Olketa Barava Willing for Go—Lo Guyana

“Mi no garem eni word for describem hapi wea man savve kasem taem hem serve lo ples wea garem big need!” Datwan nao wat Joshua, wea stap lo United States and wea serve lelebet taem lo Guyana, hem talem. Staka Witness wea serve lo disfala kantri lo South America wea staka pipol interest lo truth, olketa experiencem disfala sem hapi.a Wat nao samfala practical leson wea iumi savve lanem from olketa brata and sista hia wea serve lo ples wea garem big need? Hao nao olketa leson hia savve redyim iu if iu interest for serve lo nara ples?

Wat Nao Motivatim Olketa?

Bifor Linel muv lo Guyana, hem savve preach lo olketa territory lo hom kantri blo hem lo United States, wea no staka Witness stap. Hem sei: “Mifala wanfala grup wea 20-fala insaed kasem assignment for go lo wanfala rural area lo West Virginia. Preaching and association wea mi enjoyim during tufala week lo datfala trip hem barava changem laef blo mi! Datwan mekem mi disaed strong for duim moa samting for Jehovah.”

Garth and Erica, wanfala couple wea garem strong tingting for serve lo foreign kantri, tufala chus for go serve lo Guyana. Why nao tufala chusim Guyana? Erica sei: “Mi and hasband savve lo wanfala couple wea muv lo there. Hapi and love wea tufala garem for assignment blo tufala hem motivatim mitufala for muv lo there tu.” Erica and Garth spendem thrifala year lo datfala assignment wea tufala describem olsem “assignment wea mitufala lovem tumas.” Garth sei: “Mitufala traem foreign service and hem gud tumas.” Hem and waef attendim Gilead Skul bihaen, and distaem tufala serve lo Bolivia.

Hao Nao Olketa Prepare?

Olketa Bible principle encouragem iumi for keepim laef simpol. (Hebrews 13:5) Iumi kasem encouragement tu for kaontem kost taem iumi mekem olketa big disison lo laef. (Luke 14:26-33) Olketa principle hia barava fitim disison for muv lo foreign kantri! Garth sei: “Bifor mitufala Erica muv go lo Guyana, mitufala traem best for mekem laef blo mitufala simpol. Diswan minim mitufala mas salem bisnis, haos, and evri unnecessary tings wea stap lo haos. Hem tekem samfala year for duim evriting hia. During datfala taem, for keepim datfala interest gohed strong, mitufala evritaem tingim goal blo mitufala and wantaem lo year mitufala go lo Guyana for visit.”

Nara important samting for tingim, hem income. Olketa wea serve lo ples wea garem big need savve waka lo there if law lo datfala kantri hem allowim. Samfala duim online waka blo olketa nomata olketa muv lo nara kantri. Olketa narawan chus for go bak lo hom kantri blo olketa for lelebet taem for waka for selen. Wanfala couple wea nem blo tufala, Paul and Sinead, savve go bak lo Ireland wantaem lo year for waka. Wat tufala duim helpem tufala for enjoyim 18 years wea tufala serve lo Guyana, datwan includim 7 years bihaen dota blo tufala hem born.

Psalms 37:5 sei: “Putim go laef blo iu lo Jehovah. Depend lo hem, and bae hem duim samting for helpem iu.” Christopher and Lorissa from United States evritaem prea abaotem goal blo tufala for serve lo foreign kantri. And tu, during famili worship, tufala ting raonem wat tufala bae need for duim for mekem tufala succeed lo ples wea tufala bae serve, so tufala raetem list blo olketa advantage and disadvantage. From tufala laek for muv lo wanfala kantri wea tufala no need for lanem nara languis, tufala chus for muv lo Guyana, bikos English hem official languis lo there.

