During Taem blo Messiah and Olketa Follower blo Hem

Disfala sekson storyim olketa samting wea happen insaed 100 years. Lo start, iumi bae lane abaotem wanfala hambol Jewish gele, Mary, Jehovah givim hem spesol assignment wea winim eni nara imperfect human, and lo end blo disfala sekson, bae iumi storyim olketa last day lo laef blo John, beloved aposol blo Jesus. Lo disfala sekson, bae iumi lane tu abaotem olketa wea showim nambawan example blo courage olsem, John Baptaesa, aposol Peter, Mary Magdalene, Stephen, and aposol Paul. Olketa feisim staka challenge taem olketa gohed talemaot dat Jesus nao datfala Messiah nomata own pipol blo hem rejectim hem. Olketa no fraet for followim footstep blo hem nomata olketa kasem persecution, and olketa gohed talemaot message blo Jesus nomata pipol heitim olketa.