Alumbwana 4 adabvera Yahova

Nebukadinezara padatenga magovernadori nkuyenda nayo ku Babulo, adasankhula munthu waudindo dzina yake Asipenazi kuti ambanyang’anire magovernadori mwayo. Nebukadinezara adauza Asipenazi kuti asankhule alumbwana wa thanzi komasoti wooneka bwino. Adamuuza kuti alumbwana mwawo asamaliriwe bwino komasoti apfunzisiwe kwa magole yatatu na cholinga chakuti adzakhale akuluakulu wa boma. Alumbwana mwawo ambafunika kupfunzisiwa kuwerenga, kunemba komasoti kuyankhula chiyankhulo cha Akasidi. Ambafunika kuwapasa chakudya chomwe mpfumu na wanthu wophata basa n’nyumba yake angadya. Pagulu ya alumbwana mwawo penze Danieli, Hananiya, Azariya na Misayaeli. Koma Asipenazi adawapasa madzina ya Chibabulo yakuti Belitesazara, Shadireki, Misheki, na Abedinego. Ko vomwe angawapfunzisa ivo vidakawachitisa alumbwana mwawo kuti aleke kutumikira Yahova? Neye.

Iwo adatsimikiza kuti ambabvere Yahova. Iwo ambadziwa kuti ambafunikalini kudya chakudya cha mpfumu ndawa Chilamulo cha Yahova chimbalambiza vinango mwa vakudya vimwevi. Pamwapo adauza Asipenazi kuti: ‘Pulizi ayi kuti mutipase chakudya cha mpfumu.’ Koma Asipenazi adawadawira kuti: ‘Mukaleka kudya vakudya va mpfumu muwonde ndipo mpfumu iniphe!’

Manje Danieli adagumana pulani, adauza Asipenazi kuti: ‘Mumbatipase vakudya vamasamba na madzi kwa ntsiku 10. Patsogolo pake mudzaone momwe tinkuonekera na momwe alumbwana anango ankuonekera.’ Asipenazi adabvuma.

Pazidapita ntsiku 10, Danieli na anzake wale ambaoneka wa thanzi kuposha alumbwana anango wale. Yahova adakondwa maninge ndawa yakuti alumbwana mwawa adamubvera ndipo adapasa Danieli nzeru zakuti ambakwanise kudziwa tanthauzo ya masomphenya komasoti maloto.

Magole yatatu yale payadamala, Asipenazi adayenda na alumbwana wose kwa Nebukadinezara. Iye padayankhula nawo adaona kuti Danieli, Hananiya, Sadirake na Azariya enze wanzeru komasoti wodziwa vinthu kuposha alumbwana anango wale. Patsogolo pake adawasankhula kuti ambaphate basa kumuyi kwake. Mpfumu mweyi imbabvunzira nzeru kwa alumbwana mwawa ndawa Yahova adawathandiza kukhala na nzeru kuposha ose omwe ambadziwika kuti enze na nzeru mu dziko mwiyo.

Olo kuti alumbwana 4 mwawa enze alendo mu dziko mwiyo, alibe kuyebwa kuti iwo enze wanthu wa Mulungu. Ko iwepo uchikhala ku dziko yomwe kulibe azibereki wako ungapitirize kubvera Yahova?