APRIL 13-19, 2026
SONG 52 Christian Dedication
Understandim Mining blo Baptism
‘Teachim pipol for kamap disaepol. Baptaesim olketa.’—MATT. 28:19.
FOCUS
Bae iumi storyim mining blo baptism, why hem important, and olketa samting wea involve insaed.
1. Wat nao showim baptism hem wanfala barava important Bible teaching?
IUMI barava hapi taem olketa niu wan baptaes! Olketa first Christian kasem datfala sem hapi taem olketa lukim staka pipol baptaes lo Pentecost 33 C.E. Lo datfala first meeting, aposol Peter givim wanfala tok wea explainim datfala barava important teaching abaotem baptism. (Acts 2:38, 40, 41) Bihaen, aposol Paul storyim dat “main teaching abaotem Christ” hem includim “teaching abaotem olketa difren baptism.” (Heb. 6:1, 2) Nomata maet iumi ting topic abaotem baptism hem wanfala basic teaching nomoa, iumi need for understandim gud. Why?
2. Why nao hem important for iumi understandim gud baptism?
2 Lo sem wei wea strong faondeson savve mekem wanfala haos for strong, wei for understandim gud baptism savve helpem iumi for garem strong faith. Iumi need for understandim gud diswan nomata iumi progress for baptaes or iumi baptaes for staka year finis. So lo disfala article bae iumi ansarem olketa kwestin hia: Wat nao mining blo baptism? Wat nao involve insaed Christian baptism? And why nao iumi baptaes lo nem blo Dadi, blo Son, and blo holy spirit?
MINING BLO BAPTISM BLO IU
3. Wat nao wei for baptaes hem showim?
3 Taem iu baptaes iu showim lo pablik dat iu acceptim truth abaotem Jehovah God and Christ Jesus, repent from olketa sin blo iu, changem olketa samting wea iu duim lo laef for servem Jehovah, luksavve dat God iusim Jesus for sevem iumi man, and talem lo God lo prea dat iu barava laek for joinim organization blo Hem for duim will blo Hem. Taem iu mekem datfala promis or dedication, and baptaes, iu startim wanfala journey wea lead go for laef olowe.
4. Wat nao wei for go anda lo wata and then kamaot from wata hem minim? (Lukim tu piksa.)
4 Taem iu baptaes, iu go anda lo wata and iu kamaot from datwan,a wea hem olsem iu dae and then iu resurrect. (Comparem Colossians 2:12.) Baptism showim olketa big change wea iu duim lo laef blo iu. Lo wanem wei? Taem iu go anda lo wata, iu showim iu stop for duim olketa samting wea iu duim bifor. Taem iu kamaot from wata, iu startim wanfala niu laef wea most important samting hem for duim will blo God.
Taem iu baptaes, iu stop for followim olketa old wei blo iu and startim wanfala niu laef wea most important samting hem for duim will blo God (Lukim paragraf 4)
5. Hao nao wat iu duim for prepare for baptaes hem semsem witim waka wea Noah duim for buildim ark? (1 Peter 3:18-21)
5 Readim 1 Peter 3:18-21. Iumi savve comparem wat iu duim for redi for baptaes witim waka wea Noah duim for buildim ark. If iu just start for lane abaotem Jehovah, maet iu ting wei for prepare for baptism hem big waka, olsem big waka wea Noah duim for buildim ark. Hao, evriting iu duim hem important? Yes. Why nao iumi sei olsem? Tingim Noah. God seleva nao designim datfala ark, and Noah mas followim gud datfala design mekem taem Flood kam, olketa savve sev. From Noah garem faith and God sapotim hem, hem obey and buildim datfala ark. Olsem Noah, iu tu savve succeed for duim “evriting wea God talem.”—Gen. 6:22.
6. Lo wanem wei nao baptism savve sevem iu?
6 Lo verse 21, aposol Peter storyim dat baptism hem ‘sevem iu.’ Hem tru, wei for go anda lo wata hem no savve sevem man and no savve wasimaot olketa sin blo iu. Bat only blood blo Jesus nomoa savve klinim iu from olketa sin blo iu. (1 John 1:7) Nomata olsem, baptism hem wanfala important part blo wei for duim evriting wea God komandim and hem olsem wei for ‘askem God for givim iu gudfala konsens.’ Jehovah bae hapi for givim wat iu askem. Lo datfala wei, baptism hem ‘sevem iu,’ or leadim iu for kasem salvation.
WAT NAO INVOLVE INSAED CHRISTIAN BAPTISM?
