Hao for Helpem Olketa Relative wea No Biliv

1-2. Wat nao savve affectim relationship wea iumi garem witim olketa relative taem iumi first lanem truth?

JESUS sei olsem lo wanfala man wea laek for kamap follower blo hem: “Go lo hom lo olketa relative blo iu, and storyim evri samting wea Jehovah duim for iu.” (Mark 5:19) Taem Jesus tok olsem, hem showim hao hem wei blo pipol for laek storyim lo olketa loved wans blo olketa gud samting wea olketa kasem.

² Iu tingim hao nao iu feel taem iu first lanem gud nius? Maet iu hapi tumas for storyim lo olketa relative blo iu! Bat maet olketa loved wans blo iu no acceptim. Or hao iu storyim datfala truth maet mekem olketa for feel nogud lo iu. Sapos olsem, hao nao iu savve maintainim or strongim bak gud relationship wea iu garem witim olketa relative blo iu, and lo semtaem gohed faithful lo Jehovah?

3. Wat nao bae iumi discussim lo disfala article?

³ Lo disfala article bae iumi storyim: (1) Wei for tingim narawan savve motivatim iumi for showim personal interest lo olketa relative wea no biliv,a nomata if olketa no acceptim truth, (2) hao for no focus lo olketa negative toktok and akson blo olketa, (3) hao wei for patient and for garem hope savve helpem olketa relative for luksavve lo truth, and (4) hao iumi savve showim lo olketa dat iumi lovem olketa.

WEI FOR TINGIM NARAWAN SAVVE MOTIVATEM IU FOR HELPEM OLKETA

4. Wat nao Jesus duim taem pipol no interest lo message blo hem?

⁴ Jesus no kwiktaem for givap lo olketa wea no interest lo message blo hem. Hem comparem hemseleva witim wanfala wakaman blo grape planteison wea waka hard for mekem wanfala fig tree for garem frut. (Luke 13:​6-9) Taem Jesus storyim datfala illustration, hem bin trae for helpem olketa Jew for garem faith lo hem for winim thri years finis. Why nao hem no givap for helpem olketa? Jesus hem tingim pipol and datwan helpem hem for patient witim olketa.

5. Wat nao motivatim Jesus for tingim olketa Jew?

⁵ Jesus tingim olketa Jew bikos olketa bigman blo religion fail for helpem olketa for garem tru faith lo God. Jesus lukim dat pipol hia olsem “olketa sheepsheep wea no garem shepherd for lukaftarem olketa.” (Mark 6:34) Tu-thri day bifor Jesus hem dae, hem even krae for Jerusalem bikos hem savve dat staka pipol wea stap lo there bae lusim laef blo olketa from olketa no garem faith. (Luke 19:​41-44) Taem iumi garem sem feeling olsem Jesus for sorre lo relative blo iumi, datwan bae motivatim iumi for helpem olketa.

6. Why nao iumi shud patient witim olketa relative blo iumi wea no biliv? (Galatians 6:9)

⁶ Readim Galatians 6:9. Nomata if olketa relative blo iumi no interest yet lo biliv blo iumi distaem, iumi shud patient witim olketa and no givap for “duim gud samting.” Iumi savve hem tek taem for wanfala person changem wat hem strong for bilivim and for garem faith lo Jehovah. Lo bifor, hao, iu tu olsem pipol wea “no garem hope and wea no savve lo God”? (Eph. 2:12) Sapos olsem, for sure samwan nao patient witim iu and helpem iu. Diswan savve muvim iu tu for traem best for helpem olketa relative blo iu for lane abaotem Jehovah.

NO FOCUS LO OLKETA NEGATIVE TOKTOK AND AKSON

7. Wat nao maet mekem olketa haf brata blo Jesus no garem faith lo hem?

⁷ Luk olsem olketa haf brata blo Jesus savve abaotem olketa mirakol wea Jesus duim lo Galilee. (Luke 4:​14, 22-24) Bat, lo firstaem, olketa no garem faith lo hem. (John 7:5) Why? Bible no storyim. Bat hem showim tufala samting wea mekem samfala Jew for hol bak for kamap disaepol blo Jesus. Samfala Jew olketa fraet nogud pipol lo community blo olketa rejectim olketa. (John 9:​18-22) Olketa narawan savve gud lo Jesus from taem hem smol yet and hem hard for olketa bilivim dat God nao sendem hem kam. (Mark 6:​1-4) Maet datkaen tingting tu affectim olketa haf brata blo Jesus. Kaen tingting olsem savve affectim tu olketa loved wans blo iumi.

8. Wat nao savve mekem olketa relative wea no biliv for talem or duim samting wea unkaen?

⁸ Ting raonem why olketa talem or duim samting. Luk olsem olketa brata blo Jesus tu join witim olketa relative wea talem dat hem “karangge.” (Mark 3:21) Wat nao maet mekem olketa for tok olsem? Context showim dat Jesus hem busy for preach and healim pipol gogo hem no even garem taem for kaikai. (Mark 3:20) Hao, olketa relative blo Jesus ting dat hem ova tumas? Maet olsem. Olketa relative blo iumi tu maet ting iumi ova tumas lo religion blo iumi. If olketa feel olsem, hem gud for iumi showim lo toktok and akson blo iumi dat iumi reasonable.

