Wat Nao Bible Talem Abaotem Cremation?
Ansa from Bible
Bible no talem eni specific direction abaotem cremation. Bible no talem komand tu whether for duim burial or crematim man wea dae.
Bible storyim samfala faithful servant blo God wea berem dead body. For example, Abraham go farawe for faendem burial ples for berem waef blo hem, Sarah.—Genesis 23:2-20; 49:29-32.
Bible mentionim tu samfala faithful servant blo God wea bonem dead body. For example, taem King Saul blo Israel and thrifala son blo hem dae lo faet, dead body blo olketa stap nomoa lo territory blo enemy and datwan no showim respect lo olketa. Taem olketa faithful Israelite warrior herem nius hia olketa go tekem dead body blo Saul and olketa son blo hem, olketa bonem, and berem bon blo olketa hia. (1 Samuel 31:8-13) Bible showim dat diswan hem acceptable wei for treatim dead body blo olketa man hia.—2 Samuel 2:4-6.
Common tingting wea no stret abaotem cremation
Tingting wea no stret: Cremation no showim respect lo body.
Tru samting: Bible sei pipol wea dae go bak lo graon, wea hem nao natural samting wea happen lo dead body taem hem decompose. (Genesis 3:19) Cremation hem speedim ap process for body kamap asis, or dust.
Tingting wea no stret: Lo Bible taems, only pipol wea God no hapi lo olketa nomoa pipol bonem afta olketa dae.
Tru samting: Dead body blo samfala pipol wea no faithful, olsem Achan and famili blo hem, olketa bonem. (Joshua 7:25) Bat, diswan hem no wanfala rul. (Deuteronomy 21:22, 23) Olsem iumi storyim finis, body blo samfala faithful pipol, olsem Jonathan son blo King Saul, olketa bonem afta hem dae.
Tingting wea no stret: Cremation stopem God for resurrectim man wea dae.
Tru samting: Regardim resurrection, God bae resurrectim pipol wea dae whether olketa berem, crematim, lus lo sea, or wild animal kaikaim. (Revelation 20:13) Hem isi nomoa for Olmaeti hem creatim moa niu body for datfala person.—1 Corinthians 15:35, 38.