Thaundi ya Yerusalemu idadzongewa

Nthawe zizinji Ayuda ambasiya kutumikira Yahova nkumbatumikira milungu yanango. Yahova adayesesa kuwathandiza kwa magole yazinji. Ambawatumizira aneneri kuti awachenjeze koma iwo ambabveralini. Koma ambandowaseka. Ko Yahova adamalisa tani kutumikira mafano moku?

Nebukadinezara yemwe wenze mpfumu ya ku Babulo, ambagonjesa madziko yazinji. Pa ulendo woyamba pomwe adagonjesa Yerusalemu, adaphata mpfumu Yehoyakini, magovernadori, masocha komasoti wanthu anango wabuya. Ndipo adayenda nawo wose ku Babulo. Adatenga pomwe chuma chose chomwe chenze mukachisi wa Yahova. Patsogolo pake Nebukadinezara adasankhula Zedekiya kuti akhale mpfumu ya Ayuda.

Pakuyamba, Zedekiya ambabvera Nebukadinezara. Koma patsogolo pake, wanthu wa madziko yapafupi komasoti aneneri wabodza adamuuza kuti aleke kubvera ulamuliro wa Ababulo. Koma Yeremiya adamuuza kuti: ‘Mukaleka kubvera Ababulo, wanthu wanu azinji aphewe, ndipo mu thaundi muno mukhale njala na matenda.’

Pomwe Zedekiya adatonga kwa magole 8, adasiya kubvera Ababulo. Iye adakumbira masocha ya ku Iguputo kuti yamuthandize. Patsogolo pake Nebukadinezara adatumiza masocha yake kuti yakadzonge thaundi ya Yerusalemu. Pomwe masocha yadazungulira thaundi mwiyo, Yeremiya adauza Zedekiya kuti: ‘Mukandouza Ababulo kuti mwagonja, thaundi mweyi komasoti wanthu wanu apulumuke. Koma mukachita nthota, Ababulo atenthe thaundi mweyi ndipo imwepo ayende namwe ku ukapolo.’ Zedekiya adadawira kuti: ‘Ningachitelini olo pang’ono kuwauza Ababulo kuti nagonja!’

Payadapita magole yatatu na hafu, masocha ya Ababulo yadangena nkushoka thaundi mweyo. Masocha mwayo yadashoka kachisi, nkupha wanthu azinji na kutenga anango nkuyenda nawo ku ukapolo ku Babulo.

Zedekiya adayamba kuthawa, koma masocha ya ku Babulo yadamuthangisa. Adamuphatira pafupi na Yeriko nkuyenda naye kwa Nebukadinezara. Mpfumu mweyi idapha wana wa Zedekiya iye ankuwona. Patsogolo pake adamuchosa maso nkumufungira mudjeri, ndipo adafera mumo. Koma Yahova adauza Ayuda kuti: ‘Pakadzapita magole 70 mudzabwerere pomwe ku Yerusalemu.’

Ko unkuganiza kuti alumbwana omwe adayenda ku Babulo vidawamalira tani? Ko Iwo adapitiriza kukhala wokhulupirika kwa Yahova?