Gohed Depend lo Jehovah for Spiritual Need blo Iu

1. Wat nao samfala basic need wea Jehovah creatim iumi olketa man for garem? (Matthew 5:3)

JEHOVAH creatim olketa man for garem samfala basic need. For example, for iumi gohed laef, iumi needim kaikai, kaleko, and shelter. If iumi no garem eniwan lo olketa important samting hia, even for lelebet taem, laef bae no isi. Witim olketa material samting hia, Jehovah creatim iumi tu witim wei for savve lo hem and for depend lo hem for leadim iumi. (Readim Matthew 5:3.) If iumi laek for barava hapi, iumi need for luksavve lo datfala need and gohed for depend lo Jehovah for kasem datwan.

2. Explainim wat nao hem minim for iumi “luksavve” dat iumi “needim God”?

² Wat nao hem minim for iumi “luksavve” dat iumi “needim God”? Lo Greek languis, datfala toktok hem givim idea abaotem samwan wea beg for olketa spiritual samting. Datfala toktok mekem iumi tingim wanfala beggar wea werem brek kaleko and sidaon nomoa lo street. Body blo hem barava wik from hem no garem kaikai, pipol no laekem hem bikos lo lukluk blo hem, lo daytaem sun hotem hem, and lo naet hem cold tumas. Datfala beggar barava luksavve dat hem bae needim help if hem laek for impruvim situation blo hem. Lo sem wei tu, samwan wea luksavve hem needim God, or beggar for spiritual samting, bae needim help mekem hem savve impruvim situation blo hem. So hem barava laek for mekius lo staka spiritual provision wea Jehovah provaedem for olketa wea lovem Hem.

3. Wat nao bae iumi discussim lo disfala article?

³ Lo disfala article, bae iumi storyim wat iumi savve lanem from wanfala woman from Phoenicia wea begim Jesus for helpem hem. Disfala story haelaetim thrifala quality wea olketa wea luksavve olketa needim God mas gohed for garem. Then bae iumi storyim example blo aposol Peter and Paul, and King David, wea depend lo Jehovah for helpem olketa.

EXAMPLE BLO WEI FOR HAMBOL, GOHED ASK FOR HELP, AND FAITH

4. Wat nao wanfala woman from Phoenicia laekem Jesus for duim?

⁴ Wanday, wanfala woman from Phoenicia kam lo Jesus. Gele blo hem nao “demon barava spoelem.” (Matt. 15:​21-28) So datfala woman nildaon front lo Jesus and begim hem for help. Woman hia showim olketa naes quality taem hem askem Jesus for help. Bae iumi storyim samfala lo olketa quality hia.

5. Olketa wanem quality nao datfala woman showim, and wat nao Jesus duim? (Lukim tu piksa.)

⁵ Datfala woman from Phoenicia showim hem barava hambol. Why nao iumi sei olsem? Bikos hem no feel nogud taem Jesus iusim wanfala illustration for comparem hem olsem wanfala smol dog, wea maet olketa Gentile savve keepim lo haos. If iu nao datfala woman, hao nao bae iu feel abaotem wat Jesus talem? Hao, bae iu feel nogud and no laek nao for askem help blo hem? Datfala woman from Phoenicia hem no olsem. Hem hambol, and tu hem gohed ask for help. Datwan hem showaot lo wei wea hem gohed begim Jesus for helpem hem. Why nao hem duim datwan? Bikos hem garem faith lo Jesus. And taem Jesus lukim strong faith wea hem garem, datwan muvim Jesus for duim samting for helpem hem. Nomata Jesus talem finis dat God sendem hem for helpem nomoa ‘pipol blo Israel, wea olsem olketa sheepsheep wea lus,’ Jesus aotem datfala wicked spirit from gele blo disfala Gentile woman.

