Mose adasankhula kutumikira Yahova

Ku Iguputo wanthu wa banja ya Yakobo, adayamba kudziwika kuti Aizirayeli. Yakobo na Yesefe padamwalira, Farao munango adayamba kutonga. Iye ambachita mantha ndawa Aizirayeli ambawanda kuposha Aiguputo. Ndipomwapa adachitisa kuti Aizirayeli akhale akapolo. Adawalamula kuti ambaumbe tijolo komasoti kuphata basa zonetesa zakumunda. Koma podiya kuti ambadzudziwa maninge na Aiguputo, Aizirayeli adapitiriza kuwandirawandira. Pakuti Farao ambafunalini vimwevi, adalamula kuti wana wose amuna wa Aizirayeli ambaphewe akandobadwa. Ko unkuganiza kuti Aizirayeli adabva tani va lamulo mweyi paidaperekewa?

Mwevi pavidachitika, m’mayi munango wachiizirayeli dzina yake Yokebedi adabereka mwana mwamuna wokhuza maninge. Pakufuna kumuteteteza mwana moyu, mayi moyu adamuika mwana moyu mu sesto nkukamubisa mu ntsanga mukamadzi ka Nailo. Mulongosi wa mwana muyo dzina yake Miriyamu, adakhala pafupi kuti ambamunyang’anire.

Manje mwana wa Farao nkazi adabwera kuti adzasambe ndipo adaona sesto ire. Padafungula sesto ire, adagumana kuti muna mwana. Mwana muyo ambalira ndipo adamubvera ntsisi. Miriyamu adabvunza mwana nkazi wa Farao kuti: ‘Ko mungakonde kuti nikakufagireni munthu wakuti adzakuyamwisireni? Mwana wa Farao adabvuma ndipo Miriyamu adayenda kukauza amayi wake. Padabwera, mwana wa Farao adawauza kuti: ‘Tengani mwana uyu mukamusamalire ndipo nimbakulipireni.’

Mwana ule padakula, Yokebedi adakamupereka kwa mwana wa Farao, ndipo adamupasa dzina yakuti Mose nkumbakhala naye ninge mwana wake. Mose adalerewa ninge mwana wa mpfumu ndipo adakakwanisa kugumana chirichose chomwe ankufuna. Koma iye alibe kumuyebwa Yahova ndipo ambadziwa kuti wenze wa Chiizirayeli osati wa ku Iguputo. Ndipomwapa adasankhula kuti ambatumikire Yahova.

Pomwe wenze na magole 40, Mose ambafuna kuthandiza Aizirayeli anzake. Ndipomwapa pomwe adaona munthu wa ku Iguputo ankumenya munthu wa Chiizirayeli, Mose adamumenya munthu wa ku Iguputo ule mpakana kumupha, patsogolo pake adamufuchira mu nchenga. Farao padadziwa vimwevi ambafuna kupha Mose, mwakuti Mose adathawira ku Midiyani. Koma kumuko Yahova wenze naye.