Hao, Bible Teachim Dat Earth Hem Flat?

Ansa from Bible

Nomoa, Bible hem no teachim dat earth hem flat.a Hem tru, Bible hem no wanfala science textbuk. Bat samfala samting wea Bible storyim hem no contradict witim wat science talem. Wat Bible talem ‘man savve depend lo hem, distaem and for olowe.’​—Psalm 111:8.

• Wat nao Bible minim taem hem tok abaotem “fofala kona lo earth”?

• Wat nao Bible storyim abaotem temptation blo Devil lo Jesus?

Wat nao Bible minim taem hem tok abaotem “fofala kona lo earth”?

Olketa expression wea Bible iusim olsem “fofala kona lo earth” and “end blo earth” hem no literally minim if earth hem square or garem end blo hem. (Isaiah 11:12; Job 37:3) Instead, olketa expression hia hem figure of speech wea refer lo full earth. Bible iusim tu fofala point lo earth olsem north, south, east and west similar olsem compass.​—Luke 13:29.

Hebrew term wea olketa transleitim lo “kona” or “end” luk olsem hem wanfala idiom wea kam from disfala word “olketa wing.” According lo The International Standard Bible Encyclopedia, hem sei “bikos bird iusim wing blo hem for kavarem olketa baby blo hem, olketa iusim [disfala Hebrew term] for minim end blo samting wea kavarem wanfala big ples.” Datfala sem buk hem sei lo Job 37:3 and Isaiah 11:12, “datfala term hem minim coast, baondri, or end lo land surface blo earth.”b

Wat nao Bible storyim abaotem temptation blo Devil lo Jesus?

For temptim Jesus, “Devil tekem hem go lo wanfala barava hae maunten, and showim hem evri kingdom lo world and riches wea olketa garem.” (Matthew 4:8) Samfala pipol tingse disfala Bible account teachim dat hem garem wanfala ples lo earth wea man standap lo hem and lukim evri ples lo earth. Bat, lo disfala account “wanfala barava hae maunten” luk olsem hem wanfala metaphor and no wanfala physical location. Lukim why hem stret for sei olsem.

• No eni literal maunten stap lo earth wea man standap lo hem and savve lukim evri kingdom lo world.

• Devil no showim lo Jesus evri kingdom nomoa, bat hem showim tu “riches wea olketa garem.” Olketa kaen detail olsem man hard for lukim olketa samting if hem standap farawe, so luk olsem Devil showim olketa samting hia lo Jesus lo wanfala vision. Diswan hem semsem olsem wanfala person wea iusim wanfala projector and screen for showim olketa piksa blo olketa didifren ples lo earth lo samwan.

• Parallel account lo Luke 4:5 hem sei dat Devil “wantaem nomoa showim [Jesus] evri kingdom lo earth” wea hem no possible for man lukim thru lo normal human vision. Diswan showim dat Devil iusim nara samting for showim olketa samting hia instead lo literal human eye.