6. Wat nao iumi lanem from story blo datfala woman from Phoenicia?

⁶ For helpem iumi kasem olketa spiritual need blo iumi, iumi mas garem olketa sem quality hia. Iumi mas hambol, gohed ask for help, and garem strong faith. Samwan wea hambol nomoa savve gohed begim God for helpem hem. And iumi mas garem tu strong faith lo Christ Jesus and trustim olketa wea hem iusim for leadim olketa disaepol blo hem. (Matt. 24:​45-47) Jehovah and Son blo hem hapi for helpem and leadim olketa wea showim olketa quality hia. (Comparem James 1:​5-7.) Distaem bae iumi storyim hao Jehovah provaedem spiritual kaikai, kaleko, and shelter for iumi. Iumi bae lukim wat iumi need for duim for kasem olketa important samting hia taem iumi lane from example blo aposol Peter and Paul, and tu King David.

OLSEM PETER—GOHED KAIKAI GUD LO SPIRITUAL WEI

7. Wat nao Jesus komandim Peter for duim, bat wat nao nara samting wea Peter need for duim? Explainim. (Hebrews 5:14–6:1)

⁷ Tingim example blo aposol Peter. Hem nao wanfala lo olketa first Jew wea luksavve dat Jesus nao hem Messiah, man wea Jehovah iusim for feedim pipol blo Hem lo ‘olketa toktok wea savve leadim man for kasem laef olowe.’ (John 6:​66-68) Bifor Jesus go ap lo heven afta hem resurrect, hem givim disfala komand lo Peter: “Feedim olketa smol sheepsheep blo mi.” (John 21:17) Peter faithful for obeyim datfala komand, and Jehovah even iusim hem for raetem tufala leta wea kamap part lo Bible. Bat Peter seleva tu hem need for kaikaim spiritual kaikai. For example, hem studyim olketa leta wea aposol Paul raetem wea part finis lo olketa Holy Scripture. Peter talem stret dat samfala samting wea Paul raet abaotem hem “hard for man minim gud.” (2 Pet. 3:​15, 16) Bat Peter no givap for studyim olketa samting hia, hem garem faith dat Jehovah bae helpem hem for digestim, or understandim and applyim “strongfala kaikai” wea God iusim Paul for raetem insaed olketa leta blo hem.—Readim Hebrews 5:14–6:1.

8. Wat nao Peter duim taem hem kasem niu laet from Jehovah thru lo wanfala angel?

⁸ Peter pruvim dat hem garem faith lo Jehovah taem hem obeyim direction wea hem kasem. For example, taem Peter lo wanfala city lo Joppa, hem lukim wanfala vision wea angel blo God komandim hem for busarem and kaikaim olketa animal wea lo Law blo Moses olketa animal hia no klin. For olketa Jew, datfala direction hem barava no mek sense. Lo firstaem Peter sei: “Nomoa, Lord. No enitaem mi kaikaim eni samting wea dirty and wea no klin.” Then angel hia sei: “Iu no kolem olketa samting wea God sei hem klin, hem no klin.” (Acts 10:​9-15) So Peter obey and adjustim tingting blo hem. Hao nao iumi savve lo datwan? No longtaem afta Peter lukim datfala vision, thrifala man wea Cornelius datfala Gentile sendem, olketa arrive and invaetem Peter for go and story witim masta blo olketa. If Peter no lukim datfala vision, hard tumas for hem agree for go lo haos blo wanfala Gentile, bikos olketa Jew ting lo olketa Gentile olketa no klin. (Acts 10:​28, 29) Bat Peter kwiktaem for acceptim datfala niu laet wea Jehovah showim lo hem. (Prov. 4:18) Hem preach lo Cornelius and evriwan lo haos blo hem and hem hapi tumas for lukim olketa acceptim truth, kasem holy spirit, and baptaes.—Acts 10:​44-48.

9. Wat nao tufala gud samting wea iumi kasem from wei for laekem tumas for kaikaim olketa strong spiritual kaikai?

⁹ Olsem Peter, iumi mas evritaem drinkim milk, wea hem olketa basic truth from Word blo God. And tu, iumi mas mekem grow feeling for laekem tumas olketa strongfala spiritual kaikai, wea hem olketa truth wea maet no isi for understandim. Iumi mas markem taem and willing for mekem effort for minim gud Word blo God, and bae iumi kasem gud samting. Tingim tufala gud samting iumi kasem: Wan, iumi lanem samting abaotem Jehovah wea strongim love and respect blo iumi for hem. And mek-tu, datwan motivatim iumi for talem olketa narawan abaotem olketa nambawan samting wea Dadi blo iumi lo heven duim. (Rom. 11:33; Rev. 4:11) Iumi lanem nara samting tu from Peter: Taem iumi kasem eni adjustment lo hao iumi minim Word blo God, iumi need for kwiktaem adjustim hao iumi ting and duim samting. Wei for duim olsem bae helpem iumi for gohed kaikai gud lo spiritual wei and gohed iusful lo Jehovah.