9. Wat nao savve helpem olketa relative blo iumi for changem hao olketa ting lo iumi? (1 Peter 3:​1, 2) (Lukim tu piksa.)

⁹ Gohed for kaen and reasonable. Kaenfala toktok and akson blo iumi savve muvim olketa relative blo iumi for changem hao olketa ting lo iumi. (Readim 1 Peter 3:​1, 2.) Wanfala hasband wea no biliv maet kwiktaem for feel left aot or feel nogud taem waef blo hem attendim olketa meeting or go aot lo ministry. From sista hia no laekem hasband for feel olsem, maet hem need for adjustim taem wea hem savve duim olketa spiritual activity mekem hem savve spendem moa taem witim hasband blo hem. For example, maet hem savve go aot lo ministry lo taem wea hasband blo hem busy or hem no stap lo haos. Taem wanfala Christian waef hem flexible and reasonable, maet datwan savve helpem hasband blo hem for changem hao hem ting lo olketa Witness.

10. Hao nao iumi savve followim example blo Jesus taem pipol no tok kaen lo iumi?

¹⁰ No tingse iu mas replyim evriting wea olketa talem. Taem pipol laea for accusim Jesus dat hem man for kaikai and drinkim tumas wine, Jesus no talem eniting for defendim hemseleva. Instead, hem encouragem pipol for lukim wat hem duim and disaed if wat olketa herem hem tru or nomoa. (Matt. 11:19) And tu, hem showim thru lo example blo hem dat hem garem balance tingting abaotem laef. (Comparem John 2:​2, 6-10.) Lo sem wei, no tingse iu mas replyim evri nogud toktok wea pipol talem abaotem iu. Instead, showim lo olketa relative blo iu thru lo wat iu duim dat iu balance and hapi, and olketa seleva bae lukim datwan. Maet datwan bae mekem olketa for no bilivim false information wea olketa herem abaotem iumi.

GOHED PATIENT AND GAREM HOPE

11. Hao nao Jesus deal witim olketa brata blo hem wea no biliv?

¹¹ Olketa story lo Gospel showim Jesus hem gohed patient witim olketa brata blo hem. For example, luk olsem olketa tu lo Cana taem Jesus duim first mirakol blo hem. (John 2:​11, 12) Olsem iumi storyim finis, olketa brata blo Jesus no showim faith lo hem. Nomata olsem, Jesus gohed tingim olketa. Bible storyim dat samting olsem thri years afta Jesus duim first mirakol blo hem lo Cana, hem story kaen lo olketa brata blo hem.—John 7:​5-8.

12. Wat nao savve helpem iumi for gohed garem hope dat samfala relative blo iumi bae changem heart blo olketa?

¹² Wei wea iumi minim klia mercy blo Jehovah savve helpem iumi for gohed garem hope dat olketa relative blo iumi bae change. Taem false religion hem finis, maet olketa relative blo iumi bae tingim bak wat iumi storyim lo olketa abaotem datfala event.b (Rev. 17:16) Maet olketa even joinim iumi lo pure worship afta datfala big trabol hem start. Nomata olsem, if olketa relative blo iumi feisim hard taem distaem, iumi mas duim evriting iumi fit for duim for sapotim olketa. Maet olketa bae willing for acceptim Bible truth if olketa lukim love and kaeness blo iumi hem tru wan.

SHOWIM LO OLKETA DAT IUMI LOVEM OLKETA

13. Nomata iumi busy lo service blo Jehovah, wat nao iumi shud careful lo hem?

¹³ Nomata iumi busy lo service blo iumi for Jehovah, iumi no laekem olketa relative blo iumi for ting dat iumi no garem taem for olketa or iumi no lovem olketa. (Matt. 7:12) Hao nao iumi savve showim dat iumi kea abaotem olketa? Bae iumi storyim samfala wei.

14-15. Wat nao wanfala wei wea iumi showim dat iumi lovem olketa relative blo iumi wea no biliv? Storyim example.

¹⁴ Gohed communicate and showim iumi lovem olketa. Iumi showim iumi lovem olketa relative blo iumi taem iumi evritaem letem olketa savve hao nao iumi. For example, iumi savve sendem wanfala text message witim tu-thri piksa wea iumi tekem during wanfala holiday, trip, or taem iumi witim olketa frens blo iumi. Maet wei for givim smol present or raetem kaenfala toktok insaed wanfala leta, savve mekem iutufala fren gud tugeta. Taem iumi duim olsem, iumi showim lo olketa dat iumi lovem olketa.

