Gohed Duim Samting for Redi for Baptaes

1. (a) Wat nao samfala benefit wea iumi kasem from iumi baptaes? (b) Wat nao bae iumi storyim lo disfala article?

HAO, iu dedicate finis lo Jehovah and showim datwan taem iu baptaes? If olsem, datwan showim iu askem God for iu garem klin konsens. (1 Pet. 3:21) And tu, taem iu baptaes iu showim gud example for olketa young wan and olketa niu wan wea associate witim kongregeson blo iu. Datwan hem wanfala best disison wea iu mekem! Bat hao sapos iu no baptaes yet? For sure iu lovem Jehovah and laek for duim will blo hem. Iu savve dat baptism hem important mekem iu savve kasem forgiveness for olketa sin blo iu and for kasem appruvol blo Jehovah. (Acts 2:​38-40) Bat maet iu still hol bak. Wat nao savve helpem iu? Lo disfala article, bae iumi storyim (1) why samfala hol bak for baptaes, (2) why hem wise for gohed tingim dat end hem klosap, and (3) olketa benefit wea iu bae kasem from iu no delay for duim samting for redi for baptaes.

WHY SAMFALA HOL BAK

2. Why nao samfala hol bak for baptaes?

² Samfala hol bak for baptaes bikos olketa fraet. For example, nomata olketa laek for worshipim Jehovah, olketa fraet nogud nao olketa no fit for duim eni gud samting for mekem hem hapi. If iu feel olsem, readim bak olketa verse wea savve convincim iu dat Jehovah hem no expectim iu for perfect, bat hem hapi witim worship blo iu taem iu givim best blo iu lo hem. (Ps. 103:​13, 14; Col. 3:23) If iu fraet nogud pipol againstim iu, askem Jehovah for givim iu sem confidence wea man wea raetem Psalm hem talem, hem sei: “Jehovah hem lo saed blo mi, bae mi no fraet. Wat nao man bae duim lo mi?”—Ps. 118:6.

3. Wat kaen tingting nao maet stopem samfala for baptaes? (Lukim tu piksa.)

³ Samfala wea lovem Jehovah hol bak for baptaes bikos olketa tingse olketa no garem inaf knowledge abaotem olketa Bible teaching and abaotem Jehovah. Bat haomas knowledge nao iu need for garem? Tingim disfala Bible example. Afta wanfala earthquake sekem prison wea aposol Paul and Silas stap insaed, tufala witness lo datfala man wea lukaftarem prison and famili blo hem. Luk olsem datfala man and famili blo hem luksavve dat samting wea happen hem wanfala mirakol. And tu, olketa lanem samfala important teaching abaotem Jehovah and Jesus lo datfala naet, and datwan muvim olketa for “no delay for baptaes.” (Acts 16:​25-33) If iu savve lo Jehovah, lovem hem witim full heart blo iu, garem basic knowledge abaotem olketa Bible teaching, repent from olketa sin blo iu, and iu disaed strong for followim olketa standard blo hem, datwan showim iu redi nao for baptaes.—Mark 12:30.

4. Wat nao samfala focus lo hem wea mekem olketa hol bak for baptaes? (Lukim tu piksa.)

⁴ Samfala wea laek for mekem God hapi olketa focus lo kost or sakrifaes wea olketa mas mekem. Hem tru, hem wise for ting raonem kost blo eni disison wea iu bae mekem. (Luke 14:​27-30) Bat samfala wari abaotem olketa sakrifaes wea olketa mas duim mekem olketa worshipim God. Candace, wea growap lo truth, hem tu feel olsem taem samwan offerim Bible study lo hem taem hem big finis. Hem sei: “Mi savve lo wat mi shud duim for Jehovah, bat mi hol bak for duim datwan bikos mi enjoyim wat mi duim taem mi lo world. Mi savve bae hem hard for mi lusim olketa samting hia.” Olketa narawan wari abaotem hae standard saed lo fasin wea Jehovah expectim olketa wea baptaes for mas followim. Olketa wari nogud afta olketa baptaes olketa duim wanfala serious sin and aot from kongregeson. If samfala lo olketa samting hia mekem iu hol bak, wat nao iu savve duim?

5. Wat nao iumi shud focus lo hem taem iumi ting raonem if iumi bae baptaes? (Matthew 13:​44-46)

⁵ Taem iumi laek for baem wanfala samting, iumi no just luk for kost blo hem, bat iumi luk for value blo hem tu. If value blo datfala item hem gud winim kost blo hem, bae iumi stretawe baem. Lo sem wei, taem iumi ting raonem if iumi bae baptaes, iumi shud no focus nomoa lo kost blo olketa change wea iumi mas duim, bat focus lo hae value blo frenship wea iumi garem witim Jehovah. Jesus iusim tufala illustration for teachim disfala point. (Readim Matthew 13:​44-46.) Lo each illustration, wanfala man hapi for salem evriting wea hem onam mekem hem savve baem datfala valuable item wea hem faendem. Iu tu faendem samting wea garem hae value, wea hem nao truth abaotem Kingdom. If iu daotem sapos wei for followim truth bae mekem iu kasem gud samting, hem important for ting raonem gud tufala illustration blo Jesus. Maet iu savve ting raonem tufala kwestin hia: ‘Hao, mi barava sure dat wat mi faendem hem garem hae value? Hao, mi barava tinghae lo frenship blo mi witim Jehovah, hope wea hem givim lo mi, and olketa loving brata and sista wea hem givim lo mi?’ Ansa blo iu for tufala kwestin hia savve helpem iu for focus lo wat iu need for duim for buildim appreciation blo iu for truth, or luksavve lo wat nao mekem iu hol bak for duim samting followim wat iu lanem.

