Imwepo mungakhale okondwa olo kuti munkudzudziwa

1. Ko Yesu adanena chani, ndipo ndawa chani mwivi venze vodabwisa?

PA ULALIKI wake wapaphiri, Yesu adati: “Ndimwe okondwa wanthu akambakuzondani.” (Luka 6:22) Panango pomwe wanthu adabva vomwe Yesu adanena adadabwa maninge. Kunena chaivo, palibe munthu yemwe afuna kuzondewa. Koma ndawa chani Yesu adanena vimwivi? Mbvunzo muyu ni wabwino maninge ndawa ateweri wake wa Yesu ntsiku zino ankuzondewa na wanthu azinji. Mu pfunziro mwaino tione kuti ndawa chani tizondewa ndipo tingakhale tani okondwa olo kuti tinkuzondewa.

NDAWA CHANI TIZONDEWA?

2-3. Ko ni chifukwa chiponi chomwe chitichitisa kuti timbazondewe, ndipo ndawa chani nivofunika kubvesa vimwivi? (Yohani 16:2, 3)

² Tizondewa ndawa yakuti titumikira Yahova. Pakunena va wale omwe adzadzudze ateweri wake, Yesu adanena kuti: “Akunidziwalini ndipo akuwadziwalini Ababa.” (Werengani Yohani 16:2, 3.) Ko ni mbani yemwe adzudza atumiki wa Mulungu? Ni Satana. “Iye ni mulungu wa nthawe ino.” (2 Akor. 4:3, 4) Satana achitisa wanthu kuti osati amudziwe Yahova ndipo achitisa kuti wanthu omwe akonda Yahova adzudziwe. (Yoh. 8:42-44) Ndawa chani kudziwa vimwivi kungachinje momwe tionera wanthu wale omwe atizonda? Tikazindikira kuti ni Satana yemwe achitisa kuti wanthu mwawa ambatizonde, vitithandiza kuti ayi kuti timbawazonde.

³ Onani chitsanzo cha m’bale munango dzina yake Pavel,a yemwe akhala mu dziko yomwe basa yathu yolalikira ni yolambiziwa. Ndawa yotumikira Yahova mokhulupirika iye adamenyewa komasoti adayikhiwa mudjeri kwa minyezi inganani. Iye adanena kuti: “Ntsiku zino niwona kuti Satana na viwanda vake ni womwe ankuyesesa kulambiza kutumikira chaiko. Wanthu azinji omwe aphata basa kudjeri, atizondalini koma iwo akundochita basa yawo basi.” M‘bale munango waku Croatia adapirira pomwe azibereki wake ambamudzudza. Iye adati: “Manje nabvesa kuti Satana ni mzondi wangu nkulu, osati azibereki wangu.”—Aef. 6:12.

4. Ko tikupfunzira chani pa chitsanzo cha Yesu na Sitefano? (Onani pomwe foto.)

⁴ Isepano tizondalini wale omwe atidzudza. Ndipomwapa, tiwapempherera. (Mat. 5:44) Onani vomwe tingapfunzire kwa Yesu na kwa Sitefano. Yesu adapachikiwa pa muti wodzudzikirapo na masocha ya Chiroma. Olo kuti nthawe mweyire yenze yoshupa kwa Yesu koma iye adawapemphera. Iye adati: “Ababa, akhululukireni.” (Luka 23:34) Yesu adakumbira kwa Yahova kuti akhululukire masocha yale yomwe yadatumiwa kuti yamuphe. Ndipo iye ambaganizira pomwe va wanthu womwe ambakuwa kuti aphewe. Yesu adazindikira kuti wanthu mwawa ambadziwalini vomwe akuchita. Nayembo Sitefano, adapemphera kwa Yahova kuti akhululukire wale omwe ambafuna kumupha. (Mac. 7:58-60) Ko Yahova adadawira pemphero ya Yesu na ya Sitefano? Inde. Wanthu azinji omwe adatengambo mbali pa kuphewa kwa Yesu, patsogolo pake adalapa nkuyamba kukhulupirira Yesu ndipo adabatizika. (Mac. 2:36-41) Munthu m’bodzi yemwe adatengambo mbali pakuphewa kwa Sitefano yemwe ni Saulo waku Tariso adalapa vinthu voipa vomwe ambachita ndipo adakhala Mkhrisitu.—1 Tim. 1:13.