Next samting tufala duim, tufala followim principle lo Proverbs 15:22, wea sei: “Olketa plan savve fail taem pipol no story tugeta, bat evriting bae gohed gud thru lo staka advaesa.” Tufala raet lo branch office lo Guyana,b and storyim baekgraon and plan blo tufala for muv lo there. Semtaem olketa ask tu abaotem medical service lo there, climate, and culture. Branch ansarem olketa kwestin blo tufala and givim contact blo wanfala body of elders lo area wea tufala bae muv go lo hem.

Linel, wea iumi storyim finis, distaem hem serve olsem traveling overseer lo Guyana. Bifor hem muv lo there, hem tu applyim principle lo Proverbs 15:22. Hem sei: “Mi sevem samfala selen for datfala gogo and mi story witim olketa narawan wea serve lo olketa foreign kantri. Mi discuss witim famili blo mi, olketa elder lo kongregeson, and circuit overseer blo mifala. And mi readim olketa article lo olketa pablikeson blo iumi abaotem wei for serve lo ples wea garem big need.”

Staka wea laek for serve lo wanfala foreign kantri mekem wise disison for visitim datfala kantri firstaem. Wanfala couple, Joseph and Christina sei: “Firstaem mifala go lo Guyana, mitufala stay lo there for thri months. Datwan hem inaf taem for mifala savve lo datfala ples. Then mifala go bak hom, stretem evriting, and mifala muv go lo Guyana.”

Hao Nao Olketa Adjust?

For olketa wea laek serve lo foreign land duim gud assignment blo olketa, olketa mas garem spirit for sakrifaesim seleva and willing for adjust fitim ples olketa stap and culture lo there. For example, olketa wea kam from olketa cold kantri and muv go lo olketa tropical kantri mas adjust for stap lo ples wea garem staka difren insect. Joshua wea iumi storyim finis sei: “Mi no getius lo ples wea garem staka bug olsem. And luk olsem Guyana nao hem garem olketa biggest bug! Bat gogo mi getius lo olketa. Mi faendaot tu dat if mi keepim haos blo mi klin, bae no staka insect kam lo haos. Datwan minim for wasim olketa dirty pleit, torowem rabis, and klinim haos evritaem.”

For adjust fitim nara kantri maet minim tu for getius lo difren kaikai and for lane hao for kukim olketa kaikai hia. Joshua sei: “Mitufala roommate blo mi askem olketa brata and sista for lanem mitufala for savve hao for kuki witim olketa lokol ingredient. Afta mitufala lane hao for kukim wanfala lokol recipe, mitufala savve invaetem samfala lo kongregeson for kam mifala kaikaim tugeta. Datwan tu hem wanfala naes wei for mifala savve gud lo olketa brata and sista and for fren gud witim olketa.”

Saed lo lokol culture, Paul and Kathleen sei: “No enitaem bifor mitufala need for adjust followim hao for showim respect and hao for werem kaleko wea showim respect, lo olketa tropical kantri. So mitufala mas hambol and change, bat lo semtaem no againstim olketa Bible principle tu. For adjust fitim lokol culture hem mekem mifala fren gud witim olketa lo kongregeson and hem garem positive effect lo ministry blo mitufala.”

Benefit wea Olketa Kasem

Joseph and Christina talem sem samting wea staka narawan tu talem, tufala sei: “Olketa blessing wea mifala kasem hem winim olketa challenge and hard taem wea mifala feisim. Wei for duim tings wea mifala no getius for duim, hem helpem mifala for adjustim olketa priority lo laef. Olketa samting wea bifor mifala tingse hem barava important, distaem mifala no warim tumas. Each samting wea mifala experiencem, hem motivatim mifala for duim best blo mifala for Jehovah. Evri samting hia mekem mifala barava hapi and satisfae.”

Erica, wea iumi storyim bifor sei: “Taem mi and hasband serve lo ples wea needim help, mitufala lanem wat hem minim for barava putim trust blo mitufala lo Jehovah. Mifala lukim hand blo Jehovah lo olketa difren wei wea mifala never experiencem bifor. And taem mitufala experiencem olketa niu samting tugeta, datwan strongim go moa marit blo mitufala.”