Wat Nao Bae Happen lo Religion?—Wat Bible Talem

Hao, iu feel nogud or no hapi lo wat religion duim? Nomata religion duim samfala gud samting for samfala community and for pipol, hem kosim tu staka nogud samting. Encyclopedia of Religion and War hem sei: “Samfala lo olketa worst war lo history kamap bikos lo difference lo biliv blo olketa religion.” Staka taem olketa religious leader mekius lo religion, no for worship, bat for promotim samfala politikol idea blo olketa. Samfala religious leader trae for haedem sexual abuse or financial crimes wea olketa leader lo religion blo olketa duim.

If iu feel nogud lo wat religion duim, iu maet wonder hao nao God hem feel abaotem datwan. Bible talem dat God no hapi lo staka religion bikos lo wat olketa duim. Bible garem tu olketa profesi wea talem wat bae God duim lo religion. Bible iusim symbolic languis for explainim wat God klosap for duim lo evri religion lo world wea no enitaem hem happen bifor.

Wat nao Bible talem abaotem future blo olketa religion?

Profesi: Bible buk Revelation storyim wanfala jury woman wea nem blo hem Bigfala Babylon. Disfala jury woman sidaon antap wild animal wea kala blo hem red. Bat bihaen, datfala wild animal tane againstim hem and killim hem dae.—Revelation 17:3, 5, 16.

Mining: Datfala jury woman, Bigfala Babylon, hem representim evri false religion wea God rejectim.a Datfala wild animal wea kala blo hem red representim United Nations (UN).b Wei wea datfala jury woman sidaon antap wild animal wea kala blo hem red hem showim dat false religion hem trae for influencim, even kontrolem, disfala politikol entity. And wei wea datfala wild animal killim dae datfala jury woman hem showim dat UN and olketa nation wea sapotim hem bae tane againstim evri false religion lo world and distroem olketa. Disfala event hem no enitaem happen bifor.

Datfala jury woman wea buk blo Revelation storyim, hem sidaon antap wild animal wea kala blo hem red. Hedquarter blo United Nations standap lo left saed blo datfala wild animal, and staka religious building standap lo raet saed blo hem.

Hao nao false religion bae hem distroe?

Profesi: “Tenfala horn wea iu lukim and datfala wild animal, bae heitim datfala jury woman and bae olketa tekem evri samting blo hem and . . . bonem hem lo fire. Bikos God putim insaed tingting blo olketa [tingting blo olketa world leader] for duim samting wea hem laekem, yes, hem for olketa garem sem tingting, hem nao for givim paoa blo olketa for rul lo datfala wild animal . . . Insaed wanfala day nomoa, olketa nogud samting bae kasem hem, olsem dae and sorre and bigfala hangere, and fire bae barava finisim hem, bikos Jehovahc God, wea judgem hem, hem strong.”—Revelation 17:16, 17; 18:8.

Mining: God bae putim “samting wea hem laekem” lo tingting blo olketa nation lo world. Hem bae mekem olketa for givim “paoa blo olketa for rul,” or politikol paoa blo olketa lo UN. Then, UN bae iusim paoa wea hem just kasem from olketa nation for distroem evri false religion raonem world. Disfala shocking event bae happen olsem “insaed wanfala day nomoa,” hem kwiktaem and pipol no expectim, datwan mekem staka pipol for sapraes.—Revelation 18:21.

Why nao false religion bae distroe?

Profesi: “Olketa sin wea hem duim hem hipap gogo kasem heven, and God bae no forgetim olketa rong wea hem duim.”—Revelation 18:5.

Mining: False religion duim staka wicked samting insaed staka century wea go pas. Lukim samfala lo “olketa sin” wea hem duim wea mekem God sei hem bae distroem:

Piksa blo wanfala politikol leader and religious leader wea tufala sekhand.

Involve lo Politik. Jesus Christ teachim olketa follower blo hem for no involve lo politik, bat for putim hope blo olketa lo Kingdom blo God, wea hem gavman lo heven wea bae replacem gavman blo man.d (Daniel 2:44; Matthew 6:9, 10; John 6:15; 18:36) Bat false religion encouragem pipol for trustim gavman blo man. From Bigfala Babylon hem barava involve lo politik instead for loyal lo God, profesi lo Revelation sei hem guilty lo wei for “durong” and fitim for olketa kolem hem “datfala paoaful jury woman.”—Revelation 17:1, 2; James 4:4.