OLSEM PAUL—GOHED WEREM DATFALA SPIRITUAL KALEKO

10. Wat nao hem minim for werem datfala spiritual kaleko? (Colossians 3:​8-10)

¹⁰ For mekem God hapi, iumi mas mekius lo nara provision from Jehovah, hem nao spiritual kaleko. Wat nao datwan minim? Aposol Paul sei iumi mas “aotem old wei” and “werem niufala wei olsem kaleko.” (Readim Colossians 3:​8-10.) For gohed duim datwan hem needim taem and effort. Tingim example blo Paul. Start from taem hem young yet, hem waka hard for mekem God hapi. (Gal. 1:14; Phil. 3:​4, 5) Bat from hem no kasem accurate knowledge abaotem purpose blo God, lo spiritual wei hem poor nomoa. Wei wea hem ignorem olketa teaching blo Christ and hem praod, datwan mekem hem “nating respectim narawan” wea olsem hem werem olketa nogud wei.—1 Tim. 1:13.

11. Wat nao wik point wea Paul mas waka hard for winim? Explainim.

¹¹ Bifor Paul kamap Christian, hem man wea savve kros kwiktaem. Wanfala story lo buk blo Acts sei Paul hem barava kros lo olketa disaepol blo Jesus and “hem laekem tumas for killim olketa dae.” (Acts 9:1) For sure, afta Paul kamap Christian hem mas waka hard for aotem disfala nogud wei wea hem part lo old wei blo hem. (Eph. 4:​22, 31) Bat, wantaem Paul and Barnabas argue, and from hem kros tumas “tufala barava raoa nao.” (Acts 15:​37-39) Nomata olsem, Paul nating givap. Hem gohed ‘disciplinem body blo hem,’ wea minim hem waka hard for winim olketa wik point blo hem mekem Jehovah gohed hapi lo hem.—1 Cor. 9:27.

12. Wat nao helpem Paul for win for aotem olketa nogud wei blo hem?

¹² Paul win for aotem olketa nogud wei blo hem and werem niu wei olsem kaleko bikos hem no depend lo strong blo hemseleva. (Phil. 4:13) Olsem Peter, Paul depend lo “paoa wea kam from God.” (1 Pet. 4:11) Nomata olsem, samtaems Paul duim olketa mistek. Bat taem hem discourage, hem ting raonem olketa gud samting wea Dadi blo hem lo heven duim for hem, and datwan strongim hem for gohed duim samting for mekem Jehovah hapi.—Rom. 7:​21-25.

13. Hao nao iumi savve followim example blo Paul?

¹³ Iumi savve followim example blo Paul taem iumi luksavve dat nomata iumi servem Jehovah for longtaem finis, iumi need for gohed waka hard for aotem old wei, and werem niufala wei wea hem spiritual kaleko wea God provaedem. If iumi foldaon moa lo olketa wik point blo iumi olsem for kros kwiktaem or no story kaen lo samwan, iumi shud no ting dat hem hard nao for iumi mekem Jehovah hapi. Bat, iumi shud gohed waka hard for kasem goal blo iumi, wea hem nao for changem hao iumi ting and duim samting. (Rom. 12:​1, 2; Eph. 4:24) Bat taem iumi duim olsem, iumi need for tingim disfala important point: Spiritual kaleko hem no olsem kaleko wea iumi savve adjustim for fitim iumi, bat iumi nao mas adjustim iumiseleva for fitim datfala spiritual kaleko wea Jehovah provaedem. Hem mek sense for iumi nao change mekem iumi fit for kasem olketa standard blo God.

