Impruvim Wei wea Iu Teach lo Ministry

1. Wat kaen skill nao iumi shud lane for garem, and why? (2 Timothy 4:2) (Lukim tu piksa.)

JESUS sei olsem lo olketa follower blo hem: “Teachim pipol lo evri kantri for kamap disaepol. . . . Teachim olketa for followim evri samting wea mi laekem iufala for duim.” (Matt. 28:​19, 20) Instruction hia showim dat evri Christian shud kamap teacher. Hem tru, Jehovah leadim kam olketa ‘wea showim dat olketa laek’ for savve lo hem, and olketa angel duim important waka for helpem iumi for faendem pipol olsem. (Acts 13:48; John 6:44; Rev. 14:6) Nomata olsem, iumi tu need for duim part blo iumi. Tingim example blo aposol Paul and Barnabas. Bible storyim taem tufala preach lo sinagog lo Iconium, “hao tufala story hem mekem staka Jew and staka Greek for biliv.” (Acts 14:1) Hem klia, Paul and Barnabas lane for “teach lo gudfala wei.” (Readim 2 Timothy 4:2.) Hem gud for evri Christian tu lane for duim sem samting.

2. Why nao maet samfala Christian feel dat olketa no savve impruvim skill blo olketa for teach?

² Samfala maet feel dat olketa no savve impruvim skill blo olketa for teach bikos olketa no skul gud or no garem natural ability for teach. Bible storyim samfala man wea garem tu semkaen feeling. (Ex. 4:10; Jer. 1:6) Olketa narawan maet feel discourage abaotem teaching ability blo olketa bikos olketa no kasem eni positive result olsem olketa narawan. Tru samting nao, no evriwan wea iumi story witim or meetim bae acceptim datfala gud nius. And result wea kamaot hem no depend lo effort blo iumiseleva. Olsem iumi storyim finis, Jehovah and olketa angel mek sure iumi faendem olketa wea garem honest heart. Nomata olsem, iumi still need for duim best blo iumi for storyim datfala message lo wei wea bae kasem heart blo olketa. For helpem iumi duim datwan, disfala article bae storyim thrifala wei wea iumi savve impruvim ability for teach lo ministry.

SHOWIM IUMI INTEREST LO PIPOL

3. Wat nao mekem story blo Jesus kasem heart blo pipol wea lisin?

³ Bible storyim dat Jesus savve lo “wat nao insaed heart blo olketa man.” (John 2:25) Datfala expression showim dat Jesus savve lo hao pipol ting and wat nao motive blo olketa. Wat hem storyim kasem heart blo pipol wea lisin lo hem bikos hem luksavve lo wat olketa needim. Hem luksavve dat olketa hangere lo spiritual wei and kasem hard taem from staka kastom and olketa rul wea olketa bigman lo religion mekem. (Matt. 9:36; 23:4) So hem storyim olketa samting wea helpem olketa lo Sermon blo hem lo Maunten. Staka pipol interest for lisin lo Jesus bikos hem storyim olketa samting wea affectim olketa.

4. Hao nao iumi savve showim iumi interest lo pipol? (Lukim tu piksa.)

⁴ Iumi savve showim iumi interest lo pipol wea iumi story witim taem iumi trae for minim wat olketa wari abaotem. Each wan wea iumi preach lo hem kasem hard taem from disfala nogud system blo Satan. Taem iumi evritaem tingim datwan, bae hem moa isi for iumi helpem pipol lo territory blo iumi. For example, hao, eni recent nius maet mekem pipol lo territory for wari? Hao, parents wari abaotem safety blo pikinini blo olketa lo skul? Hao, unemployment hem big lo ples wea iu stap? Trae for imaginim hao nao laef blo pipol wea no savve lo hope wea Bible storyim, taem olketa feisim olketa barava hard taem hia.—2 Tim. 3:1; Isa. 65:​13, 14.

5. Hao nao wei wea Jesus teach hem difren from olketa Pharisee? (Matthew 11:​28-30)

⁵ Jesus interest lo olketa wea lisin lo hem, and olketa seleva lukim datwan lo hao hem treatim olketa. Jesus barava difren from olketa Pharisee wea ting daonem olketa ordinary pipol and ting lo olketa olsem olketa no important. (Matt. 23:13; John 7:49) Bat Jesus treatim pipol lo wei wea kaen and showimaot respect. Hem ‘no savve raf and hem hambol,’ and datwan nao helpem hem for kamap wanfala best teacher. (Readim Matthew 11:​28-30.) Iumi tu shud treatim olketa wea lisin lo iumi lo wei wea kaen and showimaot respect.