5. Ko mwapfunzira chani na chitsanzo cha César?

⁵ Ntsiku zino Yahova adawira mapemphero yomwe tichita pakupempherera wale omwe atidzudza. Onani chitsanzo cha César, yemwe akhala ku Venezuela. Ababa wake ambamutsutsa komasoti enze wa nkhanza. César adati: “Amayi wangu enze munthu wabwino maninge ndipo ambaikha kutumikira Yahova pa malo yoyamba. Koma olo teno, alibe kuwasiya ababa wangu. Amayi wangu adapfunzisa inepano pabodzi na azibale wangu kuti timbalemekeze ababa wanthu na kuwabvera peno vinthu vimwevo vobverana na mpfundo za Yahova.” Kuyenda kwa nthawe ababa wa César adasiya kukhala woshupa. Iye adati: “Ntsiku inango nidapemphera kwa Yahova ndipo nidawabvunza ababa wangu peno angafune kupfunzira Baibolo. Ndipo inepano nidakhala wokondwa maninge ndawa iwo adabvuma kupfunzira Baibolo.” Nkuyenda kwa nthawe, ababa wake wa César adabatizika. Ni shuwadi kuti vimwevi vichitikiralini wose womwe atidzudza, koma anango achinja makhalidwe yawo akawona momwe tichitira nawo vinthu ndipo tikhala okondwa maninge vimwevi vikachitika. Tinkufunisisa kuwona momwe Yahova yemwe ni woweruza wa dziko yose, adzakwekwetere wanthu mwawa kwa iye.—Gen. 18:25.

6. Mobverana na lemba ya Maliko 13:13, ko ni chifukwa chinango chiponi chomwe chichitisa wanthu kutizonda?

⁶ Tizondewa ndawa yakuti tibvera Yesu. Yesu adanena kuti Akhrisitu chaiwo adzazondewe “ndawa ya dzina yangu.” (Werengani Maliko 13:13.) Ko “dzina” ya Yesu itanthauza chani? Itanthauza kuti Yahova ni mpulumusi ndipo ndiye anaudindo wodzakhala Mpfumu ya Ufumu wa Mulungu. Isepano tizondewa na wanthu womwe akhulupirira mautongi ya wanthu ndipo iwo akhulupiriralini utongi wa Yahova. Yesu adayamba kutonga mu 1914 ndipo manjemanjeapa iye adzonge mautongi yose ya padziko yapasi.

7-8. Ko ni chifukwa chinango chiponi chomwe chichitisa wanthu kutizonda? (Yohani 15:18-20) (Onani pomwe mafoto.)

⁷ Tizondewa ndawa tilirini ku mbali ya dziko. Yesu adauza atumiki wake kuti mudzazondewe ndawa “mulilini mbali ya dziko.” (Werengani Yohani 15:18-20.) Ninge momwe adachitira Akhrisitu woyambirira, isembo tilamba kukhala kumbali ya dziko iyi. Ndawa ya vimwivi, abale na alongo adzudziwa maninge kubasa komasoti kushikola. (1 Pet. 4:3, 4) Koma tikhala okondwa maninge tikawona munthu yemwe ambatsutsa wachinja nkuyamba kupfunzira Baibolo.

⁸ Onani chitsanzo cha Ignacio, yemwe akhala ku América Central. Kwa magole yazinji aticha wake ambamuseka ndawa yakuti adasalula kutumikira Yahova. Akalibe kumaliza shikola aticha wake mwawo adamubvunza kuti akwanisa tani kutewedza mpfundo za Baibolo olo kuti anango amunyoza. Ignacio adafotokoza kuti malamulo ya Mulungu yamuteteza. Patsogolo pake, iye adawachemerera kumisonkhano yathu ndipo iwo adabvuma. Iwo adakomedzewa na momwe adatambiririwa bwino ku Nyumba ya Ufumu ndipo adapitiriza kusonkhana. Patsogolo pake, aticha mwawa adayambambo kudzudziwa ndawa yakupfunzira Baibolo. Koma iwo adapitiriza kuchita vabwino patsogolo pake adabatizika.

9-10. (a) Ko ni vinthu viponi vomwe visiyanisa Akhrisitu na wanthu wakudziko uku? (b) Ko tingapfunzire chani na chitsanzo cha ntumi Paulo?

⁹ Chinthu chinango chomwe tiwonesa kuti tichitalini mbali yadziko ya Satana iyi ni chakuti tingenereralini nkhani za ndale panango kuchita nawo nkhondo. (Yoh. 18:36) Ni shuwadi kuti isepano titewedzera malangizo yogumanika pa Aroma 13:1 ndipo tiyesesa kubvera malangizo ya boma. Koma ninge Akhrisitu, tingenereralini nkhani za ndale. Ndipomwapa, tikhalalini mbali iliyose ndipo tivotalini. Ndawa chani? Ndawa ndise wokhulupirika kwa Yahova. Mboni zizinji zidaikhiwa mudjeri ndawa ya chikhulupiriro chawo. Olo teno, abale na alongo mwawa ankupitiriza kulalikira. Achita vimwevi pakutewedzera chitsanzo cha ntumi Paulo, yemwe adakhala mudjeri kwa magole yazinji. (Mac. 24:27; 28:16, 30) Koma olo kuti wenze mudjeri, Paulo ambalalikira ntontholo wabwino kwa omwe ambamubvesera kuphatanidzapo wonyang’anira djeri, magovernador na akuluakulu wa Mpfumu Nelo waku Roma.—Mac. 9:15.