OLSEM DAVID—GOHED STAP LO SPIRITUAL SHELTER

14-15. Lo wanem wei nao Jehovah provaedem spiritual shelter for pipol blo hem? (Psalm 27:5) (Lukim tu piksa.)

¹⁴ For iumi barava hapi, iumi no just needim spiritual kaikai and spiritual kaleko, bat iumi needim tu spiritual shelter. Wat nao datwan, and hao nao bae iumi mek sure iumi gohed kasem protection from datwan?

¹⁵ King David story abaotem spiritual shelter wea Jehovah provaedem. (Readim Psalm 27:5.) Jehovah protectim pipol blo hem from eniwan and eni samting wea savve spoelem faith blo olketa lo Hem. Hao nao Jehovah protectim olketa servant blo hem distaem? Hem promis dat no eni weapon wea olketa wakem for againstim olketa bae win. (Ps. 34:7; Isa. 54:17) Nomata Satan, olketa demon, and olketa wea persecutim iumi garem bigfala paoa, olketa no savve spoelem iumi for olowe. Nomata if olketa killim iumi dae, Jehovah bae resurrectim iumi. (1 Cor. 15:​55-57; Rev. 21:​3, 4) Jehovah helpem iumi tu for deal witim wei for wari wea savve mekem iumi stop for worshipim Hem. (Prov. 12:25; Matt. 6:​27-29) And loving Dadi blo iumi provaedem spiritual famili blo olketa brata and sista wea sapotim iumi and olketa elder wea shepherdim iumi. (Isa. 32:​1, 2) Taem iumi attendim olketa meeting, staka taem iumi savve herem olketa reminder wea helpem iumi for tinghae lo protection wea Jehovah provaedem.—Heb. 10:​24, 25.

16. Hao nao Jehovah protectim David?

¹⁶ Taem David obeyim Jehovah, hem kasem protection from olketa nogud samting wea kasem olketa wea min for duim sin. (Comparem Proverbs 5:​1, 2.) Bat, taem David ignorem olketa standard blo God, Jehovah no protectim hem from olketa nogud samting wea kamaot from wat hem duim. (2 Sam. 12:​9, 10) Waswe lo olketa taem wea David safa bikos lo olketa nogud samting wea olketa narawan nao duim lo hem? David pourimaot heart blo hem lo Jehovah lo prea, and Jehovah helpem David for no wari taem hem reassurem David dat Hem barava lovem hem and bae lukaftarem hem.—Ps. 23:​1-6.

17. Hao nao iumi savve followim example blo David?

¹⁷ Iumi savve followim example blo David lo wei for luk lo Jehovah for advaes taem iumi mekem eni disison. Iumi luksavve tu dat samfala taem iumi kasem hard taem, no bikos Jehovah no protectim iumi, bat bikos iumi nao no mekem wise disison. (Gal. 6:​7, 8) And taem iumi feisim olketa hard taem bikos lo olketa narawan, iumi pourimaot heart blo iumi lo Jehovah thru lo prea, and trustim dat hem bae gaedem heart and tingting blo iumi.—Phil. 4:​6, 7.

GOHED DEPEND LO JEHOVAH FOR OLKETA SPIRITUAL NEED BLO IU

18. Wanem challenge nao iumi feisim, and hao nao iumi savve gohed depend lo Jehovah for olketa spiritual need blo iumi? (Lukim tu piksa.)

¹⁸ Yeartext blo iumi for 2026 sei: “Olketa wea luksavve olketa needim God, olketa hapi.” Diswan hem barava important distaem winim enitaem bifor. Why? Bikos iumi stap witim pipol wea no hapi, wea sei olketa no needim God, and staka narawan trae duim samting wea showim olketa needim God taem olketa followim nomoa idea wea kam from false religion or olketa man. Iumi mas no letem tingting blo olketa for influencim iumi. Hao nao bae iumi duim datwan? Iumi duim datwan taem iumi kaikaim spiritual kaikai wea Jehovah provaedem, werem niufala wei olsem kaleko, and kasem protection lo shelter wea Jehovah provaedem.