,” ihme kahrehda kitail kin uhpahiong irail kan me e ketin idihada en tiengla mwowe oh apwalih sapwellime tohnpadahk kan.—Ep. 4:​8, 11, 12; 5:23.

14. (a) Ia wehwehn atail papidaisla ni mwaren ngehn sarawi? (Pil kilang kilel .) (b) Soangen papidais dah teikan me irail me keidi kan kin wia? (Menlau kilang koakono “Soangen Papidais kan me Irail me Keidi kan Kin Wia.”)

¹⁴ Ni mwaren ngehn sarawi. Kitail kamehlelelahr padahk mehlel duwen ngehn sarawi. Ngehn sarawi kaidehn koht emen, de kisehn Koht Sahm, Koht Nah, Koht Ngehn Sarawi, ahpw e wia sapwellimen Koht manaman. Kitail kin pohnese me ngehn sarawi me kin kaweid soukohp akan oh sounnting en Paipel kan, kahrehda kitail kin kaukaule wadek Paipel oh kapwaiada padahk en Paipel kan. (2 Pit. 1:​20, 21) Oh kitail kin soikala wiahda dihp laud kan pwehki soangen wiewia pwukat kak irehdihsang kitail oh pil mwomwohdiso sapwellimen Koht ngehn sarawi.—Ep. 4:30.

15. Dahme kitail en koasoanehdi teng en wia?

¹⁵ Ma ke papidaislahr nin duwen Kristian men, koasoanehdi teng ken wehwehkihla soahng koaros me pid “padahk duwen papidais”c oh mour pahrekiong omw inou me ke wiahda ni ahnsou me ke inoukihong Siohwa omw mour oh papidaisla. Ahpw ia duwen ma ke saikinte papidaisla nin duwen Kristian men? Mie mehkot me ireiukedihsang en papidaisla? Kitail pahn koasoiapene nan iren onop en mwuhr ia duwen omw pahn doula nantihong pwe ken kak papidaisla.