Man wea Garem Wei for Minim Samting “Bae Succeed”

1-2. Wat nao wei for minim samting, and hao nao datwan savve helpem iumi?

HAO, enitaem pipol no treatim iu witim respect wea iu fit for kasem? Hao, enitaem samwan misjudgem iu or mekem iu feel nogud? Or enitaem iu feisim eni situation wea mekem iu fraet? If olsem, maet iu luksavve dat hem no isi for react lo positive wei. Bat, Bible storyim wanfala quality wea savve helpem iumi lo olketa taem olsem and lo olketa nara situation, hem nao wei for minim samting.

² Wei for minim samting hem ability for savve gud lo wanfala situation and no mekem disison base lo wat iumi lukim nomoa. Hem helpem iumi for understandim why samting maet happen or why samwan duim wanfala samting. From datwan, iumi bae garem gudfala tingting and duim wise samting. For example, hem savve helpem iumi for ‘kontrolem lips blo iumi’ and for savve wat taem for “stap kwaet.” (Prov. 10:19; Ps. 4:4) Hem savve helpem iumi for kontrolem kros and for forgivim narawan. Hem savve helpem iumi tu for lisin taem samwan givim advaes and stretem iumi. (Prov. 19:20) Taem iumi garem wei for minim samting, wat iumi talem and duim no just mekem Jehovah hapi, bat datwan benefitim iumiseleva and olketa narawan tu. Datwan savve happen especially lo olketa situation wea maet mekem iumi kwiktaem for react or no kontrolem hao iumi feel. Bae iumi discussim thrifala story lo Bible wea showim hao wei for minim samting savve helpem iumi for gohed hambol, calm, and barava depend lo Jehovah.

MAS HAMBOL AND NO PRAOD

3. Hu nao Naaman?

³ For duim wise samting, iumi need for rejectim wei for praod. (1 Pet. 5:5) Wei for minim samting savve helpem iumi for duim datwan. Lo wanem wei? Tingim example blo Naaman. Hem stap lo Syria, wanfala nation wea stap north lo Israel. Naaman hem wanfala paoaful man, hem bigman lo army blo Syria. Bat hem garem wanfala nogud skin disease, leprosy.—2 Ki. 5:1.

4. Hao nao samting wea Naaman duim showim hem wise?

⁴ Waef blo Naaman garem wanfala Israelite slave gele wea storyim lo hem dat wanfala profet lo Israel savve healim sik blo hasband blo hem. (2 Ki. 5:​2, 3) Maet Naaman fit for ting olsem, ‘Hao nao kaen smol gele olsem from enemy nation savve talem samting wea bae helpem mi?’ Bat Naaman duim samting wea showim hem wise. Instead for hem praod and ignorem wat smol gele hia talem, hem hambol and lisin lo hem. Hem askem permission from king blo Syria for go lo Israel mekem olketa kiurim sik blo hem.—2 Ki. 5:​4, 5.

5. Wat nao happen taem Naaman kasem Israel?

⁵ Naaman arrive lo palace blo King Jehoram blo Israel, and hem hope for olketa kiurim leprosy blo hem. Bat taem Jehoram lukim hem, hem tingse king blo Syria laek startim nomoa raoa witim hem. Taem profet Elisha herem datwan, hem askem Jehoram for sendem Naaman kam lo hem. (2 Ki. 5:​6-9) Bat Elisha no duim wat Naaman expectim. Hem no even kamaot from haos blo hem for meetim Naaman or for story lo hem. Instead, hem sendem nomoa wanfala messenger for talem Naaman wat hem need for duim mekem sik blo hem finis.—2 Ki. 5:10.

6. (a) Wat nao maet mekem Naaman praod and no laek lisin lo olketa instruction wea datfala messenger talem? (b) Hao nao olketa servant blo Naaman showim olketa garem wei for minim samting, and wat nao result? (2 Kings 5:​13, 14)

⁶ Lo firstaem Naaman no laek lisin lo datfala messenger or lo olketa instruction wea hem kasem. Hem “kros fogud” and “tane raon and go nao.” (2 Ki. 5:​11, 12) Why? Maet hem feel dat olketa no treatim hem witim respect wea hem fit for kasem bikos hem samwan wea garem hae position lo army. And tu, maet Naaman feel dat olketa instruction wea Elisha givim showim hem no respectim nation blo Syria. Nomata wat nao reason, Naaman disaed for go bak nomata hem no kasem eni cure for sik blo hem. Bat, olketa servant blo hem showim olketa garem wei for minim samting taem olketa begim hem for changem tingting blo hem. So Naaman lusim wei wea hem praod and hem hambol for followim olketa instruction blo Elisha. From datwan, sik blo hem finis nao!—Readim 2 Kings 5:​13, 14.