¹⁰ Abale wanthu womwe ali mudjeri, alalikirambo wale womwe angawabvesere kuphatanidzapo oweruza, magovernador na wonyang’anira djeri. M’bale munango adakhala mudjeri kwa magole yoposha 6 ndawa yosangenerera nkhani za ndale. Iye adanena kuti pomwe nenze mudjeri nimbawonalini kuti chenze chilango koma nimbawona kuti ni basa yomwe Yahova wanipasa kuti nilalikire kwa wanthu wa mitima yabwino. Nimwayi ukulu kuphatisiriwa basa na Yahova kuti tiuze wanthu anango va ntontholo wabwino! (Akol. 4:3) Naboni tiwone vifukwa vinango vomwe vitichitisa kukhala okondwa olo kuti tinkudzudziwa pomwe tikutumikira Yahova.

NDAWA CHANI TINKUFUNIKA KUPITILIZA KUKHALA OKONDWA OLO KUTI TIKUZONDEWA?

11. Ko kudzudziwa kungalimbise tani chikhulupiriro chathu? Perekani chitsanzo.

¹¹ Isepano tidziwa kuti kuzondewa kwathu kukukwanilisa maulosi ya m’Baibolo. Mu ulosi woyambirira wonembewa mu m’Baibolo uwonesa kuti Yahova adaneneratu mobveka bwino kuti Satana na wanthu wake adzazonde wanthu omwe akutumikira Yahova mokhulupirika. (Gen. 3:15) Yesu adafotokoza mobwerezabwereza kuti ulosi muyu udzakwanilisike ndipo vomwe iye adanena vidanembewa mu mabukhu yanayi ya ntontholo wabwino. (Mat. 10:22; Maliko 13:9-12; Luka 6:22, 23; Yoh. 15:20) Onemba Baibolo anango adanembambo vimwivi. (2 Tim. 3:12; Yak. 1:2; 1 Pet. 4:12-14; Yuda 3, 17-19) Ndipomwapa, tikambadzudziwa tidabwalini. M’malo mwa vimwivi, isepano tikhala okondwa maninge maulosi ya m’Baibolo yakambakwanilisika. Vimwivi vititsimikizira kuti tikutumikira Mulungu chaiye. Mulongo munango yemwe akhala mu dziko yomwe basa yathu yolalikira ni yolambiziwa, adanena kuti: “Pomwe inepano nidadzipereka kwa Yahova, nimbadziwiratu kuti nthawe iliyose nidzadzudziwe. Ndipomwapa, pomwe nidayamba kudzudziwa nilibe kudabwisiwa panango kukhala na mantha.” Wanthu azinji ambamutsutsa kuphatanidzapo mwamuna wake. Mwamuna wake ambamuchitira vinthu vankhanza ndipo adamushokera Baibolo na mabukhu yanango. Koma olo kuti venze teno, iye adapitiriza kukhala na chikhulupiriro cholimba. (Aheb. 10:39) Iye adanena pomwe kuti: “Baibolo idaneneratu kuti atumiki wa Yahova adzadzudziwe. Ndipomwapa, nimbadziwiratu kuti vimwivi vinichitikire. Kugumana na mabvuto mwaya kudanitsimikizira kuti chimwichi ni chipembedzo chaicho.”

12. Ko chani chomwe chidathandiza m’bale munango pomwe ambadzudziwa?

¹² Olo kuti tikudziwa kuti timbadzudziwe, vingakhale voshupa kupirira. M’bale munango yemwe adakhalako mudjeri, adanena kuti: “Nimbakhala okwinyirira komasoti wankhawa ndipo nimbandolira.” Ko chani chomwe chidathandiza m’bale muyu kupirira? Iye adati: “Kukandochena nimbapemphera ndipo vinthu vinango voipa vikanichitikira nimbadzifungira nchinjausi nkuyamba kupemphera.” Kuyingizira mwapa, m’bale muyu ambaganizira vitsanzo va wanthu wakalekale na wamanjeuno womwe adapirira pomwe ambadzudziwa. Vimwivi vidamuthandiza kupitiriza kukhala na ntendere womwe Yesu adapolomisa ateweri wake.—Yoh. 14:27; 16:33.