6. Wat nao savve helpem iumi for garem gud heart condition?

⁶ Lo illustration blo Jesus abaotem datfala farmer, Jesus describem olketa heart condition wea savve stopem samwan for mekem spiritual progress. Nomata olsem, wat Jesus storyim showim tu dat samfala bae herem datfala Kingdom message witim “gudfala heart” and duim samting followim datwan. (Luke 8:​5-15) If iu wari dat heart blo iu hem divaed, no givap. Witim help blo God, iu savve garem wanfala ‘niu heart,’ heart wea bae willing for obeyim hem. So askem Jehovah for helpem iu softim heart blo iu mekem Kingdom truth savve grow gud.—Ezek. 18:31; 36:26.

7-8. Why nao samfala young wan no progress for baptism? (Lukim tu piksa.)

⁷ Samfala young wan wea lovem Jehovah no progress for baptism bikos lo influence from olketa narawan. For example, samfala skul teacher maet advaesem olketa student for garem open mind abaotem samfala laefstael wea olketa ting hem acceptable, nomata samfala laefstael hia againstim olketa standard blo God. Bat kaen advaes olsem savve leadim man for kasem nogud samting. (Ps. 1:​1, 2; Prov. 7:​1-5) Iu savve avoidim diswan taem iu followim example blo man wea raetem Psalm, wea sei lo Jehovah: “Mi garem wei for minim samting winim go moa evri teacher blo mi, bikos mi ting abaotem olketa reminder blo iu.”—Ps. 119:99.

⁸ And tu, luk olsem wat samfala Witness parents duim nao mekem hem no isi for pikinini blo olketa disaed for baptaes. Olketa parents hia maet focus tumas lo education or career blo pikinini, or olketa seleva fail for helpem pikinini for markem olketa spiritual goal. Hao, iu ting parents blo iu shud duim moa samting for sapotim iu progress lo spiritual wei? Sapos olsem, storyim datwan witim tufala. Remember, nomata wat nao age blo iu, iu savve buildim klos frenship witim Jehovah.—Prov. 20:11.

9. Why nao maet samfala delay for baptaes?

⁹ Samfala wea qualify for baptaes maet delay for duim datwan bikos lo peer pressure, olketa maet even weit for baptaes lo sem day witim narawan. For example, maet olketa laek for baptaes lo sem day witim wanfala fren or loved wan blo olketa. Hem tru, iu savve baptaes lo semtaem witim olketa narawan wea iu lovem. Bat really, datwan shud no mekem iu hol bak for baptaes distaem. Remember, dedication blo iu for God hem wanfala personal promis. Baptism blo iu shud no depend lo wat narawan duim.—Rom. 14:12.

WHY HEM IMPORTANT FOR GOHED TINGIM END HEM KLOSAP

10. Why nao maet samfala delay for progress lo spiritual wei?

¹⁰ Witim olketa reason wea iumi storyim finis, samfala maet delay for progress lo spiritual wei bikos olketa tingse staka taem hem stap yet bifor end hem kam. Bat hao, datfala tingting hem stret? Jesus warnim olketa disaepol blo hem olsem: “Gohed redi, bikos Son blo man bae kam lo taem wea iufala nating tingim.”—Luke 12:40.

11. Olsem Psalm 119:60 storyim, taem iumi savve lo Jehovah, hao nao datwan mekem iumi ting lo olketa komand blo hem?

¹¹ Love nao shud motivatim iumi for dedicate lo Jehovah. Taem iumi savve gud go moa lo loving God blo iumi, datwan bae muvim iumi for lovem olketa komand blo hem and kwiktaem for obeyim bikos datwan bae benefitim iumi. (Readim Psalm 119:60.) Disaepol James storyim nara important reason for kwiktaem obeyim olketa komand blo Jehovah: No eniwan lo iumi savve wat bae happen tumoro. Iumi maet no even garem eni day moa for duim “stret samting,” so iumi shud duim samting distaem followim wat iumi lanem.—Jas. 4:​13-17.