7. Wat nao iumi savve lanem from example blo Naaman? (Proverbs 22:4) (Lukim tu piksa.)

⁷ Wat nao iumi lanem from disfala story? Iumi showim iumi garem wei for minim samting taem iumi savve gud lo wanfala situation, winim for mekem disison base lo wat iumi lukim nomoa. And iumi showim iumi garem wei for minim samting tu taem iumi no letem feeling blo iumi for kontrolem iumi. Wei for minim samting savve muvim iumi for hambol. Taem iumi hambol bae iumi luksavve dat iumi no savve lo evri samting. Samfala taem maet iumi needim help from olketa narawan, especially from Jehovah. Naaman hem no wanfala worshiper blo Jehovah yet, nomata olsem hem showim hem garem wei for minim samting taem hem hambol for lisin lo olketa narawan olsem Israelite slave gele blo waef blo hem, olketa servant blo hem, and most important hem Elisha, representative blo Jehovah. Naaman hem willing for let go lo wei wea hem praod. From datwan, hem mekem wanfala wise disison wea mekem hem gud bak. So bifor iumi talem or duim samting, stop and tingting firstaem. For example, maet samwan givim iumi advaes from Bible wea iumi no agree witim or iumi kasem wanfala theocratic direction wea iumi no understandim. Lo taem olsem, iumi need for tingting gud abaotem if hao iumi react bae showim iumi praod or hambol.—Readim Proverbs 22:4.

MAS CALM AND NO KROS

8. Lo olketa wanem situation nao hem no isi for iumi stay calm?

⁸ Wei for minim samting savve helpem iumi for stay calm and avoidim wei for kros taem olketa situation wea savve mekem man kros hem kamap. Hem tru, datwan hem no evritaem isi bikos samfala taem iumi garem stret reason for kros, taem olketa narawan talem or duim samting lo iumi wea no kaen or no followim justice. (Eph. 4:26 and English study note “Be wrathful”) Distaem bae iumi storyim hao David and Abigail showim tufala garem wei for minim samting taem wanfala hard situation kamap.

9. Hao nao Nabal treatim David?

⁹ Tingim disfala story: David and olketa man blo hem ranawe from Saul and stap lo wilderness lo Paran. (1 Sam. 25:1) Taem olketa lo there, olketa help for protectim olketa shepherd and olketa animal blo wanfala rich man wea nem blo hem Nabal. (1 Sam. 25:​15, 16) Lo taem for katem wool blo olketa sheepsheep, David sendem olketa messenger blo hem go lo Nabal for askem eni extra kaikai. Olketa duim datwan lo wei wea kaen and showim olketa hambol. (1 Sam. 25:​6-8) Bat Nabal nating tinghae lo evri samting wea David and olketa man blo hem duim for hem. Nabal barava les for duim wat David askem, and hem even tok spoelem David and olketa man blo hem.—1 Sam. 25:​10, 11.

10. Hao nao David and Abigail showim tufala garem wei for minim samting? (1 Samuel 25:​32, 33) (Lukim tu piksa.)

¹⁰ If iu nao lo situation blo David, hao nao bae iu feel? Hem isi for iumi minim why David kros tumas. Hem man wea garem strong emotion, and taem diswan happen, hem barava kros and laek for killim dae Nabal! (1 Sam. 25:​13, 21, 22) Bat waef blo Nabal, Abigail wea garem gudfala tingting, stopem David and olketa man blo hem followim road taem olketa go for killim dae Nabal. Hao nao Abigail showim hem garem wei for minim samting? Hem luksavve David hem wanfala gud man nomata hem kros tumas, so hem duim wat hem fit for duim for helpem David kontrolem kros blo hem. Abigail givim hem staka present and hambol for givim samfala wise advice. (1 Sam. 25:​18, 23-31) David showim hem garem wei for minim samting taem hem lisin lo wat Abigail talem, hem luksavve wat Abigail talem hem followim tingting blo Jehovah abaotem datfala situation. From datwan, David calm daon and no duim wanfala serious mistek.—Readim 1 Samuel 25:​32, 33.

11. Hao nao wei for minim samting savve helpem iumi taem samwan mekem iumi kros? (Proverbs 19:11)

¹¹ Wat nao iumi lanem from disfala story? Wei for minim samting savve helpem iumi for react lo wei wea calm nomata iumi garem reason for kros. Hem helpem iumi for ting raonem wat nao savve kamaot from toktok and akson blo iumi. (Readim Proverbs 19:11.) Taem Abigail remindim David abaotem hao Jehovah bae feel abaotem akson blo hem, datwan helpem David for kontrolem kros blo hem. If samting or samwan mekem iu kros or feel nogud, avoidim wei for no tingting firstaem bifor iu duim samting. (Jas. 1:19) Prea lo Jehovah abaotem datwan and spendem taem for faendem tingting blo Jehovah abaotem datfala situation. Datwan savve helpem iu for calm daon.

12. Hao nao olketa narawan savve helpem iumi for garem tingting blo Jehovah and stay calm?

¹² Jehovah iusim Abigail for helpem David stay calm and for savve lo tingting blo Jehovah abaotem datfala situation. Hem savve iusim olketa narawan tu for helpem iumi understandim hao Hem ting lo wanfala situation. So bifor iu react lo wanfala situation wea mekem iu feel nogud, story lo wanfala mature Christian, wea savve helpem iu for garem tingting blo Jehovah abaotem datwan. (Prov. 12:15; 20:18) And if iu garem chance for helpem wanfala fren wea feisim semkaen situation, hao, iu savve followim example blo Abigail? Hao, iu savve helpem fren blo iu for garem sem tingting olsem Jehovah abaotem wanfala situation? For sure Jehovah bae blessim effort blo iu for helpem narawan garem wei for minim samting and for stay calm.

