Kaen Taem Iu Storyim Truth lo Narawan

1. Wat nao iumi mas duim for part lo famili blo Jehovah?

LO FIRSTAEM wea iumi meetim nara brata or sista blo iumi, wanfala kwestin wea iumi savve askem staka taem hem, “Hao nao iu lanem truth?” Samfala savve sei dat olketa “growap lo truth.” Olketa narawan maet sei olketa just “kam insaed truth.” Iumi savve ansa olsem bikos truth insaed Word blo God gaedem iumi lo laef. Why? Bikos iumi luksavve dat for iumi part lo famili blo Jehovah iumi mas pruvim dat iumi lovem truth and iumi followim lo laef blo iumi. Datwan includim wei for honest lo toktok and wat iumi duim.—Ps. 15:​1-3.

2. (a) Wanem reputation nao Jesus garem? (b) Hao nao truth wea hem teachim bae affectim pipol?

² Jesus hem evritaem talem tru samting. Even olketa enemy blo hem tu talem dat Jesus evritaem talem tru samting nomata staka taem olketa no laek herem wat hem talem. (Matt. 22:16) Jesus storyim hao truth wea hem teachim affectim pipol taem hem sei: “Mi kam for mekem pipol divaed, son againstim dadi blo hem, dota againstim mami blo hem, and dota-in-law againstim mami-in-law blo hem.” (Matt. 10:35) Jesus no laekem pipol for againstim message wea hem and olketa follower blo hem preachim, bat hem savve datwan bae happen. (Matt. 23:37) Hem savve dat message blo hem bae divaedem pipol lo tufala grup, olketa wea lovem Bible truth and olketa wea no laekem datwan.—2 Thess. 2:​9-11.

3. Wat nao bae iumi storyim lo disfala article?

³ Olsem Jesus, iumi trae for honest and storyim tru samting evritaem nomata sapos pipol no laek for herem wat iumi talem. And iumi preach and teachim Bible truth nomata samfala maet feel nogud lo wat iumi talem. Hao, diswan minim dat iumi bae no need for kea nomoa abaot hao and wat taem iumi storyim truth, includim taem iumi preachim gud nius? Barava nomoa nao! Lo disfala article, firstaem bae iumi ansarem disfala basic kwestin: Wea nao iumi savve faendem truth? Then, iumi bae ansarem olketa kwestin hia: Why, hao, and wat taem nao iumi shud storyim truth? Ansa for olketa kwestin hia bae helpem iumi for impruvim ability blo iumi for teachim truth lo wei wea kaen, wea hem nao for garem gudfala tingting and storyim lo raet taem.

WEA NAO IUMI SAVVE FAENDEM TRUTH?

4. Why nao iumi savve sei Jehovah hem Source blo truth?

⁴ Jehovah hem Source blo truth. Evriting hem talem hem tru. For example, wat hem talem abaotem samting wea stret and samting wea rong hem tru. (Ps. 19:9; 119:​142, 151) Evriting wea hem sei bae happen, hem kamap tru. (Isa. 55:​10, 11) Hem evritaem fulfillim promis blo hem. (Num. 23:19) Tru nao, Jehovah hem no savve laea! (Heb. 6:18) Dastawe hem mek sense for Bible kolem Jehovah “datfala God blo truth.”—Ps. 31:5.

5. Why nao hem no hard for faendem “datfala God blo truth”? Explainim. (Acts 17:27)

⁵ Samfala pipol sei hem hard for faendem Jehovah, “datfala God blo truth,” bat datwan hem no tru. Staka evidence stap raonem iumi wea pruvim hem exist. (Rom. 1:20) Taem aposol Paul hem story lo samfala educated man blo Greece wea stap lo Athens, Paul sei God laekem iumi for “faendem hem” and “hem nating stap farawe from each wan lo iumi.” (Readim Acts 17:27.) Tru samting nao, Jehovah leadim kam lo hem hambol pipol wea lukaotem truth.—John 6:44.