6. Hao nao iumi showim iumi kaen and respectim olketa wea rejectim or againstim message iumi preachim?

⁶ Samfala rejectim or even againstim message wea iumi preachim. Wat nao iumi shud duim? Jesus instructim iumi for no treatim olketa nogud, bat hem talem iumi for duim nara samting. Hem sei for iumi “duim gud samting lo olketa wea heitim” iumi, for “askem God for blessim olketa wea laekem nogud samting for kasem” iumi, and even for “prea for olketa wea tok spoelem” iumi. (Luke 6:​27, 28) Hem bae isi for iumi duim datwan if iumi ting raonem reason wea maet mekem olketa no laek lisin lo iumi. Samfala olketa min for againstim iumi. Bat, olketa narawan maet feisim samfala famili problem or wari abaotem situation wea olketa feisim. Maet iumi kasem olketa lo taem wea no fitim. Nomata lo eni situation, iumi shud evritaem followim disfala kaonsel for “toktok blo [iumi] mas evritaem kaen olsem [iumi] putim solt lo hem, mekem [iumi] bae savve hao for givim ansa lo evri man.” (Col. 4:6) If iumi tingim pipol and trae for luksavve lo wat olketa needim, bae iumi no kwiktaem feel nogud and iumi savve kamap olketa best teacher.

DEPEND LO WORD BLO GOD

7. Hao nao Jesus showim dat hem depend lo Word blo God taem hem teach? (John 7:​14-16)

⁷ Jesus no depend lo savve blo hemseleva. Teaching blo hem base lo Word blo God, and hem teach lo wei wea audience blo hem bae isi for minim and rememberim. Bible storyim dat “teaching blo hem garem paoa, and no olsem olketa scribe.” And pipol “barava sapraes” lo hao hem teach. (Mark 1:22; lukim “not as the scribes” lo English study note.) Olketa scribe lo taem blo Jesus savve quotem toktok blo olketa famous religious teacher for sapotim teaching blo olketa. Bat Jesus no olsem, hem evritaem quotem toktok from olketa Holy Scripture. Nomata Jesus stap witim God lo heven bifor hem kam lo earth, hem no trae for show-off witim bigfala wisdom blo hem and mekem olketa wea lisin for feel olsem olketa no savve lo eniting. Instead, teaching blo hem base lo will blo God and Word blo Hem. (Readim John 7:​14-16.) Jesus showim nambawan example for olketa follower blo hem.

8. Hao nao aposol Peter followim example blo Jesus?

⁸ Olketa disaepol blo Jesus tu depend lo Word blo God taem olketa teach. For example, tingim tok wea aposol Peter givim lo Pentecost 33 C.E. Peter hem no man wea skul gud. Bat taem hem iusim olketa Scripture for explainim olketa profesi wea Jesus fulfillim, datwan kasem heart blo olketa wea lisin lo hem. (Acts 2:​14-37) Wat nao result? Bible sei: “Olketa wea hapi for acceptim toktok blo hem olketa baptaes, and lo datfala day samting olsem 3,000 pipol nao kamap disaepol.”—Acts 2:41.

9. Taem iumi teach, why nao iumi mas depend lo Word blo God?

⁹ Best tul wea iumi savve iusim for kasem heart blo pipol hem Word blo God. (Heb. 4:12) Dastawe, iumi need for iusim Bible taem iumi teach. Iumi laek for “preachim word blo God,” no own idea blo iumi. (2 Tim. 4:2) Proverbs 2:6 sei: “Jehovah nao givim wisdom. Knowledge and wei for luksavve kam from mouth blo hem.” So taem iumi iusim olketa Scripture for teach, hem olsem iumi letem Jehovah for story. (Mal. 2:7) Iumi laekem pipol for savve hao wisdom lo Bible hem barava winim wisdom blo olketa man. Wat Bible teachim hem kam from God and hem garem knowledge wea iumi need for kasem mekem iumi duim samting wea Creator blo iumi hapi lo hem and for iumi garem hapi laef.—2 Tim. 3:​16, 17.

10. Hao nao iumi savve helpem Bible student for focus lo Word blo God?

¹⁰ Taem iu prepare for conductim wanfala Bible study, trae for faendem wei for helpem student blo iu for focus lo wat Bible teachim. Student blo iu shud understandim dat nomata olketa piksa and video savve helpem iumi for lanem samting, Bible nao hem main textbuk. So readim olketa verse wea bae helpem student for understandim main point, then helpem hem for ting raonem wat hem savve lanem from olketa verse hia. Taem iutufala story abaotem olketa piksa and video, helpem student for minim olketa important Bible principle wea hem savve lanem. Iu no need for storyim staka samting or readim staka scripture for helpem student. Bat, givim taem for student ting raonem wat each scripture hem minim, and if need hem stap iutufala savve readim moa. Taem iumi duim olsem, iumi conductim wanfala Bible study, no wanfala buk study or piksa study or wanfala video study.—1 Cor. 2:13.

