Ia Duwen Atail Kak Sewese Atail Peneinei me Sohte Iang Padahk Mehlel

1-2. Dahme kakete kahrehda kitail en sohla ahneki nanpwungmwahu rehn atail peneinei kan me kaidehn Sounkadehde kei?

SISES mahsanihong ohl emen me men wiahla sapwellime tohnpadahk: “Kohwei rehn kisehmw kan oh ndaiong irail soahng koaros me Siohwa ketin wiahiong uhk.” (Mark 5:19) Sises mahsanih met pwehki e mwahngih me pali laud en aramas kin men ehukihong arail peneinei duwen rohng mwahu.

² Ke tamatamante omw pepehm ni omw tepin sukuhlkihdi rongamwahwo? Mwein uhdahn ke perenkihda oh men ehukihong omw peneinei ko koaros duwen soahng mwahu kan me ke sukusukuhlki! Ahpw mwein re sohte kin perenki dahme ke sukusukuhlki. De ele re nsensuwedkihla mwomwen omw padahkihong irail duwen me mehlelo. Ma met wiawihong uhk, ia duwen omw kak kolokol de kamwahwihala omw nanpwungmwahu rehn omw peneinei kan oh ni ahnsowohte kolokol omw lelepek ong Siohwa?

3. Dahme kitail pahn koasoiapene nan iren onop wet?

³ Nan iren onop wet, kitail pahn koasoiapene: (1) Ia duwen atail poakehla atail peneinei kan me sohte iang padahk mehlel, eh kak kamwakid kitail en sewese irail, mehnda ma re pil kahng rong; (2) dahme kitail kak wia ni atail peneinei kan ar nda de wia mehkot me kamedekeikitailla; (3) ia duwen atail kak sewese atail peneinei kan ni atail kin kanengamah oh koapworopworkihte me re pahn iang papah Siohwa ni ahnsou kohkohdo; oh (4) ia duwen atail kak kasalehiong irail me kitail poakohng irail.

OMW POAKEIRAILLA PAHN KAMWAKID UHK EN SEWESE IRAIL

4. Dahme Sises ketin wia ni aramas akan ar kahng rong sapwellime padahk kan?

⁴ Sises sohte ketin uhdihsang eh nantihong sewese aramas akan me kahng rong sapwellime padahk kan. E ketin karasahiong ih ohl emen me ahneki mwetin kreip ehu, me kin doadoahk laud pwehn sewese tuhke pik ehu en miehda wah. (Luk 13:​6-9) Ni ahnsou me Sises ketikihda karasaras wet, e ketin nantihongehr daulih sounpar siluh pwehn sewese mehn Suhs ko ren pwoson ih oh wiahla sapwellime tohnpadahk. Dahme kahrehda e kin ketin nantihong sewese irail? Eh kin ketin poakehla aramas akan kin sewese ih en kin ketin kanengamahiong irail.

5. Dahme kahrehda Sises ketin poakehla ienge mehn Suhs kan?

⁵ Sises ketin poakehla ienge mehn Suhs kan pwehki kaunen pelien lamalam kan sohte kin sewese irail en pwoson Koht. Sises mwahngih me aramas ako “rasehng sihpw kan me sohte sileparail.” (Mark 6:34) Mwohnte eh pwoula, Sises pil ketin tentenihrki Serusalem pwehki e mwahngih me pali laud en towe kan pahn mehla pwehki ar sohte pwoson ih oh Siohwa. (Luk 19:​41-44) Ni atail kakairada soangen pepehm kohte ong atail peneinei kan, met pahn kamwakid kitail en sewese irail.

6. Dahme kahrehda kitail anahne kanengamahiong atail peneinei kan me sohte iang padahk mehlel? (Kalesia 6:9)

⁶ Wadek Kalesia 6:9. Mehnda ma atail peneinei kan saikinte men sukuhlki duwen Siohwa, kitail anahne kanengamahiong irail oh dehr uhdihsang “wia dahme mwahu.” Kitail ese me aramas kin anahne ahnsou pwehn wekidala eh madamadau oh kakairada pwoson. Mwein mahso ke duwehte irail ko me ‘sohte arail koapworopwor . . . ni arail sohte ese Koht.’ (Ep. 2:12) Ahpw mie me kin kanengamahiong uhk oh seweseiuk ken wiahda wekidekla kan oh esehla Siohwa. Met sou kamwakid uhk ken pil sewese omw peneinei kan ren esehla Siohwa?