6. Wat nao samfala truth lo Bible, and why nao iu tinghae from iu savve lo olketa truth hia?

⁶ Wanfala wei wea iumi savve faendem Jehovah hem nao for studyim Bible. Holy spirit blo God nao leadim olketa man wea raetem. (2 Pet. 1:​20, 21) So evriting wea stap insaed Bible hem truth and iumi fit for trustim. For example, iumi savve trustim wat Bible talem abaotem origin blo universe and hao laef lo earth hem start. (Gen. 1:​1, 26) Iumi fit for bilivim wat hem talem abaotem why iumi evriwan sin and why pipol barava safa and dae. (Rom. 5:12; 6:23) Iumi savve barava trustim taem Bible sei dat Jehovah bae iusim Son blo hem for stretem evri nogud samting wea Satan, datfala “dadi blo wei for laea” hem duim. (John 8:44; Rom. 16:20) And iumi savve trustim promis insaed Bible wea storyim dat Jesus bae distroem wicked pipol, resurrectim olketa wea dae, mekem disfala earth kamap paradaes moa, and helpem iumi for kamap perfect. (John 11:​25, 26; 1 John 3:8) Datwan hem spesol privilege wea iumi kasem from Jehovah! Hem teachim iumi truth, and hem givim iumi chance for teachim olketa narawan.—Matt. 28:​19, 20.

WHY IUMI STORYIM TRUTH

7-8. Hao, motive blo iumi for storyim truth hem important? Storyim example. (Mark 3:​11, 12) (Lukim tu piksa.)

⁷ Olsem iumi storyim lo start, iumi mas evritaem talem tru samting if iumi laek for part lo famili blo Jehovah. Bat for mekem Jehovah hapi, hem no inaf for talem tru samting nomoa. Reason why iumi talem tru samting hem important lo Jehovah. Tingim wat happen during lo ministry blo Jesus lo earth. (Readim Mark 3:​11, 12.) Taem Jesus preach saed lo Sea blo Galilee, staka pipol hipap raonem hem. Insaed datfala crowd hem samfala wea demon stap lo olketa, and olketa foldaon front lo Jesus and singaot olsem: “Iu nao Son blo God.” Why nao olketa demon talem truth abaotem Jesus? Maet goal blo olketa hem for mekem pipol trustim olketa, and then leadim pipol go difren from wei for worshipim Jehovah. Wat olketa demon hia talem hem tru, bat olketa garem rong motive. Jesus savve lo motive blo olketa so hem no hapi lo olketa. Hem givim order lo olketa demon for no preach abaotem hem.

⁸ Wat nao iumi lanem from disfala story? Motive blo iumi for talem truth hem important lo Jehovah. So hem barava important dat taem iumi teachim truth abaotem Jehovah iumi duim datwan bikos iumi lovem hem, and if olketa narawan trae for praisem iumi for message iumi preachim, iumi mas givim datfala praise go lo Jehovah!—Matt. 5:16; comparem Acts 14:​12-15.

9. Wat nao iumi shud no duim, and why?

⁹ Tingim nara situation wea iumi need for avoidim wei for iumiseleva kasem praise. Imaginim wanfala responsible brata storyim samfala confidential information lo iumi, and then iumi storyim datwan lo olketa narawan. If olketa wea herem faendaot bihaen dat wat iumi talem hem tru, maet olketa tinghae lo iumi bikos lo wat iumi savve, and tingse iumi kasem olketa confidential information staka taem. Diswan bae mekem pipol tinghae lo iumi, bat hem bae no mekem God hapi. (Prov. 11:13) Why? Bikos iumi no just storyim confidential information nomoa, bat iumi storyim tru samting witim rong motive.

HAO FOR STORYIM TRUTH

10. Wat nao hem minim for talem toktok wea “kaen”? (Colossians 4:6)

¹⁰ Readim Colossians 4:6. Aposol Paul remindim olketa Christian wea stap lo Colossae dat toktok blo olketa shud “evritaem kaen.” Wat nao datwan minim? Greek toktok wea Paul iusim lo hia hem givim idea dat toktok blo iumi shud no just helpem nomoa man wea herem, bat hem mas kaen and here naes tu.

11-12. Why nao iumi mas careful lo hao iumi teachim truth? Storyim example. (Lukim tu piksa.)

¹¹ Iumi need for followim kaonsel blo Paul for tok kaen taem iumi teachim truth lo narawan. Bible comparem truth wea stap insaed Word blo God witim sharp sword wea savve divaedem man and spirit. Or hem savve showim deep feeling blo man and motive blo hem. (Heb. 4:12) Bat if iumi no savve gud hao for iusim Bible, iumi savve kosim pipol for feel nogud and argue. Hao nao datwan maet happen?

