Mpfumukazi yoipa idalangiwa

Mpfumu Ahabu akanyang’ana na pa janela ali m’nyumba mwake ku Yezeereli, ambawona munda wa uva wa Naboti. Ahabu ambakhumbwira maninge munda moyu ndipo adauza Naboti kuti amugulisire. Koma Naboti adalamba ndawa Chilamulo cha Yahova chimbalambiza wanthu kugulisa cholowa (chuma cha banja). Ko Ahabu adakondwa na vimwevi? Neye. Patsogolo pake, iye adakalipa maninge ndipo ambalamba kudya komasoti ambabulalini kuchipinda kwake.

Manje nkazi wake Yezebeli yemwe wenze woipa maninge, adamuuza kuti: ‘Ndimwe mpfumu ya Izirayeli. Ndipomwapa mungakwanise kugumana chirichose chomwe munkufuna. Nichite chirichose kuti munda moyu ukhale wanu.’ Yezebeli adanemba makalata kwa akuluakulu wa muthaundi kuwauza kuti amunamizire Naboti kuti wanyoza Mulungu ndipo amuphe mwa kumuphwanya na minyala. Akuluakulu mwawo adachitadi vimwevi, patsogolo pake Yezebeli adawuza Ahabu kuti: ‘Naboti wafa, manje munda ule ni wanu.’

Koma sikuti Yezebeli adapha Naboti yekha, iye adapha pomwe wanthu azinji womwe ambakonda Yahova. Komasoti Yezebeli ambatumikira mafano ndipo ambachita vinthu vizinji voipa. Yahova ambawona vose vimwevi. Manje ko adachita chani?

Ahabu padamwalira, mwana wake Yehoramu adakhala mpfumu. Yahova adatumiza munthu munango dzina yake Yehu kuti apereke chilango kwa Yezebeli na banja yake.

Yehu adapakira ngolo yake nkuyamba ulendo woyenda ku Yezereeli, komwe Yezebeli ambakhala. Padasala pang’ ono kufika, Yehoramu adamuchunguzira pa ngolo yake. Patsogolo pake adamubvunza kuti: ‘Ko unkubwerera ntendere Yehu?’ Koma Yehu adadawira kuti: ‘Ntendere ungakhalepo tani amayi wako a Yezebeli ankuchita vinthu vizinji voipa?’ Yehoramu padabva vimwevi adakhonesa ngolo yake nkuyamba kuthawa. Koma Yehu adamulasa na dipa ndipo adafera pamwapo.

Patsogolo pake Yehu adayenda ku nyumba ya Yezebeli. Yezebeli padabva kuti Yehu ankubwera, adadzikhuzisa ndipo adakonzakonza pomwe tsitsi yake ndipo adayenda pa janela kukamudikhirira. Yehu padafika, Yezebeli adamumonisa mosowa ulemu. Manje Yehu padafika adauza anyabasa wake kuti: “Muthuseni pasi!” Iwo adamuthusadi Yezebeli nkubula na pa janela ndipo adagwera pasi nkufa.

Patsogolo pake, Yehu adapha wana amuna 70 wa Ahabu, nkumalisa pomwe kutumikira Baala dziko yose mwiyo. Ko waona kuti Yahova adziwa vose ndipo panthawe yake chaiyo apereka chilango kwa wanthu womwe ankuchita voipa?