DAHME KITAIL KAK WIA MA RE NDA DE WIA MEHKOT ME KAMEDEK

7. Dahme kakete kahrehiong rien Sises ohl ako ren sohte pwoson ih?

⁷ Mwein rien Sises ohl ako kin rong duwen manaman kan me e ketin wiahda nan Kalili. (Luk 4:​14, 22-24) Ahpw nin tapio re sohte pwoson ih. (Sohn 7:5) Dahme kahrehda? Paipel sohte kasalehda duwen met. Ahpw e kasalehda soahng riau me kahrehiong ekei mehn Suhs ren sohte wiahla sapwellimen Sises tohnpadahk. Ekei masak me tohn arail wasa pahn soikirailla. (Sohn 9:​18-22) A ekei kin ese Sises sangete eh tikitik, kahrehda re sohte kak kamehlele me e ketin wia wiliepen Koht. (Mark 6:​1-4) Rien Sises ohl ako pil kakete ahneki soangen madamadau pwukat. Mweinte atail peneinei kan pil kakete ahneki soangen madamadau kohte.

8. Dahme kakete kahrehiong atail peneinei kan me sohte iang padahk mehlel ren nda de wia mehkot kamedek?

⁸ Medewehla kahrepen ar kin nda de wia soahng kamedek kan. Mwein rien Sises ohl ako iang eh peneinei ko me nda me “e sahliella.” (Mark 3:21) Dahme kakete kahrehiong ren ndahki met? Paipel mahsanih me uwen Sises eh kin ketin kedirepw, pil sohla ahnsoun eh konot. (Mark 3:20) Ia duwe, eh peneinei ko kin medewe me e nohnla poadidi? Mweinte. Atail peneinei kan pil kakete medewe me kitail nohnla poadidi. Ma re ahneki soangen pepehm wet, kitail anahne kasalehda sang ni atail wiewia kan me kitail kin uhdahn toupahrek.

9. Dahme kakete sewese atail peneinei kan ren wekidala arail madamadau duwen kitail? (1 Piter 3:​1, 2) (Pil kilang kilel kan.)

⁹ Pousehlahte kasalehda kadek oh toupahrek. Atail lokaia oh wiewia kadek kan kak kamwakid atail peneinei ren wekidala arail madamadau duwen kitail. (Wadek 1 Piter 3:​1, 2.) Karasepe, ohl emen me sohte iang padahk mehlel kakete pehm me e kelekelehpw de e kin nsensuwed ni ahnsou me eh pwoudo kin kohla kalohk de iang towehda mihting kan. Pwehki sistero sohte men eh pwoudo en ahneki soangen pepehm pwukat, e kak wekidala eh koasoandi kan pwehn ahneki ahnsou en mi rehn eh pwoudo. Karasepe, e kak kohla kalohk ni ahnsou me eh pwoudo kin kedirepw de sohte mi ni imwarao. Ni lih pwopwoud Kristian men eh kin toupahrek, e kakete sewese eh pwoudo en wekidala eh madamadau duwen Sounkadehde kan.

10. Ia duwen atail kak alasang Sises ni meteikan ar kauwe kitail?

¹⁰ Kaidehn ahnsou koaros ke anahne sapeng omw peneinei ma re kauweiuk. Ni ahnsou me aramas akan wiahda karaunlikamw me dene Sises kin sakasak oh niminim daulihala, e sohte engiengda pahrail. Ahpw e ketin kangoange aramas ako ren kasawih ire mehlel kan. (Mad. 11:19) E pil kin ketin kasalehda me e kin ketin toupahrek oh perenki sapwellime mour. (Pil kilang Sohn 2:​2, 6-10.) Duwehte met, ni aramas akan ar nda soahng suwed kan duwen kowe, dehr pehm me ahnsou koaros ke anahne kadehdehda me re sapwung. Ahpw sang ni omw wiewia kan, kasalehiong omw peneinei kan me ke toupahrek oh kin peren, a re nek pilada dahme re pahn medewehkin uhk. Re kakete tehkada me soahng suwed kan me re kin rong duwen kitail sohte mehlel.

KANENGAMAH OH KOAPWOROPWOR

11. Ia mwomwen sapwellimen Sises wiewia ong rie ko me sohte pwoson ih?

¹¹ Pwuhken Rongamwahu ko kasalehda me Sises kin ketin kanengamahiong rie ohl ako. Karasepe, e sansal me re iang mi nan Kena ni ahnsou me Sises ketin wiahda tepin sapwellime manamano. (Sohn 2:​11, 12) Ahpw duwehte me kitail koasoiapenehro, rien Sises ko sohte pwoson ih. Mendahki met, Sises kin ketin nsenohkihte irail. Paipel kasalehda me mpen sounpar siluh mwurin tepin sapwellime manamano nan Kena, Sises kin ketin mahseniong rie ohl ako ni kadek.—Sohn 7:​5-8.

