Maintainim Olketa Kingdom Hall blo Iumi

Wanfala young sista lo Colombia wea nem blo hem Nicole, sei: “Mi lovem tumas Kingdom Hall blo mi bikos hem ples wea mi savve associate witim olketa brata and sista blo mi!” Hao, iu tu feel olsem?

Raonem world, Olketa Jehovah’s Witness duim meeting insaed lo samting olsem 63,000 difren Kingdom Hall. Bikos lo olketa Kingdom Hall hia, iumi garem olketa comfortable ples for worshipim God. Bat ino datwan nomoa. Wanfala regular pioneer wea nem blo hem David lo Colombia sei: “Olketa Kingdom Hall blo iumi hem mekem pipol tinghae lo message wea iumi teachim. Staka visitor wea kam sapraes for lukim hao iumi keepim Kingdom Hall blo iumi lo gud condition.” Hem luk naes olsem bikos iumi waka hard for klinim and gohed for maintainim. Hao nao iumi fit for duim datwan?

Hao Nao Olketa Organizem Maintenance Waka?

Olketa kongregeson wea iusim Kingdom Hall nao responsible for maintainim. From datwan, olketa brata and sista nao evritaem klinim and lukaftarem Kingdom Hall blo olketa. Olketa duim tu olketa smol repair and preventive maintenance.

For helpem olketa kongregeson maintainim Kingdom Hall blo olketa, Local Design/Construction Department (LDC) assignim olketa brata for serve olsem olketa maintenance trainer. Each maintenance trainer savve lukaftarem samting olsem six kasem tenfala Kingdom Hall. Hem bae visitim Kingdom Hall and trainim olketa pablisa lo kongregeson lo hao for lukaftarem Kingdom Hall blo olketa. Evri thri years, hem bae evaluatim each building and reportim eni samting saed lo safety or eni maintenance issue.

Olketa brata and sista barava tinghae lo training wea olketa kasem from olketa maintenance trainer. Sista Indhumathi, from India, sei: “Datfala training hem barava gud. Hem gud samting for lanem hao for keepim Kingdom Hall blo mifala lo gud condition.” Brata Evans, from Kenya, sei: “Mifala avoidim olketa big expense taem mifala lane for fixim olketa smol problem lo Kingdom Hall bifor hem kamap worse.”

For Kavarem Expenses

Evri year for ranem and maintainim wanfala Kingdom Hall hem savve kostim staka handred and thousand dollars,a datwan depend lo location, hao long building hem stap kam followim, and hao many kongregeson nao iusim datfala hall. Hao nao iumi savve kavarem olketa expenses hia?

Olketa donation blo kongregeson nao sapotim maintenance blo Kingdom Hall. Alexander, wanfala brata from Kazakhstan hem sei: “Part lo olketa selen hia olketa iusim for peim Internet and olketa expenses, olsem wata and electricity. Nara part lo selen hia hem for olketa expenses olsem toilet pepa, hand glove, klining supply and paint.” Eni selen wea left bae olketa givim for waka raonem world for sapotim olketa big maintenance project wea barava expensive, wea kamap evriwea.

Olketa Big Maintenance Project

If wanfala Kingdom Hall needim big maintenance waka wea kost blo hem winim operating expenses blo olketa for tu or thri month, olketa elder bae story firstaem witim LDC maintenance trainer. If LDC appruvim datfala project, donation from waka raonem world nao bae sapotim project hia. During 2023 service year, 8,793 project nao gohed, wea kost blo hem $76.6 million. Lukim tufala lo olketa project hia

Lo Angola, wanfala Kingdom Hall stap for 15 years finis, and hem barava needim samfala maintenance. Electrical system blo hem nogud nao, olketa wall hem krak, and olketa neiba komplen dat rain wata from Kingdom Hall savve ran go lo area blo olketa. LDC organizem wanfala project for fixim olketa problem hia. Datfala project kostim $9,285. Olketa neiba barava tinghae and sapraes lo waka wea gohed.

Lo Poland, ruf blo wanfala Kingdom Hall hem leak and carpet insaed no fitim nao for repairim. LDC appruvim wanfala project for repairim ruf and replacem carpet. Datfala project hem kostim $9,757. From datwan, olketa bae no need for duim wanfala big renovation lo datfala Kingdom Hall for samfala year moa.

Maintenance Waka Givim Glory lo Jehovah

Wei for duim Maintenance hem sevem olketa donation, and tu hem givim glory lo nem blo Jehovah. Wanfala brata lo Tonga wea nem blo hem Shaun sei: “Bikos lo olketa maintenance waka wea iumi duim, iumi savve worshipim Jehovah lo ples wea klin, organize, evriting waka gud lo Kingdom Hall, and datwan givim gud nem lo Jehovah lo community. Mifala no hol bak for invaetem pipol for kam lo Kingdom Hall.”

Hao Nao Iu Savve Help?

Iumi evriwan savve help for klinim and maintainim ples blo iumi for worship. Marino, wanfala maintenance trainer lo Australia, sei: “Iumi evriwan savve share lo disfala spesol privilege for lukaftarem olketa Kingdom Hall blo iumi. Taem iumi duim datwan, iumi help for sevem selen and organization savve iusim lo olketa ples wea really needim help.”

Joel, wanfala brata lo India storyim hao hem enjoyim tumas for lukaftarem Kingdom Hall blo olketa. Hem sei: “Wei for waka witim olketa brata hem helpem mi for imaginim laef lo niu world.” Nicole, wea iumi storyim finis hem sei: “Recently, taem olketa brata waka for fixim wanfala bath rum wea leak, mi help for mopim floor. Nomata mi no fixim datfala problem, mi help for preventim eni accident.”

If iu laek for volunteer for maintainim Kingdom Hall, story lo olketa elder lo kongregeson blo iu. And tu, olketa donation wea iu givim savve help for sapotim maintenance lo Kingdom Hall blo iu and olketa nara Kingdom Hall raonem world. Iu savve givim donation lo olketa contribution box lo Kingdom Hall blo iu or thru lo donate.jw.org. Mifala barava appreciatim wei wea iufala willing for give.