7. Wat nao stret wei for duim baptism?
7 Bible storyim requirement for baptism hem for man mas go anda lo wata, bat hem no storyim staka detail abaotem baptism. Nomata olsem, Bible helpem iumi for savve wat nao hem appropriate. For example, olketa Bible principle helpem olketa wea candidate for baptaes for savve lo wat kaen kaleko for werem and hem helpem tu olketa wea lukluk for savve hao olketa savve behave during baptism. (1 Cor. 14:40; 1 Tim. 2:9) Distaem, wanfala elder nao savve baptaesim olketa wea candidate, and iumi avoidim wei for mekhae lo olketa wea kasem disfala privilege. (1 Cor. 1:14, 15) Baptism hem important nomata staka pipol nao witnessim or nomoa.—Acts 8:36.
8. Wat nao tufala kwestin wea olketa savve askem lo olketa wea candidate for baptaes, and why? (Acts 2:38-42) (Lukim tu piksa.)
8 Bible sei dat iumi shud ‘talemaot lo pablik datfala message wea savve leadim man for kasem salvation,’ wea hem nao for talemaot faith blo iumi. (Rom. 10:9, 10; lukim “publicly declare” lo English study note.) Iumi talemaot datwan no lo taem iumi preach nomoa, bat hem barava important for iumi duim datwan tu lo day wea iumi baptaes! Dastawe, olketa wea candidate for baptaes mas ansarem tufala kwestin. First kwestin hem, “Waswe, iu repent from olketa sin blo iu, dedicatem iuseleva lo Jehovah, and luksavve God iusim Jesus Christ for sevem iumi?” Disfala kwestin hem focus lo wat samwan duim finis for redi for baptaes, and hem semsem olsem encouragement wea Peter talem lo datfala crowd lo Pentecost. Mek-tu kwestin hem, “Iu savve taem iu baptaes datwan showimaot iu wanfala lo Olketa Jehovah’s Witness and distaem iu insaed lo organization blo Jehovah?” Disfala kwestin remindim iumi dat iumi keepim dedication promis blo iumi taem iumi willing for obeyim direction wea Jehovah provaedem thru lo organization blo hem, and iumi worshipim Jehovah witim olketa nara Christian olsem olketa disaepol lo first century duim. (Readim Acts 2:38-42.) Olketa wea ansa yes witim full heart lo tufala kwestin hia olketa qualify for baptaes.
Baptism blo iu includim wei wea iu ‘talemaot lo pablik datfala message wea savve leadim man for kasem salvation’ (Lukim paragraf 8)d
9. Olketa wanem step nao each wan mas duim for mekem God hapi?
9 Even bifor iu start for lanem truth, maet iu garem gud laef and no enitaem iu duim eni serious sin. Or maet iu growap insaed famili wea parents blo iu helpem iu for lovem Jehovah. Hao, iu still need for repent and baptaes for mekem God hapi? Yes. Nomata wat nao baekgraon blo iumi, iumi evriwan mas luksavve dat iumi inheritim sin, wea mekem iumi stap farawe from God. (Ps. 51:5) Bat taem iumi lane abaotem Jehovah, iumi chus for duim will blo Hem winim wat iumiseleva laekem. Sapos iumi duim datwan, iumi savve repent from wat iumi bin duim and tane raon, wea minim for stop for duim samting wea Dadi blo iumi lo heven no hapi lo hem and duim samting wea Hem laekem. Then iumi savve baptaes.—Acts 3:19.
10. Wat nao iu shud duim if iu baptaes finis olsem member blo nara religion?
10 Nomata if iu baptaes finis olsem member blo nara religion iu still need for baptaes for kamap wanfala Jehovah’s Witness. Why? Bikos lo dat taem iu no really understandim truth abaotem Jehovah God and Jesus. And even if iu dedicatem iuseleva lo God lo prea, promis wea iu mekem hem no base lo stret understanding abaotem will blo hem. Taem aposol Paul meetim olketa man lo Ephesus wea baptaes finis bat wea no understandim gud Christian teaching, hem arrange for olketa baptaes moa.b (Acts 19:1-5) Lo sem wei, distaem tu baptism hem valid only sapos hem base lo accurate knowledge abaotem will blo God.
“LO NEM BLO DADI AND BLO SON AND BLO HOLY SPIRIT”
11. Wat nao hem minim for baptaes “lo nem blo Dadi and blo Son and blo holy spirit”? (Matthew 28:18-20)
11 Jesus givim komand for olketa niu disaepol mas baptaes “lo nem blo Dadi and blo Son and blo holy spirit.” (Readim Matthew 28:18-20.) Wat nao Jesus minim? Lo Bible, datfala word “nem” staka taem hem minim reputation blo samwan. And hem savve minim tu position and authority blo samwan wea garem datfala nem. So taem iumi duim samting “lo nem blo” samwan or samting, datwan showim iumi luksavve lo authority wea datfala man garem. (Comparem Matthew 10:41; lukim “because he is a prophet” lo English study note.) Distaem bae iumi storyim hao iumi savve luksavve lo position and authority blo Dadi and blo Son and tu waka wea holy spirit blo God duim.