12. Dahme kak sewese kitail en kin koapworopworkihte me ekei atail peneinei pahn men papah Siohwa ehu rahn?

¹² Atail wehwehkihla mwahu duwen sapwellimen Siohwa kadek kalahngan kak sewese kitail en kolokolete atail koapworopwor. Ni ahnsou me pelien lamalam likamw kan pahn sohrala, atail peneinei kan kakete tamanda me kitail padahkihong irail me met pahn wiawi.a (Kaud. 17:16) Re pil kakete pilada en iang kitail papah Siohwa mwurin kahn kamakam kowahlapo eh tepida. Oh ma atail peneinei kan kin ahneki kahpwal laud ni ahnsou wet, kitail uhdahn pahn men wia uwen atail kak en sewese irail. Eri ni ar kilang me kitail uhdahn poakohng irail, met kakete kamwakid irail ren men esehla duwen padahk mehlel en Paipel.

KASALEHIONG IRAIL ME KE POAKOHNG IRAIL

13. Mendahki atail kin soupisengki atail papah Siohwa, dahme kitail anahne kanahieng?

¹³ Mendahki atail kin soupisengki atail papah Siohwa, kitail sohte men atail peneinei kan ren medewe me kitail kahng patehng irail de me kitail solahr poakohng irail. (Mad. 7:12) Ia duwen atail kak kasalehiong irail me kitail nsenohkin irail? Mie soahng kei me kitail kak wia.

14-15. Ia ehu ahl me kitail kak kasalehiong atail peneinei me sohte iang padahk mehlel me kitail poakohng irail? Menlau kihda ehu karasaras.

¹⁴ Kin koasoakoasoiong irail oh kasalehda me ke poakohng irail. Kitail kin kasalehiong atail peneinei me kitail poakohng irail sang ni atail kin koasoakoasoiong irail. Karasepe, kitail kak kadaralahng irail text message ehu iangahki kilel kan sang atail vacation, seiloak, de kamadipw ehu rehn kompoakepatail kan. Kitail pil kak kihong irail kisin kisakis ehu de kisinlikou ehu me pahn kak sewese kamwahwihala atail nanpwungmwahu rehrail. Ni atail kin tiengla mwowe oh wia soahng pwukat, kitail kin kasalehda me kitail poakohng irail.

¹⁵ Medewehla duwen karasaras en emen sister nan Armenia me adaneki Anna. Eh peneinei kin kalapw patpene, ahpw mehlel ni rahnen ipwidi kan oh rahnen kasarawi kan. Ni ahnsou me Anna esehla padahk mehlel, eh peneinei kan tepida pwunodki ma e sohla pahn kin patehng irail. Re pil kin pwunodki me eh mour pahn apwalla ma e wiahla Sounkadehdehn Siohwa men. Dahme Anna kin wia pwehn sewese ren dehr pwunod? E koasoia: “Ni ei kin mwemweitla rehn ei peneinei kan, I kin koasoiaiong irail duwen ei mour oh dahme I kin wiewia. I pil kin lukehdo irail ni imweio pwe ren tuhwong ekei kompoakepahi kan. Imwilahn met, pali laud en ei peneinei kan eselahr oh pil ahnlahr ekei kompoakepahi kan.” E pil doula koasoia: “Ei peneinei tohto kin nda me re kilang me I kin nsenamwahu oh re solahr kin pwunodkin ie.”

16. Ia duwen Sises eh ketin kasalehda me e ketin nsenohki rie ohlo Seims? (Pil kilang nting tikitik me mi pah.)

¹⁶ Kasalehda me ke nsenohki dahme kin wiewiawi nan arail mour. Mwurin Sises eh ketin iasada, e ketin kasalehiong rie ohlo Seims me e ketin nsenohki sang ni eh ketin pwarohng ih. (1 Kor. 15:7) Ke kak medewehla ia en Seims eh pepehm ni eh kilang me Sises kin ketin nsenohkihte ih? Mwein ara tuhpeneo me kamehlelehiong Seims me Sises iei me Mesaiao. Mwurin ara tuhpeneo, Seims ele sewese tohn eh peneinei teikan ren esehla me Sises iei me Mesaiao.b—Wiewia 1:14.

