KWESTIN FROM READER

Wanem tufala covenant nao aposol Paul story abaotem lo Galatians 4:24?

Afta aposol Paul storyim relationship wea Abraham garem witim Sarah and Hagar, Paul sei: “Iumi savve ting lo olketa samting hia olsem tokpiksa. Tufala woman hia piksarem tufala covenant.” (Gal. 4:​22-24) Lo bifor, iumi sei tufala covenant hia hem datfala Law covenant and datfala niu covenant. Bat, afta samfala deep study abaotem diswan, iumi luksavve dat iumi need for adjustim hao iumi minim diswan. Luk olsem, taem Paul storyim datwan, hem no minim datfala niu covenant, bat hem minim datfala covenant wea God mekem witim Abraham. Tingim samfala reason for disfala adjustment.a

Paul connectim datfala servant woman Hagar witim Maunt Sinai. (Gal. 4:25) Hagar minim datfala Law covenant wea God givim lo Maunt Sinai lo 1513 B.C.E. (Ex. 19:​5, 6) No eniwan hem perfect for keepim datfala Law lo perfect wei, so diswan remindim olketa Jew dat olketa slave lo sin. Datfala covenant helpem nation blo Israel for luksavve hu nao datfala Messiah, wea hem nomoa only man wea savve keepim datfala Law lo perfect wei. Taem datfala Messiah sakrifaesim perfect laef blo hem, datwan mekem hem possible for iumi wea no perfect for kamap free from sin and dae. (Gal. 3:​19, 24, 25) Afta Jesus fulfillim purpose blo God, no eni need stap moa for followim datfala Law covenant.—Rom. 10:4.

Paul storyim hao Sarah hem difren from Hagar, Sarah hem “woman wea free” wea bornem pikinini “from promis blo God.” (Gal. 4:23) Datfala promis hem Abrahamic covenant. (Gal. 3:29; 4:​28, 30). Jehovah storyim datfala covenant lo Genesis 22:18 wea sei: “Thru lo pikinini blo iu [Abraham], evri nation lo earth bae kasem blessing bikos iu obeyim mi.”

Datfala covenant wea God mekem witim Abraham, storyim samfala information moa abaotem promis wea Jehovah talem lo Eden. (Gen. 3:15) Covenant hia showim hao datfala “pikinini” wea profesi story abaotem bae kam from laen blo Abraham. Paul explainim hao datfala main “pikinini” nao Jesus Christ. Bat olketa “blo Christ,” wea hem 144,000 wea bae rul witim Jesus lo Kingdom blo hem, olketa tu part lo pikinini hia. (Gal. 3:​16, 29; Rev. 14:​1-3) Olketa wea acceptim and obeyim Jesus bae kasem staka blessing bikos lo promis wea God mekem witim Abraham.

Why nao Paul iusim disfala “tokpiksa”? Paul showim dat if olketa Jew lo taem blo hem strong for keepim Law, bae olketa olsem Hagar, olketa bae gohed slave. Bat, if olketa acceptim datfala main “pikinini” blo Abraham, wea hem Jesus Christ, olketa bae free, olsem Sarah. Olketa bae kamap free from sin and dae. (John 8:​32-34) If olketa no acceptim Jesus, bae olketa misstim nao main purpose blo datfala Law covenant, wea hem nao for leadim olketa go lo Christ.

Staka Christian lo Galatia wea Paul raet go for olketa, olketa no Jew and no enitaem olketa stap anda lo datfala Law covenant. Samfala Jew Christian talem dat olketa Gentile Christian mas obeyim Law covenant, wea includim wei for circumcise. Paul storyim dat hem no mek sense for olketa Christian hia for kamap “slave” lo Law, bikos olketa experiencem finis “freedom” wea Christ mekem olketa for kasem.—Gal. 5:​1, 10-14.