MAS GAREM CONFIDENCE AND NO FRAET

13. Hao nao wei for minim samting savve helpem iumi taem iumi fraet?

¹³ Samfala taem, iumi feisim olketa situation wea mekem iumi fraet. Wei for minim samting savve helpem iumi for tingim dat Jehovah garem bigfala paoa winim eniwan or eni samting wea savve mekem iumi fraet. (Ps. 27:1) Jehovah savve helpem iumi lo eni situation, nomata lo taem wea iumi feel hopeles. Datwan nao wat happen lo profet Jonah. Hem wanfala spiritual man, bat hem needim wei for minim samting for succeed lo wanfala hard assignment.

14. Why nao maet Jonah fraet for duim assignment wea Jehovah givim lo hem?

¹⁴ Jehovah givim Jonah wanfala hard assignment, wea hem nao for go lo Nineveh and talemaot wanfala judgment message lo olketa wea stap lo there. (Jonah 1:​1, 2) Hao nao bae iu feel if iu nao kasem datfala assignment? Datfala journey from Israel for go lo Nineveh, wanfala city lo Assyria, hem tekem samting olsem wan month for Jonah wakabaot go lo there. And olketa Assyrian olketa pipol for kros and raf tumas. Bible even kolem Nineveh lo “taon wea killim dae staka pipol.” (Nah. 3:​1, 7) So instead for Jonah acceptim datfala assignment, hem disaed for ranawe.—Jonah 1:3.

15. Wat nao helpem Jonah for mekem grow confidence wea hem garem finis lo Jehovah? (Jonah 2:​6-9)

¹⁵ Taem Jonah ranawe, Jehovah duim wanfala spesol samting for sevem hem and datwan nao remindim hem lo bigfala paoa blo Jehovah. (Jonah 1:​15, 17) Jonah lanem wanfala leson. Hem start for luksavve hem no need for fraet for duim datfala assignment for go lo Nineveh and for focus lo wei wea Jehovah bae protectim hem from eni danger. (Readim Jonah 2:​6-9.) So taem Jehovah givim hem mek-tu chance for duim datfala assignment, Jonah no hol bak. Hem go lo Nineveh, and pipol lo there acceptim message hem talemaot and olketa sev.—Jonah 3:5.

16. Hao nao wei for minim samting savve helpem iumi lo olketa situation wea savve mekem iumi fraet? (Proverbs 29:25) (Lukim tu piksa.)

¹⁶ Wat nao iumi lanem from disfala story? Iumi no laek letem eniting, especially wei for fraetem man, for mekem iumi hol bak for duim samting lo worship blo iumi for Jehovah. (Readim Proverbs 29:25.) Wei for minim samting helpem Jonah for focus lo sapot blo Jehovah and no focus lo olketa challenge wea hem feisim lo assignment blo hem. Lo sem wei, iumi laek for tingim bak hao Jehovah helpem and protectim iumi lo bifor and no focus lo olketa samting wea mekem iumi fraet. Iumi laek for ting raonem tu example blo olketa brata and sista wea winim olketa situation wea mekem olketa fraet or wea win for duim olketa challenging assignment bikos olketa depend lo Jehovah.a (Heb. 13:6) So disaed strong for showim iumi garem wei for minim samting taem iumi barava trustim Jehovah and helpem olketa narawan tu for duim sem samting.

GAINIM AND PROTECTIM WEI FOR MINIM SAMTING

17. Hao nao iumi savve gohed gainim wei for minim samting?

¹⁷ Olsem iumi storyim, for garem wei for minim samting savve helpem iumi for win for deal witim olketa challenging situation. Hao nao iumi savve gohed gainim wei for minim samting? Jehovah nao hem most important Source blo wei for minim samting, and hem givim datwan lo olketa worshiper blo hem thru lo Word blo hem and holy spirit. (Neh. 9:20; Ps. 32:8) Hem givim advaes wea savve helpem iumi for mekem wise disison and for kontrolem hao iumi feel. (Ps. 119:​97-101) Iumi savve gainim wei for minim samting taem iumi ting raonem gud wat Bible talem and askem Jehovah for givim holy spirit blo hem. Diswan bae helpem iumi for savve gud lo wanfala situation and savve lo best wei for deal witim datwan, mekem wat iumi talem and duim bae followim tingting blo Jehovah.—Prov. 21:​11, ftn.

18. Wat nao iu disaed strong for duim?

¹⁸ Iumi laek for gohed lukaotem and tinghae lo wei for minim samting wea iumi kasem from Jehovah. (Ps. 14:2) If iumi duim datwan, bae iumi no go difren “from road blo wei for minim samting.” (Prov. 21:16) Bat winim enitaem bifor, iumi disaed strong for showim dat iumi garem wei for minim samting evritaem and lo evri situation. Sapos iumi duim datwan, iumi “bae succeed.”