Message From Word blo God—Hope for Olketa Refugee!

Evri year, staka million pipol mas ranawe from hom blo olketa for safety. Hao, iu experiencem diskaen nogud situation? If olsem, no wari samwan hem stap wea bae helpem iu for deal witim datwan. God provaedem hope for garem gud laef, wea iu savve lane abaotem olketa Holy Scripture.

Christos Stylianides, wanfala European Union commissionera sei: “Olketa refugee and pipol wea displaceb no just needim help, bat olketa needim tu . . . hope for future.” Pipol wea garem hope savve garem positive attitude abaotem future blo olketa. Bat olketa refugee needim comfort tu, mekem olketa savve deal witim hao olketa feel abaotem wat olketa bin experiencem.

“Taem mi mas ranawe from kantri blo mi and leavim famili blo mi bihaen, mi barava feel nogud and mi ting dat hard for mi winim datfala situation nao. Mi barava fraet, sorre, and stress fogud.”—Emmanuel, Haiti.

Hao, iu tu garem olketa feeling olsem? If iu bin ranawe from hom blo iu, iu needim eni ples wea iu savve ran go lo hem for kasem comfort and hope. Hao nao Word blo God, Bible, savve helpem iu?

Comfort from Word blo God

Bible sei: “Jehovahc . . . lovem foreigner wea stap witim iufala.”—Deuteronomy 10:17, 18.

Bible sei: “Jehovah hem stap klosap lo evriwan wea kol lo hem.”—Psalm 145:18.

Bible sei: “Hard tumas for tru God duim wicked samting . . . Olmaeti hem evritaem duim samting followim justice.”—Job 34:10, 12.

Diswan minim ino God nao kosim iu for safa. Hem no panisim iu, hem no testim iu tu lo wei for mekem laef blo iu hard.

Hope from Word blo God

Bible storyim wat God bae duim for iumi lo future. Lukim hao disfala hope hem helpem pipol wea ranawe from hom blo olketa.

Bible sei: “[God] bae draem evri tias from eye blo olketa, and dae bae nomoa nao, krae and sorre and pain tu bae nomoa.”—Revelation 21:4.

Diswan minim dat iumi bae kasem relief from safaring. God promis for solvem evri problem wea savve mekem iumi feel hopeles distaem.

“Klosap nao God bae stopem injustice and olketa nogud samting wea happen raonem iumi distaem. Datfala hope helpem mi for gohed focus lo datfala taem wea evri safaring bae end.”—Karla, El Salvador.

Bible sei: “Olketa samting wea happen bifor bae no kamap moa lo mind blo pipol, and bae olketa no kamap tu lo heart.”—Isaiah 65:17.

Diswan minim dat iumi bae free nao from olketa nogud memory. God bae mek sure iu bae no gohed for feel nogud moa lo olketa nogud memory blo olketa samting wea iu experiencem.

“Bible promisim dat iumi bae no even rememberim pain and evriting wea iumi lusim bihaen. Disfala hope helpem mi for deal witim hard situation wea mifala kasem bikos mi savve dat klosap nao evri samting bae change.”—Natalia, Ukraine.

Bible sei: “God wea rul lo heven bae startim wanfala kingdom wea . . . bae pisisim and finisim evri kingdom hia.”—Daniel 2:44.

Diswan minim wanfala perfect gavman lo heven bae rul ovarem earth. Klosap God bae replacem evri gavman blo man witim gavman blo hem wea bae rul lo heven. Disfala gavman bae givim tru peace and security, witim justice and gud laef for evriwan.—Micah 4:3, 4.

“Hem barava encouragem mi for savve dat olketa problem olsem wei for treatim nogud lo narawan, discrimination, no trustim narawan, and racism hem temporary. Klosap nao Kingdom blo Jehovah bae finisim evri problem hia.”—Mustafa, Middle East.

Wisdom from Word blo God

Practical wisdom from Bible savve helpem iu for cope witim wat hem happen lo iu. Hem savve helpem iu tu for deal witim niu circumstance blo iu, includim olketa material tings iu lusim. Lukim hao olketa principle hia hem benefitim olketa refugee:

Bible sei: “Nomata man garem staka samting, evri samting hem onam no givim hem laef.”—Luke 12:15.

Hao olketa wise toktok hia savve helpem iu for cope: Maet iu shock and feel sorre tumas for olketa tings wea iu lusim. Bat if iu pause and remember laef blo iu hem valuable winim olketa tings wea iu lusim, datwan bae helpem iu for no tingim tumas olketa tings hia.

“Laef hem moa important winim olketa material tings. Lo samfala situation, olketa material tings or selen no savve helpem iu.”—Natalia, Ukraine.

Bible sei: “Iu no sei, ‘Why nao bifor hem beta winim distaem?’”—Ecclesiastes 7:10.

Hao olketa wise toktok hia savve helpem iu for cope: Present situation blo iu maet hem very challenging, bat no trae for comparem witim circumstance blo iu bifor bikos datwan bae mekem iu for feel nogud nomoa.

“Taem mi acceptim present situation blo mi, datwan helpem mi for garem positive attitude.”—Eli, Rwanda.

Bible sei: “Sapos iumi garem kaikai and kaleko, iumi mas satisfae witim olketa samting hia.”—1 Timothy 6:8.

Hao olketa wise toktok hia savve helpem iu for cope: Trae for satisfae witim wat iu garem. Taem iu satisfae nomoa, datwan bae helpem iu for no stress tumas and no wari tumas.

“Bible helpem mi for ting positive, no focus lo wat mifala lusim finis. Mi and waef blo mi hapi mifala still laef and stap sef.”—Ivan, Ukraine.

Bible sei: “So, samting wea iufala laekem pipol for duim lo iufala, sem samting tu iufala mas duim lo olketa.”—Matthew 7:12.

Hao olketa wise toktok hia savve helpem iu for cope: Bae iu get along witim others if iu duim best for patient and kaen. Taem iu duim datwan, bae hem isi for pipol acceptim iu and no ting daonem iu.

“Staka pipol bae laekem iu if iu treatim olketa witim respect, kaen, and lovem olketa. Olketa quality hia savve helpem iu for garem gud relationship witim pipol lo niu ples iu stap.”—Angelo, Sri Lanka.

Bible sei: “Barava prea strong . . . and peace blo God . . . bae gaedem heart blo iufala and tingting blo iufala.”—Philippians 4:6, 7.

Hao olketa wise toktok hia savve helpem iu for cope: Prea lo God abaotem feeling blo iu, need blo iu, wat iu fraetem, and wari abaotem. Kaen prea olsem bae helpem iu for no wari tumas taem iu adjust witim niu situation blo iu.

“Enitaem mi garem problem, mi prea lo God and hem ansarem mi. Wat mi lanem from Bible hem helpem mi for garem real peace lo mind.”—Yol, South Sudan.

“Olketa gud advaes lo Bible hem helpem mi for garem peace wea mi needim for deal witim disfala difficult situation.”—Valentina, Ukraine.

“For savve dat Jehovah God promisim wanfala beta laef, datwan strongim mi.”—Emmanuel, Haiti

Hao, iu laek for lanem samfala samting moa abaotem olketa promis lo Bible wea givim comfort and hope and why iu savve trustim? Requestim wanfala Jehovah’s Witness for visitim iu. Olketa bae hapi for helpem iu.