¹² Tingim disfala example. Lo ministry, maet iumi meetim wanfala man wea interest wea savve prea evritaem lo olketa image, and hem enjoyim wei for celebratem Christmas and Easter witim famili blo hem. Iumi savve iusim Bible for showim hem dat hem karangge samting for prea lo olketa statue wea no laef, and pruvim lo hem dat Christmas and Easter hem olketa heathen celebration. (Isa. 44:​14-20; 2 Cor. 6:​14-17) If iumi duim datwan lo firstaem wea iumi meetim hem, iumi storyim truth, bat wat iumi duim showim iumi no savve gud hao for iusim Word blo God.

13. Hao nao iumi savve putim solt lo toktok blo iumi?

¹³ Paul encouragem iumi tu for toktok blo iumi mas evritaem kaen olsem iumi putim solt lo hem. Paul no minim dat iumi shud trae for storyim truth lo wei wea misleadim man or for haedem truth. Bat, hem encouragem iumi for iusim toktok wea kaen olsem iumi “putim solt” lo hem mekem iumi savve storyim truth lo wei wea bae ‘teist’ naes lo olketa wea herem. (Job 12:11) Hem no isi for iumi duim datwan. Saed lo physical kaikai, maet iumi tingse wat hem teist naes lo iumi hem teist naes lo olketa narawan tu. Lo sem wei, iumi maet ting dat hao iumi story hem here naes lo evriwan. Bat datwan hem no tru. For example, pipol from olketa difren culture maet savve talem stret nomoa tingting blo olketa, nomata taem olketa story witim olketa wea older winim olketa. Olketa from nara culture maet no acceptim datkaen wei for story or olketa even savve feel nogud. Paul sei iumi mas “savve hao for givim ansa lo evri man.” Diswan minim iumi shud adjustim hao iumi story, no followim teist or culture blo iumi, bat followim teist blo olketa wea lisin.

WAT TAEM FOR STORYIM TRUTH

14. Taem Jesus lo earth, hao, hem teachim olketa disaepol blo hem evriting wea hem savve? Explainim.

¹⁴ Jesus evritaem story kaen lo olketa follower blo hem, and hem teachim olketa staka samting. (Mark 6:34) Bat olketa still need for lanem staka samting. Jesus no trae for teachim olketa evriting wea hem savve. Hem luksavve lo limit blo olketa. Hem luksavve hem no raet taem for olketa lanem samfala truth. Hem talem olketa dat olketa no fit for minim yet olketa truth hia. (John 16:12) Wat nao iumi lanem from datwan?

15. Hao, iumi mas teachim lo Bible student blo iumi evriting wea iumi savve lo hem wantaem nomoa? Explainim. (Proverbs 25:11) (Lukim tu piksa.)

¹⁵ Example blo Jesus showim wei for savve lo truth hem no minim iumi need for teachim evriting wea iumi savve lo hem wantaem nomoa. Hao nao iumi savve followim example blo Jesus? Iumi mas trae for tingim situation blo pipol. Tingim moa datfala man wea enjoyim wei for celebratem Christmas and Easter witim famili blo hem. Iumi savve hem olketa heathen celebration and God no acceptim. Bat imaginim iu start for studyim Bible witim datfala man wan or tu weeks bifor Christmas. Hao, iumi kaen if iumi storyim lo hem wat Bible talem abaotem olketa heathen celebration and expectim hem for stop semtaem for celebratem Christmas? Hem tru, samfala Bible student kwiktaem for followim evriting wea olketa lanem from Bible. Bat, for olketa narawan hem tek taem for adjustim tingting and wat olketa duim. Iumi savve helpem olketa Bible student blo iumi for progress if iumi talem wat olketa need for savve taem olketa need for herem datwan, wea hem nao taem wea olketa bae fit for minim.—Readim Proverbs 25:11.

16. Hao nao iumi savve helpem olketa Bible student blo iumi for “gohed wakabaot followim truth”?

¹⁶ No staka samting savve mekem iumi barava hapi olsem wei for helpem olketa narawan for lanem truth abaotem Jehovah. Iumi savve helpem olketa for “gohed wakabaot followim truth” if iumi duim olketa samting hia: Gohed for showim gud example for olketa. (3 John 3, 4) Mek sure wat iumi duim lo laef pruvim dat iumi bilivim olketa promis lo Bible. Storyim truth witim raet motive. Story lo wei wea kaen, iusim olketa kaenfala toktok lo raet taem, taem iu teachim truth. And givim eni praise wea iu kasem go lo Jehovah. If iu duim olsem, iu pruvim dat iu blo Jehovah, datfala God blo truth.