Yahova adalimbikisa Eliya

Yezebeli padabva vomwe vidachitikira aneneri wa Baala, adakalipa maninge. Manje adatumiza ntontholo kwa Eliya wakuti: ‘Mangwana nawembo ufe ninge momwe afera aneneri wa Baala.’ Eliya padabva vimwevi adachita mantha maninge ndipo adathawa nkuyenda ku chipululu. Kumuko adapemphera kuti: ‘Yahova vomwe vinkuchitika ivi naneta navo. Bvumani kuti nindofa.’ Ndawa yoneta Eliya adagona tulo n’nyantsi mwa muti.

Patsogolo pake, kudabwera mngelo nkumugunduza ndipo adamuuza kuti: ‘Lamuka udye.’ Eliya padalamuka, adaona chikho cha madzi na nkate wozungulira uli paminyala yotentha. Adadya nkate muyo nkumwa madzi mwayo ndipo patsogolo pake adagona pomwe. Paidapita nthawe pang’ono mngelo ule adabwera pomwe nkumuuza kuti: ‘Dyaya pomwe kuti ugumane mphanvu ndawa ufambe nsenga utali.’ Pamwapo Eliya adamuka nkudya pomwe koma adafamba kwa ntsiku 40 usiku na masikati mpakana kukafika pa phiri ya Horebe. Iye adangena kumphako nkugona. Koma Yahova adamubvunza kuti: ‘Unkufuna chani kuno Eliya?’ Iye adadawira kuti: ‘Aizirayeli aphwanya pangano yawo na imwepo. Agwesa maguwa yanu ya ntsembe ndipo apha aneneri wanu. Apa manje ankufuna pomwe kupha inepano.’

Koma Yahova adamuuza kuti: ‘Yenda ukaime paphiri.’ Manje chimphepo chidapitira pafupi na msuwo wa mphako mweire. Patsogolo pake padayamba chivomezi. Pachidamala chivomezi padabwera moto. Pavidachitika vimwevi, Eliya adabva mawu yapasipasi na yopfatsa. Padandobva mawu mwayo, adatenga chovala chake nkufunikira ku nkhope ndipo adabula nkuima pa msuwo wa mphako ire. Pamwapo Yahova adamubvunza pomwe kuti: ‘Unkufuna chani kuno?’ Eliya adadawira kuti: ‘Nasala nekhanekha.’ Koma Yahova adamuuza kuti: ‘Ulirini wekha, mu Izirayeli mulipomwe wanthu wokwana 7000 omwe ankupitiriza kunitumikira. Yenda ukadzoze Elisa kuti angene m’malo mwako.’ Nthawe mwiyo Eliya adayenda kukachita vomwe Yahova adamuuza ivo. Ko unkuganiza kuti nayembo Yahova angakuthandize ukambachita vomwe afuna? Inde angakuthandize. Manje nabo tione vomwe vidachitika pa nthawe ya chilala.