Bible Education Changem Laef blo Pipol
Diswan hem story blo tufala man from Vietnam wea laef blo tufala barava change. For longtaem, tufala tingse only wei for man hapi and stap gud hem for garem staka selen. So tufala duim evri samting wea tufala fit for duim for kasem staka selen nomata datwan bae spoelem laef blo tufala and others. Bat gogo, tufala realizim dat for garem tru peace and purpose lo laef hem only kam from wei for studyim Bible. Story blo tufala showim dat wei for applyim olketa Bible principle savve helpem pipol for responsible, obeyim law, and kamap olketa gud citizen.
Changem Tingting for Aftarem Selen for Kasem Tru Hapi
Taem Lanh Văn Nguyễn hem pikinini, hem experiencem war, politikol problem, and wei for poor. Gogo, hem ting dat for man kasem tru hapi hem mas rich. So lo 1988 hem muv go lo Germany for faendem waka. Hem barava waka hard, day and naet, for kasem selen.
Afta ten years, Lanh meetim Olketa Jehovah’s Witness. Olketa showim lo hem Bible buk blo Proverbs, wea datwan interesting lo hem bikos hem savve laekem tumas olketa proverb and wise saying. Olketa practical advaes wea stap lo Bible mekem hem laek for lane moa abaotem datwan. So hem askem wanfala Witness sista for peim Bible for hem. Then datfala sista sei if hem studyim Bible witim hem and hasband blo hem, bae tufala givim hem free Bible. Lo next visit, sista hia tekem kam wanfala Bible and buk Savvy wea Lead Go long Laef Olawe.
Taem hem studyim Bible witim olketa Witness, Lanh start for wonder if bae hem continue witim bisnis blo hem for baem and salem olketa weapon. No longtaem bihaen hem luksavve hem need for stop. Afta hem duim datwan, income blo hem barava drop by 80 percent. So hem prea abaotem datwan and start for salem olketa difren tings. Gogo, income blo hem increase moa.
Lanh disaed for spendem moa taem for teachim others abaotem Bible. Hem laek for sharem wat hem lanem witim others, bat hem no fit for duim datwan bikos hem no savve story gud lo German languis. So, hem go bak lo Vietnam mekem hem savve teachim others abaotem Bible lo own languis blo hem.
Since Lanh start for understandim Bible, hem changem tingting and laefstael blo hem. Distaem, hem and waef blo hem, and olketa pikinini blo hem garem hapi laef.
Lanh and waef blo hem
Change From Wanfala Criminal for Garem Hapi Laef
Thắng Viết Phùng hem born lo 1976 lo Nghe An, Vietnam, and hem hope for wanday bae hem kamap rich. Taem hem 19 years old, hem muv from famili blo hem for faendem riches. Hem go stay illegal lo Germany, lo there hem joinim wanfala gang wea involve lo staka illegal activity. Hem evritaem karem gun witim hem, even putim andanit pillow blo hem taem hem sleep. Gogo, from hem involve lo wanfala high-profile kidnapping, olketa arrestim hem and sentencem hem for six years lo prison. Afta tu years olketa releasem hem.
Then, Thắng joinim wanfala niu gang moa and start for duim olketa criminal activity moa. Olketa arrestim hem again bat hem no go lo kot bikos olketa wea witnessim datfala crime fraet for testify againstim hem. From hem duim olketa criminal activity olsem, staka pipol nao savve lo hem. Gogo, lastaem wea olketa arrestim hem, olketa sentencem hem for ten years lo prison, olketa prisoner and olketa gard luksavve hem violent criminal.
Wanday, wanfala prisoner invaetem Thắng for attendim meeting blo Olketa Jehovah’s Witness lo prison. Firstaem, Thắng no laek for attend, bat taem hem attend, hem feelim peace wea no enitaem bifor hem experiencem. Lo datfala meeting hem kasem wanfala buk Wanem Nao Really Samting wea Bible Teachim? wea olketa Witness nao pablisim. Thắng readim full buk hia insaed wan naet nomoa. Wanfala chapter hem garem olketa Bible verse wea explainim dat olketa wea dae finis no savve lo eni samting. (Ecclesiastes 9:5; John 11:11-14) Bifor, Thắng bilivim dat olketa relative blo hem wea dae finis protectim hem, and hem wonder why nao olketa no stopem hem for duim olketa nogud samting.
Thắng continue for attendim olketa meeting blo Olketa Jehovah’s Witness, wea provaedem Bible education program. Hem lanem dat God barava lovem pipol, includim hem. Hem lane tu for luksavve lo wat hem stret and wat hem rong, and hem waka hard for no focus lo selen and for no violent. Wanfala most difficult challenge wea hem need for ovakamim hem for kontrolem temper blo hem, bat from hem prea and waka hard, hem succeed. Lo 2009 hem baptaes taem hem lo prison, and hem kamap wanfala Jehovah’s Witness. Bihaen, Thắng go bak lo Vietnam. Hem sei: “Distaem, mi garem hapi famili, and mifala evriwan worshipim Jehovah God tugeta. Hem sevem laef blo mi and hem blessim mi lo staka difren wei. Taem mi tingim bak laef blo mi bifor, mi ting olsem, ‘Laef blo mi bae hao, if mi no savve lo Jehovah?’”
Thắng and famili blo hem
Hao Bible Education Helpem Pipol for Kamap Gud Citizen
Wei wea Lanh and Thắng changem laef blo tufala, datwan showim positive impact blo Bible education. Tufala stop for iusim full taem and energy blo tufala for aftarem selen. Lanh, wea firstaem hem tingse wei for rich nao bae mekem hem hapi, distaem hem faendem tru hapi bikos lo famili blo hem and faith lo God. Thắng, wea bin laek tumas for brekem law for hem rich, distaem hem teachim others for honest and obeyim law. Instead for tufala focus lo wei for kamap rich, tufala teachim olketa Bible principle lo pipol lo community blo tufala for garem miningful laef, hapi and for kamap gud citizen.