13. Ko chani chomwe chingatithandize kupirira tikakhala kuti tinkuzondewa?

¹³ Chikondi chathu ni chikulu maninge kuposha chizondo. Yesu alibe kusiya kukonda Ababa wake mpakana kufa kwake. Iye ambakonda pomwe azishamwali wake. (Yoh. 13:1; 15:13) Tikambakonda maninge Yahova komasoti abale na alongo, tidzagonjese chizondo. Mwanjira yanyi? Kuti tiwone m’dawiro wake naboni tiwone chitsanzo cha Paulo.

14. Ko chani chomwe chidathandiza ntumi Paulo kupirira olo kuti ambadzudziwa?

¹⁴ Wandosala pang’ono kufa, Paulo adanembera shamwali wake Timoteyo kuti: “Mulungu alibe kutipasa mzimu wamantha, koma wamphanvu na wachikondi.” (2 Tim. 1:7) Ko iye ambatanthauza chani pakunena vimwivi? Paulo ambatanthauza kuti peno munthu akonda maninge Yahova, adzakwanise kulimbana na mabvuto yoshupa. (2 Tim. 1:8) Ndipo ndawa yakuti Paulo ambakonda Yahova, vidamuthandiza kukhala wokhulupirika ndipo adakwanisa kulimbana na mabvuto yoshupa maninge.—Mac. 20:22-24.

15. Ko abale na alongo awonesana tani chikondi ntsiku zathu zino? (Onani pomwe foto.)

¹⁵ Isepano tiwakonda maninge abale womwe ankupitiriza kukhala okhulupiririka olo kuti akubonera na chidzudzo. Abale anango aikha moyo wawo pangozi kuti athandize abale na alongo ninge momwe Akula na Purisika adaikhira moyo wawo pangozi kuti athandize Paulo. (Aro. 16:3, 4) Mwakulinganiza, ku Rússia abale azinji ayenda ku tiribunali kuti akalimbikise abale omwe ali mudjeri. Mulongo munango yemwe wenze mudjeri padawona abale azinji ali ku tiribunali, iye adakhala wokondwa maninge ndawa ya chikondi cha abale mwawa ndipo vidamulimbikisa maninge pa nthawe yomwe ambafunikira thandizo. Ndise wokondwa maninge kudziwa kuti chikondi chathu ni chikulu maninge kuposha chizondo.

16. Ndawa chani ntumi Petulo adanena kuti wale womwe ankudzudziwa ndawa yotumikira Yahova adzakhale okondwa? (1 Petulo 4:14)

¹⁶ Isepano tikudziwa kuti Yahova akhala okondwa maninge tikakhala kuti tinkupirira pa nthawe yomwe tikuzondewa. (Werengani 1 Petulo 4:14.) Ntumi Petulo adanena kuti wale womwe apirira akakhala kuti akudzudziwa ndawa yotumikira Yahova, anavifukwa vizinji vokhalira okondwa. Ndawa chani? Ndawa muyu ni umboni wakuti mzimu wa Mulungu “uli pa isepano.” Petulo ambadziwa bwino khalidwe mwiyi ya kupirira ndawa yakuti iye adagumanambo na mabvuto ninge mwaya. Patsogolo pa Pentekosite mu gole ya 33 Yesu wayenda kale kudzulu, wonyang’ania kachisi adatuma wanthu kuti akaphate Petulo na atumi anango omwe ambaphata basa yolalikira. Koma Petulo adapitiriza kukhala okhulupirika ndipo adapitiriza kukhala wolimba ntima. (Mac. 5:24-29) Olo kuti Petulo na anzake wale adamenyewa, iwo alibe kusiya kulalikira. M’malo mwa vimwivi, “iwo enze wokondwa ndawa Mulungu adawona kuti venze bwino kuti iwo adzudziwe ndawa ya dzina ya Yesu.” Isembo tingakhale okondwa tikakhala kuti tinkupirira tikambagumana na mabvuto.—Mac. 5:40-42.

17. Ko Yesu adawuza chani opfunzira wake ntsiku yakuti mangwana yake aphewe?

¹⁷ Usiku wakuti Yesu mangwana yake afe, adawuza opfunzira wake kuti: “Yemwe anikonda inepano, ababa wangu adzamukonde.” (Yoh. 14:21) Tinkudikhira mwachidwi ntsiku yomwe wanthu adzatikonde osati kutizonda pomwe tikutumikira Yahova. (2 Ates. 1:6-8) Pomwe tinkudikhira kuti vimwevi vidzachitike, tingambaganizire vinthu vomwe vitichitisa kukhala okondwa tikambadzudziwa.