Thai Liang Lim/E+ via Getty Images
GOHED FOR LUKAOT!
Global Concern Abaotem Social Media and Young Pipol
During 2025 staka gavman raonem world talem concern blo olketa abaotem effect blo social media lo young pipol. Wanfala kantri banim olketa young wan wea anda 16 years old for no iusim social media, and olketa nara kantri tu ting for duim sem samting.
Interesting samting, even samfala teenager tu lukim nogud samting wea social media savve kosim. Wanfala survey wea Pew Research Center conductim lo United States wea release lo April 2025, hem talem dat “roughly haf lo olketa teenager (48%) sei [dat social media] sites hem mostly garem negative effect lo olketa young pipol wea sem age olsem olketa.”
Olketa health expert warnim pipol abaotem effect blo social media lo mentol health blo olketa young wan. Last year, Dr. Vivek Murthy, wea hem U.S. surgeon general lo datfala taem hem sei olsem: “Mentol health problem wea staka young pipol kasem hem wanfala emergency, and main kos blo datwan hem social media.”
Hao nao parents savve protectim pikinini blo olketa from olketa danger blo social media? Bible givim practical advaes.
Wat parents savve duim
Ting raonem olketa Bible principle hia.
“Man wea wise ting raonem each step blo hem.”—Proverbs 14:15.
From social media garem olketa risk, no feel olsem iu mas allowim pikinini blo iu for iusim social media. Bifor iu allowim hem for iusim social media, mek sure hem mature inaf for kontrolem hemseleva for followim taem, continue for frens witim gud pipol, and avoidim olketa content wea savve spoelem hem.
For lanem moa information, readim olketa article “Waswe, Pikinini blo Mi Shud Iusim Social Media?” and “Teachim Teenager blo Iu lo Hao for Iusim Social Media.”
“Iusim gud taem wea iufala garem.”—Ephesians 5:16.
If iu allowim pikinini blo iu for iusim social media, mekem rules lo hao for iusim, and explainim hao rules hia bae helpem hem for sef. Mas alert lo eni change lo behavior blo pikinini blo iu wea maet showim dat iu need for putim limit for hem accessim social media.
Iusim whiteboard animation video Mas Wise Taem Iu Iusim Social Network for helpem pikinini understandim why hem important for garem limits.
For samfala practical suggestion from Bible lo wat parents savve duim, lukim article “Top Health Official Warnim Hao Social Media Affectim Young Pipol—Wat Nao Bible Talem Abaotem Datwan?”
Samfala nara information
Bible sei iumi stap lo taem wea “evri samting hem hard tumas.” (2 Timothy 3:1-5) Nomata olsem, hem givim practical advaes wea savve helpem iumi for cope. Wanfala list blo ova 20 Bible base resources for parents and pikinini hem stap lo disfala article “Olketa Teenager wea Garem Mentol Health Problem Increase—Wat Nao Bible Talem Abaotem Datwan?”