Yahova adauza Yeremiya kuti akalalikire

Yahova adauza Yeremiya kuti ambakalalikire kwa Ayuda. Adamuuza pomwe kuti ambakawachenjeze kuti asiye kuchita vinthu voipa. Koma Yeremiya adadawira kuti: ‘Yahova inepano ndine mwana, ningakwaniselini kulalikira kwa wanthu mwawa.’ Manje Yahova adamuuza kuti: ‘Ayi kugopa, nikuuze vose vomwe ukanene ndipo nikuthandize.’

Yahova adauza Yeremiya kuti asonkhanise akuluakulu wose. Patsogolo pake aphwanye botolo ya dothi iwo ankuona ndipo awauze kuti: ‘Yerusalemu adzadzongewe teneletu.’ Yeremiya padachita vimwevi akuluakulu mwawo adakalipa maninge. Wantsembe munango dzina yake Pasuri adamenya Yeremiya, patsogolo pake nkumumanga m’matangawelo. Yeremiya adakhala pamwapo usiku wose ndipo ambakwanisalini kufamba, mangwana yake machibese Pasuri adamumasula Yeremiya m’matangawelo mwayo. Ndipo Yeremiya adalewa kuti: ‘Vomwe ankunichitira ivi vaninetesa, basi nilalikirelini pomwe.’ Koma ko Yeremiya adasiyadi kulalikira? Neye. Padaiganizira bwinobwino nkhani mweyi adalewa kuti: ‘Ntontholo wa Yahova uli ninge moto mu ntima mwangu mwakuti ningalekelini kulalikira.’ Pamwapo Yeremiya adapitiriza kuchenjeza wanthu mwawo.

Magole yanganani patsogolo pake, Zedekiya adakhala Mpfumu ya Ayuda. Koma wantsembe na aneneri wabodza ambazonda Yeremiya ndawa ya ntontholo womwe ambalalikira. Iwo adauza magovernadori kuti: ‘Munthu moyu ankufunika kuphewa.’ Koma Yeremiya adalewa kuti: ‘Mukanipha ndiye kuti mwapha munthu wosaphonya. Ine niuza wanthu mawu ya Yahova wosati yangu.’ Magovernadori mwayo padabva vimwevi adalewa kuti: ‘Munthu moyu ankufunikalini kuphewa.’

Yeremiya adapitiriza kulalikira ndipo magovernadori mwayo yadakalipa naye maninge. Manje adakumbira Mpfumu kuti Yeremiya aphewe. Zedekiya adawauza kuti angamuchite chirichose chomwe ankufuna. Pamwapo iwo adamuthusira mu chinchera chonoka kuti afere mumo. Yeremiya adayamba kumila m’matope mumo.

Patsogolo pake, munthu munango waudindo mu nyumba ya Mpfumu dzina yake Ebedi-mereki adayenda kwa Mpfumu kukalewa kuti: ‘Magovernadori yale yathusira Yeremiya mu chinchera, tikamusiya afere mumo.’ Zedekiya adauza Ebedi-mereki kuti atenge wanthu 30 ndipo ayende kukamubulisa. Isembo timbatewedzere Yeremiya ndipo ayi kuti tibvume kuti chirichose chitikangise kulalikira.