Piksa blo olketa religious leader wea holem cross and blessim military army.

Violence. Bible storyim dat false religion hem responsible for dae blo “evriwan wea olketa killim dae lo earth.” (Revelation 18:24) Staka religion fail for teachim olketa member blo olketa for stap lo peace, and sapotim or even encouragem pipol for faet lo war and terrorism.

Piksa blo wanfala religious leader wea hand blo hem fulap lo selen.

Greedy. False religion “no shame for garem rich living.” (Revelation 17:4; 18:7) Staka religion iusim paoa wea olketa garem and relationship blo olketa for kasem staka riches. Wei wea olketa greedy mekem God no hapi.—Titus 1:7.

Piksa blo wanfala religious leader wea story.

Laea. False religion promotim olketa teaching and practice wea contradict witim truth lo Bible.e From false religion hem source blo staka teaching and practice wea misleadim pipol and hem no honorim God, profesi kolem hem “mami . . . blo olketa barava rabis samting lo earth.”—Revelation 17:5; 18:23.

**Hao, bae evri religion distroe?**

Nomoa. Buk blo Revelation hem tok abaotem pipol from evriwea lo world wea hem kolem lo “big crowd.” (Revelation 7:9) Bible sei disfala big crowd “olketa werem white kaleko,” wea minim dat olketa loyal for worshipim God followim olketa standard blo hem. Olketa bae survive lo “datfala big trabol,” wea Bible kolem datfala taem period hem taem wea false religion and evri enemy blo God bae distroe. (Revelation 7:13, 14; 19:11, 19-21) Datfala big crowd wea werem white kaleko olketa blo datfala tru religion, datfala religion nao bae stap forever.f

Big crowd blo olketa man, woman, and pikinini hapi for olketa wakabaot tugeta. Bihaen lo olketa, wanfala religious building wea damage. — Wanfala big crowd blo olketa tru worshiper blo God bae survive taem false religion distroe

Hao nao wei for savve dat false religion bae distroe hem affectim iu?

Iu savve garem peace lo mind taem iu savve dat God no hapi lo olketa barava nogud samting wea religion duim. Iu savve garem hope for future, bikos iu savve dat klosap nao no eni religion wea no honorim God and mekem pipol safa hem stap.

And tu, iu savve sure dat worship wea hem acceptable lo God hem stap. Bible sei “olketa wea worship lo stretfala wei bae worshipim Dadi followim holy spirit and followim truth. Tru nao, Dadi lukaotem kaen pipol olsem for worshipim hem.” (John 4:23) Hem talem olketa: “Go aot from hem [Bigfala Babylon], pipol blo mi, sapos iufala no laek join witim hem lo sin blo hem, and sapos iufala no laek kasem olketa nogud samting wea bae kasem hem.” (Revelation 18:4, 5) Yes, God hem invaetem pipol for worshipim hem followim truth. (1 Timothy 2:3, 4) Hem promis lo olketa wea acceptim invitation blo hem dat olketa bae laef olowe.—1 John 2:17.

a For lane abaotem fofala key wea savve help for identifyim Bigfala Babylon, readim article “Wat Nao Bigfala Babylon?”

b For lane abaotem sixfala key wea savve help for identifyim disfala wild animal, readim article “Wat Nao Mining blo Datfala Wild Animal wea Kala blo Hem Red wea Revelation Chapter 17 Storyim?”

c Jehovah hem personal nem blo God. (Psalm 83:18) Lukim article “Hu Nao Jehovah?”

d For lanem moa samting, watchim video Wanem Nao Kingdom Bilong God?

e For lukim olketa example, lukim box “Hao, Bigfala Babylon Includim Eni Religion wea Sei Hem ‘Christian’?”

f For lanem hao Bible savve helpem iu for identifyim tru religion, readim article “Hao Nao Mi Savve Faendem Tru Religion?”