Hao, Olketa Jehovah’s Witness Forcem Pikinini blo Olketa for Followim Religion blo Olketa?

Nomoa, for worshipim God hem personal disison. (Romans 14:12) Olketa Jehovah’s Witness teachim olketa Bible principle lo pikinini, bat taem olketa growap each wan mas mekem own disison blo hem whether bae hem wanfala Jehovah’s Witness or nomoa.—Romans 12:2; Galatians 6:5.

Olsem staka parents, Olketa Jehovah’s Witness laekem pikinini blo olketa for garem best laef. Olketa teachim pikinini wat olketa tingse bae benefitim olketa olsem: practical skills, hao for garem olketa gud wei and religious biliv blo olketa. Olketa Jehovah’s Witness biliv dat Bible nomoa savve helpem man for garem best laef, so olketa traem best for putim olketa toktok hia lo heart blo olketa pikinini taem olketa studyim Bible witim olketa, and attendim olketa Christian meeting tugeta. (Deuteronomy 6:6, 7) Taem pikinini growap, each wan savve mekem own disison whether bae hem followim religion blo parents or nomoa.

Hao, Olketa Jehovah’s Witness baptaesim olketa baby?

Nomoa. Bible no agree witim wei for baptaesim baby. For example, Bible showim dat bifor olketa first century Christian baptaes, olketa “hapi for acceptim” message and repent. (Acts 2:14, 22, 38, 41) So, for man baptaes hem mas old inaf for understandim wat Bible teachim, mas bilivim, and mas mekem disison followim olketa teaching hia. Evri samting hia olketa baby no savve duim.

Gogo, taem olketa pikinini growap olketa savve chus for baptaes. Bat for duim datwan, olketa mas understandim promis wea olketa mekem.

Hao, Olketa Jehovah’s Witness les lo pikinini if hem chus for no baptaes?

Nomoa. Nomata Witness parents feel sorre if pikinini blo olketa no baptaes, olketa still lovem pikinini and datwan no spoelem relationship blo olketa just bikos hem no laek for kamap wanfala Witness.

Wanfala boy baptaes taem full body blo hem nao go insaed wata. — Nomata wat nao age blo olketa, each wan nao mas disaed whether for baptaes or nomoa

Why nao Olketa Jehovah’s Witness tekem pikinini witim olketa lo preaching?

Mifala tekem olketa pikinini blo mifala lo preaching waka for olketa reason hia.a

Bible instructim olketa parents for teachim pikinini abaotem God and trainim olketa for worshipim hem. (Ephesians 6:4) Since worship hem involvim wei for talemaot faith lo pablik, preaching waka hem important part lo spiritual education blo pikinini.—Romans 10:9, 10; Hebrews 13:15.
Bible encouragem olketa young wan for “praisem nem blo Lord.” (Psalm 148:12, 13, King James Version) Wanfala main wei for praisem God, hem for story abaotem hem lo olketa narawan.b
Olketa pikinini benefit lo practical wei taem olketa preach witim parents. For example, olketa lane hao for communicate witim olketa difren pipol, and olketa garem valuable quality olsem for tingim narawan, kaen, showim respect, and kea for narawan. And tu, from biliv blo olketa hem base lo Bible, olketa barava understandim gud wat olketa bilivim.

Hao, Olketa Jehovah’s Witness participate lo olketa holiday or olketa nara celebration??

Olketa Jehovah’s Witness no join insaed olketa religious holiday or olketa nara celebration wea mekem God no hapi.c (2 Corinthians 6:14-17; Ephesians 5:10) For example, mifala no participate lo olketa birthday or Christmas celebration bikos hem no kam from Bible.

Nomata olsem, mifala enjoyim wei for spendem taem witim famili and hapi for givim samting lo olketa pikinini blo mifala. Instead for letem kalenda kontrolem famili gathering and for givim present, mifala nao organizem olketa gathering hia and givim present enitaem lo year.

Wanfala dadi and mami sapraesim dota and son blo tufala witim olketa present. — Christian parents hapi for givim samting lo pikinini blo olketa

Wat nao tingting blo olketa wea growap insaed famili wea Jehovah’s Witness?

“Preaching trainim mi for respectim olketa narawan, nomata wat nao olketa bilivim or hao olketa treatim mi. And tu, taem mifala preach, staka taem pipol storyim feeling blo olketa and problem wea olketa feisim. So instead for focus lo miseleva, mi lane for tingim feeling blo olketa narawan and for luksavve lo wat olketa maet needim.”—Tara.d
Parents blo mi no forcem mi for kamap Witness. Olketa evritaem talem dat mi garem choice. Evritaem mi askem mami blo mi abaotem biliv blo olketa Witness, hem savve sei, ‘Hao if iu duim research abaotem datwan?’ So mi duim staka research, and gogo mi convince dat disfala religion hem blo mi tu, no blo parents blo mi nomoa.”—Ellie.
Mi no enitaem feel dat mi miss aot from mi no celebratem olketa holiday. Evri weekend mi garem busy schedule witim olketa nara Witness. Mifala savve kaikai, dance, and pleim olketa game. Staka taem olketa skul fren blo mi sei mi busy tumas winim olketa.”—Melissa.
Nomata mi understandim why mifala no celebratem Christmas, samtaems mi savve feel left aot. Wat helpem mi for ovakamim datfala feeling, hem taem parents blo mi evritaem invaetem olketa frens and olketa relative for kam lo haos blo mifala. Mi remember tu dat olketa givim mi present.”—Miguel.

a For tok stret, olketa Witness pikinini bae no participate lo preaching waka without parents or nara responsible adult.

b Bible mentionim staka pikinini wea mekem God hapi taem olketa storyim biliv blo olketa lo narawan.—2 Kings 5:1-3; Matthew 21:15, 16; Luke 2:42, 46, 47.

c Lukim article “Why Nao Olketa Jehovah’s Witness No Celebratem Samfala Holiday?”

d Mifala changem samfala nem.