17. Ia duwen atail kak kapwaiada ire mehlelo nan Rom 12:15? (Pil kilang kilel.)

¹⁷ Wadek Rom 12:15. Ma kitail kin kasalehiong atail peneinei kan me kitail nsenohkin irail ni ahnsou me irail keieu anahne sawas—sohte lipilipil ma mehkot mwahu de suwed wiawihong irail—kitail kak sewese irail ren wekidala arail madamadau duwen kitail.c Karasepe, ma emen atail peneinei ahpwtehn neitik, kitail kak kihong irail kisakis ehu oh kasalehiong irail me kitail iang perenkihda met. Oh ma emen me re poakohng mehla, kitail kak kansenamwahwih irail sang ni atail koasoi kadek, sewesehkin irail dahme re anahne, de kadarala card ehu. Kitail en pil tamatamante en kin call, ntingla, de mwemweitla rehrail, ahpw mehlel ni ahnsou me re kin lokolongki kahpwal ehu.

18. Ia duwen atail kak alasang tohnpadahko Andru?

¹⁸ Wiahda ahnsou pwe ren tuhwong ekei iengatail Sounkadehde kan. Ni ahnsou me Andru esehda me Sises iei me Mesaiao, e mwadangete kohla ndaiong rie ohlo Piter en kohla tuhwong Sises. (Sohn 1:​40-42) Kitail pil kak wia mehkot me duwehte met? Ia duwe, kitail kak luke irail ekei pak ren iang towehda mihting ehu de iang kitail mwenge rehn kompoakepatail kan? Ni arail tuhwong iengatail Sounkadehde teikan, re pahn kakete kilang me kitail duwehte aramas teikan oh me kitail kin mwahu oh kadek.

19. Mehnda ma atail peneinei kan sohte uhdahn wehwehki ekei soahng kan me kitail kin kamehlele, ia pahn mwomwen atail wiewia ong irail? (1 Piter 3:15)

¹⁹ Wadek 1 Piter 3:15. Mwein atail peneinei kan sohte pahn kak uhdahn wehwehki dahme kahrehda kitail sohte kin iang wia ekei soahng kan, ahpw re pahn ahnsou koaros tamataman atail kin kadekohng oh waunekin irail. Mehnda ma kitail solahr pahn kin iang irail wia kasarawi kan de ekei tiahk kan, re kakete perenkihda ni atail kin nantihong wiahda ahnsou pwehn patehng irail. Karasepe, kitail kak mwemweitla rehrail, mwengepene, oh kisikise irail ni ahnsou teikan.

KOLOKOLETE OMW KOAPWOROPWOR ONG OMW PENEINEI

20. Dahme kahrehda mehn kahlemeng en Seims wia mehn kangoang ong kitail?

²⁰ Seims sohte kin iang Sises erein sapwellime doadoahk en kalohk nin sampah. Ahpw mwuhr e wiahla emen sapwellimen Sises tohnpadahk oh mwein e sukuhlkihdi mehn kasukuhl tohto me Sises kin ketin padahngki erein eh ketiket nin sampah. (Kal. 1:​18, 19; 2:9) Karasepe, e ntingihada kisinlikou ehu ong Kristian kan oh koasoia duwen mehn kasukuhl kan me duwehte dahme Sises ketin padahngki nan Kapahrek en Pohn Dohlo.d

21. Dahme kahrehda kitail en koapworopworkihte me atail peneinei kan pahn kak pilada en papah Siohwa?

²¹ Mendahki atail kin nanti laud en kadekohng oh nsenohki atail peneinei kan me sohte iang padahk mehlel, re pahn kakete kamedekeikitailte de saikinte men esehla duwen Siohwa. Ahpw dahme kahrehda kitail en pousehlahte kadek ong irail? Pwehki ehuehu ahnsou me kitail kin kadek ong atail peneinei kan, kitail kin alasang atail Koht, Siohwa, me kin ketin kadek kalahngan oh sapwellime Ohlo, Sises. (Luk 6:​33, 36) Kedekedeo atail limpoak oh kadek pahn kakete kamwakid irail en wekidala arail madamadau duwen kitail. Re pil kakete tamataman soahng tohto me kitail ndaiong irail duwen Siohwa oh sapwellime inou kan. Eri ma kitail kin pousehlahte song en sewese oh kadek ong atail peneinei kan, re pahn kakete pilada en iang kitail papah Siohwa oh met pahn wadohng kitail peren laud!