¹⁵ Tingim example blo Anna, wanfala sista lo Armenia. Famili blo hem savve spendem staka taem tugeta especially during olketa birthday and holiday. Taem Anna acceptim truth, olketa relative blo hem wari abaotem hao nao niu religion blo hem bae affectim relationship blo olketa. Olketa wari tu abaotem hao disison blo hem for kamap wanfala Witness bae affectim future blo hem. So, wat nao Anna duim? Hem sei: “Taem mi visitim olketa relative blo mi, mi story abaotem laef blo mi and samting wea mi gohed busy lo hem. And mi invaetem olketa tu lo ples mi stap and introducem olketa lo olketa frens blo mi. From datwan, staka lo olketa relative blo mi savve gud lo olketa wea mi klos witim and no fraetem olketa.” Hem sei moa: “Staka lo olketa relative blo mi talem dat mi hapi and olketa no need for wari moa abaotem mi.”

16. Hao nao Jesus showim personal interest lo haf brata blo hem James? (Lukim tu footnote.)

¹⁶ Showim lo olketa dat olketa important lo iu. Afta Jesus resurrect, hem showim hem interest lo brata blo hem James taem hem appear lo hemseleva. (1 Cor. 15:7) Imaginim hao James mas barava hapi taem hem luksavve Jesus no givap lo hem. Luk olsem lo datfala taem nao James hem convince dat Jesus hem datfala Messiah. Afta Jesus meet witim James, maet James helpem olketa nara member lo famili blo hem for garem stret tingting abaotem hu nao Jesus.c—Acts 1:14.

17. Hao nao iumi savve applyim principle lo Romans 12:15? (Lukim tu piksa.)

¹⁷ Readim Romans 12:15. If iumi showim iumi interest lo olketa loved wans blo iumi taem wea olketa barava needim, lo gud taems and lo bad taems, maet iumi helpem olketa for changem hao olketa feel abaotem iumi.d For example, iumi savve congratulatim olketa taem baby blo olketa born, and givim wanfala present lo olketa for showim iumi hapi witim olketa. Taem famili member lusim loved wan lo dae, iumi savve comfortim olketa, offerim practical help, or sendem wanfala comforting card. And iumi shud no forget for chekim olketa evritaem, especially taem olketa feisim hard taem.

18. Hao nao iumi savve followim example blo disaepol Andrew?

¹⁸ Introducem hem lo olketa nara brata and sista. Taem disaepol Andrew luksavve Jesus nao hem datfala Messiah, Andrew hapi tumas for introducem brata blo hem Peter lo Jesus. (John 1:​40-42) Hao, iumi savve duim sem samting? For example, hao sapos samfala taem iumi invaetem wanfala relative blo iumi lo meeting or invaetem hem for iumi kaikai tugeta witim olketa frens blo iumi? Taem iumi introducem hem lo olketa brata and sista, hem bae lukim dat olketa Witness olketa gud pipol and olketa semsem nomoa olsem olketa nara pipol.

19. Nomata if olketa relative no really understandim samfala biliv blo iumi, hao nao iumi shud treatim olketa? (1 Peter 3:15)

¹⁹ Readim 1 Peter 3:15. Olketa famili blo iumi maet no really understandim why iumi no duim samfala samting, bat olketa bae evritaem rememberim kaeness and respect wea iumi showim. And tu, bae olketa appreciatim effort blo iumi for spendem taem witim olketa nomata iumi no savve spendem taem witim olketa lo samfala occasion. For example, iumi bae no participate lo olketa celebration and kastom wea Bible stopem, bat iumi savve visitim olketa, kaikai tugeta, and givim present lo olketa nara taem.

NO GIVAP LO OLKETA RELATIVE BLO IU

20. Why nao example blo James hem encouragem iumi?

²⁰ James misstim chance for waka tugeta witim Jesus lo ministry, bat gogo hem kamap wanfala disaepol. (Gal. 1:​18, 19; 2:9) Nomata hem no wanfala lo olketa first disaepol, bat hem lanem staka samting from teaching blo Jesus. For example, God iusim hem for raetem wanfala leta wea storyim olketa leson wea semsem olsem wat Jesus teachim lo Sermon lo Maunten.e

21. Why nao iumi shud no givap lo olketa relative blo iumi wea no biliv?

²¹ Nomata iumi barava traem best, olketa relative blo iumi wea no biliv maet no interest lo truth or acceptim datwan taem iumi showim personal interest lo olketa. Why nao iumi shud no givap lo olketa? Bikos each taem iumi showim kaeness lo olketa, iumi followim example blo merciful God blo iumi, Jehovah, and Son blo hem, Jesus. (Luke 6:​33, 36) If iumi gohed showim iumi lovem olketa, maet gogo olketa bae changem hao olketa ting abaotem iumi. Maet olketa bae even rememberim olketa samting wea iumi storyim lo olketa bifor abaotem biliv blo iumi. If iumi no givap lo olketa, maet iumi bae hapi for lukim samfala lo olketa relative blo iumi joinim iumi lo tru worship!