Wat Nao Happen lo Wedding blo Olketa Jehovah’s Witness?
Wedding blo Olketa Jehovah’s Witness staka taem hem consist lo wanfala simpol ceremony wea showim respect and garem wanfala tok wea base lo Bible. Afta datfala ceremony olketa savve hipap tugeta, or garem reception.a Jesus tu attendim kaen feast olsem lo taon lo Cana taem hem startim ministry blo hem.—John 2:1-11.
Bae olketa guest torowem rice or nara samting lo bride and groom?
Hao, Olketa Jehovah’s Witness celebratem wedding anniversary?
Wat nao happen during wedding ceremony?
Main feature blo datfala ceremony hem wedding tok, wea hem samting olsem 30 minutes long and wanfala minister blo Olketa Jehovah’s Witness nao givim. Datfala encouraging tok hem strongim hao Bible savve helpem datfala couple for stap gud, lovem each other, and garem hapi marit.—Ephesians 5:33.
Lo staka kantri, gavman authorizim olketa minister blo Olketa Jehovah’s Witness for officiatem olketa marit. Towards end blo tok, couple savve talem vow lo each other. Olketa maet exchangem ring tu. Then minister declarim dat tufala hasband and waef nao.
Lo olketa nara kantri, law requirem for couple saenem pepa lo wanfala office blo gavman. Couple savve duim diswan just bifor wedding tok. If bride and groom no talem vow lo each other during taem wea olketa saenem pepa lo office blo gavman, tufala maet duim datwan towards lo end blo wedding tok. If tufala talem vow lo each other finis, tufala maet chus for repeatim datwan, and iusim past tense for mekem klia dat tufala talem vow finis. Datfala tok bae conclude witim prea for askem God for blessim datfala niu marit couple.
Wedding blo Olketa Jehovah’s Witness savve happen lo wea?
Staka Witness chus for duim wedding ceremony blo olketa lo wanfala Kingdom Hall if hem available.b If couple garem reception afta wedding ceremony, olketa savve chusim nara location for datwan.
Hu nao savve attend?
If wedding hem happen lo Kingdom Hall, hem open for eniwan nomoa for attend, olketa Witness and olketa wea no Witness. If couple garem reception, tufala savve chus hu nao bae tufala invaetem.
Wat kaen kaleko nao for werem?
Nomata wedding kamap lo Kingdom Hall olketa no garem specific dress code, Olketa Jehovah’s Witness traem best for followim direction from Bible for werem kaleko wea modest and wea showim respect. Olketa appreciatim taem olketa narawan duim sem samting. (1 Timothy 2:9) And datfala sem principle hem apply tu if couple chus for garem reception.
Bae olketa givim wedding gift tu?
Bible encouragem wei for give. (Psalm 37:21) Olketa Jehovah’s Witness hapi for give and for receivim olketa wedding gift. (Luke 6:38) Bat, olketa Witness avoidim wei for forcem man for givim samting or announcem lo pablik nem blo olketa wea givim samting. (Matthew 6:3, 4; 2 Corinthians 9:7; 1 Peter 3:8) Diswan hem againstim wat Bible talem and hem mekem olketa wea attend for feel shame.
Bae olketa duim toasting tu?
Hem tru Bible no stopem wei for toasting or for clinking glass, bat samfala couple maet askem olketa guest for no duim toasting for avoidim wei for mekem narawan stambol.—Romans 14:21.
Bae olketa guest torowem rice or nara samting lo bride and groom?
Nomoa. Lo samfala ples, pipol savve torowem rice or nara samting lo tufala wea just marit. Olketa biliv diswan bae givim gud luck, hapi, and laef longtaem. Bat Olketa Jehovah’s Witness avoidim olketa practice wea join witim spiritism. Diswan includim wei for talem gud luck, wea hem againstim olketa Bible principle.—Isaiah 65:11.
Bae olketa provaedem kaikai and drink tu?
Wedding ceremony lo Kingdom Hall hem no includim kaikai or drink. Samfala couple maet chus for garem reception afta wedding ceremony wea olketa savve servem kaikai or refreshment. (Ecclesiastes 9:7) If olketa disaed for provaedem alcohol, olketa bae provaedem moderate quantity and hem only for olketa wea kasem legal age for drink.—Luke 21:34; Romans 13:1, 13.
Bae olketa pleim music and dance tu?
If couple garem reception, olketa maet chus for includim music and dance lo datfala reception. (Ecclesiastes 3:4) Music wea olketa chusim hem depend lo wat olketa laekem and wea fitim culture blo olketa, bat olketa mas mek sure hem no mekem guest blo olketa feel nogud. Olketa wedding ceremony lo Kingdom Hall staka taem includim tu music wea theme blo hem base lo olketa Scripture.
Hao, Olketa Jehovah’s Witness celebratem wedding anniversary?
Olketa Bible principle no stopem olketa for celebratem wedding anniversary, bat olketa Witness couple savve disaed whether for celebratem or nomoa. If tufala chus for duim, tufala maet celebrate seleva or witim olketa frens and famili.
a Samfala specific kastom, wat olketa duim, and olketa legal requirement hem depend lo olketa difren ples.
b Minister wea givim datfala tok bae no chargem fee for datfala wedding ceremony, and bae no eni charge tu for iusim Kingdom Hall.