Chitsamba chomwe chimbagaka moto

Mose adakhala ku Midiyani kwa magole 40 ndipo adalowola nkukhala na wana. Ntsiku inango ambadyesa nkhosa pafupi na phiri ya Sinai, pamwapo adaona vinthu vodabwisa. Adawona chitsamba chinkugaka koma chinkupsalini. Padafendera kuti anyang’anisise vomwe vinkuchitika, adabva mawu yochokera pachitsamba mwapo yakuti: ‘Mose! ayi kuti ufendere, vula ntsapato zako! Ndawa malo yomwe waima ayo ni yochena.’ Yahova ni yemwe ambayankhula ndipo adaphatisira basa mngelo.

Mose adachita mantha maninge mwakuti adafunikiza nkhope yake. Yahova adamuuza kuti: ‘Nawona kuti Aizirayeli ankubonera maninge. Ninkufuna kuwapulumusa ku Iguputo nkuwayendesa ku dziko yabwino ndipo iwepo uwatsogolere pochoka ku Iguputo.’ Mose adadabwa maninge na vimwevi

Mose adabvunza kuti: ‘Manje akakanibvunza kuti wakutuma ni mbani nikadawire kuti tani? Pamwapo Mulungu adamuuza kuti: ‘Ukawauze kuti Yahova Mulungu wa Abulahamu, wa Isaki na wa Yakobo, ni yemwe wanituma.’ Patsogolo pake Mose adalewa kuti: ‘Manje ko akakaleka kunikhulupirira?’ Pamwapo Yahova adamuuza kuti: ‘Thusa mpsyimbo yako pasi.’ Nthawe mwiyo mpsyimbo mwiyo idasanduka nyoka koma padaiphata ku nchira idasanduka pomwe mpsyimbo. Manje Yahova adamuuza kuti: ‘Ukakachita vimwevi akakhulupirire kuti inepano ndine nakutuma.’

Koma Mose adalewa kuti: ‘Pale inepano nishupika kuyankhula.’ Manje Yahova adamupolomisa kuti: ‘Inepano nikuuze vomwe ukayankhule ndipo nikupase Aroni kuti ambakakuthandizire.’ Mose padadziwa kuti Yahova amuthandize, adatenga nkazi wake na wana wake nkuyamba ulendo woyenda ku Iguputo.