12. Wat nao iumi savve lanem from illustration blo Jesus abaotem grape planteison?

¹² Tingim illustration blo Jesus abaotem datfala grape planteison. Hem explainim dat samfala bae just waka for wan hour nomoa and still kasem sem wages olsem olketa wea waka for full day. Bat, lukim reason why olketa wea waka for wan hour no start early. Olketa sei: “Bikos no eniwan givim waka for mifala.” So olketa wakaman hia no lesy, olketa laek waka for full day bat no eniwan givim waka lo olketa. Semtaem boss givim waka lo olketa, olketa stretawe kam waka. (Matt. 20:​1-16) Distaem tu, Jesus invaetem iumi for kamap disaepol blo hem and join insaed Kingdom waka. Iumi shud stretawe acceptim disfala invitation taem iumi kasem.

13. Wat nao iumi savve lanem from waef blo Lot?

¹³ Eniwan wea delay for duim samting for progress lo spiritual wei maet luksavve dat hem no isi for duim olketa last minute change for mekem God hapi. Jesus savve lo diswan and hem warnim olketa disaepol blo hem olsem: “No forgetim samting wea happen lo waef blo Lot.” (Luke 17:​31-35) Hem savve dat judgment blo God for Sodom and Gomorrah hem barava klosap for happen, nomata olsem, hem still no willing for let go lo olketa tings wea hem lusim bihaen. (Gen. 19:​23-26) Example blo hem remindim iumi tu dat door blo salvation bae no gohed open for olowe. Lo taem wea God markem, datfala door bae hem klos and lok for olowe.—Luke 13:​24, 25.

14. Hao nao olketa Bible profesi abaotem end shud affectim iu?

¹⁴ Olketa samting wea happen raonem world each day, hem fulfillim olketa Bible profesi abaotem end blo disfala system. Nomata if samfala lo olketa samting hia no affectim iu yet, taem iu lukim olketa happen lo olketa nara ples datwan shud muvim iu for no delay for progress for baptaes. Tingim disfala example from first century. Aposol Peter encouragem olketa Christian for “redi evritaem” or alert bikos “taem wea evri samting bae finis hem klosap nao.” (1 Pet. 4:7) Luk olsem “taem wea evri samting bae finis” wea Peter storyim hem minim system blo olketa Jew. Olketa Christian wea Peter raet for olketa, olketa stap farawe from Jerusalem, so taem wea datfala taon bae distroe bae hem no really affectim olketa. (1 Pet. 1:1) Bat, taem olketa lukim datfala profesi hem fulfill, trust blo olketa lo olketa nara promis blo Jehovah bae strong go moa. Lo sem wei, taem iu lukim olketa profesi abaotem end hem fulfill, datwan bae muvim iu for redi for duim samting for kasem goal for baptaes.

15. Hao nao iumi savve redi for day blo Jehovah? (2 Peter 3:​10-13)

¹⁵ Lo second leta blo Peter, hem explainim hao iumi savve redi for datfala day blo Jehovah wea klosap for kam. For olketa Christian lo first century, datfala day hem farawe yet, nomata olsem, Peter talem olketa for “tingim evritaem” or “laekem tumas” datfala day for kam. (Readim 2 Peter 3:​10-13; ftn.) Iumi tingim evritaem day blo Jehovah taem iumi evritaem tingim dat day hia hem barava klosap for kam. And iumi duim best blo iumi for redi for datfala day taem iumi duim samting wea showim iumi holy and faithful lo God. Tingim, Jehovah mas barava hapi taem hem lukim wat iu duim for ‘showim iu faithful lo God’! For sure hem bae hapi tumas taem hem lukim iu dedicatem iuseleva lo hem and baptaes.

OLKETA BENEFIT IU KASEM FROM IU NO DELAY

16. Wat taem nao best taem for iu progress for baptism? (2 Corinthians 6:​1, 2) (Lukim tu piksa.)

¹⁶ Distaem nao hem best taem for iu duim samting for progress for baptism. (Readim 2 Corinthians 6:​1, 2.) Datfala Ethiopian hae official wea Philip meetim luksavve hem need for duim samting kwiktaem. Taem hem understandim wat nao gud nius and hem garem chance for baptaes, hem no ting olsem: ‘Mi laek for lanem moa samting firstaem abaotem gud nius. Mi weitim nara pool wata followim road nao.’ Instead hem askem Philip olsem, “Wat nao stopem mi for baptaes?” (Acts 8:​26, 27, 35-39) Datwan hem nambawan example! Afta datfala hae official hem baptaes hem “hapi tumas and gohed lo gogo blo hem.”

17. Wat nao iumi savve sure lo hem?

¹⁷ If iu hol bak for baptaes, iu savve sure dat Jehovah redi for leadim iu kam for kamap klos fren blo hem. (Rom. 2:4) Hem savve helpem iu for ovakamim wei for fraet, wari, or influence wea iu savve kasem from olketa narawan wea maet stopem iu for progress. Taem iu garem gud konsens front lo God from iu baptaes, bae iu luksavve dat “olketa samting lo bihaen” bae hem no important lo iu moa. (Phil. 3:​8, 13) Then iu savve luk forward for ‘olketa samting wea stap lo front,’ wea hem nao taem wea Jehovah bae fulfillim olketa promis blo hem for olketa wea dedicate lo hem and baptaes.—Acts 3:19.