12. Hao nao iumi baptaes lo nem blo Dadi? (Revelation 4:11) (Lukim tu piksa.)
12 Lo nem blo Dadi. Iumi luksavve Jehovah nao Dadi blo iumi lo heven, or Man wea givim laef. Hem nao olmaeti God, Creator blo evri samting. (Readim Revelation 4:11.) Iumi luksavve hem Man wea herem olketa prea, and iumi iusim personal nem blo hem lo wei wea showim respect and savve iusim nem hia taem iumi prea lo hem and story abaotem hem lo olketa narawan. (Ps. 65:2) Bat, moa samting hem insaed lo wei for baptaes lo nem blo Dadi. Olketa wea lisin lo Peter lo Pentecost savve finis abaotem Jehovah, bat olketa need for luksavve dat hem nao Man wea provaedem laef olowe thru lo Jesus Christ.—Rom. 5:8.
Afta iu baptaes, gohed for luksavve lo position and authority blo Dadi and blo Son and tu waka blo holy spirit (Lukim paragra 12)
13. Hao nao iumi baptaes lo nem blo Son? (Lukim tu piksa.)
13 Lo nem blo Son. Iumi luksavve Jesus nao hem spesol Son blo God. Jesus nao hem “datfala road” wea only thru lo hem iumi savve fren gud witim Jehovah. (John 14:6) Jesus tu hem Savior blo iumi, man wea dae for iumi mekem iumi savve kasem laef. Wei for savve lo datwan motivatim iumi for followim example blo hem evriday lo laef blo iumi, no just taem iumi baptaes nomoa. (1 John 2:6) So iumi strong for preach olsem Jesus duim and no letem eni samting for stopem iumi. (Luke 4:43) Iumi no givap and loyal for worshipim God nomata iumi feisim persecution. (2 Tim. 3:12) From iumi respectim Jesus olsem “hed blo kongregeson,” iumi hapi for stap anda lo olketa wea hem markem for lead and kea for olketa follower blo hem.—Eph. 4:8, 11, 12; 5:23.
Afta iu baptaes, gohed for luksavve lo position and authority blo Son (Lukim paragraf 13)
14. (a) Hao nao iumi baptaes lo nem blo holy spirit? (Lukim tu piksa.) (b) Wat nao olketa nara baptism for olketa anointed wan? (Lukim box “Olketa Baptism for Olketa Anointed Wan.”)
14 Lo nem blo holy spirit. Iumi acceptim truth abaotem holy spirit. Holy spirit hem no wanfala person or part blo Trinity, bat hem paoa blo God. Iumi luksavve dat holy spirit nao leadim olketa profet and olketa Bible raeta, so iumi readim Bible evritaem and followim olketa teaching wea stap insaed. (2 Pet. 1:20, 21) And iumi avoidim wei for duim olketa serious sin, bikos datwan bae no just blokem nomoa holy spirit blo God for helpem iumi bat bae hem stopem tu flow blo holy spirit blo hem insaed lo kongregeson.—Eph. 4:30.
Afta iu baptaes, gohed for luksavve lo waka blo holy spirit (Lukim paragraf 14)
15. Wat nao iumi shud disaed strong for duim?
15 If iu wanfala Christian wea baptaes finis, disaed strong for duim samting for understandim evriting lo “teaching abaotem olketa difren baptism”c and keepim promis wea iu mekem lo Jehovah taem iu dedicate and baptaes. Bat hao sapos iu no baptaes yet? Hao, eniting nao mekem iu hol bak? Lo next article bae iumi discussim wat iu savve duim for redi for baptaes.
SONG 161 Mi Laek for Duim Will blo Iu
a Datfala Greek word ba’pti-sma, wea olketa transleitim for “baptism,” hem minim “go anda” or “dipim insaed.” So baptism hem minim taem full body blo wanfala person hem barava go anda lo wata, and hem no minim for just sprinklem wata olsem hao samfala religion teachim.
b Olketa man lo Ephesus baptaes followim “baptism wea John teach abaotem.” (Acts 19:3) John Baptaesa encouragem olketa Jew for repent from olketa sin wea olketa duim againstim Law blo Moses, and John baptaesim olketa wea repent. (Mark 1:4, 5) Nomata olsem, baptism wea John teach abaotem hem no longer valid taem Law blo Moses hem finis. Start lo datfala taem, God appruvim only “wanfala baptism” wea lead go for salvation.—Eph. 4:5.
c Lukim disfala article “Wat Nao Baptism?” lo disfala series “Ansa for Olketa Bible Kwestin” lo jw.org and lo JW Library®.
d PIKSA DESCRIPTION: Lo wanfala assembly, olketa wea candidate for baptaes standap for talemaot faith blo olketa lo pablik.