Mwana wa nkazi wamasiye adamukisiwa

Pomwe ku Izirayeli kwenze chilala, Yahova adauza Eliya kuti: ‘Yenda ku Zarefati, kumuko nkazi wa masiye ambakakupase chakudya.’ Eliya padafika mu thaundi mumo adaona m’mayi wosauka komasoti wamasiye ankulokota nkhuni. Iye adamukumbira kuti amupaseko madzi. Pomwe m’mayi moyu pambayenda kukatenga madzi mwayo, Eliya adamuuza pomwe kuti: ‘Munibwereseko pomwe chakudya pang’ono.’ Koma m’mayi muyo adalewa kuti: ‘Niribe chakudya chakuti ningakupaseni. Nandokhala na tuufa tung’onong’ono na tumafuta tung’onong’ono twakuti niphikire chakudya cha inepano na mwana wangu basi.’ Koma Eliya adamuuza kuti: ‘Yahova wanena kuti mukanipasa ufa na mafuta yanu vimalelini mpakana nvula idzagwe.’

Manje m’mayi moyu adayenda kukaphika chakudya na kumupasa mneneri wa Yahova moyu. Ninge momwe Yahova adanenera m’mayi moyu na mwana wake enze na chakudya pa nthawe yose ya chilala mwechi. Ntsuko wawo wamafuta komasoti waufa umbandokhala wodzala.

Patsogolo pake, padachitika chinthu chinango chobvesa ntsisi. Mwana wake ule adadwala maninge mpakana kumwalira, manje m’mayi moyu adakumbira Eliya kuti amuthandize. Eliya adatenga mwana wakufa ule nkuyenda naye m’chipinda cha n’dzulu. Pamwapo adamugonesa pa m’beda ndipo adapemphera kuti: ‘Pulizi Yahova, mukisani mwana uyu.’ Ko unkudziwa ndawa yake chimwechi chidakhala chinthu chodabwisa chomwe Yahova adachita? Tinkulewa teno ndawa yakuti pa nthawe mweyo palibe munthu yemwe adamukisiwa nkukhala pomwe na moyo. Ndawa nkazi wamasiye na mwana wake moyu enzelini Aizirayeli.

Patsogolo pake, mwana ule adakhala pomwe na moyo ndipo adayamba kupuma. Eliya adauza m’mayi moyu kuti: ‘Mwana wanu ule uyu, anamoyo.’ M’mayi moyu adakondwa maninge ndipo adauza Eliya kuti: ‘Ndimwedi munthu wa Mulungu, ninkulewa teno ndawa yakuti muyankhula vomwe Yahova wakuuzani.’