11-12. (a) Hao nao iumi savve patient witim olketa Bible student blo iumi? (Acts 17:​1-4) (Lukim tu piksa.) (b) Wat nao maet samfala need for lanem abaotem Bible, and hao nao iumi savve helpem olketa?

¹¹ If student blo iu faendem hem hard for acceptim wanfala point, remember, for “preachim word blo God . . . iu mas patient.” Hao each wan progress hem no semsem. Samfala student maet needim moa taem for minim olketa truth, wea for iumi hem isi nomoa for minim. Paul mas preach lo olketa Jew lo Thessalonica tu-thri taem, hem explainim and givim pruv from olketa Scripture bifor samfala lo olketa minim point.—Readim Acts 17:​1-4.

¹² Nara wei wea iumi savve showim iumi patient hem taem iumi askem olketa kwestin for savve lo tingting blo student and avoidim wei for story tumas. Trae for lisin gud and minim tingting blo olketa. Then readim olketa specific scripture and story raonem for helpem hem minim tingting blo God abaotem wat iutufala studyim. And tu, tingim diswan: Samfala pipol no even lukim Bible and no savve wat nao Bible storyim. Hem bae gud for iumi showim lo olketa wanfala hard copy blo Bible. And iumi savve showim “Introduction for Word blo God” wea stap lo olketa first page blo Niu World Transleison, for helpem olketa savve wat nao olketa important topic wea Bible storyim. Then maet iumi savve iusim wan or tufala scripture anda lo kwestin 15 for explainim hao Bible savve helpem iumi for hapi. So, if iumi showim lo Bible student paoa wea Word blo God garem, wei wea iumi teach bae barava helpem olketa.

FOCUS LO JEHOVAH

13. Taem iumi teach, hu nao shud kamap focus blo iumi? Storyim example.

¹³ Goal blo iumi hem for helpem olketa wea lisin for savve lo Jehovah and fren klos witim hem. (Jas. 4:8) Iumi savve comparem iumi witim samwan wea holem torchlaet for helpem narawan lukim wanfala object wea stap lo dark ples. Datfala person bae no torchim hemseleva, bat hem bae torchim datfala object mekem nara person hia hem lukim. Lo sem wei, taem iumi teach iumi shud focus lo Jehovah, no lo iumiseleva.

14. Hao nao iumi savve helpem Bible student for focus lo Jehovah?

¹⁴ Taem iu conductim wanfala Bible study, helpem student blo iu for garem feeling for laek mekem Jehovah hapi. (Prov. 27:11) Iu no just trae for helpem student for followim nomoa olketa rul, olsem samwan wea member lo wanfala grup. Bat iu laekem student for mekem olketa change bikos hem laek for mekem Jehovah hapi. For example, if student blo iu stragol for winim wanfala bad habit, askem hem olketa kwestin hia: “Why nao Jehovah heitim wei for duim diskaen samting? Why nao Jehovah laekem iu for lusim samting wea iu enjoyim? Hao nao disfala requirement showim dat Jehovah lovem iu?” Taem iu gohed for helpem student for ting abaotem Jehovah and olketa quality blo Hem, datwan bae helpem student for lukim dat Dadi blo iumi Jehovah hem barava lovem hem. And datwan bae helpem student blo iu for laek for mekem Jehovah hapi.

GOHED IMPRUVIM WEI WEA IU TEACH

15. Wat nao savve helpem iu for gohed impruvim wei wea iu teach?

¹⁵ Iu savve prea and askem Jehovah for helpem iu lukluk gud lo hao iu teach mekem iu luksavve lo wat iu need for duim for impruv. (1 John 5:14) Iu savve duim samting followim prea blo iu taem iu traem best for applyim training wea Jehovah givim lo olketa kongregeson meeting. Iu savve askem wanfala experience Bible teacher for joinim iu lo Bible study. Then ask for feedback. Tingim tu, student blo iu no savve gud lo datfala material olsem iu. Trae for ting raonem hao nao student blo iu bae ting lo datfala information. Then helpem hem for luksavve dat hem bae benefit from wat hem lanem and Jehovah promisim olketa gud samting for iumi. Datwan savve helpem hem for fren klos witim Jehovah and mekem hem garem hapi laef.—Ps. 1:​1-3.

16. Wanem gud samting nao bae iumi kasem if iumi gohed impruvim ability blo iumi for teach lo gudfala wei?

¹⁶ Wei for teachim olketa narawan abaotem Jehovah hem wanfala samting wea savve mekem iumi barava hapi distaem. And iumi bae need for teachim staka pipol lo niu world wea bae kam. So iumi laek for gohed interest lo pipol wea lisin lo iumi, depend lo Word blo God, and focus lo Jehovah taem iumi preachim datfala gud nius. Taem iumi duim olsem, iumi savve impruvim ability blo iumi for teach gud lo ministry.